Read 1 Esdras 3 side by side with translations · The Final Bible
1 ܘܡܠܟܐ ܕܪܝܘܫ ܥܒܕ ܩܘܒܠܐ ܪܒܐ ܠܟܠܗܘܢ ܕܬܚܘܬܘܗܝ ܘܠܟܠܗܘܢ ܝܠܝ̈ܕܝ ܒܝܬܐ ܕܝܠܗ ܘܠܟܠܗܘܢ ܪ̈ܘܪܒܢܐ ܕܡܕܝ ܘܕܦܪܣ
2 ܘܠܟܠܗܘܢ ܣܛܪ̈ܦܐ ܘܐܣܛܪ̈ܛܝܓܐ ܘܛܘܦܪ̈ܟܘ ܗܢܘܢ ܕܬܚܘܬܘܗܝ ܡܢ ܗܢܕܝܐ ܥܕܡܐ ܠܟܘܫ ܒܡܐܐ ܘܥܣܪ̈ܝܢ ܘܫܒܥ ܣܛܪ̈ܦܘܬܐ
3 ܘܐܟܠܘ ܘܐܫܬܝܘ ܘܟܕ ܣܒܥܘ ܗܦܟܘ ܗܘ ܕܝܢ ܕܪܝܘܫ ܡܠܟܐ ܗܦܟ ܠܩܝܛܘܢܐ ܘܕܡܟ ܘܕܐܬܬܥܝܪ ܗܘܐ
4 ܗܝܕܝܢ ܬܠܬܐ ܝܢܣܩ̈ܐ ܗܢܘܢ ܢܛܪ̈ܝ ܦܓܪܐ ܗܠܝܢ ܕܢܛܪܝܢ ܠܦܓܪܐ ܕܡܠܟܐ ܐܡܪܘ ܐܚܪܢܐ ܠܘܬ ܐܚܪܢܐ
5 ܢܐܡܪ ܟܠܚܕ ܡܢܢ ܚܕܐ ܡܠܬܐ ܗܝ ܕܝܬܝܪ ܚܝܠܬܢܝܐ ܘܗܘ ܕܐܢ ܬܬܚܙܐ ܡܠܬܐ ܕܝܠܗ ܕܝܬܝܪ ܚܟܝܡܐ ܡܢ ܕܚܒܪܗ ܢܬܠ ܠܗ ܕܪܝܘܫ ܡܠܟܐ ܡܘܗ̈ܒܬܐ ܪ̈ܘܪܒܬܐ ܘܕܙܟܘ̈ܬܐ ܪ̈ܘܪܒܬܐ
6 ܘܐܪ̈ܓܘܢܐ ܠܡܬܥܛܦܘ ܘܒܕܗܒܐ ܢܫܬܐ ܘܥܠ ܕܗܒܐ ܢܕܡܟ ܘܡܪܟܒܬܐ ܕܪܟܘܒܗ ܕܕܗܒܐ ܘܩܪܕܪܝܢ ܒܘܨܝܬܐ ܘܙܝܪܐ ܥܠ ܩܕܠܐ
7 ܘܬܪܝܢܐ ܢܬܒ ܕܕܪܝܘܫ ܡܛܠ ܚܟܡܬܐ ܕܝܠܗ ܘܒܪ ܓܢܣܐ ܕܕܪܝܘܫ ܢܬܩܪܐ
8 ܘܗܝܕܝܢ ܟܕ ܟܬܒܘ ܟܠܚܕ ܠܡܠܬܐ ܕܝܠܗ ܚܬܡܘ ܘܣܡܘ ܠܬܚܬ ܡܢ ܐܣ̈ܕܐ ܕܕܪܝܘܫ ܡܠܟܐ ܘܐܡܪܘ
9 ܕܡܐ ܕܐܬܬܥܝܪ ܡܠܟܐ ܢܬܠܘܢ ܠܗ ܠܟܬܒܐ ܘܗܘ ܡܢ ܕܐܢ ܢܕܘܢ ܡܠܟܐ ܘܬܠܬܐ ܪ̈ܘܪܒܢܐ ܕܦܪܣ ܕܡܠܬܐ ܕܝܠܗ ܝܬܝܪ ܚܟܝܡܐ ܠܗ ܬܬܝܗܒ ܙܟܘܬܐ ܐܝܟܢܐ ܕܟܬܝܒ
10 ܚܕ ܚܕ ܗܟܝܠ ܟܬܒܘ ܝܬܝܪ ܚܝܠܬܢ ܚܡܪܐ
