Read 1 Maccabees 8 side by side with translations · The Final Bible
1 ܘܫܡܥ ܝܗܘܕܐ ܫܡܥܗܘܢ ܕܒ̈ܢܝ ܪܗܘܡܐ ܕܥܫܝܢܝܢ ܒܚܝܠܐ ܘܡܨܛܒܝܢ ܒܟܠ ܐܝܠܝܢ ܕܡܬܢܩܦܝܢ ܠܗܘܢ ܘܠܟܠ ܡܢܘ ܕܡܬܩܪܒ ܠܘܬܗܘܢ ܡܩܝܡܝܢ ܥܡܗ ܪܚܡܘܬܐ
2 ܘܐܫܬܥܝܘ ܠܗ ܥܠ ܓܢܒܪܘܬܗܘܢ ܘܩܪ̈ܒܝܗܘܢ ܕܥܒܕܘ ܒܓ̈ܠܛܝܐ ܘܐܬܥܫܢܘ ܥܠܝܗܘܢ ܘܕܥܒܕܘ ܐܢܘܢ ܕܢܗܘܘܢ ܠܗܘܢ ܡܣ̈ܩܝ ܡܕܐܬܐ
3 ܘܟܠܡܕܡ ܬܘܒ ܕܥܒܕܘ ܒܐܪܥܐ ܕܐܣܦܢܝܐ ܘܕܐܚܕܘ ܡܐܛܠ̣ܐ ܕܕܗܒܐ ܘܕܣܐܡܐ ܕܐܝܬ ܬܡܢ
4 ܘܕܐܚܕܘ ܒܡ̈ܠܟܝܗܘܢ ܘܒܢܓܝܪܘܬ ܪܘܚܗܘܢ ܟܠ ܐܬܪ ܐܬܪܐ ܕܝܢ ܪܚܝܩ ܗܘܐ ܡܢܗܘܢ ܣܓܝ ܘܕܐܝܟܢܐ ܬܘܒ ܫܚܩܘ ܠܡ̈ܠܟܐ ܕܐܬܘ ܥܠܝܗܘܢ ܡܢ ܣܘ̈ܦܝܗ ܕܐܪܥܐ ܘܡܚܘ ܒܗܘܢ ܡܚܘܬܐ ܪܒܬܐ ܘܫܪܟܐ ܕܐܚܪ̈ܢܐ ܡܣܩܝܢ ܗܘܘ ܠܗܘܢ ܡܕܐܬܐ ܒܟܠ ܫܢܐ ܘܫܢܐ
5 ܐܦ ܠܦܝܠܝܦܘܣ ܘܠܡ̈ܠܟܐ ܕܚ̈ܬܝܐ ܘܠܐܝܠܝܢ ܕܡܫܬܩܠܝܢ ܗܘܘ ܥܠܝܗܘܢ ܡܟܟܘ ܘܫܚܩܘ ܐܢܘܢ ܒܩܪ̈ܒܐ ܘܐܬܥܫܢܘ ܥܠܝܗܘܢ
6 ܘܠܐܢܛܝܟܘܣ ܡܠܟܐ ܪܒܐ ܕܐܣܝܐ ܗܘ ܕܐܙܠ ܗܘܐ ܥܠܝܗܘܢ ܠܩܪܒܐ ܘܐܝܬ ܗܘܐ ܥܡܗ ܡܐܐ ܘܥܣܪܝܢ ܦܝ̈ܠܝܢ ܘܦܪ̈ܫܐ ܘܡܪ̈ܟܒܬܐ ܘܚܝܠܐ ܣܓܝܐܐ ܘܥܫܝܢܐ ܫܚܩܘܗ ܠܟܠܗ ܡܫܪܝܬܗ
7 ܘܠܗ ܐܚܕܘܗܝ ܟܕ ܚܝ ܘܐܩܝܡ ܕܗܘܐ ܡܣܩ ܠܗܘܢ ܗܘ ܘܡ̈ܠܟܐ ܕܡܢ ܒܬܪܗ ܡܕܐܬܐ ܪܒܬܐ ܒܟܠ ܫܢܐ ܘܫܢܐ ܘܕܗܘܘ ܝܗܒܝܢ ܗܡܝܪ̈ܐ ܘܦܘܪ̈ܫܢܐ
