1 Samuel 17 — Coptic (Sahidic)

1 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲥⲱⲟⲩϩ ⲉϩⲟⲩⲛ ⲉⲛⲉⲩⲡⲁⲣⲉⲙⲃⲟⲗⲏ ⲏ ⲛⲉⲩⲙⲡⲗⲁϩ ϩⲙⲡⲡⲟⲗⲉⲙⲟⲥ ⲁⲩⲱ ⲁⲩⲉⲓ ⲉϩⲣⲁⲓ ⲉⲁⲥⲥⲟⲭⲟⲑ ⲛⲧⲉⲧⲓⲇⲟⲩⲙⲁⲓⲁ ⲁⲩⲱ ϩⲛⲧⲙⲏⲧⲉ ⲛⲁⲥⲥⲟⲭⲱⲑ ⲁⲩⲱ ϩⲛⲧⲙⲏⲧⲉ ⲛⲁⲍⲏⲅⲁ ϩⲛⲥⲉⲫⲁⲣⲙⲉⲛ

2 ⲥⲁⲟⲩⲗ ⲇⲉ ⲙⲛⲛⲣⲱⲙⲉ ⲙⲡⲓⲥⲣⲁⲏⲗ ⲁⲩⲥⲱⲟⲩϩ ⲉϩⲟⲩⲛ ⲉⲡⲉⲓⲁ ⲛⲧⲟⲟⲩ ⲁⲩⲁϩⲉⲣⲁⲧⲟⲩ ⲉⲡⲡⲟⲗⲉⲙⲟⲥ ⲙⲡϩⲟⲧ ⲉⲃⲟⲗ ⲛⲛⲁⲗⲗⲟⲫⲩⲗⲟⲥ

3 ⲛⲁⲗⲗⲟⲫⲩⲗⲟⲥ ⲇⲉ ⲁⲩⲁϩⲉⲣⲁⲧⲟⲩ ϩⲓⲡⲓⲥⲁ ⲙⲡⲧⲟⲟⲩ ⲡⲓⲥⲣⲁⲏⲗ ⲇⲉ ⲁϥⲁϩⲉⲣⲁⲧϥ ϩⲓⲡⲓⲥⲁ ⲙⲡⲧⲟⲟⲩ ⲁⲩⲱ ⲡⲁⲩⲗⲱⲛ ⲉⲧⲉⲡⲉⲓⲁ ⲡⲉ ⲛⲉϥϩⲛⲧⲉⲩⲙⲏⲧⲉ

4 ⲁϥⲉⲓ ⲇⲉ ⲛϭⲓⲟⲩⲣⲱⲙⲉ ⲛⲁⲙⲉⲥⲥⲁⲓⲟⲥ ⲉⲩϫⲱⲱⲣⲉ ⲡⲉ ⲉⲃⲟⲗ ϩⲛⲛⲉⲙⲗⲁϩ ⲛⲛⲁⲗⲗⲟⲫⲩⲗⲟⲥ ⲉⲡⲉϥⲣⲁⲛ ⲡⲉ ⲅⲟⲗⲓⲁⲑ ⲉⲩⲉⲉⲃⲟⲗ ⲡⲉ ϩⲛⲅⲉⲑ ⲉⲣⲉⲧⲉϥϣⲓⲏ ⲛⲁⲣⲉϥⲧⲟⲟⲩ ⲙⲙⲁϩⲉ ⲙⲛⲟⲩⲉⲣⲧⲱ

5 ⲉⲣⲉⲟⲩⲡⲉⲣⲓⲕⲉⲫⲁⲗⲁⲓⲁ ϩⲓϫⲛⲧⲉϥⲁⲡⲉ ⲉⲣⲉⲟⲩϩⲱⲕ ⲛⲣⲉ ⲛϭⲓⲛϭⲉ ⲧⲟ ⲉϩⲓⲱⲱϥ ⲉⲣⲉⲡϣⲓ ⲙⲡⲉϥϩⲱⲕ ⲛⲁⲣⲟⲩϭⲓⲥ ⲧⲃⲁ ⲛⲥⲁⲧⲉⲉⲣⲉ ⲛϩⲟⲙⲛⲧ ϩⲓⲡⲉⲛⲓⲡⲉ

6 ⲁⲩⲱ ϩⲛⲥⲏϥⲉ ⲛϩⲟⲙⲛⲧ ⲛⲉⲩⲟⲧϩ ⲉⲣⲁⲧϥ ⲉⲣⲉⲟⲩϩⲟⲡⲗⲟⲛ ⲛⲣⲛϩⲟϥ ⲕⲏ ⲉϩⲣⲁⲓ ⲟⲩⲧⲉ ⲛⲉϥⲛⲁϩⲃⲉ

7 ⲧⲉϩⲧⲏ ⲇⲉ ⲙⲡⲉϥⲙⲉⲣⲉϩ ⲛⲉⲥⲟ ⲛⲧϩⲉ ⲛⲟⲩϩⲟ ⲛⲥⲱϩⲉ ⲁⲩⲱ ⲧⲉϥⲗⲟⲅⲭⲏ ⲛⲉⲥⲛⲁⲣⲥⲟⲟⲩ ⲛϣⲉ ⲛⲥⲁⲧⲉⲉⲣⲉ ⲛϩⲣⲏϣⲉ ⲙⲡⲉⲛⲓⲡⲉ ⲡⲉⲧϥⲓ ⲇⲉ ⲛⲛⲉϥϩⲟⲡⲗⲟⲛ ⲛⲉϥⲙⲟⲟϣⲉ ϩⲓϩⲏ ⲙⲙⲟϥ

