Read 1 Esdras 4 side by side with translations · The Final Bible
1 ܘܫܪܝ ܬܪܝܢܐ ܠܡܡܠܠܘ ܗܘ ܕܐܡܪ ܗܘܐ ܡܛܠ ܚܝܠܬܢܘܬܐ ܕܡܠܟܐ
2 ܐܘ ܓܒܪ̈ܐ ܠܘ ܝܬܝܪ ܚܝܠܬܢܝܢ ܒ̈ܢܝܢܫܐ ܕܠܐܪܥܐ ܘܠܝܡܐ ܐܚܝܕܝܢ ܘܠܟܠܗܝܢ ܗܠܝܢ ܕܒܗܘܢ
3 ܡܠܟܐ ܕܝܢ ܚܝܠܬܢܐ ܡܫܠܛ ܥܠܝܗܘܢ ܘܡܪܐ ܗܘ ܕܝܠܗܘܢ ܘܟܠ ܗܘ ܡܐ ܕܐܢ ܕܢܐܡܪ ܠܗܘܢ ܡܫܬܡܥܝܢ
4 ܐܢ ܢܐܡܪ ܠܗܘܢ ܠܡܥܒܕ ܩܪܒܐ ܐܚܪܢܐ ܠܘܬ ܐܚܪܢܐ ܥܒܕܝܢ ܐܢ ܕܝܢ ܢܫܕܪ ܐܢܘܢ ܠܘܬ ܡܩܪ̈ܒܢܐ ܡܗܠܟܝܢ ܘܕܪ̈ܫܝܢ ܛܘܪ̈ܐ ܘܠܫܘܪ̈ܐ ܘܠܦܘܪ̈ܩܣܐ
5 ܘܩܛܠܝܢ ܘܡܬܩܛܠܝܢ ܘܠܡܠܬܐ ܕܡܠܟܐ ܠܐ ܥܒܪܝܢ ܐܢܕܝܢ ܢܙܟܘܢ ܠܡܠܟܐ ܡܝܬܝܢ ܟܠܡܕܡ ܘܐܢ ܢܒܙܘܢ ܘܗܠܝܢ ܐܚܪ̈ܢܝܬܐ ܟܠܗܝܢ
6 ܘܟܠ ܐܝܠܝܢ ܕܠܐ ܡܦܠܚܝܢ ܘܠܐ ܡܩܪܒܝܢ ܐܠܐ ܡܐܟܪܝܢ ܠܐܪܥܐ ܬܘܒ ܡܐ ܕܙܪܥܝܢ ܡܐ ܕܚܨܕܘ ܡܣܩܝܢ ܠܡܠܟܐ ܘܐܚܪܢܐ ܠܐܚܪܢܐ ܟܕ ܐܠܨܝܢ ܡܣܩܝܢ ܡܕܐܬܐ ܠܡܠܟܐ
7 ܘܗܘ ܚܕ ܒܠܚܘܕܘܗܝ ܐܝܬܘܗܝ ܐܢ ܢܐܡܪ ܠܡܩܛܠ ܩܛܠܝܢ ܐܡܪ ܠܡܫܒܩ ܫܒܩܝܢ
8 ܐܡܪ ܠܡܡܚܐ ܡܚܝܢ ܐܡܪ ܠܡܚܪܒܘ ܡܚܪܒܝܢ ܐܡܪ ܠܡܒܢܐ ܒܢܝܢ
9 ܐܡܪ ܠܡܦܣܩ ܦܣܩܝܢ ܐܡܪ ܠܡܢܨܒ ܢܨܒܝܢ
10 ܘܟܠܗ ܥܡܐ ܕܝܠܗ ܘܚ̈ܝܠܘܬܗ ܠܗ ܫܡܥܝܢ ܥܡ ܕܝܢ ܗܠܝܢ ܗܘ ܡܓܣ ܟܕ ܐܟܠ ܘܫܬܐ ܘܕܡܟ
11 ܗܠܝܢ ܕܝܢ ܢܛܪܝܢ ܠܘܬܗ ܘܠܐ ܡܨܝܢ ܟܠܚܕ ܠܡܐܙܠ ܘܠܡܥܒܕ ܠܥܒ̈ܕܐ ܕܝܠܗ ܘܠܐ ܠܐ ܡܫܬܡܥܝܢ ܠܗ
