Song of Solomon 1 — Coptic (Sahidic)

1 ⲡϫⲱ ⲛⲧⲉⲛⲓϫⲱ ⲉⲧⲉⲡⲁⲥⲟⲗⲟⲙⲱⲛ ⲡⲉ ⲉϥϫⲱ ⲙⲙⲟⲥ ϫⲉ

2 ⲙⲁⲣⲉϥϯⲡⲉⲓ ⲉⲣⲱⲓ ⲉⲃⲟⲗ ϩⲛⲙⲡⲉⲓⲛⲧⲉⲧⲉϥⲧⲁⲡⲣⲟ ϫⲉⲛⲁⲛⲟⲩⲛⲉⲕⲉⲕⲓⲃⲉ ⲛϩⲟⲩⲉ ⲡⲏⲣⲡ

3 ⲁⲩⲱ ⲡⲉⲥⲧⲟⲓ ⲛⲛⲉⲕⲥⲟϭⲛ ϥϣⲱϣ ⲉϩⲟⲩⲉⲛϩⲏⲛⲉ ⲧⲏⲣⲟⲩ ⲡⲉⲕⲣⲁⲛ ⲟⲩⲥⲟϭⲛ ⲡⲉ ⲉⲁⲩⲥⲙⲟⲩ ⲉⲣⲟϥ ⲁⲩⲱ ⲉϥⲡⲏⲛ ⲉⲃⲟⲗ ⲉⲧⲃⲉⲡⲁⲓ ⲁⲛϣⲉⲉⲣⲉ ϣⲏⲙ ⲙⲉⲣⲓⲧⲕ ⲁⲩⲥⲟⲕⲕ ⲛⲁⲩ ⲉⲡⲁϩⲟⲩ

4 ⲉⲛⲛⲁⲡⲱⲧ ⲉⲟⲩⲁϩⲛ ⲛⲥⲁⲡⲉⲥⲧⲟⲓ ⲛⲛⲉⲕⲥⲟϭⲛ ⲁⲡⲣⲣⲟ ϫⲓ ⲙⲙⲟⲓ ⲉϩⲟⲩⲛ ⲉⲡⲉϥⲧⲁⲙⲉⲓⲟⲛ ⲧⲛⲛⲁⲧⲉⲗⲏⲗ ϭⲉ ⲛⲧⲛⲉⲩⲫⲣⲁⲛⲉ ⲛϩⲏⲧⲉ ⲧⲛⲛⲁⲙⲉⲣⲉ ⲛⲟⲩⲉⲕⲓⲃⲉ ⲉϩⲟⲩⲉⲡⲏⲣⲡ ϫⲉⲁⲡⲉⲧⲥⲟⲩⲧⲱⲛ ⲙⲉⲣⲓⲧⲉ

5 ⲁⲛⲟⲕ ⲁⲛⲅⲟⲩⲕⲁⲙⲏ ⲁⲗⲗⲁ ⲛⲉⲥⲱⲉⲓ ϩⲛⲛϣⲉⲉⲣⲉ ⲙⲡⲓⲥⲣⲁⲏⲗ ⲛⲧϩⲉ ⲛⲛⲉⲥⲕⲏⲛⲏ ⲙⲉⲛ ⲛⲕⲏⲇⲁⲣ ⲛⲧϩⲉ ⲇⲉ ⲛⲛⲇⲉⲣⲣⲓⲥ ⲛⲥⲟⲗⲟⲙⲱⲛ

6 ⲙⲡⲣϭⲱϣⲧ ⲉⲣⲟⲓ ϫⲉⲁⲛⲅⲟⲩⲕⲁⲙⲏ ⲁⲛⲟⲕ ⲡⲣⲏ ⲡⲉⲛⲧⲁϥⲡⲱϣⲥ ⲙⲙⲟⲓ ⲁϥⲕⲁⲁⲧ ⲛⲥⲱϥ ⲛϣⲏⲣⲉ ⲛⲧⲁⲙⲁⲁⲩ ⲁⲩⲙⲓϣⲉ ⲛⲙⲙⲁⲓ ⲁⲩⲕⲁⲁⲧ ⲉⲣⲟⲉⲓⲥ ⲉⲛⲙⲁ ⲛⲉⲗⲟⲟⲗⲉ ⲡⲁⲙⲁ ⲛⲉⲗⲟⲟⲗⲉ ⲣⲱ ⲁⲛⲟⲕ ⲙⲡⲓⲣⲟⲉⲓⲥ ⲉⲣⲟϥ

