Read 1 Maccabees 7 side by side with translations · The Final Bible
1 ܒܫܢܬ ܡܐܐ ܘܚܡܫܝܢ ܘܚܕܐ ܢܦܩ ܕܡܛܪܝܘܣ ܒܪ ܣܠܘܩܘܣ ܡܢ ܪܗܘܡܐ ܘܣܠܩ ܒܐܢܫܐ ܙܥܘܪ̈ܐ ܥܠ ܡܕܝܢ̈ܬܐ ܕܥܠ ܣܦܪ̈ܝ ܝܡܐ ܘܐܡܠܟ ܬܡܢ
2 ܘܗܘܐ ܕܟܕ ܥܐܠ ܗܘܐ ܠܒܝܬ ܡܠܟܘܬܐ ܕܐܒܗ̈ܘܗܝ ܐܚܕܘ ܚܝ̈ܠܐ ܠܐܢܛܝܟܘܣ ܘܠܠܘܣܝܐ ܕܢܣܩܘܢ ܐܢܘܢ ܠܘܬܗ
3 ܘܐܬܝܕܥܬ ܠܗ ܨܒܘܬܐ ܘܐܡܪ ܠܐ ܬܚܘܘܢܢܝ ܐ̈ܦܝܗܘܢ
4 ܘܩܛܠܘ ܐܢܘܢ ܚ̈ܝܠܐ ܘܝܬܒ ܕܡܛܪܝܘܣ ܥܠ ܟܘܪܣܝܐ ܕܡܠܟܘܬܗ
5 ܘܐܬܘ ܠܘܬܗ ܟܠܗܘܢ ܓܒܪ̈ܐ ܥܘ̈ܠܐ ܘܪ̈ܫܝܥܐ ܡܢ ܐܝܣܪܐܝܠ ܘܐܠܩܝܡܘܣ ܗܘ ܗܘܐ ܡܕܒܪܢܗܘܢ ܕܨܒܐ ܗܘܐ ܕܢܗܘܐ ܪܒ ܟܗ̈ܢܐ
6 ܘܐܟܠܘ ܩܪ̈ܨܘܗܝ ܕܥܡܐ ܩܕܡ ܡܠܟܐ ܘܐܡܪܘ ܐܘܒܕܘ ܝܗܘܕܐ ܘܐܚ̈ܘܗܝ ܠܪ̈ܚܡܝܟ ܘܠܢ ܒܕܪܘܢ ܡܢ ܐܪܥܢ
7 ܗܫܐ ܫܕܪ ܓܒܪܐ ܐܝܢܐ ܕܡܗܝܡܢ ܠܟ ܘܢܐܙܠ ܘܢܚܙܐ ܟܠܗ ܐܒܕܢܐ ܕܥܒܕܘ ܒܢ ܘܒܐܪܥܗ ܕܡܠܟܐ ܕܐܝܟܢܐ ܫܢܩ ܐܢܘܢ ܘܠܟܠܗܘܢ ܡܥܕܪ̈ܢܝܗܘܢ
8 ܘܓܒܐ ܡܠܟܐ ܠܒܝܟܪܝܘܣ ܪܚܡܗ ܕܡܫܠܛ ܗܘܐ ܒܗܘ ܥܒܪܗ ܕܢܗܪܐ ܘܪܒܐ ܗܘܐ ܘܡܗܝܡܢܐ ܒܡܠܟܘܬܗ
9 ܘܫܕܪܗ ܘܠܐܠܩܝܡܘܣ ܪܫܝܥܐ ܘܐܩܝܡ ܠܗ ܟܗܢܘܬܐ ܘܦܩܕܗ ܕܢܥܒܕ ܦܘܪܥܢܐ ܒܒ̈ܢܝ ܐܝܣܪܐܝܠ