12 ܐܘ ܓܒܪ̈ܐ ܠܘ ܝܬܝܪ ܚܝܠܬܢ ܡܠܟܐ ܡܛܠ ܕܗܟܢܐ ܡܫܬܡܥܢܐ ܐܝܬܘܗܝ ܘܫܬܩ
13 ܗܘ ܕܝܢ ܬܠܝܬܝܐ ܗܘ ܕܐܡܪ ܡܛܠ ܢܫ̈ܐ ܘܫܪܪܐ ܗܢܐ ܕܐܝܬܘܗܝ ܙܘܪܒܒܝܠ ܗܘ ܕܫܠܐܬܝܠ ܡܢ ܫܪܒܬܐ ܕܝܗܘܕܐ ܫܪܝ ܠܡܡܠܠܘ
14 ܓܒܪ̈ܐ ܠܘ ܪܒܐ ܗܘ ܡܠܟܐ ܘܣ̈ܓܝܐܐ ܒܢܝ̈ܢܫܐ ܘܚܡܪܐ ܚܝܠܬܢ ܡܢܘ ܗܟܝܠ ܗܘ ܕܡܙܟܝ ܥܠܝܗܘܢ ܐܘ ܡܢܘ ܗܘ ܕܡܫܠܛ ܥܠܝܗܘܢ
15 ܠܘ ܢܫ̈ܐ ܝ̈ܠܕܢ ܠܡ̈ܠܟܐ ܘܠܟܠܗ ܥܡܐ ܗܘ ܕܫܠܝܛ ܥܠ ܝܡܐ ܘܥܠ ܐܪܥܐ
16 ܘܡܢܗܝܢ ܗܘܐ ܘܗܢܝܢ ܪܒܝܝܢ ܐܢܘܢ ܠܗܢܘܢ ܕܢܨܒܘ ܠܟܪ̈ܡܐ ܡܢ ܗܢܘܢ ܕܚܡܪܐ ܗܘܐ
17 ܘܗܢܝܢ ܥܒ̈ܕܢ ܐܣ̈ܛܠܐ ܕܒܢܝ̈ܢܫܐ ܘܗܢܝܢ ܥܒ̈ܕܢ ܬܫܒܘܚܬܐ ܠܒ̈ܢܝܢܫܐ ܘܠܐ ܡܨܝܢ ܒܢܝ̈ܢܫܐ ܠܡܗܘܐ ܣܛܪ ܡܢ ܢܫ̈ܐ
18 ܐܢ ܕܝܢ ܢܟܢܫܘܢ ܕܗܒܐ ܘܣܐܡܐ ܘܟܠ ܣܘܥܪܢܐ ܫܦܝܪܐ ܘܢܚܙܘܢ ܐܢܬܬܐ ܚܕܐ ܫܦܝܪܐ ܒܚܙܘܐ ܘܒܫܘܦܪܐ
19 ܐܦ ܗܠܝܢ ܟܠܗܝܢ ܟܕ ܫܒܩܝܢ ܘܒܗ ܬܘܝܪܝܢ ܘܟܕ ܦܥܪܝܢ ܦܘܡܐ ܚܝܪܝܢ ܒܗ ܘܟܠܗܘܢ ܠܗ ܪܚܡܝܢ ܡܐܠܠܘܢ ܐܘ ܠܕܗܒܐ ܘܠܣܐܡܐ ܘܠܟܠ ܣܘܥܪܢܐ ܫܦܝܪܐ
20 ܒܪܢܫܐ ܠܐܒܐ ܕܝܠܗ ܫܒܩ ܗܘ ܕܪܒܝܗ ܘܠܐܬܪܐ ܕܝܠܗ ܘܠܘܬ ܐܢܬܬܐ ܕܝܠܗ ܕܒܩ
21 ܘܥܡ ܐܢܬܬܐ ܕܝܠܗ ܫܒܩ ܢܦܫܐ ܘܠܐ ܠܐܒܐ ܥܗܝܕ ܘܠܐ ܠܐܡܐ ܘܠܐ ܠܐܬܪܐ
22 ܘܡܢ ܗܪܟܐ ܙܕܩ ܠܟܘܢ ܠܡܕܥ ܕܢܫ̈ܐ ܡܫܠܛܢ ܥܠܝܟܘܢ ܠܐ ܥܡܠܝܢ ܐܢܬܘܢ ܘܠܐܝܢ ܘܟܠ ܡܕܡ ܠܢܫ̈ܐ ܝܗܒܝܢ ܐܢܬܘܢ ܘܡܝܬܝܢ ܐܢܬܘܢ