8 ⲁⲩⲱ ⲅⲟⲗⲓⲁⲑ ⲁϥⲁϩⲉⲣⲁⲧϥ ⲁϥⲱϣ ⲉⲃⲟⲗ ⲉⲡⲙⲏⲏϣⲉ ⲙⲡⲓⲥⲣⲁⲏⲗ ⲉϥϫⲱ ⲙⲙⲟⲥ ⲛⲁⲩ ϫⲉⲉⲧⲃⲉⲟⲩ ⲧⲉⲧⲛⲛⲏⲩ ⲉⲃⲟⲗ ⲉⲁϩⲉⲣⲁⲧⲧⲏⲩⲧⲛ ⲉⲡⲡⲟⲗⲉⲙⲟⲥ ⲉⲙⲓϣⲉ ⲛⲙⲙⲁⲛ ⲙⲏ ⲁⲛⲟⲕ ⲁⲛⲅ ⲟⲩⲫⲩⲗⲉⲥⲧⲓⲁⲓⲟⲥ ⲁⲛ ⲛⲧⲱⲧⲛ ⲇⲉ ⲛⲧⲉⲧⲛⲛⲉϩⲉⲃⲣⲁⲓⲟⲥ ⲛϩⲙϩⲁⲗ ⲛⲥⲁⲟⲩⲗ ⲥⲱⲧⲡ ϭⲉ ⲛⲟⲩⲣⲱⲙⲉ ⲉⲃⲟⲗ ⲛϩⲏⲧⲧⲏⲩⲧⲛ ⲛϥⲉⲓ ⲉⲃⲟⲗ ⲛⲁⲓ

9 ⲁⲩⲱ ⲉϥϣⲁⲛϭⲙϭⲟⲙ ⲉⲙⲓϣⲉ ⲛⲙⲙⲁⲓ ⲛϥⲡⲁⲧⲁⲥⲥⲉⲓ ⲙⲙⲁⲓ ⲧⲛⲛⲁϣⲱⲡⲉ ⲛⲏⲧⲛ ⲛϩⲙϩⲁⲗ ⲁⲛⲟⲕ ⲇⲉ ⲉⲓϣⲁⲛϭⲙϭⲟⲙ ⲉⲣⲟϥ ⲛⲧⲁⲡⲁⲧⲁⲥⲥⲉⲓ ⲙⲙⲟϥ ⲧⲉⲧⲛⲛⲁϣⲱⲡⲉ ⲛⲁⲛ ⲛϩⲙϩⲁⲗ

10 ⲁⲩⲱ ⲡⲁⲗⲗⲟⲫⲩⲗⲟⲥ ⲡⲉϫⲁϥ ⲛⲁⲩ ϫⲉⲉⲓⲥϩⲏⲏⲧⲉ ⲡⲗⲁⲟⲥ ⲙⲡⲓⲥⲣⲁⲏⲗ ⲁⲓⲛⲉϭⲛⲟⲩϭϥ ⲙⲡϩⲟⲟⲩ ⲛϩⲟⲟⲩ ϫⲉⲛⲉϩⲟⲩⲣⲱⲙⲉ ⲛⲁⲓ ⲉⲃⲟⲗ ⲛⲧⲉⲛⲙⲓϣⲉ ⲙⲡⲉⲥⲛⲁⲩ ϩⲓⲟⲩⲥⲟⲡ

11 ⲁⲩⲱ ⲥⲁⲟⲩⲗ ⲙⲛⲡⲓⲥⲣⲁⲏⲗ ⲧⲏⲣϥ ⲁⲩⲥⲱⲧⲙ ⲉⲛⲉⲓϣⲁϫⲉ ⲛⲧⲉⲡⲁⲗⲗⲟⲫⲩⲗⲟⲥ ⲁⲩϣⲧⲟⲣⲧⲣ ⲁⲩⲣϩⲟⲧⲉ ⲉⲙⲁⲧⲉ

12 ⲇⲁⲩⲉⲓⲇ ⲇⲉ ⲡϣⲏⲣⲉ ⲛⲟⲩⲣⲱⲙⲉ ⲛⲉⲫⲣⲁⲑⲁⲓⲟⲥ ⲛⲧⲉⲃⲏⲑⲗⲉⲉⲙ ⲛⲧⲉⲓⲟⲩⲇⲁ ⲉⲡⲉϥⲣⲁⲛ ⲡⲉ ⲓⲥⲥⲁⲓ ⲉⲟⲩⲛⲧⲁϥ ⲙⲙⲁⲩ ⲛϣⲙⲟⲩⲛ ⲛϣⲏⲣⲉ ⲡⲣⲱⲙⲉ ⲇⲉ ⲉⲧⲙⲙⲁⲩ ϩⲛⲛⲉϩⲟⲟⲩ ⲛⲥⲁⲟⲩⲗ ⲛⲉⲩϩⲗⲗⲟ ⲡⲉ ⲉϥϩⲉⲛⲛⲉⲣⲙϩⲣⲁⲩ

13 ⲁⲩⲱ ϣⲟⲙⲛⲧ ⲛⲛⲟϭ ⲛϣⲏⲣⲉ ⲛⲧⲉⲉⲓⲥⲥⲁⲓ ⲁⲩⲃⲱⲕ ⲁⲩⲟⲩⲁϩⲟⲩ ⲛⲥⲁⲥⲁⲟⲩⲗ ⲉⲡⲡⲟⲗⲉⲙⲟⲥ ⲡⲣⲁⲛ ⲇⲉ ⲙⲡⲉϥϣⲟⲙⲛⲧ ⲛϣⲏⲣⲉ ⲛⲧⲁⲩⲃⲱⲕ ⲉⲃⲟⲗ ⲉⲡⲡⲟⲗⲉⲙⲟⲥ ⲉⲗⲓⲁⲃ ⲡⲉ ⲡϣⲣⲡⲙⲓⲥⲉ ⲁⲩⲱ ⲡⲙⲉϩⲥⲛⲁⲩ ⲡⲉ ⲁⲙⲓⲛⲁⲇⲁⲃ ⲡⲙⲉϩϣⲟⲙⲛⲧ ⲡⲉ ⲥⲁⲙⲙⲁⲁ

14 ⲇⲁⲩⲉⲓⲇ ⲇⲉ ⲡⲕⲟⲩⲓ ⲉⲣⲟⲟⲩ ⲡϣⲟⲙⲛⲧ ⲇⲉ ⲛⲛⲟϭ ⲛⲥⲟⲛ ⲁⲩⲃⲱⲕ ⲇⲉ ⲁⲩⲟⲩⲁϩⲟⲩ ⲛⲥⲁⲥⲁⲟⲩⲗ

15 ⲇⲁⲩⲉⲓⲇ ⲇⲉ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ⲛⲥⲁⲟⲩⲗ ⲁϥⲃⲱⲕ ⲁϥⲙⲟⲟⲛⲉ ⲛⲛⲉⲥⲟⲟⲩ ⲙⲡⲉϥⲉⲓⲱⲧ ϩⲣⲁⲓ ϩⲛⲃⲏⲑⲗⲉⲉⲙ