8 ܘܠܐܪܥܐ ܕܗܢܕܘ ܘܕܡܕܝ ܘܕܠܘܕܝܐ ܡܢ ܐܪ̈ܥܬܗ ܐܪ̈ܥܬܐ ܓܒ̈ܝܬܐ ܘܟܕ ܢܣܒܘ ܐܢܝܢ ܡܢܗ ܝܗܒܘ ܐ̈ܢܝܢ ܠܐܘܡܢܝܘܣ ܡܠܟܐ
9 ܘܟܕ ܬܘܒ ܨܒܘ ܕܢܐܬܘܢ ܡܢ ܗܠܣ ܕܢܥܛܘܢ ܘܢܓܡܪܘܢ ܐܢܘܢ
10 ܘܐܬܝܕܥܬ ܠܗܘܢ ܡܠܬܐ ܘܫܕܪܘ ܥܠܝܗܘܢ ܠܚܕ ܡܢ ܐܣܛܪ̈ܛܓܐ ܘܐܩܪܒ ܥܡܗܘܢ ܘܢܦܠܘ ܡܢܗܘܢ ܩ̈ܛܝܠܐ ܣܓ̈ܝܐܐ ܘܫܒܘ ܢܫ̈ܝܗܘܢ ܘܒܢ̈ܝܗܘܢ ܘܒܙܘ ܐܢܘܢ ܘܐܚܕܘ ܘܐܬܥܫܢܘ ܥܠ ܐܪܥܗܘܢ ܘܣܚܦܘ ܚܣܢ̈ܝܗܘܢ ܘܫܥܒܕܘ ܐܢܘܢ ܥܕܡܐ ܠܝܘܡܐ ܗܢܐ
11 ܘܠܫܪܟܐ ܕܡ̈ܠܟܘܬܐ ܘܠܓܙܪ̈ܬܐ ܘܚܕܐ ܙܒܢ ܠܟܠ ܐܝܠܝܢ ܕܩܝܡܝܢ ܗܘܘ ܠܘܩܒܠܗܘܢ ܡܚܒܠܝܢ ܗܘܘ ܠܗܘܢ ܘܒܙܝܢ ܘܫܒܝܢ ܘܡܫܥܒܕܝܢ ܗܘܘ ܠܗܘܢ ܠܥܒܕܘܬܐ
12 ܥܡ ܪ̈ܚܡܝܗܘܢ ܕܝܢ ܘܥܡ ܐܝܠܝܢ ܕܡܢܚܝܢ ܗܘܘ ܨܐܕܝܗܘܢ ܢܛܪܝܢ ܗܘܘ ܪܚܡܘܬܐ ܘܐܚܕܘ ܘܐܬܥܫܢܘ ܥܠ ܡ̈ܠܟܐ ܕܪܚܝܩܝܢ ܘܕܩܪܝܒܝܢ ܘܟܠ ܕܫܡܥܝܢ ܗܘܘ ܫܡܥܗܘܢ ܡܬܬܙܝܥܝܢ ܗܘܘ ܡܢܗܘܢ
13 ܘܠܟܠ ܡܢܘ ܕܨܒܝܢ ܗܘܘ ܕܢܥܕܪܘܢ ܘܢܡܠܟܘܢ ܡܡܠܟ ܗܘܐ ܘܠܟܠ ܡܢܘ ܕܨܒܝܢ ܗܘܘ ܕܢܡܟܟܘܢ ܡܡܟܟܝܢ ܗܘܘ ܘܐܬܪܝܡܘ ܘܐܬܥܫܢܘ ܣܓܝ
14 ܘܒܗܠܝܢ ܟܠܗܝܢ ܠܐ ܩܛܪ ܐܦܠܐ ܚܕ ܡܢܗܘܢ ܬܓܐ ܘܠܐ ܐܬܟܣܝ ܐܪ̈ܓܘܢܐ ܐܝܟ ܕܢܬܪܘܪܒ ܒܗܘܢ
