Read 1 Esdras 6 side by side with translations · The Final Bible
1 ܐܬܢܒܝ ܚܓܝ ܘܙܟܪܝܐ ܗܘ ܕܥܕܘ ܗܢܘܢ ܢܒ̈ܝܐ ܥܠ ܝܘ̈ܕܝܐ ܗܢܘܢ ܕܒܝܗܘܕ ܘܒܐܘܪܝܫܠܡ ܥܠ ܫܡܗ ܕܡܪܝܐ ܐܠܗܐ ܕܝܣܪܝܠ ܥܠܝܗܘܢ
2 ܗܝܕܝܢ ܟܕ ܩܡ ܙܘܪܒܒܝܠ ܗܘ ܕܫܠܐܬܝܠ ܘܝܫܘܥ ܗܘ ܕܝܘܙܕܩ ܫܪܝܘ ܠܡܒܢܐ ܠܒܝܬܗ ܕܐܠܗܐ ܗܘ ܕܒܐܘܪܝܫܠܡ ܟܕ ܥܡܗܘܢ ܐܝܬ ܗܘܘ ܢܒ̈ܝܐ ܕܡܪܝܐ ܕܡܥܕܪܝܢ ܗܘܘ ܠܗܘܢ
3 ܒܗ ܒܙܒܢܐ ܩܪܝܒ ܗܘܐ ܠܘܬܗܘܢ ܣܝܣܝܢܘܣ ܗܘ ܗܘܦܪܟܐ ܕܣܘܪܝܐ ܘܕܦܘܢܝܩܐ ܘܣܬܪܘܒܘܪܢܝܣ ܘܚܒܪ̈ܐ ܕܐܟܚܕܐ ܘܐܡܪܘ ܠܗܘܢ
4 ܡܢܘ ܕܟܕ ܠܟܘܢ ܦܩܕ ܠܒܝܬܐ ܗܢܐ ܒܢܝܢ ܐܢܬܘܢ ܘܠܬܛܠܝܠܐ ܗܢܐ ܘܠܗܠܝܢ ܐܚܪ̈ܢܝܬܐ ܟܠܗܝܢ ܡܫܡܠܝܢ ܐܢܬܘܢ ܘܡܢܘ ܐܝܬܝܗܘܢ ܒܢܘ̈ܝܐ ܗܢܘܢ ܕܗܠܝܢ ܡܫܡܠܝܢ
5 ܘܩܢܘ ܛܝܒܘܬܐ ܟܕ ܣܥܘܪܘܬܐ ܗܘܬ ܥܠ ܫܒܝܬܐ ܡܢ ܡܪܝܐ ܩܫܝ̈ܫܐ ܕܝ̈ܘܕܝܐ
6 ܘܠܐ ܐܬܟܠܝܘ ܡܢ ܒܢܝܢܐ ܥܕܡܐ ܕܐܫܬܘܕܥ ܠܕܪܝܘܫ ܡܛܠܬܗܘܢ ܘܐܬܐܡܪ ܠܘܬܗ
7 ܨܚܚܐ ܕܐܓܪܬܐ ܗܝ ܕܟܬܒܘ ܗܘܘ ܠܕܪܝܘܫ ܘܫܕܪܘ ܣܝܣܝܢܘܣ ܗܘ ܗܘܦܪܟܐ ܕܣܘܪܝܐ ܘܕܦܘܢܝܩܐ ܘܣܬܪܘܒܘܪܙܢܝܣ ܘܚܒܪ̈ܐ ܕܐܟܚܕܐ ܗܢܘܢ ܕܒܣܘܪܝܐ ܘܒܦܘܢܝܩܐ ܗܓ̈ܡܘܢܐ ܠܡܠܟܐ ܕܪܝܘܫ ܠܡܚܕܐ
8 ܟܠܗܝܢ ܝܕܝ̈ܥܬܐ ܢܗܘܝܢ ܠܡܪܐ ܕܝܠܢ ܡܠܟܐ ܡܛܠ ܕܟܕ ܐܬܝܢܢ ܠܐܬܪܐ ܕܝܗܘܕ ܘܐܬܝܢܢ ܠܐܘܪܝܫܠܡ ܡܕܝܢܬܐ ܐܕܪܟܢܢ ܠܩ̈ܫܝܫܐ ܕܫܒܝܬܐ ܕܝܘ̈ܕܝܐ ܒܐܘܪܝܫܠܡ ܡܕܝܢܬܐ ܟܕ ܒܢܝܢ ܒܝܬܐ ܠܡܪܝܐ ܪܒܐ ܚܕܬܐ ܒܝܕ ܟܐܦ̈ܐ ܓܙܝܪ̈ܬܐ ܣܓܝ̈ܐܬ ܛܝܡܐ ܘܩܝ̈ܣܐ ܕܡܬܬܣܝܡܝܢ ܒܒ̈ܬܐ