10 ܘܫܩܠܘ ܘܐܬܘ ܠܐܪܥܐ ܕܝܗܘܕܐ ܒܚܝܠܐ ܣܓܝܐܐ ܘܫܕܪܘ ܡܠܐ̈ܟܐ ܠܘܬ ܝܗܘܕܐ ܘܐܚ̈ܘܗܝ ܒܡ̈ܠܐ ܕܫܠܡܐ ܒܢܟܠܐ
11 ܘܚܪܘ ܘܐܣܬܟܠܘ ܒܡ̈ܠܝܗܘܢ ܚܙܘ ܓܝܪ ܕܐܬܘ ܠܘܬܗܘܢ ܒܚܝܠܐ ܪܒܐ
12 ܘܐܬܟܢܫܘ ܠܘܬ ܐܠܩܝܡܘܣ ܘܒܝܟܪܝܘܣ ܟܢܘܫܬܐ ܕܣܦܪ̈ܐ ܠܡܦܩܕ ܘܠܡܒܥܐ ܟܐܢܘܬܐ
13 ܘܩܕܡ̈ܝܐ ܐܝܬܝܗܘܢ ܗܘܘ ܡܫܒ̈ܚܢܐ ܒܒ̈ܢܝ ܐܝܣܪܝܠ ܘܒܥܝܢ ܗܘܘ ܡܢܗܘܢ ܫܠܡܐ
14 ܐܡܪܘ ܓܝܪ ܕܓܒܪܐ ܟܗܢܐ ܐܬܐ ܡܢ ܙܪܥܗ ܕܐܗܪܘܢ ܥܡ ܚܝܠܐ ܘܠܐ ܡܒܐܫܝܢ ܠܢ
15 ܘܡܠܠ ܥܡܗܘܢ ܡ̈ܠܐ ܕܫܠܡܐ ܘܐܝܡܐ ܠܗܘܢ ܘܐܡܪ ܕܠܐ ܢܒܥܐ ܘܠܐ ܢܬܚܫܒ ܥܠܝܟܘܢ ܒܝܫܬܐ ܘܠܪ̈ܚܡܝܟܘܢ
16 ܘܗܝܡܢܘܗܝ ܘܐܚܕ ܡܢܗܘܢ ܐܫܬܝܢ ܓܒܪ̈ܝܢ ܘܩܛܠ ܐܢܘܢ ܒܚܕ ܝܘܡܐ ܐܝܟ ܡܠܬܐ ܕܐܡܪ ܢܒܝܐ
17 ܕܒܣܪܐ ܕܚܣ̈ܝܝܟ ܘܕܡܗܘܢ ܐܫܕܘ ܚܕܪ̈ܝܗ ܕܐܘܪܫܠܡ ܘܠܐ ܐܝܬ ܠܗܘܢ ܕܩܒܪ
18 ܘܢܦܠܬ ܕܚܠܬܗܘܢ ܥܠ ܟܠܗ ܥܡܐ ܐܡܪܘ ܓܝܪ ܕܠܝܬ ܠܗܘܢ ܫܪܪܐ ܐܦܠܐ ܕܝܢܐ ܥܒܪܘ ܓܝܪ ܥܠ ܕܝܢܐ ܘܡܘ̈ܡܬܐ ܘܩܝܡܐ ܕܐܩܝܡܘ
19 ܘܫܩܠ ܒܝܟܪܝܘܣ ܡܢ ܐܘܪܫܠܡ ܘܫܪܘ ܥܠ ܒܝܬ ܙܪ̈ܐ ܘܫܕܪ ܘܐܚܕ ܡܢ ܐܢܫܐ ܕܡܪܕܘ ܥܠܘܗܝ ܐܦ ܡܢ ܥܡܐ ܘܢܟܣ ܐܢܘܢ ܥܠ ܒܪܐ ܪܒܬܐ
20 ܘܐܫܠܡ ܐܪܥܐ ܠܐܠܩܝܡܘܣ ܘܫܒܩ ܠܘܬܗ ܚܝܠܐ ܠܥܘܕܪܢܗ ܘܐܬܐ ܒܝܟܪܝܘܣ ܠܘܬ ܡܠܟܐ
21 ܐܠܩܝܡܘܣ ܕܝܢ ܡܬܟܬܫ ܗܘܐ ܥܠ ܪܒܘܬ ܟܗܢܘܬܐ