15 ܘܥܒܕܘ ܠܗܘܢ ܒܝܬ ܒܘܠܐ ܘܟܠܝܘܡ ܡܬܡܠܟܝܢ ܗܘܘ ܬܠܬܡܐܐ ܘܥܣܪܝܢ ܓܒܪ̈ܝܢ ܐܟܚܕܐ ܒ̈ܢܝ ܡܠܟܐ ܘܡܬܚܫܒܝܢ ܗܘܘ ܕܐܝܟܢܐ ܢܐܨܦܘܢ ܘܢܕܒܪܘܢ ܠܥܡܐ
16 ܘܡܫܠܡܝܢ ܗܘܘ ܪܫܢܘܬܐ ܠܚܕ ܓܒܪܐ ܒܫܢܬܐ ܘܗ̣ܘ ܦܩܕ ܗܘܐ ܘܡܫܬܠܛ ܥܠ ܟܠܗ ܐܪܥܗܘܢ ܘܟܠܗܘܢ ܡܫܬܡܥܝܢ ܗܘܘ ܠܗܘ ܚܕ ܓܒܪܐ ܘܠܐ ܐܝܬ ܗܘܐ ܒܝܢܬܗܘܢ ܠܐ ܚܣܡܐ ܘܠܐ ܛܢܢܐ ܘܓܒܐ ܝܗܘܕܐ ܠܐܘܦܠܝܡܘܣ ܒܪܗ ܕܝܘܚܢܢ ܒܪ ܐܩܘܣ ܘܠܐܝܣܘܢ ܒܪܗ ܕܠܥܙܪ
17 ܘܫܕܪ ܐܢܘܢ ܠܪܗܘܡܐ ܕܢܩܝܡܘܢ ܥܡܗܘܢ ܪܚܡܘܬܐ ܘܥܘܕܪܢܐ
18 ܘܕܢܣܒܘܢ ܡܢܗܘܢ ܢܝܪܐ ܡܛܠ ܕܡܠܟܘܬܐ ܕܝܘ̈ܢܝܐ ܡܫܥܒܕܐ ܗܘܬ ܠܐܝܣܪܐܝܠ ܠܥܒܕܘܬܐ
19 ܘܐܙܠܘ ܕܒܝܬ ܐܘܦܠܝܡܘܣ ܠܪܗܘܡܐ ܐܘܪܚܐ ܕܝܢ ܪܒܐ ܗܘܬ ܣܓܝ ܘܥܠܘ ܠܒܝܬ ܒܘܠܐ ܕܝܠܗܘܢ ܘܥܢܘ ܘܐܡܪܘ ܠܗܘܢ
20 ܝܗܘܕܐ ܡܩܒܝ ܘܐܚ̈ܘܗܝ ܘܥܡܐ ܕܝܗ̈ܘܕܝܐ ܫܕܪܘܢ ܠܘܬܟܘܢ ܠܡܩܡܘ ܥܡܟܘܢ ܥܘܕܪܢܐ ܘܪܚܡܘܬܐ ܘܕܬܟܬܒܘܢܢ ܪ̈ܚܡܝܟܘܢ ܘܡܥܕܪ̈ܢܝܟܘܢ
21 ܘܫܦܪܬ ܡܠܬܐ ܒܥܝ̈ܢܝܗܘܢ
22 ܘܗܢܘ ܦܚܡܗ ܕܐܓܪܬܐ ܕܟܬܒܘ ܒܦܢܩܝܬܐ ܕܢܚܫܐ ܘܫܕܪܘ ܠܐܘܪܫܠܡ ܕܬܗܘܐ ܠܘܬܗܘܢ ܠܥܘܗܕܢܐ ܘܪܚܡܘܬܐ ܘܕܥܘܕܪܢܐ ܘܕܫܠܡܐ
23 ܫܦܝܪ ܢܗܘܐ ܠܪ̈ܗܘܡܝܐ ܘܠܥܡܐ ܕܝܗ̈ܘܕܝܐ ܒܝܡܐ ܘܒܝܒܫܐ ܠܥܠܡ ܘܪܘܡܚܐ ܘܒܥܠܕܒܒܐ ܢܬܪܚܩ ܡܢܗܘܢ
24 ܐܢ ܕܝܢ ܢܩܘܡ ܩܪܒܐ ܥܠ ܪ̈ܗܘܡܝܐ ܠܘܩܕܡ ܐܘ ܥܠ ܟܠ ܡܥܕܪ̈ܢܝܗܘܢ ܐܘ ܥܠ ܟܠ ܐܝܟܐ ܕܡܫܠܛܝܢ
