Read Zechariah 13 side by side with translations · The Final Bible
1 ⲁⲩⲱ ϥⲛⲁϣⲱⲡⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲛϭⲓⲙⲁ ⲛⲓⲙ ⲉⲧⲟⲩⲛⲁⲟⲩⲱⲛ ⲙⲙⲟϥ ϥⲛⲁϣⲱⲡⲉ ⲛⲏⲓ ⲛⲇⲁⲩⲉⲓⲇ ⲁⲩⲱ ⲥⲉⲛⲁⲟⲩⲱⲛ ⲛⲟⲩⲡⲩⲅⲏ ⲙⲡⲏⲓ ⲛⲇⲁⲩⲉⲓⲇ ⲙⲛⲛⲉⲧⲟⲩⲏϩ ϩⲛⲧϩⲓⲉⲣⲟⲩⲥⲁⲗⲏⲙ
2 ⲁⲩⲱ ⲥⲛⲁϣⲱⲡⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲡⲉϫⲉⲡϫⲟⲉⲓⲥ ⲛⲛϭⲟⲙ ϫⲉϯⲛⲁϥⲱⲧⲉ ⲉⲃⲟⲗ ⲙⲡⲣⲁⲛ ⲛⲛⲉⲓⲇⲱⲗⲟⲛ ϩⲓϫⲙⲡⲕⲁϩ ⲛⲥⲉⲧⲙⲕⲟⲧⲟⲩ
3 ⲁⲩⲱ ⲉϣⲱⲡⲉ ⲉⲣϣⲁⲛ ⲟⲩⲣⲱⲙⲉ ⲡⲣⲟⲫⲏⲧⲉⲩⲉ ⲛⲟⲩⲱϩⲙ ⲛⲥⲉϫⲟⲟⲥ ⲛⲁϥ ⲛϭⲓⲡⲉϥⲉⲓⲱⲧ ⲙⲛⲧⲉϥⲙⲁⲁⲩ ⲛⲧⲁⲩϫⲡⲟϥ ϫⲉⲛⲅⲛⲁⲱⲛϩ ⲁⲛ ϫⲉⲁⲕϫⲱ ⲛϩⲛⲙⲛⲧⲛⲟⲩϫ ϩⲙⲡⲣⲁⲛ ⲙⲡϫⲟⲉⲓⲥ ⲁⲩⲱ ⲉⲩⲉⲥⲱⲛϩϥ ⲛϭⲓⲡⲉϥⲉⲓⲱⲧ ⲙⲛⲧⲉϥⲙⲁⲁⲩ ⲛⲧⲁⲩϫⲡⲟϥ ϩⲙⲡⲧⲣⲉϥⲡⲣⲟⲫⲏⲧⲉⲩⲉ
4 ⲁⲩⲱ ⲉⲥⲛⲁϣⲱⲡⲉ ϩⲙⲡⲉϩⲟⲟⲩ ⲉⲧⲙⲙⲁⲩ ⲥⲉⲛⲁϫⲓϣⲓⲡⲉ ⲛϭⲓⲛⲉⲡⲣⲟⲫⲏⲧⲏⲥ ⲡⲟⲩⲁ ⲡⲟⲩⲁ ϩⲛⲧⲉϥϩⲟⲣⲁⲥⲓⲥ ϩⲙⲡⲧⲣⲉϥⲡⲣⲟⲫⲏⲧⲉⲩⲉ ⲁⲩⲱ ⲉⲩϯ ϩⲓⲱⲟⲩ ⲛϩⲉⲛϭⲟⲟⲩⲛⲉ ⲉⲃⲟⲗ ϫⲉⲁⲩϫⲓϭⲟⲗ