16 ⲡⲁⲗⲗⲟⲫⲩⲗⲟⲥ ⲇⲉ ⲛⲉϥⲃⲏⲕ ⲉⲣⲱⲟⲩ ⲙⲙⲏⲛⲉ ⲉϩⲧⲟⲟⲩⲉ ⲁⲩⲱ ⲉⲣⲟⲩϩⲉ ⲉⲁϥⲣϩⲙⲉ ⲛϩⲟⲟⲩ ϩⲓⲣⲱⲟⲩ

17 ⲁⲩⲱ ⲡⲉϫⲉⲓⲉⲥⲥⲁⲓ ⲛⲇⲁⲩⲉⲓⲇ ⲡⲉϥϣⲏⲣⲉ ϫⲉϫⲓ ⲙⲡⲉⲓϣⲓ ⲛⲛⲟⲉⲓⲧ ⲛⲛⲉⲕⲥⲛⲏⲩ ⲁⲩⲱ ⲡⲉⲓⲙⲏⲧ ⲛⲟⲉⲓⲕ ⲛⲅⲧⲱⲟⲩⲛ ⲛⲅⲡⲱⲧ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲉⲣⲁⲧⲟⲩ ⲛⲛⲉⲕⲥⲛⲏⲩ

18 ⲡⲉⲓⲙⲏⲧ ϩⲱⲱϥ ⲛⲟⲉⲓⲕ ⲛⲥⲁⲓⲣ ⲛⲅϫⲓⲧⲟⲩ ⲉϩⲟⲩⲛ ⲙⲡⲭⲓⲗⲓⲁⲣⲭⲟⲥ ⲛⲅⲛⲡⲟⲩⲱ ⲛⲛⲉⲕⲥⲛⲏⲩ ϩⲛⲟⲩⲉⲓⲣⲏⲛⲏ ⲛⲅⲛⲁⲩ ϫⲉⲉⲩϣⲁⲁⲧ ⲛⲟⲩⲛⲅⲉⲛⲡⲉⲩⲟⲩⲱ ⲛⲁⲓ

19 ⲁⲩⲱ ⲥⲁⲟⲩⲗ ⲛⲙⲙⲁⲩ ⲙⲛⲡⲓⲥⲣⲁⲏⲗ ⲧⲏⲣϥ ⲛⲉⲩϩⲛⲡⲉⲓⲁ ⲙⲡϣⲏⲛ ⲉⲧϫⲟⲥⲉ ⲉⲩⲙⲓϣⲉ ⲙⲛⲛⲁⲗⲗⲟⲫⲩⲗⲟⲥ

20 ⲇⲁⲩⲉⲓⲇ ⲇⲉ ⲁϥϣⲟⲣⲡϥ ⲉϩⲧⲟⲟⲩⲉ ⲁϥⲕⲁⲛⲉⲥⲟⲟⲩ ⲛⲧⲟⲟⲧⲟⲩ ⲛⲛⲉⲣⲉϥⲣⲟⲉⲓⲥ ⲁϥϫⲓ ⲛⲛⲉⲛⲕⲁ ⲁϥⲃⲱⲕ ⲕⲁⲧⲁⲧϩⲉ ⲛⲧⲁⲉⲓⲥⲥⲁⲓ ϩⲱⲛ ⲉⲧⲟⲟⲧϥ ⲁϥⲉⲓ ⲉϩⲣⲁⲓ ⲉⲧⲉⲥⲧⲣⲟⲅⲅⲩⲗⲱⲥⲓⲥ ⲉⲧⲉⲡⲙⲁ ⲡⲉ ⲉⲧⲟⲩⲉⲛϩⲏⲧϥ ⲁⲩⲱ ⲉⲣⲁⲧϥ ⲙⲡⲉⲙⲗⲁϩ ⲛⲉⲧⲃⲏⲕ ⲉⲃⲟⲗ ϩⲙⲡⲡⲟⲗⲉⲙⲟⲥ ⲁⲩⲧⲉⲕⲗⲟⲩⲗⲁⲓ ⲉⲃⲟⲗ ϩⲙⲡⲡⲟⲗⲉⲙⲟⲥ

21 ⲡⲓⲥⲣⲁⲏⲗ ⲙⲛⲛⲁⲗⲗⲟⲫⲩⲗⲟⲥ ⲁⲩⲁϩⲉⲣⲁⲧⲟⲩ ⲉⲙⲓϣⲉ ⲙⲛⲛⲉⲩⲉⲣⲏⲩ

22 ⲇⲁⲩⲉⲓⲇ ⲇⲉ ⲁϥⲕⲁⲛⲉϥⲥⲕⲉⲩⲏ ϩⲁⲧⲙ ⲡⲉⲧϩⲁⲣⲉϩ ⲉⲛⲉⲥⲕⲉⲩⲏ ⲁϥⲡⲱⲧ ⲉⲃⲟⲗ ⲉⲧⲡⲁⲣⲉⲙⲃⲟⲗⲏ ⲁϥⲡⲱϩ ⲉⲛⲉϥⲥⲛⲏⲩ ⲁϥϫⲛⲟⲩⲟⲩ ⲉⲡⲉⲩⲟⲩⲱ ϩⲛⲟⲩⲉⲓⲣⲏⲛⲏ

23 ⲛⲧⲟϥ ⲇⲉ ⲉϥϣⲁϫⲉ ⲛⲙⲙⲁⲩ ⲉⲓⲥ ⲡⲣⲱⲙⲉ ⲛⲁⲙⲉⲥⲥⲁⲓⲟⲥ ⲁϥⲉⲓ ⲉⲃⲟⲗ ⲡⲉⲫⲓⲗⲓⲥⲧⲓⲁⲓⲟⲥ ⲉⲡⲉϥⲣⲁⲛ ⲡⲉ ⲅⲟⲗⲓⲁⲑ ⲉⲃⲟⲗ ϩⲛⲅⲉⲑ ⲉϥⲏⲡ ⲉⲛⲉⲙⲗⲁϩ ⲛⲛⲁⲗⲗⲟⲫⲩⲗⲟⲥ ⲁϥϣⲁϫⲉ ⲉϩⲟⲩⲛ ⲉⲣⲟⲟⲩ ⲕⲁⲧⲁⲛⲉⲓϣⲁϫⲉ ⲁⲩⲱ ⲁϥⲥⲱⲧⲙ ⲛϭⲓⲥⲁⲟⲩⲗ