23 ܘܢܣܒ ܒܪܢܫܐ ܠܣܝܦܐ ܒܐܝܕܗ ܕܢܐܙܠ ܠܡܚܙܩ ܘܠܡܠܣܛܝܘ ܘܠܡܓܢܒ ܘܒܝܡܐ ܠܡܛܦ ܘܒܢܗܪ̈ܘܬܐ
24 ܘܠܐܪܝܐ ܚܙܐ ܘܒܚܫܘܟܐ ܡܗܠܟ ܘܡܐ ܕܓܢܒ ܘܚܛܦ ܘܫܠܚ ܠܗܝ ܕܪܚܝܡܐ ܡܝܬܐ
25 ܘܣܓܝܐܝܬ ܡܚܒ ܒܪܢܫܐ ܠܐܢܬܬܐ ܡܐܠܠܘܢ ܐܘ ܠܐܒܐ ܘܐܡܐ
26 ܘܣܓ̈ܝܐܐ ܫܢܘ ܒܬܪܥܝܬܐ ܕܝܠܗܘܢ ܡܛܠ ܢܫ̈ܐ ܘܥܒ̈ܕܐ ܗܘܘ ܡܛܠܬܗܝܢ
27 ܘܣܓܝ̈ܐܐ ܐܒܕܘ ܘܛܥܫܘ ܘܦܕܘ ܡܛܠ ܢܫ̈ܐ
28 ܘܗܫܐ ܠܐ ܡܗܝܡܢܝܢ ܐܢܬܘܢ ܠܝ ܠܘ ܪܒܐ ܗܘ ܡܠܟܐ ܒܫܘܠܛܢܐ ܕܝܠܗ ܠܘ ܟܠܗܘܢ ܐܬܪ̈ܘܬܐ ܕܚܠܝܢ ܠܡܓܫܦ ܒܗ
29 ܚܙܐ ܗܘܝܬ ܠܗ ܘܠܐܦܐܡܐ ܗ̇ܝ ܒܪܬܐ ܕܪܒܐ ܐܪܛܩ ܗܘ ܬܡܝܗܐ ܗܝ ܕܪܘܟܬܐ ܕܡܠܟܐ
30 ܘܕܡܪܝܡܐ ܗܘܬ ܠܬܓܐ ܡܢ ܪܝܫܐ ܕܝܠܗ ܘܣܝܡܐ ܗܘܬ ܗܝ ܠܗ ܘܡܫܩܦܐ ܗܘܬ ܠܡܠܟܐ ܒܣܡܠܗ
31 ܘܠܘܬ ܗܠܝܢ ܡܠܟܐ ܟܕ ܦܥܝܪ ܦܘܡܗ ܚܐܪ ܗܘܐ ܒܗ̇ ܘܐܢ ܓܚܟܐ ܗܘܬ ܠܘܬܗ ܓܚܟ ܗܘܐ ܐܢܕܝܢ ܬܬܡܪܡܪ ܥܠܘܗܝ ܡܫܓܫ ܗܘܐ ܠܗ̣̇ ܐܝܟܢܐ ܕܬܬܪܥܐ ܠܗ
32 ܐܘ ܓܒܪ̈ܐ ܐܝܟܢܐ ܠܐ ܚܝ̈ܠܬܢܝܢ ܢܫ̈ܐ ܕܗܟܢܐ ܣܥܪ̈ܢ
33 ܘܗܝܕܝܢ ܡܠܟܐ ܘܪ̈ܘܪܒܢܐ ܚܝܪܝܢ ܗܘܘ ܐܚܪܢܐ ܒܐܚܪܢܐ ܘܫ̇ܪ̣ܝܘ ܠܡܡܠܠܘ ܡܛܠ ܫܪܪܐ
34 ܓܒܪ̈ܐ ܠܐ ܚܝ̈ܠܬܢܝܢ ܢܫ̈ܐ ܪܒܐ ܐܪܥܐ ܘܪܡ ܫܡܝܐ ܘܩܠܝܠ ܒܪܗܛܐ ܫܡܫܐ ܡܛܠ ܕܗܦܟ ܒܚܘܕܪܐ ܕܫܡܝܐ ܘܬܘܒ ܪܗܛ ܠܕܘܟܬܐ ܕܝܠܗ ܒܚܕ ܝܘܡܐ