9 ܠܥ̇ܒ̈ܕܐ ܗܢܘܢ ܕܒܝܨܝܦܘܬܐ ܗܘܝܢ ܘܡܬܬܨܠܚ ܗܘܐ ܥܒܕܐ ܒܐܝ̈ܕܝܐ ܕܝܠܗܘܢ ܘܒܟܠܗ ܬܫܒܘܚܬܐ ܒܝܨܝܦܘܬܐ ܡܫܬܡܠܐ
10 ܗܝܕܝܢ ܡܫܐܠܝܢ ܗܘܝܢ ܠܩ̈ܫܝܫܐ ܗܢܘܢ ܟܕ ܐܡܪܝܢܢ ܡܢܘ ܕܟܕ ܠܟܘܢ ܦܩܕ ܒܢܝܢ ܐܢܬܘܢ ܠܒܝܬܐ ܗܢܐ ܘܠܥܒ̈ܕܐ ܗܠܝܢ ܡܫܬܐܣܝܢ ܐܢܬܘܢ
11 ܫܐܠܢ ܐܢܘܢ ܗܟܝܠ ܡܛܠ ܗܝ ܕܐܦ ܢܫܘܕܥ ܠܟ ܘܢܟܬܘܒ ܠܟ ܐܢܫܐ ܪ̈ܝܫܢܝܗܘܢ ܡܟܬܒܘܬ ܫܡ̈ܗܐ ܫܐܠܝܢ ܗܘܝܢ ܠܗܘܢ ܕܩܕܡܝܐ ܕܪ̈ܝܫܢܝܗܘܢ
12 ܗܢܘܢ ܕܝܢ ܦܢܝܘ ܠܢ ܟܕ ܐܡܪܝܢ ܐܝܬܝܢ ܥܒ̈ܕܐ ܕܡܪܝܐ ܗܘ ܕܒܪܐ ܠܫܡܝܐ ܘܠܐܪܥܐ
13 ܘܒܢܐ ܗܘܐ ܒܝܬܐ ܡܢ ܩܕܡ ܫܢܝ̈ܐ ܣܓܝ̈ܐܬܐ ܒܝܕ ܡܠܟܐ ܕܐܝܣܪܝܠ ܪܒܐ ܘܚܝܠܬܢܐ ܘܐܫܬܡܠܝ
14 ܘܡܛܠ ܕܐܒ̈ܗܐ ܕܝܠܢ ܟܕ ܡܪܡܪܘ ܗܘܘ ܚܛܘ ܒܡܪܝܐ ܗܘ ܫܡܝܢܐ ܕܐܝܣܪܝܠ ܐܫܠܡ ܐܢܘܢ ܒܐܝ̈ܕܝܐ ܕܢܒܘܟܕܢܨܪ ܡܠܟܐ ܕܒܒܝܠ ܡܠܟܐ ܕܟܠܕܝ̈ܐ
15 ܘܠܒܝܬܐ ܟܕ ܣܬܪܘ ܐܘܩܕܘ ܘܠܥܡܐ ܫܒܘ ܠܒܒܝܠ
16 ܒܫܢܬܐ ܕܝܢ ܩܕܡܝܬܐ ܟܕ ܡܠܟܐ ܗܘܐ ܟܘܪܫ ܠܡܒܢܐ ܒܝܬܐ ܗܢܐ
17 ܘܠܡ̈ܐܢܐ ܟܗ̈ܢܝܐ ܕܕܗܒܐ ܘܕܣܐܡܐ ܗܠܝܢ ܕܐܦܩ ܗܘܐ ܢܒܘܟܕܢܨܪ ܡܢ ܗܝܟܠܐ ܗܘ ܕܒܐܘܪܝܫܠܡ ܘܣ̣ܡ ܗܘܐ ܐܢܘܢ ܒܗܝܟܠܐ ܕܝܠܗ ܬܘܒ ܐܦܩ ܐܢܘܢ ܟܘܪܫ ܡܠܟܐ ܡܢ ܗܝܟܠܐ ܗܘ ܕܒܒܒܝܠ ܘܐܬܬܫܠܡܘ ܠܙܘܪܒܒܝܠ ܘܠܫܢܒܫܘܪ ܗܘ ܗܘܦܪܟܐ
18 ܘܐܬܦܩܕ ܠܗ ܘܐܘܒܠ ܠܟܠܗܘܢ ܡ̈ܐܢܐ ܗܠܝܢ ܠܡܬܬܣܡܘ ܒܗܝܟܠܐ ܗܘ ܕܒܐܘܪܝܫܠܡ ܘܕܗܝܟܠܗ ܕܡܪܝܐ ܢܬܒܢܐ ܥܠ ܕܘܟܬܗ