24 ⲙⲛⲛⲉⲣⲱⲙⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲱ ⲛⲧⲉⲣⲟⲩⲛⲁⲩ ⲉⲡⲣⲱⲙⲉ ⲁⲩⲡⲱⲧ ϩⲁⲡⲉϥϩⲟ ⲁⲩⲣϩⲟⲧⲉ ⲉⲙⲁⲧⲉ

25 ⲡⲉϫⲉⲛⲣⲱⲙⲉ ⲙⲡⲓⲥⲣⲁⲏⲗ ⲛⲛⲉⲩⲉⲣⲏⲩ ϫⲉⲉⲛⲉⲁⲧⲉⲧⲛⲛⲁⲩ ⲉⲡⲣⲱⲙⲉ ⲡⲁⲓ ⲛⲧⲁϥⲉⲓ ⲉϩⲣⲁⲓ ⲉⲣⲱⲛ ϫⲉⲛⲧⲁϥⲉⲓ ⲉϩⲣⲁⲓ ⲉϫⲙⲡⲓⲥⲣⲁⲏⲗ ⲡⲣⲱⲙⲉ ϭⲉ ⲉⲧⲛⲁⲃⲱⲕ ⲉⲃⲟⲗ ⲛϥⲡⲁⲧⲁⲥⲥⲉⲓ ⲙⲙⲟϥ ⲡⲣⲣⲟ ⲛⲁⲁⲁϥ ⲛⲣⲙⲙⲁⲟ ϩⲛⲟⲩⲛⲟϭ ⲙⲙⲛⲧⲣⲙⲙⲁⲟ ⲁⲩⲱ ⲧⲉϥϣⲉⲉⲣⲉ ⲉϥⲛⲁⲧⲁⲁⲥ ⲛⲁϥ ⲛⲥϩⲓⲙⲉ ⲁⲩⲱ ⲡⲏⲓ ⲧⲏⲣϥ ⲙⲡⲉϥⲉⲓⲱⲧ ϥⲛⲁⲕⲁⲁϥ ⲉⲃⲟⲗ ⲛⲣⲉⲙϩⲉ ϩⲙⲡⲓⲥⲣⲁⲏⲗ

26 ⲡⲉϫⲉⲇⲁⲩⲉⲓⲇ ⲛⲛⲣⲱⲙⲉ ⲉⲧⲁϩⲉⲣⲁⲧⲟⲩ ⲛⲙⲙⲁϥ ⲉϥϫⲱ ⲙⲙⲟⲥ ⲛⲁⲩ ϫⲉⲟⲩ ⲡⲉ ⲡϩⲱⲃ ⲉⲧⲟⲩⲛⲁⲁⲁϥ ⲙⲡⲣⲱⲙⲉ ⲡⲉⲧⲛⲁⲡⲁⲧⲁⲥⲥⲉⲓ ⲙⲡⲁⲗⲗⲟⲫⲩⲗⲟⲥ ⲉⲧⲙⲙⲁⲩ ⲛϥϥⲓ ⲙⲙⲁⲩ ⲛⲟⲩⲛⲟϭⲛⲉϭ ⲉⲃⲟⲗ ϩⲙⲡⲓⲥⲣⲁⲏⲗ ϫⲉⲟⲩⲣⲱⲙⲉ ⲡⲉ ⲡⲉⲓⲁⲗⲗⲟⲫⲩⲗⲟⲥ ⲛⲁⲧⲥⲃⲃⲉ ⲡⲁⲓ ⲛⲧⲁϥⲛⲟϭⲛⲉϭ ⲙⲡⲙⲏⲏϣⲉ ⲙⲡⲛⲟⲩⲧⲉ ⲉⲧⲟⲛϩ

27 ⲁⲩⲱ ⲡⲗⲁⲟⲥ ⲁϥϣⲁϫⲉ ⲛⲙⲙⲁϥ ⲕⲁⲧⲁⲡⲉⲓϣⲁϫⲉ ⲉϥϫⲱ ⲙⲙⲟⲥ ϫⲉⲧⲁⲓ ⲧⲉ ⲧϩⲉ ⲉⲧⲟⲩⲛⲁⲁⲁⲥ ⲙⲡⲣⲱⲙⲉ ⲡⲉⲧⲛⲁⲡⲁⲧⲁⲥⲥⲉⲓ ⲙⲡⲉⲓⲁⲗⲗⲟⲫⲩⲗⲟⲥ

28 ⲁⲩⲱ ⲉⲗⲓⲁⲃ ⲡⲉϥⲛⲟϭ ⲛⲥⲟⲛ ⲁϥⲥⲱⲧⲙ ⲉⲣⲟϥ ⲉϥϣⲁϫⲉ ⲙⲛⲛⲣⲱⲙⲉ ⲉⲗⲓⲁⲃ ⲁϥⲛⲟⲩϭⲥ ϩⲛⲟⲩϭⲱⲛⲧ ⲉⲇⲁⲩⲉⲓⲇ ⲡⲉϫⲁϥ ⲉϩⲟⲩⲛ ⲉϩⲣⲁϥ ϫⲉⲉⲧⲃⲉⲟⲩ ⲁⲕⲉⲓ ⲉϩⲣⲁⲓ ⲉⲡⲉⲓⲙⲁ ⲁⲩⲱ ⲛⲧⲁⲕⲕⲁⲛⲉⲥⲟⲟⲩ ⲕⲟⲩⲓ ⲛⲧⲉⲛⲓⲙ ϩⲛⲧⲉⲣⲏⲙⲟⲥ ⲁⲛⲟⲕ ϯⲥⲟⲟⲩⲛ ⲛⲧⲉⲕⲙⲛⲧϫⲁⲥⲓϩⲏⲧ ⲁⲩⲱ ⲧⲕⲁⲕⲓⲁ ⲙⲡⲉⲕϩⲏⲧ ϫⲉⲛⲧⲁⲕⲉⲓ ⲉⲡⲡⲟⲗⲉⲙⲟⲥ ⲉⲛⲁⲩ ⲉⲣⲟϥ