35 ܠܘ ܪܒܐ ܗܘ ܗܘ ܕܗܠܝܢ ܥܒܕ ܘܗܘ ܫܪܪܐ ܪܒ ܘܚܝܠܬܢ ܛܒ ܡܢ ܟܠ
36 ܟܠܗ ܐܪܥܐ ܠܫܪܪܐ ܩܪܝܐ ܘܫܡܝܐ ܠܗ ܡܒܪܟ ܘܟܠܗܘܢ ܥܒ̈ܕܐ ܙܝܥܝܢ ܘܪܥܠܝܢ ܘܠܐ ܐܝܬ ܥܡܗ ܕܗܢܐ ܥܘܠܐ ܘܠܐ ܡܕܡ
37 ܥܘܠ ܡܠܟܐ ܥ̈ܘܠܢ ܢܫ̈ܐ ܥ̈ܘܠܝܢ ܟܠܗܘܢ ܒܢܝ̈ܐ ܕܐܢܫܐ ܘܥܘ̈ܠܝܢ ܟܠܗܘܢ ܥܒ̈ܕܐ ܕܝܠܗܘܢ ܟܠܗܘܢ ܕܐܝܟ ܗܠܝܢ ܘܠܐ ܐܝܬܘܗܝ ܒܗܘܢ ܫܪܪܐ ܘܒܥܘܠܘܬܐ ܕܝܠܗܘܢ ܐܒܕܝܢ
38 ܘܫܪܪܐ ܩܝܡ ܘܚܝܠܬܢ ܠܥܠܡ ܘܐܚܝܕ ܠܥܠܡ ܕܥܠܡ̈ܐ
39 ܘܠܐ ܐܝܬ ܠܘܬܗ ܠܡܣܒ ܒܦܪܨܘܦܐ ܘܠܐ ܫܘܚܠܦܐ ܐܠܐ ܗܢܝܢ ܕܟ̈ܐܢܢ ܥܒܕ ܡܢ ܟܠܗܘܢ ܗܢܘܢ ܕܥܘ̈ܠܝܢ ܘܒ̈ܝܫܝܢ ܘܟܠܗܘܢ ܫܦܝܪ ܡܨܛܒܝܢ ܒܥܒ̈ܕܐ ܕܝܠܗ
40 ܘܠܐ ܐܝܬ ܒܕܝܢܐ ܕܝܠܗ̣ ܘܠܐ ܡܕܡ ܥ̣̇ܘܠܐ ܀ ܘܕܝܠܗ ܗܘ ܚܝܠܐ ܘܡܠܟܘܬܐ ܘܫܘܠܛܢܐ ܘܪܒܘܬܐ ܕܟܠܗܘܢ ܥܡ̈ܡܐ ܡܒܪܟܐ ܗܘ ܐܠܗܗ ܕܫܪܪܐ̣
41 ܘܫܬܩ ܡܢ ܕܠܡܡܠܠܘ ܘܟܠܗ ܥܡܐ ܗܝܕܝܢ ܐܙܥܩ ܘܐܡܪܘ ܪܒ ܗܘ ܫܪܪܐ ܘܝܬܝܪ ܚܝܠܬܢ
42 ܗܝܕܝܢ ܡܠܟܐ ܐܡܪ ܠܗ ܫܐܠ ܗܘ ܡܐ ܕܨܒܐ ܐܢܬ ܝܬܝܪ ܡܢ ܗܠܝܢ ܕܟܬܝܒ̈ܢ ܘܢܬܠ ܠܟ ܒܗܘ ܙܢܐ ܕܐܫܬܟܚܬ ܝܬܝܪ ܚܟܝܡܐ ܘܥܠ ܓܢܒܝ ܬܬܒ ܘܒܪ ܓܢܣܐ ܕܝܠܝ ܬܬܩܪܐ
43 ܗܝܕܝܢ ܐܡܪ ܠܡܠܟܐ ܐܬܥܗܕ ܠܢܕܪܐ ܕܢܕܪܬ ܠܡܒܢܐ ܠܐܘܪܝܫܠܡ ܒܝܘܡܐ ܗܘ ܕܠܬܓܐ ܕܝܠܟ ܩܒܠܬ
44 ܘܠܟܠܗܘܢ ܡ̈ܐܢܐ ܕܐܬܢܣܒܘ ܡܢ ܐܘܪܝܫܠܡ ܠܡܫܕܪܘ ܗܠܝܢ ܕܦܪܫ ܗܘܐ ܟܘܪܫ ܟܕ ܢܕܪ ܗܘܐ ܠܡܫܕܪܘ ܠܬܡܢ