5 ⲁⲩⲱ ϥⲛⲁϫⲟⲟⲥ ϫⲉⲁⲛⲅ ⲟⲩⲡⲣⲟⲫⲏⲧⲏⲥ ⲁⲛ ⲁⲛⲟⲕ ⲉⲃⲟⲗ ϫⲉⲟⲩⲣⲱⲙⲉ ⲡⲉ ⲛⲧⲁϥϫⲡⲟⲓ ⲁⲩⲱ ⲁϥⲧⲥⲁⲃⲟⲓ ϫⲓⲛⲧⲁⲙⲛⲧϣⲏⲣⲉ ϣⲏⲙ
6 ⲁⲩⲱ ϯⲛⲁϫⲟⲟⲥ ⲛⲁϥ ϫⲉⲟⲩ ⲛⲉ ⲛⲉⲓⲥⲏϣⲉ ⲉⲧϩⲛⲧⲙⲏⲧⲉ ⲛⲛⲉⲕϭⲓϫ ⲁⲩⲱ ϥⲛⲁϫⲟⲟⲥ ⲛⲁⲓ ϫⲉⲛⲁⲓ ⲛⲉ ⲛⲧⲁⲩⲧⲁⲁⲩ ⲛⲁⲓ ϩⲙⲛⲏⲓ ⲙⲡⲁⲙⲉⲣⲓⲧ
7 ⲧⲥⲏϥⲉ ⲧⲱⲟⲩⲛ ϩⲓϫⲙⲡϣⲱⲥ ⲁⲩⲱ ⲉϫⲙⲡⲣⲱⲙⲉ ⲡⲉϥⲣⲙⲛϯⲙⲉ ⲡⲉϫⲉⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲣⲱϩⲧ ⲙⲡϣⲱⲥ ⲁⲩⲱ ⲙⲁⲣⲟⲩϫⲱⲱⲣⲉ ⲉⲃⲟⲗ ⲛϭⲓⲛⲉⲥⲟⲟⲩ ⲁⲩⲱ ϯⲛⲁⲉⲓⲛⲉ ⲛⲧⲁϭⲓϫ ⲉϫⲛⲛⲕⲟⲩⲓ ⲛϣⲟⲟⲥ
8 ⲁⲩⲱ ϥⲛⲁϣⲱⲡⲉ ⲙⲡⲕⲁϩ ⲧⲏⲣϥ ⲡⲉϫⲉⲡϫⲟⲉⲓⲥ ϫⲉⲟⲩⲱⲛ ⲥⲛⲁⲩ ⲥⲉⲛⲁⲧⲁⲕⲟ ⲛⲥⲉⲱϫⲛ ⲡⲟⲩⲛⲉ ϣⲟⲙⲛⲧ ⲇⲉ ϥⲛⲁϣⲱϫⲡ ⲛϩⲏⲧϥ
9 ⲁⲩⲱ ⲡⲟⲩⲛ ⲛϣⲟⲙⲛⲧ ϯⲛⲁⲛⲧϥ ⲉⲃⲟⲗ ϩⲓⲧⲛⲟⲩⲕⲱϩⲧ ⲛⲧⲁⲡⲁⲥⲧⲟⲩ ⲛⲧϩⲉ ⲙⲡϩⲁⲧ ⲉϣⲁⲩⲡⲁⲥⲧϥ ⲁⲩⲱ ϯⲛⲁⲇⲟⲕⲓⲙⲁⲍⲉ ⲙⲙⲟⲟⲩ ⲛⲧϩⲉ ⲙⲡⲛⲟⲩⲃ ⲉϣⲁⲩⲇⲟⲕⲓⲙⲁⲍⲉ ⲙⲙⲟϥ ⲛⲧⲟϥ ϥⲛⲁⲉⲡⲓⲕⲁⲗⲓ ⲙⲡⲁⲣⲁⲛ ⲁⲩⲱ ⲁⲛⲟⲕ ϯⲛⲁⲥⲱⲧⲙ ⲉⲣⲟϥ ⲧⲁϫⲟⲟⲥ ϫⲉⲡⲁⲓ ⲡⲉ ⲡⲁⲗⲁⲟⲥ ⲁⲩⲱ ⲛⲧⲟϥ ϥⲛⲁϫⲟⲟⲥ ϫⲉⲛⲧⲟⲕ ⲡⲉ ⲡϫⲟⲉⲓⲥ ⲡⲁⲛⲟⲩⲧⲉ
Zechariah 12 · Zechariah 14 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)