22 ܘܐܬܟܢܫܘ ܠܘܬܗ ܟܠܗܘܢ ܐܝܠܝܢ ܕܫܓܫܝܢ ܗܘܘ ܠܥܡܗܘܢ ܘܐܚܕܗ ܠܐܪܥܐ ܕܝܗܘܕܐ ܘܥܒܕ ܡܚܘܬܐ ܪܒܬܐ ܒܐܝܣܪܝܠ
23 ܘܚܙܐ ܝܗܘܕܐ ܠܟܠܗ ܒܝܫܬܐ ܕܥܒܕ ܐܠܩܝܡܘܣ ܘܐܝܠܝܢ ܕܥܡܗ ܒܒ̈ܢܝ ܐܝܣܪܐܝܠ ܝܬܝܪ ܡܢ ܥܡ̈ܡܐ
24 ܘܢܦܩ ܠܟܠܗܘܢ ܬܚܘ̈ܡܝܗ ܕܝܗܘܕ ܟܕ ܚܕܪܝܢ ܘܥܒܕ ܕܝܢܐ ܒܓܒܪ̈ܐ ܐܝܠܝܢ ܕܡܪܕܘ ܘܐܫܬܕܪܘ ܕܢܗܠܟܘܢ ܒܐܪܥܐ
25 ܘܟܕ ܕܝܢ ܚܙܐ ܐܠܩܝܡܘܣ ܕܐܬܥ̈ܫܢ ܝܗܘܕܐ ܘܐܝܠܝܢ ܕܥܡܗ ܘܐܝܕܥ ܕܠܐ ܡܫܟܚ ܠܡܩܡ ܩܕܡܝܗܘܢ ܗܦܟ ܠܘܬ ܡܠܟܐ ܘܐܟܠ ܩܪ̈ܨܝܗܘܢ ܒܒܝ̈ܫܬܐ ܣܓܝܐ̈ܬܐ
26 ܘܫܕܪ ܡܠܟܐ ܕܡܛܪܝܘܣ ܠܢܝܩܢܘܪ ܚܕ ܡܢ ܡܫ̈ܒܚܐ ܕܪ̈ܘܪܒܢܘܗܝ ܕܒܣܢܐܬܐ ܘܒܒܥܠܕܒܒܘܬܐ ܐܝܬܘܗܝ ܗܘܐ ܠܘܬ ܐܝܣܪܐܝܠ ܘܦܩܕܗ ܕܢܥܛܝܘܗܝ ܘܢܪܝܡܝܘܗܝ ܠܥܡܐ
27 ܘܐܬܐ ܢܝܩܢܘܪ ܠܐܘܪܫܠܡ ܒܚܝܠܐ ܣܓܝܐܐ ܘܫܕܪ ܠܘܬ ܝܗܘܕܐ ܘܐ̈ܚܘܗܝ ܡ̈ܠܐ ܕܫܠܡܐ ܒܢܟܠܐ ܘܐܡܪ ܠܗܘܢ
28 ܠܐ ܬܗܘܐ ܡܨܘܬܐ ܒܝܢܝ ܘܠܟܘܢ ܘܐܬܐ ܒܓܒܪ̈ܐ ܙܥܘܪ̈ܐ ܘܐܚܙܐ ܐ̈ܦܝܟܘܢ ܒܫܠܡܐ
29 ܘܐܬܘ ܠܘܬ ܝܗܘܕܐ ܘܫܐܠܘ ܒܫܠܡܐ ܚܕ ܕܚܕ ܚܝ̈ܠܐ ܕܝܢ ܡܥܬܕܝܢ ܗܘܘ ܕܢܚܛܦܘܢܝܗܝ ܠܝܗܘܕܐ
30 ܘܐܬܝܕܥܬ ܡܠܬܐ ܠܝܗܘܕܐ ܕܒܢܟܠܐ ܐܬܘ ܨܐܕܘܗܝ ܘܐܪܚܩ ܠܗ ܡܢܗ ܘܬܘܒ ܠܐ ܨܒܐ ܗܘܐ ܕܢܚܙܐ ܐ̈ܦܘܗܝ