25 ܢܐܬܐ ܠܥܘܕܪܢܗܘܢ ܥܡܐ ܕܝܗ̈ܘܕܝܐ ܐܝܟ ܡܐ ܕܫܐܠ ܙܒܢܐ ܒܠܒܐ ܡܠܝܐ
26 ܘܠܒ̈ܥܠܕܒܒܐ ܕܡܩܪܒܝܢ ܥܡܗܘܢ ܠܐ ܢܬܠܘܢ ܠܗܘܢ ܢܦܐܫܐ ܘܢܟܠܘܢ ܡܢܗܘܢ ܚ̈ܛܐ ܘܙܝܢܐ ܘܟܣܦܐ ܘܐ̈ܠܦܐ ܐܝܟ ܕܫܦܪ ܠܪ̈ܗܘܡܝܐ ܘܢܛܪܘܢ ܢܛܘܪ̈ܬܗܘܢ ܟܕ ܡܕܡ ܠܐ ܢܣܒܝܢ ܡܢܗܘܢ
27 ܘܐܢ ܕܝܢ ܠܥܡܐ ܕܝܗ̈ܘܕܝܐ ܢܓܕܫ ܠܘܩܕܡ ܩܪܒܐ ܢܬܟܬܫܘܢ ܘܢܥܕܪܘܢ ܐܢܘܢ ܒ̈ܢܝ ܪ̈ܗܘܡܐ ܡܢ ܟܠܗ ܢܦܫܗܘܢ ܐܝܟ ܡܐ ܕܙܒܢܐ ܫܐܠ
28 ܘܠܐܝܠܝܢ ܕܡܬܟܬܫܝܢ ܘܡܩܪܒܝܢ ܥܡܗܘܢ ܠܐ ܢܬܝܗܒ ܚ̈ܛܐ ܘܙܝܢܐ ܘܟܣܦܐ ܘܐ̈ܠܦܐ ܐܝܟ ܕܫܦܪ ܠܒ̈ܢܝ ܪܗܘܡܐ ܘܢܛܪܘܢ ܢܛܘܪ̈ܬܗܘܢ ܟܕ ܡܕܡ ܠܐ ܢܣܒܘܢ ܡܢܗܘܢ ܕܠܐ ܒܢܟܠܐ
29 ܐܝܟ ܗܠܝܢ ܡ̈ܠܐ ܐܩܝܡܘ ܒ̈ܢܝ ܪܗܘܡܐ ܥܡ ܟܢܫܐ ܕܝܗ̈ܘܕܝܐ
30 ܐܢ ܕܝܢ ܡܢ ܒܬܪ ܡ̈ܠܐ ܗܠܝܢ ܢܨܒܘܢ ܗܠܝܢ ܠܡܒܨܪ ܐܘ ܠܡܘܣܦܘ ܢܥܒܕܘܢ ܟܠ ܕܫܦܪ ܠܬܪܥܝܬܗܘܢ ܘܟܠ ܕܢܒܨܪܘܢ ܐܘ ܢܘܣܦܘܢ ܢܗܘܐ ܫܠܝܛ ܠܗܘܢ
31 ܘܥܠ ܒܝܫ̈ܬܐ ܕܝܢ ܕܥܒܕ ܨܐܕܝܟܘܢ ܕܡܛܪܝܘܣ ܡܠܟܐ ܟܬܒܢ ܘܫܠܚܢ ܠܗ ܕܠܡܢܐ ܐܘܩܪܬ ܘܐܥܫܢܬ ܢܝܪܟ ܥܠ ܪ̈ܚܡܝܢ ܘܡܥܕܪ̈ܢܝܢ ܝܗܘ̈ܕܝܐ
32 ܐܢ ܗܟܝܠ ܬܘܒ ܢܩܒܠܘܢ ܥܠܝܟ ܢܥܒܕ ܠܗܘܢ ܬܒܥܬܐ ܘܕܝܢܐ ܘܢܩܪܒ ܥܡܟ ܒܝܡܐ ܘܒܝܒܫܐ
1 Maccabees 7 · 1 Maccabees 9 · Greek (Septuagint / SBLGNT) · Latin (Vulgate)