45 ܘܐܢܬ ܢܕܪܬ ܠܡܒܢܐ ܬܡܢ ܗܝܟܠܐ ܗܘ ܕܐܘܩܕܘ ܐܕܘܡܝ̈ܐ ܟܕ ܚܪܒܬ ܝܗܘܕ ܡܢ ܟ̈ܠܕܝܐ
46 ܘܗܫܐ ܗܕܐ ܐܝܬܝܗ ܗܝ ܕܠܟ ܡܦܝܣ ܐܢܐ ܡܪܝ ܡܠܟܐ ܘܗܝ ܕܫܐܠ ܐܢܐ ܠܟ ܘܗܕܐ ܐܝܬܝܗ ܪܒܘܬܐ ܗܝ ܕܡܢܟ ܒܥܐ ܐܢܐ ܗܟܝܠ ܐܝܟܢܐ ܕܬܥܒܕ ܠܢܕܪܐ ܗܘ ܕܢܕܪܬ ܠܡܠܟܐ ܗܘ ܕܫܡܝܐ ܠܡܥܒܕ ܡܢ ܦܘܡܐ ܕܝܠܟ
47 ܗܝܕܝܢ ܟܕ ܩܡ ܕܪܝܘܫ ܡܠܟܐ ܢܫܩܗ ܘܟܬܒ ܠܗ ܐܓܪ̈ܬܐ ܠܘܬ ܟܠܗܘܢ ܐܘ̈ܩܘܢܘܡܐ ܘܛܘܦܪ̈ܟܘ ܘܣ̈ܛܪܛܝܓܐ ܘܣܛܪ̈ܦܐ ܐܝܟܢܐ ܕܢܠܘܘܢܝܗܝ ܘܠܗܢܘܢ ܕܥܡܗ ܟܠܗܘܢ ܕܣܠܩܝܢ ܠܡܒܢܐ ܠܐܘܪܝܫܠܡ
48 ܘܠܟܠܗܘܢ ܛܘܦܪ̈ܟܘ ܕܒܣܘܪܝܐ ܥܡܝܩܬܐ ܘܦܘܢܝܩܐ ܘܠܗܢܘܢ ܕܒܠܒܢܢ ܟܬܒ ܐܓܪ̈ܬܐ ܠܡܥܒܪܘ ܩ̈ܝܣܐ ܕܐܪܙܐ ܡܢ ܠܒܢܢ ܠܐܘܪܝܫܠܡ ܘܐܝܟܢܐ ܕܢܒܢܘܢ ܥܡܗ ܠܡܕܝܢܬܐ
49 ܘܟܬܒ ܠܟܠܗܘܢ ܝܘ̈ܕܝܐ ܗܢܘܢ ܕܣܠܩܝܢ ܡܢ ܡܠܟܘܬܐ ܠܝܗܘܕ ܚܠܦ ܚܘܪܪܐ ܕܟܠ ܚܝܠܬܢܐ ܘܣܛܪ̈ܦܐ ܘܛܘܦܪ̈ܟܐ ܘܐܩܘܢܘܡܐ ܠܐ ܢܣܥܐ ܥܠ ܬܪ̈ܥܐ ܕܝܠܗܘܢ
50 ܘܕܟܠ ܐܬܪܐ ܗܘ ܕܐܚܕܝܢ ܕܠܐ ܡܕܐܬܐ ܠܗܘܢ ܢܗܘܐ ܐܝܬܘܗܝ ܘܐܝܟܢܐ ܕܐܕܘ̈ܡܝܐ ܢܪܦܘܢ ܠܩܘܪ̈ܝܐ ܕܐܚܝܕܝܢ ܡܢ ܕܝܘ̈ܕܝܐ
51 ܘܠܒܢܝܢܐ ܕܗܝܟܠܐ ܢܬܝܗܒ ܒܟܠ ܫܢܬܐ ܟܟܪ̈ܐ ܕܟܣܦܐ ܥܣܪ̈ܝܢ ܥܕܡܐ ܕܡܬܒܢܐ
52 ܘܕܥܠ ܡܕܒܚܐ ܝܩ̈ܕܐ ܫ̈ܠܡܐ ܢܣܩܘܢ ܒܟܠ ܝܘܡܐ ܐܝܟܢܐ ܕܐܝܬ ܠܗܘܢ ܦܘܩܕܢܐ ܠܡܩܪܒܘ ܘܐܚܪ̈ܢܝܬܐ ܥܣܪ ܟܟܪ̈ܐ ܒܟܠ ܫܢܬܐ