29 ⲇⲁⲩⲉⲓⲇ ⲇⲉ ⲡⲉϫⲁϥ ⲛⲁϥ ϫⲉⲛⲧⲁⲓⲣⲣⲟⲩ ⲛⲛⲟⲃⲉ ⲙⲏ ⲛⲟⲩϣⲁϫⲉ ⲁⲛ ⲡⲉ ⲛⲧⲁⲓϫⲟⲟϥ

30 ⲁϥⲕⲧⲟϥ ⲇⲉ ⲉⲃⲟⲗ ⲙⲙⲟϥ ⲁⲩⲱ ⲁϥⲉⲓ ⲉⲣⲁⲧϥ ⲛⲕⲉⲣⲱⲙⲉ ⲁϥϣⲁϫⲉ ⲕⲁⲧⲁⲡⲉⲓϣⲁϫⲉ ⲁⲩⲱ ⲡⲗⲁⲟⲥ ⲁϥⲣⲟⲩⲱ ϩⲁⲣⲱϥ ⲕⲁⲧⲁⲧⲙⲓⲛⲉ ⲙⲡϣⲟⲣⲡ ⲛϣⲁϫⲉ

31 ⲛϣⲁϫⲉ ⲇⲉ ⲛⲧⲁⲇⲁⲩⲉⲓⲇ ϫⲟⲟⲩ ⲁⲩϯⲥⲟⲉⲓⲧ ⲁⲩⲱ ⲁⲩⲧⲁⲩⲟⲟⲩ ⲙⲡⲉⲙⲧⲟ ⲉⲃⲟⲗ ⲛⲥⲁⲟⲩⲗ ⲥⲁⲟⲩⲗ ⲇⲉ ⲁϥϫⲓⲧϥ ⲉϩⲟⲩⲛ ⲛⲁϥ

32 ⲁⲩⲱ ⲇⲁⲩⲉⲓⲇ ⲡⲉϫⲁϥ ϩⲓⲧϩⲏ ⲛⲥⲁⲟⲩⲗ ϫⲉⲙⲡⲉⲣⲧⲣⲉⲡϩⲏⲧ ⲙⲡⲁϫⲟⲉⲓⲥ ⲟⲩⲱⲗⲥ ⲉⲣⲟϥ ⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ϥⲛⲁⲃⲱⲕ ⲛϥⲡⲟⲗⲉⲙⲉⲓ ⲙⲛⲡⲉⲓⲁⲗⲗⲟⲫⲩⲗⲟⲥ

33 ⲡⲉϫⲉⲥⲁⲟⲩⲗ ⲉϩⲟⲩⲛ ϩⲛⲇⲁⲩⲉⲓⲇ ϫⲉⲛⲅⲛⲁϣϭⲙϭⲟⲙ ⲁⲛ ⲉⲃⲱⲕ ⲉⲙⲓϣⲉ ⲙⲛⲡⲉⲓⲁⲗⲗⲟⲫⲩⲗⲟⲥ ϫⲉⲛⲧⲕ ⲟⲩϣⲏⲣⲉ ϣⲏⲙ ⲛⲧⲟⲕ ⲡⲁⲓ ⲇⲉ ⲟⲩⲣⲱⲙⲉ ⲡⲉ ⲛⲣⲉϥⲙⲓϣⲉ ⲛϫⲓⲛ ⲧⲉϥⲙⲛⲧⲕⲟⲩⲓ

34 ⲇⲁⲩⲉⲓⲇ ⲇⲉ ⲡⲉϫⲁϥ ⲛⲥⲁⲟⲩⲗ ϫⲉⲁⲛⲟⲕ ⲡⲉⲕϩⲙϩⲁⲗ ⲛⲉⲓⲙⲟⲟⲛⲉ ⲛⲛⲉⲥⲟⲟⲩ ⲙⲡⲁⲉⲓⲱⲧ ⲁⲩⲱ ⲉⲣϣⲁⲛⲡⲙⲟⲩⲓ ⲙⲛⲧⲁⲣⲝ ⲉⲓ ⲛⲧⲉⲣⲱϥ ϫⲓⲟⲩⲉⲥⲟⲟⲩ ⲛϩⲏⲧⲟⲩ

35 ϣⲁⲓⲁⲛⲅⲧ ⲉⲃⲟⲗ ⲉⲡⲁϩⲟⲩ ⲙⲙⲟϥ ⲛⲧⲁⲣⲁϩⲧⲡⲙⲟⲩⲓ ⲛⲧⲁϥⲉⲓ ⲉⲃⲟⲗ ϩⲛⲧⲉϥⲧⲁⲡⲣⲟ ⲙⲡⲉⲛⲧⲁⲡⲙⲟⲩⲓ ⲧⲟⲣⲡϥ ⲉϥϣⲁⲛⲕⲧⲟϥ ⲇⲉ ⲉⲣⲟⲓ ϣⲁⲓⲙⲉϩⲧⲟⲟⲧ ϩⲛⲧⲉϥϣⲟⲩⲱⲃⲉ ⲛⲧⲁⲁⲁϥ ⲛϭⲱⲃ ⲛⲧⲁⲙⲟⲟⲩⲧϥ

36 ⲡⲙⲟⲩⲓ ϭⲉ ⲙⲛⲧⲁⲣⲝ ⲡⲉⲕϩⲙϩⲁⲗ ⲁϥⲡⲁⲧⲁⲥⲥⲉⲓ ⲙⲙⲟⲟⲩ ⲡⲉⲓⲁⲗⲗⲟⲫⲩⲗⲟⲥ ⲇⲉ ϩⲱⲱϥ ⲛⲁⲧⲥⲃⲃⲉ ⲛⲁⲣⲧϩⲉ ⲛⲟⲩⲁ ⲛⲛⲁⲓ ϯⲛⲁⲃⲱⲕ ϭⲉ ⲟⲛ ⲉⲃⲟⲗ ⲉⲣⲟϥ ⲛⲧⲁⲡⲁⲧⲁⲥⲥⲉⲓ ⲙⲙⲟϥ ⲛⲧⲁϥⲉⲓ ⲛⲧⲉϥⲁⲡⲉ ⲛⲧⲁϥⲉⲓ ⲙⲡϩⲟⲟⲩ ⲛⲟⲩⲛⲟϭⲛⲉϭ ⲉⲃⲟⲗ ϩⲙⲡⲓⲥⲣⲁⲏⲗ ϫⲉⲟⲩ ϩⲱⲱϥ ⲡⲉ ⲡⲉⲓⲁⲧⲥⲃⲃⲉ ⲉⲁϥⲛⲟϭⲛⲉϭ ⲙⲡⲙⲏⲏϣⲉ ⲙⲡⲛⲟⲩⲧⲉ ⲉⲧⲟⲛϩ