19 ܗܝܕܝܢ ܫܢܒܫܘܪ ܗ̇ܘ ܕܟܕ ܐܬܐ ܗܘܐ ܐܪܡܝ ܫܬܐܣ̈ܐ ܕܒܝܬܗ ܕܡܪܝܐ ܗܘ ܕܒܐܘܪܝܫܠܡ ܘܡܢ ܗܘ ܥܕܡܐ ܠܗܫܐ ܟܕ ܡܬܒܢܐ ܠܐ ܢܣܒ ܫܘܡܠܝܐ
20 ܗܫܐ ܗܟܝܠ ܐܢ ܕܝܢܝܢ ܐܢܬܘܢ ܡܠܟܐ ܢܣܬܥܪ ܒܒܝܬ ܢܛܘܪܘܬ ܟܬܒ̈ܐ ܡ̈ܠܟܝܐ ܕܟܘܪܫ ܡܠܟܐ ܗܢܘܢ ܕܒܒܒܝܠ
21 ܘܐܢ ܡܫܟܚܝܢ ܐܢܬܘܢ ܕܥܡ ܦܘܩܕܢܐ ܕܟܘܪܫ ܡܠܟܐ ܗܘܐ ܒܢܝܢܐ ܕܒܝܬܗ ܕܡܪܝܐ ܗܘ ܕܒܐܘܪܝܫܠܡ ܘܡܬܬܕܝܢܐ ܡܢ ܡܪܢ ܡܠܟܐ ܕܝܠܢ ܦܪܘܣܦܘܢܝܘܣ ܢܥܒܕ ܠܢ ܡܛܠ ܗܠܝܢ
22 ܗܝܕܝܢ ܗܘ ܡܠܟܐ ܕܪܝܘܫ ܦܩܕ ܠܡܣܥܪ ܠܒܝܬ ܢܛܘܪܘܬ ܟܬܒ̈ܐ ܗܠܝܢ ܕܣܝܡܝܢ ܒܒܒܝܠ ܘܐܫܬܟܚܘ ܒܩܒܛܝܢܘܣ ܕܒܣܚܪܬܐ ܗܝ ܕܒܡܕܝ ܐܬܪܐ̣ ܕܘܟܬܐ ܚܕܐ ܗܝ ܕܒܗ ܡܥܗܕܢ ܗܘܝ ܗܠܝܢ ܀
23 ܒܫܢܬܐ ܩܕܡܝܬܐ ܟܕ ܡܡܠܟ ܗܘܐ ܟܘܪܫ ܡܠܟܐ ܟܘܪܫ ܦܩܕ ܕܒܝܬܐ ܕܡܪܝܐ ܗܘ ܕܒܐܘܪܝܫܠܡ ܢܬܒܢܐ ܐܝܟܐ ܕܕܒܚܝܢ ܒܝܕ ܢܘܪܐ ܐܡܝܢܐܝܬ
24 ܗ̇ܘ ܕܪܘܡܗ ܕܐܡ̈ܐ ܫ̈ܬܝܢ ܦܬܝܐ ܕܐܡ̈ܐ ܫ̈ܬܝܢ ܒܝܕ ܕܘܡܣ̈ܐ ܕܟܐ̈ܦܐ ܕܦܣܝ̣ܠܝܢ ܬܠܬܐ ܘܕܘܡܣܐ ܕܩܝ̈ܣܐ ܕܡܢܗ ܕܐܬܪܐ ܚܕܬܐ ܚܕ ܘܕܢܦܩܬܐ ܬܬܝܗܒ ܡܢ ܒܝܬܗ ܕܟܘܪܫ ܡܠܟܐ
25 ܘܠܡ̈ܐܢܐ ܟܗ̈ܢܝܐ ܕܒܝܬܗ ܕܡܪܝܐ ܕܕܗܒܐ ܘܕܣܐܡܐ ܗܢܘܢ ܕܐܦܩ ܢܒܘܟܕܢܨܪ ܡܢ ܒܝܬܐ ܗܘ ܕܒܐܘܪܝܫܠܡ ܘܐܘܒܠ ܗܘܐ ܠܒܒܝܠ ܢܬܦܢܘܢ ܠܒܝܬܐ ܗܘ ܕܒܐܘܪܝܫܠܡ ܐܝܟܐ ܕܐܝܬܝܗܘܢ ܗܘܘ ܕܣܝܡܝܢ ܐܝܟܢܐ ܕܢܬܬܣܝܡܘܢ ܬܡܢ