53 ܘܕܠܟܠܗܘܢ ܗܢܘܢ ܕܡܫܬܘܫܛܝܢ ܡܢ ܒܒܝܠ ܠܡܒܢܐ ܠܡܕܝܢܬܐ ܢܗܘܐ ܐܝܬ ܚܘܪܪܐ ܘܠܗܘܢ ܘܠܒ̈ܢܝܐ ܕܝܠܗܘܢ ܘܠܟܠܗܘܢ ܟܗ̈ܢܐ ܗܢܘܢ ܕܡܫܬܘܫܛܝܢ
54 ܟܬܒ ܕܝܢ ܘܠܝܗܘܒܘܬ ܣܘܢܩܢܐ ܘܠܐܣܛܠܐ ܟܗܢܝܬܐ ܒܗܝ ܕܡܫܡܫܝܢ ܗܘܘ ܒܗ
55 ܘܠܠܘ̈ܝܐ ܟܬܒ ܠܡܬܠ ܝܗܘܒܘܬ ܣܘܢܩܢܐ̣ ܥܕܡܐ ܠܝܘܡܐ ܕܢܫܬܡܠܐ ܒܝܬܐ ܘܐܘܪܝܫܠܡ ܬܬܒܢܐ
56 ܘܠܟܠܗܘܢ ܗܢܘܢ ܕܢܛܪܝܢ ܠܡܕܝܢܬܐ ܟܬܒ ܠܡܬܠ ܠܗܘܢ ܦܣܐ ܘܐܦܣ̈ܢܝܬܐ
57 ܘܫܕܪ ܟܠܗܘܢ ܡ̈ܐܢܐ ܗܠܝܢ ܕܦܪܫ ܟܘܪܫ ܡܠܟܐ ܡܢ ܒܒܝܠ ܘܟܠܗܝܢ ܗܠܝܢ ܕܐܡܪ ܟܘܪܫ ܠܡܥܒܕ ܐܦ ܗܘ ܦܩܕ ܠܡܥܒܕ ܘܠܡܫܕܪܘ ܠܐܘܪܝܫܠܡ ܀
58 ܘܗܝܕܝܢ ܢܦܩ ܗܘ ܝܢܣܩܐ ܘܟܕ ܐܪܝܡ ܠܦܪܨܘܦܗ ܠܫܡܝܐ ܠܘܩܒܠ ܐܘܪܝܫܠܡ ܒܪܟ ܠܡܠܟܐ ܕܫܡܝܐ ܟܕ ܐܡܪ
59 ܡܢܟ ܗܝ ܙܟܘܬܐ ܘܡܢܟ ܗܝ ܚܟܡܬܐ ܘܕܝܠܟ ܗܝ ܬܫܒܘܚܬܐ ܘܐܢܐ ܒܪ ܒܝܬܐ ܕܝܠܟ
60 ܡܒܪܟܐ ܐܝܬܝܟ ܗܘ ܕܝܗܒܬ ܠܝ ܚܟܡܬܐ ܘܠܟ ܡܘܕܐ ܐܢܐ ܡܪܝܐ ܕܐܒܗ̈ܬܐ
61 ܘܢܣܒ ܠܐܓܪ̈ܬܐ ܘܢܦܩ ܘܐܬܐ ܠܒܒܝܠ ܘܐܘܕܥ ܠܐܚ̈ܐ ܕܝܠܗ ܟܠܗܘܢ
62 ܘܒܪܟܘ ܠܐܠܗܐ ܕܐܒܗ̈ܬܐ ܕܝܠܗܘܢ ܡܛܠ ܕܝܗܒ ܠܗܘܢ ܢܝܚܐ ܘܫܘܒܩܢܐ
63 ܠܡܣܩ ܘܠܡܒܢܐ ܠܐܘܪܫܠܡ ܘܠܗܝܟܠܐ ܗܘ ܕܐܫܬܡܗ ܫܡܐ ܕܝܠܗ ܥܠܘܗܝ ܘܫܬܝܢ ܗܘܘ ܥܡ ܡܘܣܝ̈ܩܐ ܘܚܕܘܬܐ ܝܘ̈ܡܬܐ ܫܒܥܐ
1 Esdras 3 · 1 Esdras 5 · Greek (Septuagint / SBLGNT) · Latin (Vulgate)