31 ܘܐܝܕܥ ܢܝܩܢܘܪ ܕܐܬܓܠܝܬ ܠܗ ܡܚܫܒܬܗ ܘܢܦܩ ܠܐܘܪܥܗ ܕܝܗܘܕܐ ܠܘܩܒܠ ܟܦܪ ܫܠܡܐ
32 ܘܢܦܠܘ ܡܢ ܓܒܪ̈ܐ ܕܥܡ ܢܝܩܢܘܪ ܐܝܟ ܚܡܫܡܐܐ ܘܥܪܩܘ ܠܡܕܝܢܬܗ ܕܕܘܝܕ
33 ܘܡܢ ܒܬܪ ܗܠܝܢ ܡ̈ܠܐ ܣܠܩ ܢܝܩܢܘܪ ܠܛܘܪܐ ܕܨܗܝܘܢ ܘܢܦܩܘ ܟܗ̈ܢܐ ܡܢ ܒܝܬ ܡܩܕܫܐ ܘܡܢ ܩܫܝ̈ܫܐ ܕܥܡܐ ܕܢܫܐܠܘܢ ܒܫܠܡܗ ܘܕܢܚܘܘܢܝܗܝ ܝܩ̈ܕܐ ܘܩܘܪ̈ܒܢܐ ܕܡܬܩܪܒܝܢ ܥܠ ܐ̈ܦܝ ܡܠܟܐ
34 ܘܡܝܩ ܘܒܙܚ ܒܗܘܢ ܘܫܛ ܐܢܘܢ ܘܡܠܠ ܒܫܒܗܪܢܘܬܐ
35 ܘܝܡܐ ܒܚܡܬܐ ܘܐܡܪ ܕܐܢ ܠܐ ܢܫܬܠ̣ܡ ܗܫܐ ܝܗܘܕܐ ܘܡܫܪܝܬܗ ܒܐܝ̈ܕܝ ܡܐ ܕܗܦܟܬ ܒܫܠܡܐ ܐܘܩܕܝܘܗܝ ܠܒܝܬܐ ܗܢܐ ܘܢܦܩ ܒܚܡܬܐ ܪܒܬܐ
36 ܘܥܠܘ ܟܗ̈ܢܐ ܘܩܡܘ ܩܕܡ ܡܕܒܚܐ ܘܩܣܛܪܘܡܐ ܘܒܟܘ ܘܐܡܪܘ
37 ܐܢܬ ܡܪܝܐ ܓܒܝܬ ܠܟ ܗܢܐ ܒܝܬܐ ܕܢܬܩܪܐ ܫܡܟ ܥܠܘܗܝ ܘܕܢܗܘܐ ܒܝܬ ܨܠܘܬܐ ܘܒܥܘܬܐ ܠܥܡܟ
38 ܥܒܕ ܦܘܪܥܢܐ ܡܢ ܓܒܪܐ ܗܢܐ ܘܡܢ ܡܫܪܝܬܗ ܘܢܦܠܘܢ ܒܪܘܡܚܐ ܘܐܬܕܟܪ ܓܘܕܦܗܘܢ ܘܠܐ ܬܬܠ ܒܗܘܢ ܚܝܠܐ ܘܡܣܝܒܪܢܘܬܐ
39 ܘܢܦܩ ܢܝܩܢܘܪ ܡܢ ܐܘܪܫܠܡ ܘܫܪܐ ܥܠ ܒܝܬ ܚܘܪܢ ܘܐܪܥܗ ܚܝܠܐ ܕܣܘܪܝܐ
40 ܘܝܗܘܕܐ ܫܪܐ ܥܠ ܐܪܣܐ ܒܬܠܬܐ ܐܠܦܝܢ ܓܒܪ̈ܝܢ ܘܨܠܝ ܝܗܘܕܐ ܘܐܡܪ
41 ܡܪܝܐ ܐܢܬ ܗܘ ܕܟܕ ܓܕܦܘ ܥܠܝܟ ܚ̈ܝܠܐ ܕܡܠܟܐ ܕܐܬܘܪ ܢܦܩ ܡܠܐܟܟ ܘܚܪܒ ܐܢܘܢ ܠܡܐܐ ܘܬܡܢܐܝܢ ܘܚܡܫܐ ܐܠܦܝܢ