37 ⲁⲩⲱ ⲇⲁⲩⲉⲓⲇ ⲡⲉϫⲁϥ ϩⲓⲛⲁⲓ ϫⲉⲡϫⲟⲉⲓⲥ ⲡⲉ ⲛⲧⲁϥⲛⲁϩⲙⲉⲧ ⲉⲧⲧⲁⲡⲣⲟ ⲙⲡⲙⲟⲩⲓ ⲁⲩⲱ ⲛⲧⲟⲟⲧϥ ⲛⲧⲁⲣⲝ ⲛⲧⲟϥ ⲟⲛ ⲡⲉⲧⲛⲁⲛⲁϩⲙⲉⲧ ⲛⲧⲟⲟⲧϥ ⲙⲡⲉⲓⲁⲗⲗⲟⲫⲩⲗⲟⲥ ⲛⲁⲧⲥⲃⲃⲉ ⲁⲩⲱ ⲥⲁⲟⲩⲗ ⲡⲉϫⲁϥ ⲛⲇⲁⲩⲉⲓⲇ ϫⲉⲃⲱⲕ ⲉⲃⲟⲗ ⲉⲣⲟϥ ⲁⲩⲱ ⲉⲣⲉⲡϫⲟⲉⲓⲥ ϣⲱⲡⲉ ⲛⲙⲙⲁⲕ

38 ⲥⲁⲟⲩⲗ ⲇⲉ ⲁϥϯϩⲓⲱⲱϥ ⲛⲇⲁⲩⲉⲓⲇ ⲛⲟⲩϣⲧⲏⲛ ⲛⲣⲃⲧ ⲁⲩⲱ ⲟⲩⲡⲉⲣⲓⲕⲉⲫⲁⲗⲁⲓⲁ ⲛϩⲟⲙⲛⲧ ⲁϥⲧⲁⲁⲥ ⲉϫⲛⲧⲉϥⲁⲡⲉ

39 ⲁⲩⲱ ⲁϥϯϩⲓⲱⲱϥ ⲛⲟⲩϩⲱⲕ ⲁⲩⲱ ⲧⲉϥⲥⲏϥⲉ ⲁϥⲙⲟⲣⲥ ⲉϫⲛⲡϩⲱⲕ ⲛⲇⲁⲩⲉⲓⲇ ⲁϥϫⲱⲣⲁϩ ⲇⲉ ⲛϭⲓⲇⲁⲩⲉⲓⲇ ⲛⲧⲉⲣⲉϥϫⲱⲛⲧ ⲉⲙⲟⲟϣⲉ ⲛϩⲏⲧⲟⲩ ϫⲉⲛⲉϥϫⲟⲛⲧ ⲁⲛ ⲙⲙⲟⲟⲩ ⲁⲩⲱ ⲛⲧⲉⲣⲉϥⲙⲟⲟϣⲉ ⲛϩⲏⲧⲟⲩ ⲛⲟⲩⲥⲟⲡ ⲁⲩⲱ ⲥⲛⲁⲩ ⲁϥϩⲓⲥⲉ ⲡⲉϫⲉⲇⲁⲩⲉⲓⲇ ⲛⲥⲁⲟⲩⲗ ϫⲉⲛϯⲛⲁϣⲙⲟⲟϣⲉ ⲁⲛ ⲉⲣⲉⲛⲁⲓ ϩⲓⲱⲱⲧ ϫⲉⲛϯⲧⲏⲏⲡ ⲁⲛ ⲉⲣⲟⲟⲩ ⲇⲁⲩⲉⲓⲇ ⲇⲉ ⲁϥⲕⲁⲁϥ ⲕⲁϩⲏⲩ ⲙⲙⲟⲟⲩ

40 ⲁϥϫⲓ ⲙⲡⲉϥϭⲉⲣⲱⲃ ⲉϩⲣⲁⲓ ⲉⲛⲉϥϭⲓϫ ⲁⲩⲱ ⲁϥⲥⲱⲧⲡ ⲛⲁϥ ⲛϯⲟⲩ ⲛⲱⲛⲉ ϩⲙⲡⲉⲓⲁ ⲉⲩⲟⲩⲟϫ ⲁϥⲕⲁⲁⲩ ⲉϩⲣⲁⲓ ϩⲙⲡⲉϥϫⲓⲗⲗⲏⲥ ⲉϣⲁϥⲙⲟⲟⲛⲉ ⲛϩⲏⲧϥ ⲉϥϣⲟⲟⲡ ⲛⲁϥ ⲉⲣⲉⲧⲉϥⲥⲫⲉⲛⲇⲟⲛⲏ ϩⲛⲧⲉϥϭⲓϫ ⲁϥⲙⲟⲟϣⲉ ⲉⲃⲟⲗ ⲉⲡⲁⲗⲗⲟⲫⲩⲗⲟⲥ

41 ⲡⲁⲗⲗⲟⲫⲩⲗⲟⲥ ϩⲱⲱϥ ⲁϥⲙⲟⲟϣⲉ ⲉϩⲟⲩⲛ ⲉⲇⲁⲩⲉⲓⲇ ⲉϥϣⲟⲩϣⲟⲩ ⲙⲙⲟϥ ⲉⲣⲉⲡⲉⲧϥⲓ ⲙⲡⲉϥⲑⲩⲣⲱⲛ ϩⲓϩⲏ ⲙⲙⲟϥ

42 ⲡⲁⲗⲗⲟⲫⲩⲗⲟⲥ ⲇⲉ ⲁϥϭⲱϣⲧ ⲁϥⲛⲁⲩ ⲉⲇⲁⲩⲉⲓⲇ ⲁϥⲕⲱⲙϣ ⲛⲥⲱϥ ϫⲉⲛⲉⲩϣⲏⲣⲉ ϣⲏⲙ ⲡⲉ ⲉϥⲟ ⲙⲙⲣϣ ⲛⲥⲁⲉⲓⲉⲃⲁⲗ ⲉⲣⲟϥ