11 ܐܚܪܢܐ ܟܬܒ ܝܬܝܪ ܚܝܠܬܢ ܡܠܟܐ
12 ܗܘ ܬܠܝܬܝܐ ܟܬܒ ܝܬܝܪ ܚܝ̈ܠܬܢܝܢ ܢܫ̈ܐ ܝܬܝܪ ܡܢ ܟܠܡܕܡ ܙܟܐ ܫܪܪܐ
13 ܘܡܐ ܕܐܬܬܥܝܪ ܡܠܟܐ ܟܕ ܢܣܒܘܗܝ ܠܟܬܒܐ ܝܗܒܘܗܝ ܠܗ ܘܩܪܐ
14 ܘܫܕܪ ܩܪܐ ܠܟܠܗܘܢ ܪ̈ܘܪܒܢܐ ܕܦܪܣ ܘܕܡܕܝ ܘܠܐܣܛܘܪ̈ܦܐ ܘܠܐܣܛܪ̈ܛܝܓܐ ܘܠܛܘܦܪ̈ܟܘ ܘܠܐܦܛܘ ܘܝܬܒܘ ܒܝܬ ܓܠܝܢܐ ܘܐܬܩܪܝ ܗܘ ܟܬܒܐ ܩܕܡܝܗܘܢ
15 ܘܐܡܪܘ ܩܪܘ ܐܢܘܢ ܠܝܢܣ̈ܩܐ ܘܗܢܘܢ ܢܫܘܕܥܘܢ ܠܡ̈ܠܐ ܕܝܠܗܘܢ ܘܐܬܩܪܝܘ ܘܥܠܘ
16 ܘܐܡ̣ܪܘ ܠܗܘܢ ܐܘܕܥܘ ܠܢ ܡܛܠ ܗܠܝܢ ܕܟ̈ܬܝܒܢ ܀ ܘܫ̇ܪ̣ܝ ܩܕܡܝܐ ܕܐܡ̣ܪ ܗܘܐ ܡܛܠ ܚܝܠܗ ܕܚܡܪܐ̣ ܘܐܡ̣ܪ ܗܟܢܐ
17 ܓܒܪ̈ܐ ܐܝܟܢܐ ܠܘ ܝܬܝܪ ܚܝܠܬܢ ܚܡܪܐ ܝܬܝܪ ܡܢ ܟܠܗܘܢ ܒܢܝܢ̈ܫܐ ܗ̇ܢܘܢ ܕܫ̇ܬܝܢ ܠܗ ܡ̇ܛܥܐ ܠܬܪܥܝܬܐ
18 ܘܕܡܠܟܐ ܘܕܝܬܡܐ ܥܒܕ ܬܪܥܝܬܐ ܚܕܐ ܘܕܒܪ ܒܝܬܐ ܘܕܒܪ ܚܐܪ̈ܐ ܘܕܡܣܟܢܐ ܘܕܥܬܝܪܐ
19 ܘܟܠ ܬܪܥܝܬܐ ܡܫܚܠܦ ܘܠܒܘܣܡܐ ܘܠܚܕܘܬܐ ܘܠܐ ܥܗܝܕ ܟܠ ܥܩܬܐ ܘܟܠ ܚܘܒܬܐ
20 ܘܟܠܗܘܢ ܠܒܘ̈ܬܐ ܥܒܕ ܥܬܝܪ̈ܐ ܘܠܐ ܥܗܝܕ ܠܡܠܟܐ ܘܠܐ ܠܣܛܪܦܐ ܘܟܠܗܝܢ ܒܝܕ ܟܟܪ̈ܐ ܥܒܕ ܠܡܡܠܠܘ
21 ܘܠܐ ܥܗܝܕ ܐܡܬܝ ܕܫܬܝܢ ܠܡܪܚܡ ܠܪ̈ܚܡܐ ܘܠܐܚ̈ܐ ܘܒܬܪ ܠܘ ܣܓܝ ܫܡܛܝܢ ܣܝ̈ܦܐ
22 ܘܐܡܬܝ ܕܡܢ ܚܡܪܐ ܢܩܘܡܘܢ ܠܐ ܥܗܝܕܝܢ ܗܠܝܢ ܕܣܥܪܘ
23 ܐܘ ܓܒܪ̈ܐ ܠܘ ܝܬܝܪ ܚܝܠܬܢ ܚܡܪܐ ܕܗܟܢܐ ܐ̇ܠܨ ܠܡܥܒܕ ܘܫܬܩ ܟܕ ܗܟܢܐ ܐܡܪ
1 Esdras 2 · 1 Esdras 4 · Greek (Septuagint / SBLGNT) · Latin (Vulgate)