Read 1 Esdras 7 side by side with translations · The Final Bible
1 ܗܝܕܝܢ ܣܝܣܝܢܘܣ ܗܘܦܪܟܐ ܕܣܘܪܝܐ ܥܡܝܩܬܐ ܘܕܦܘܢܝܩܐ ܘܣܬܪܘܒܘܪܙܝܢܘܣ ܘܚܒܪ̈ܐ ܕܐܟܚܕܐ ܟܕ ܢܩܦܘ ܠܗܠܝܢ ܕܡܢ ܡܠܟܐ ܕܪܝܘܫ ܐܬܦܩܕܝܢ
2 ܩܝܡܝܢ ܗܘܘ ܥܠ ܥܒ̈ܕܐ ܟܗ̈ܢܝܐ ܟܕ ܝܬܝܪ ܝܨܝܦܐܝܬ ܡܥܕܪܝܢ ܗܘܘ ܠܩܫܝ̈ܫܐ ܕܝܘ̈ܕܝܐ ܘܩܝܘ̈ܡܐ ܟܗ̈ܢܝܐ
3 ܘܡܬܬܨ̈ܠܚܢܐ ܗܘܘ ܥܒ̈ܕܐ ܟܗ̈ܢܝܐ ܟܕ ܡܬܢܒܝܢ ܗܘܘ ܚܓܝ ܘܙܟܪܝܐ ܢܒ̈ܝܐ
4 ܘܫܡܠܝܘ ܗܠܝܢ ܒܝܕ ܦܘܩܕܢܐ ܕܡܪܝܐ ܐܠܗܐ ܕܝܣܪܝܠ ܘܥܡ ܦܘܩܕܢܐ ܕܟܘܪܫ ܘܕܕܪܝܘܫ ܘܐܪܛܚܫܫܬ ܡ̈ܠܟܐ ܕܦܪ̈ܣܝܐ
5 ܥܕܡܐ ܠܫܢ̇ܬܐ ܫܬܝܬܝܬܐ ܕܕܪܝܘܫ ܡܠܟܐ ܕܦܪ̈ܣܝܐ ܐܫܬܡܠܝ ܒܝܬܐ ܗܘ ܩܕܝܫܐ ܥܕܡܐ ܠܬܠܬܐ ܘܥܣܪ̈ܝܢ ܕܝܪܚܐ ܐܕܪ ܕܫܢܬܐ ܫܬܝܬܝܬܐ ܕܡܠܟܐ ܕܪܝܘܫ
6 ܘܥܒܕܘ ܒܢܝ̈ܐ ܕܐܝܣܪܝܠ ܘܟܗ̈ܢܐ ܘܠܘ̈ܝܐ ܘܗܢܘܢ ܕܫܪܟܐ ܕܡܢ ܫܒܝܬܐ ܗܢܘܢ ܕܐܬܬܘܣܦܘ ܢܩܝܦܐܝܬ ܠܗܢܝܢ ܕܒܟܬܒܐ ܕܡܘܫܐ
7 ܘܩܪܒܘ ܠܚܘܕܬܐ ܕܗܝܟܠܗ ܕܡܪܝܐ ܬܘܪ̈ܐ ܡܐܐ ܕܟܪ̈ܐ ܡܐܬܝ̈ܢ ܐܡܪ̈ܐ ܐܪ̈ܒܥܡܐܐ
8 ܨܝܦܪ̈ܝܐ ܕܚܠܦ ܚܛܗ̈ܐ ܕܟܠܗ ܐܝܣܪܝܠ ܬܪ̈ܥܣܪ ܐܝܟ ܡܢܝܢܐ ܡܢ ܕܪ̈ܝܫܢܝ ܫܪ̈ܒܬܐ ܕܝܣܪܝܠ ܬܪ̈ܥܣܪ
9 ܘܩܡܘ ܟܗ̈ܢܐ ܘܠܘ̈ܝܐ ܟܕ ܡܥܛܦܝܢ ܐܣ̈ܛܠܐ ܐܝܟ ܫܪ̈ܒܬܐ ܥܠ ܥܒ̈ܕܐ ܕܡܪܝܐ ܐܠܗܐ ܕܐܝܣܪܝܠ ܢܩܝܦܐܝܬ ܠܟܬܒܐ ܕܡܘܫܐ ܘܬܪ̈ܥܐ ܥܠ ܟܠܚܕ ܡܢ ܬܪ̈ܥܐ
10 ܘܥܒܕܘ ܒܢܝ̈ܐ ܕܐܝܣܪܝܠ ܗܢܘܢ ܕܡܢ ܫܒܝܬܐ ܦܨܚܐ ܒܐܪ̈ܒܥܣܪܐ ܕܝܪܚܐ ܩܕܡܝܐ ܡܛܠ ܕܐܬܕܟܝܘ ܟܗ̈ܢܐ ܘܠܘ̈ܝܐ ܐܟܚܕܐ
11 ܘܟܠܗܘܢ ܒܢܝ̈ܐ ܕܫܒܝܬܐ ܠܐ ܐܬܕܟܝܘ ܗܘܘ ܡܛܠ ܕܠܘ̈ܝܐ ܟܠܗܘܢ ܐܟܚܕܐ ܐܬܕܟܝܘ
12 ܘܕܒܚܘܗܝ ܠܦܨܚܐ ܠܟܠܗܘܢ ܒ̈ܢܝܐ ܕܫܒܝܬܐ ܘܠܐܚ̈ܐ ܕܝܠܗܘܢ ܠܟܗ̈ܢܐ ܘܠܗܘܢ
13 ܘܐܟܠܘ ܒܢܝ̈ܐ ܕܐܝܣܪܝܠ ܗܢܘܢ ܕܡܢ ܫܒܝܬܐ ܟܠܗܘܢ ܗܢܘܢ ܕܐܬܦܪܫܘ ܡܢ ܢܕܝܕܘܬܐ ܕܥܡ̈ܡܐ ܕܐܪܥܐ ܟܕ ܒܥܝܢ ܠܡܪܝܐ
14 ܘܥܒܕܘ ܠܥܐܕܐ ܕܦܛܝܪ̈ܐ ܫܒܥܐ ܝܘ̈ܡܐ ܟܕ ܚܕܝܢ ܩܕܡ ܡܪܝܐ
15 ܡܛܠ ܕܫܚܠܦ ܠܡܚܫܒܬܐ ܕܡܠܟܐ ܕܐܬܘܪ̈ܝܐ ܥܠܝܗܘܢ ܠܡܚܝܠܘ ܠܐܝܕܝ̈ܗܘܢ ܥܠ ܥܒ̈ܕܐ ܕܡܪܝܐ ܐܠܗܐ ܕܐܝܣܪܝܠ
1 Esdras 6 · 1 Esdras 8 · Greek (Septuagint / SBLGNT) · Latin (Vulgate)