43 ⲁⲩⲱ ⲡⲁⲗⲗⲟⲫⲩⲗⲟⲥ ⲡⲉϫⲁϥ ⲉϩⲟⲩⲛ ϩⲛⲇⲁⲩⲉⲓⲇ ϫⲉⲉⲓⲟ ⲁⲛⲟⲕ ⲛⲧϩⲉ ⲛⲟⲩⲟⲩϩⲟⲣ ϫⲉⲛⲧⲟⲕ ⲉⲕⲛⲏⲩ ⲉⲃⲟⲗ ⲉⲣⲟϥ ϩⲛⲟⲩϭⲉⲣⲱⲃ ⲙⲛϩⲉⲛⲱⲛⲉ ⲡⲉϫⲉⲇⲁⲩⲉⲓⲇ ⲛⲁϥ ϫⲉⲁⲣⲏⲩ ⲕϩⲟⲟⲩ ⲉⲡⲉⲩϩⲟⲣ ⲁⲩⲱ ⲡⲁⲗⲗⲟⲫⲩⲗⲟⲥ ⲁϥⲥⲁϩⲟⲩ ⲛⲇⲁⲩⲉⲓⲇ ϩⲛⲛⲉϥⲛⲟⲩⲧⲉ

44 ⲉⲣⲉⲡⲁⲗⲗⲟⲫⲩⲗⲟⲥ ϫⲱ ⲙⲙⲟⲥ ⲉⲣⲟϥ ϫⲉⲁⲙⲟⲩ ⲛⲁⲓ ⲛⲧⲁϯ ⲛⲛⲉⲕⲁⲃⲟⲩⲓ ⲛⲛⲉϩⲁⲗⲁⲧⲉ ⲛⲧⲡⲉ ⲁⲩⲱ ⲛⲛⲉⲑⲏⲣⲓⲟⲛ ⲙⲡⲕⲁϩ

45 ⲇⲁⲩⲉⲓⲇ ⲇⲉ ⲡⲉϫⲁϥ ⲉϩⲟⲩⲛ ϩⲙⲡⲁⲗⲗⲟⲫⲩⲗⲟⲥ ϫⲉⲛⲧⲟⲕ ⲉⲕⲛⲁⲉⲓ ⲛⲁⲓ ϩⲛⲟⲩⲥⲏϥⲉ ⲙⲛⲟⲩⲙⲉⲣⲉϩ ⲙⲛⲟⲩϩⲟⲡⲗⲟⲛ ⲁⲛⲟⲕ ⲇⲉ ⲉⲓⲛⲏⲩ ⲉϩⲟⲩⲛ ⲉⲣⲟⲕ ϩⲙⲡⲣⲁⲛ ⲙⲡϫⲟⲉⲓⲥ ⲥⲁⲃⲃⲁⲱⲑ ⲡⲛⲟⲩⲧⲉ ⲙⲡⲙⲏⲏϣⲉ ⲙⲡⲓⲥⲣⲁⲏⲗ ⲡⲁⲓ ⲛⲧⲁⲕⲛⲉϭⲛⲟⲩϭϥ ⲙⲡϩⲟⲟⲩ

46 ⲁⲩⲱ ⲡϫⲟⲉⲓⲥ ⲛⲁⲧⲁⲁⲕ ⲙⲡϩⲟⲟⲩ ⲉϩⲣⲁⲓ ⲉⲛⲁϭⲓϫ ⲛϥⲧⲣⲁϩⲟⲧⲃⲉⲕ ⲛⲧⲁϥⲓ ⲙⲙⲁⲩ ⲛⲧⲉⲕⲁⲡⲉ ⲛⲧⲁϯ ⲛⲛⲉⲕϣⲁⲩ ⲁⲩⲱ ⲛϣⲁⲩ ⲛⲧⲡⲁⲣⲉⲙⲃⲟⲗⲏ ⲛⲛⲁⲗⲗⲟⲫⲩⲗⲟⲥ ϩⲙⲡϩⲟⲟⲩ ⲛϩⲟⲟⲩ ⲛⲛⲉϩⲁⲗⲁⲧⲉ ⲛⲧⲡⲉ ⲙⲛⲛⲉⲑⲏⲣⲓⲟⲛ ⲙⲡⲕⲁϩ ⲛⲧⲉⲡⲕⲁϩ ⲧⲏⲣϥ ⲉⲓⲙⲉ ϫⲉⲡⲛⲟⲩⲧⲉ ϣⲟⲟⲡ ϩⲙⲡⲓⲥⲣⲁⲏⲗ

47 ⲁⲩⲱ ⲧⲉⲓⲥⲟⲟⲩϩⲥ ⲧⲏⲣⲥ ⲛⲁⲉⲓⲙⲉ ϫⲉⲛⲉⲣⲉⲡϫⲟⲉⲓⲥ ⲛⲁⲧⲟⲩϫⲉⲡⲣⲱⲙⲉ ⲁⲛ ϩⲛⲟⲩⲥⲏϥⲉ ⲟⲩⲇⲉ ϩⲛⲟⲩⲙⲉⲣⲉϩ ϫⲉⲡⲡⲟⲗⲉⲙⲟⲥ ⲣⲱ ⲡⲁⲡϫⲟⲉⲓⲥ ⲡⲉ ⲁⲩⲱ ϥⲛⲁⲡⲁⲣⲁⲇⲓⲇⲟⲩ ⲙⲙⲱⲧⲛ ⲉϩⲣⲁⲓ ⲉⲧⲟⲟⲧⲛ

48 ⲡⲁⲗⲗⲟⲫⲩⲗⲟⲥ ⲇⲉ ⲁϥⲧⲱⲟⲩⲛ ⲁϥⲙⲟⲟϣⲉ ⲉϩⲟⲩⲛ ⲉⲇⲁⲩⲉⲓⲇ ⲁⲩⲱ ⲇⲁⲩⲉⲓⲇ ⲁϥⲁⲛⲅϥ ⲉϩⲣⲁⲓ ⲁϥⲉⲓ ⲉⲧⲙⲏⲧⲉ ⲙⲡⲉⲙⲗⲁϩ ⲁϥⲙⲟⲟϣⲉ ⲉϩⲟⲩⲛ ⲉⲡⲁⲗⲗⲟⲫⲩⲗⲟⲥ