26 ܦܩܕ ܕܝܢ ܕܢܝ̣ܨܦ ܠܣܝܣܢܐ ܗܘܦܪܟܐ ܕܣܘܪܝܐ ܘܕܦܘܢܝܩܐ ܘܠܣܬܪܘܒܘܪܙܢܐ ܘܠܚܒܪ̈ܐ ܕܐܟܚܕܐ ܘܠܗܢܘܢ ܕܡܛܟܣܝܢ ܒܣܘܪܝܐ ܘܒܦܘܢܝܩܐ ܗܝ̈ܓܡܘܢܐ ܠܡܪܚܩܘ ܡܢ ܕܘܟܬܐ ܢܫܒܩܘܢ ܕܝܢ ܠܥܒܕܗ ܕܡܪܝܐ ܙܘܪܒܒܝܠ ܗܘܦܪܟܐ ܕܝܢ ܕܝܗܘܕ ܘܠܩܫ̈ܝܫܐ ܕܝܘ̈ܕܝܐ ܕܠܒܝܬܐ ܗܘ ܠܡܒܢܐ ܥܠܝܗ ܕܕܘܟܬܐ
27 ܐܦ ܐܢܐ ܕܝܢ ܦܩܕܬ ܟܠܢܐܝܬ ܠܡܒܢܐ ܘܠܡܨܕܘ ܐܝܟܢܐ ܕܢܥܒܕܘܢ ܥܡ ܫܒܝܬܐ ܕܝܗܘܕܐ ܥܕܡܐ ܕܡܫܬܡܠܐ ܒܝܬܗ ܕܡܪܝܐ
28 ܘܡܢ ܡܕܐܬܐ ܕܣܘܪܝܐ ܥܡܝܩܬܐ ܘܕܦܘܢܝܩܐ ܝܨܝܦܐܝܬ ܦܘܪܫܢܐ ܢܬܝܗܒ ܠܗܢܘܢ ܐܢܫܐ ܠܕܒܚܬܐ ܠܡܪܝܐ ܠܙܘܪܒܒܝܠ ܗܘܦܪܟܐ ܠܬܘܪ̈ܐ ܘܠܕܟܪ̈ܐ ܘܠܐܡܪ̈ܐ
29 ܒܗ ܒܕܡܘܬܐ ܕܝܢ ܘܚ̈ܛܐ ܘܡܠܚܐ ܘܚܡܪܐ ܘܡܫܚܐ ܐܡܝܢܐܝܬ ܒܟܠ ܫܢܬܐ ܐܟܡܐ ܕܟܗ̈ܢܐ ܗܢܘܢ ܕܒܐܘܪܝܫܠܡ ܡܨܚܝܢ ܕܡܬܛܠܩ ܒܟܠ ܝܘܡܐ ܕܠܐ ܦܘܫܟܐ
30 ܐܝܟܢܐ ܕܢܬܩܪܒܘܢ ܢܘܩ̈ܝܐ ܠܐܠܗܐ ܗ̇ܘ ܡܪܝܡܐ ܚܠܦ ܡܠܟܐ ܘܥܒ̈ܕܘܗܝ ܘܢܨܠܘܢ ܥܠ ܚܝ̈ܐ ܕܝܠܗܘܢ ܀
31 ܘܬܦܩܘܕ ܐܝܟܢܐ ܕܟܠ ܐܝܠܝܢ ܕܐܢ ܢܥܒܪܘܢ ܠܡܕܡ ܡܢ ܐܝܠܝܢ ܕܟܬܝܒ̈ܢ ܐܘ ܐܦ ܢܒܛܠܘܢ ܢܬܢܣܒ ܩܝܣܐ ܡܢ ܕܝܠܗ ܘܥܠܘܗܝ ܢܬܬܠܐ ܘܗܠܝܢ ܕܐܝܬ ܠܗ ܢܗ̣̈ܘܝܢ ܡ̈ܠܟܝܬܐ
32 ܡܛܠ ܗܠܝܢ ܐܦ ܡܪܝܐ ܗܘ ܕܫܡܐ ܕܝܠܗ ܩܪܐ ܬܡܢ ܢܣܪܘܚ ܠܟܠ ܡܠܟܐ ܘܥܡܐ ܗܘ ܕܡܘܫܛ ܐܝܕܐ ܕܝܠܗ ܠܡܟܠܐ ܐܘ ܠܡ̇ܐܒܫܘ ܠܒܝܬܗ ܕܡܪܝܐ ܗܘ ܕܒܐܘܪܝܫܠܡ
33 ܐܢܐ ܡܠܟܐ ܕܪܝܘܫ ܦܩܕܬ ܝܨܝܦܐܝܬ ܕܐܝܟ ܗܠܝܢ ܠܡܗܘܐ
1 Esdras 5 · 1 Esdras 7 · Greek (Septuagint / SBLGNT) · Latin (Vulgate)