42 ܗܟܢܐ ܫܚܘܩ ܘܬܒܪ ܠܡܫܪܝܬܐ ܗܕܐ ܝܘܡܢܐ ܩܕܡܝܢ ܘܢܕܥܘܢ ܫܪܟܐ ܕܐܚܪ̈ܢܐ ܕܒܝܫܐܝܬ ܡܠܠܘ ܥܠ ܒܝܬ ܡܩܕܫܟ ܘܕܘܢ ܐܢܘܢ ܐܝܟ ܒܝܫܘܬܗܘܢ
43 ܘܫܪܝ ܡܫܪ̈ܝܬܐ ܕܢܩܪܒܢ ܒܬܠܬܥܣܪܐ ܒܐܕܪ ܝܪܚܐ ܘܐܬܬܒܪܬ ܡܫܪܝܬܗ ܕܢܝܩܢܘܪ ܘܢܦܠ ܗܘ ܒܩܕܡܐ ܒܩܪܒܐ
44 ܘܟܕ ܕܝܢ ܚܙܬ ܡܫܪܝܬܗ ܕܢܝܩܢܘܪ ܕܢܦܠ ܠܗ ܫܕܘ ܙܝܢܗܘܢ ܘܥܪܩܘ
45 ܘܪܕܦܝܢ ܗܘܘ ܠܗܘܢ ܕܒܝܬ ܝܗܘܕܐ ܡܪ̈ܕܐ ܝܘܡܐ ܚܕ ܡܢ ܐܪܣܐ ܘܥܕܡܐ ܕܐܬܘ ܠܓܙܝܪܐ ܘܩܪܘ ܒܬܪܗܘܢ ܒܩܪ̈ܢܬܐ ܐܝܕܝ̈ܥܬܐ
46 ܘܢܦܩܘ ܡܢ ܟܠܗܝܢ ܩܘܪ̈ܝܐ ܕܝܗܘܕܐ ܘܡܚܡܠܝܢ ܗܘܘ ܘܡܗܦܟܝܢ ܠܗܘܢ ܚܕ ܠܘܬ ܚܕ ܥܕܡܐ ܕܢܦܠܘ ܟܠܗܘܢ ܒܦܘܡܐ ܕܚܪܒܐ ܥܕܡܐ ܕܠܐ ܐܫܬܚܪ ܡܢܗܘܢ ܐܦܠܐ ܚܕ
47 ܘܢܣܒܘ ܒܙܬܗܘܢ ܘܫܒܝܬܗܘܢ ܘܫܩܠܘ ܪܫܗ ܕܢܝܩܢܘܪ ܘܝܡܝܢܗ ܗܝ ܕܐܪܝܡ ܗܘܐ ܒܫܘܒܗܪܐ ܘܐܝܬܝܘ ܘܬܠܘ ܐܢܘܢ ܒܐܘܪܫܠܡ
48 ܘܐܬܒܣܡ ܥܡܐ ܣܓܝ ܘܐܩܝܡܘܗܝ ܠܝܘܡܐ ܗܢܐ ܒܒܘܣܡܐ ܘܒܚܕܘܬܐ
49 ܘܣܡܘ ܕܗܘܘ ܥܒܕܝܢ ܠܗ ܡܢ ܫܢܐ ܠܫܢܐ ܒܬܠܬܥܣܪܐ ܒܐܕܪ ܝܪܚܐ
50 ܘܫܠܝܬ ܐܪܥܐ ܕܝܗܘܕܐ ܝܘ̈ܡܬܐ ܙܥܘܪ̈ܐ
1 Maccabees 6 · 1 Maccabees 8 · Greek (Septuagint / SBLGNT) · Latin (Vulgate)