49 ⲇⲁⲩⲉⲓⲇ ⲇⲉ ⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲉϩⲣⲁⲓ ⲉⲡⲉϥϫⲓⲗⲗⲏⲥ ⲁϥϥⲓ ⲛϩⲏⲧϥ ⲛⲟⲩⲱⲛⲉ ⲛⲟⲩⲱⲧ ⲁϥⲕⲁⲁϥ ϩⲛⲧⲉϥⲥⲫⲉⲛⲇⲟⲛⲏ ⲁϥϩⲣⲟⲩⲱⲣϥ ⲉⲃⲟⲗ ⲉⲡⲁⲗⲗⲟⲫⲩⲗⲟⲥ ⲁϥⲣⲁϩⲧϥ ⲉϩⲟⲩⲛ ⲉⲧⲉϥⲧⲉϩⲛⲉ ⲡⲱⲛⲉ ⲇⲉ ⲁϥϫⲉⲧⲧⲡⲉⲣⲓⲕⲉⲫⲁⲗⲁⲓⲁ ⲉϩⲟⲩⲛ ϩⲛⲧⲉϥⲧⲉϩⲛⲉ ⲁϥϩⲉ ⲉⲡⲉⲥⲏⲧ ϩⲓϫⲙⲡⲉϥϩⲟ

50 ⲇⲁⲩⲉⲓⲇ ⲇⲉ ⲁϥϫⲣⲟ ⲉⲡⲁⲗⲗⲟⲫⲩⲗⲟⲥ ϩⲛⲧⲉϥⲥⲫⲉⲛⲇⲟⲛⲏ ⲁⲩⲱ ϩⲙⲡⲉϥⲱⲛⲉ ⲁϥⲣⲡⲁⲗⲗⲟⲫⲩⲗⲟⲥ ⲛϭⲱⲃ ⲁϥⲙⲟⲟⲩⲧϥ ⲛⲉⲙⲛⲥⲏϥⲉ ⲇⲉ ⲛⲧⲟⲟⲧϥ ⲛⲇⲁⲩⲉⲓⲇ

51 ⲁϥϯ ⲙⲡⲉϥⲟⲩⲟⲓ ⲁϥⲁϩⲉⲣⲁⲧϥ ⲉϫⲙⲡⲁⲗⲗⲟⲫⲩⲗⲟⲥ ⲁϥⲁⲙⲁϩⲧⲉ ⲛⲧⲉϥⲥⲏϥⲉ ⲁϥⲧⲟⲕⲙⲉⲥ ⲉⲃⲟⲗ ϩⲙⲡⲉⲥⲕⲟⲉⲓϩ ⲁϥⲙⲟⲟⲩⲧϥ ⲁϥⲥⲉⲗⲉⲡⲧⲉϥⲁⲡⲉ ⲛϩⲏⲧⲥ ⲛⲁⲗⲗⲟⲫⲩⲗⲟⲥ ⲇⲉ ⲛⲧⲉⲣⲟⲩⲛⲁⲩ ϫⲉⲁⲡⲉⲩⲗⲉⲙⲏⲏϣⲉ ⲙⲟⲩ ⲁⲩϯϩⲣⲟⲟⲩ ⲉⲃⲟⲗ ⲁⲩⲡⲱⲧ

52 ⲛⲣⲱⲙⲉ ⲇⲉ ⲙⲡⲓⲥⲣⲁⲏⲗ ⲁⲩⲧⲱⲟⲩⲛ ⲙⲛⲛⲣⲱⲙⲉ ⲛⲓⲟⲩⲇⲁ ⲁⲩⲛⲉϫⲗⲟⲩⲗⲁⲓ ⲉⲃⲟⲗ ⲁⲩⲡⲱⲧ ⲛⲥⲁⲛⲁⲗⲗⲟⲫⲩⲗⲟⲥ ϣⲁⲧⲉϩⲓⲏ ⲛⲃⲱⲕ ⲉϩⲟⲩⲛ ⲉⲅⲉⲑ ⲉⲩⲛⲁⲧⲁⲁⲩ ⲉϩⲟⲩⲛ ⲉⲣⲟⲥ ⲁⲩⲱ ϣⲁⲙⲡⲩⲗⲏ ⲛⲁⲥⲕⲁⲗⲱⲛ ⲁⲩϩⲉ ⲛϭⲓⲛϩⲁⲧⲃⲉⲥ ⲛⲛⲁⲗⲗⲟⲫⲩⲗⲟⲥ ϩⲛⲧⲉϩⲓⲏ ⲛⲛⲉⲡⲩⲗⲏ ϣⲁⲉϩⲣⲁⲓ ⲉⲅⲉⲑ ⲁⲩⲱ ϣⲁⲉϩⲣⲁⲓ ⲉⲁⲕⲕⲁⲣⲱⲛ

53 ⲛⲣⲱⲙⲉ ⲇⲉ ⲙⲡⲓⲥⲣⲁⲏⲗ ⲁⲩⲕⲧⲟⲟⲩ ⲉⲃⲟⲗ ϩⲛⲛⲁⲗⲗⲟⲫⲩⲗⲟⲥ ⲁⲩⲧⲁⲁⲩ ⲉϩⲣⲁⲓ ⲉⲛⲉⲩⲡⲁⲣⲉⲙⲃⲟⲗⲏ ⲁⲩϣⲱⲗ ⲙⲙⲟⲟⲩ

54 ⲁⲩⲱ ⲇⲁⲩⲉⲓⲇ ⲁϥϫⲓ ⲛⲧⲁⲡⲉ ⲙⲡⲁⲗⲗⲟⲫⲩⲗⲟⲥ ⲁϥⲛⲧⲥ ⲉϩⲣⲁⲓ ⲉⲧϩⲓⲉⲣⲟⲩⲥⲁⲗⲏⲙ ⲁⲩⲱ ⲛⲉϥⲥⲕⲉⲩⲏ ⲁϥⲕⲁⲁⲩ ⲉϩⲣⲁⲓ ϩⲛⲧⲉⲥⲕⲩⲛⲏ