7 ⲙⲁⲧⲁⲙⲟⲓ ϭⲉ ⲡⲉⲛⲧⲁⲧⲁⲯⲩⲭⲏ ⲙⲉⲣⲓⲧϥ ϫⲉⲉⲕⲙⲟⲟⲛⲉ ⲧⲱⲛ ⲁⲩⲱ ⲉⲕⲣϣⲁⲓⲣⲉ ⲧⲱⲛ ⲙⲡⲛⲁⲩ ⲙⲙⲉⲉⲣⲉ ⲙⲡⲣⲧⲣⲁϭⲟⲟⲗⲉⲧ ⲧⲁⲓ ⲉϫⲛⲛⲁⲅⲉⲗⲏ ⲛⲛⲉⲕϣⲃⲉⲉⲣ

8 ⲉϣⲱⲡⲉ ⲉⲣⲉⲧⲙⲥⲟⲩⲱⲛⲧ ⲧⲉⲧⲛⲉⲥⲱⲥ ϩⲛⲛⲉϩⲓⲟⲙⲉ ⲉⲓⲥ ⲁⲙⲏ ⲉⲃⲟⲗ ⲛⲧⲉⲉⲧϩⲁⲏ ⲛⲛⲟϩⲉ ⲛⲧⲉⲙⲟⲟⲛⲉ ⲛⲛⲟⲩⲃⲁⲁⲙⲡⲉ ϩⲛⲛⲥⲕⲏⲛⲏ ⲛⲛϣⲱⲱⲥ

9 ⲧⲉⲧϩⲓⲧⲟⲩⲱⲓ ⲁⲓⲧⲛⲧⲱⲛⲉ ⲉⲧⲁϩⲧⲱⲣⲉ ϩⲛⲛϩⲁⲣⲙⲁ ⲙⲫⲁⲣⲁⲱ

10 ⲛⲟⲩⲟϭⲉ ⲁⲩⲥⲁ ⲛⲧϩⲉ ⲛϩⲉⲛϭⲣⲙⲡϣⲁⲛ ⲡⲟⲩⲙⲁⲕϩ ⲁϥⲥⲁ ⲛⲧϩⲉ ⲛϩⲉⲛϩⲟⲣⲙⲓⲥⲕⲟⲥ

11 ⲡⲓⲛⲉ ⲙⲡⲛⲟⲩⲃ ⲧⲛⲛⲁⲧⲁⲙⲓⲟϥ ⲛⲛⲛ ⲙⲙⲁⲉⲓⲛ ⲙⲡϩⲁⲧ

12 ϣⲁⲛⲧⲉⲡⲣⲣⲟ ⲛⲟϫϥ ϩⲙⲡⲉϥⲙⲁ ⲧⲁⲛⲁⲣⲇⲟⲥ ⲁⲥϣⲱϣ ⲉⲃⲟⲗ ⲙⲡⲉⲥⲥⲧⲟⲓ

13 ⲟⲩⲙⲁⲓⲣⲉ ⲛⲧⲉⲧⲉⲥⲧⲁⲕⲧⲏ ⲡⲉ ⲡⲁⲥⲟⲛ ⲛⲁⲓ ⲉϥⲛⲁϣⲱⲡⲉ ϩⲛⲧⲙⲏⲧⲉ ⲛⲛⲁⲉⲕⲓⲃⲉ

14 ⲟⲩⲥⲙⲁϩ ⲛⲕⲟⲩⲡⲣ ⲡⲉ ⲡⲁⲥⲟⲛ ⲉϥϩⲛ ⲙⲙⲁ ⲛⲉⲗⲟⲟⲗⲉ ⲉⲧϩⲛⲅⲁⲇⲇⲉⲓ

15 ⲉⲓⲥ ϩⲏⲏⲧⲉ ⲛⲉⲥⲱ ⲧⲁϣⲃⲉⲉⲣⲉ ⲉⲓⲥ ϩⲏⲏⲧⲉ ⲛⲉⲥⲱ ⲛⲟⲩⲃⲁⲗ ϩⲉⲛⲃⲁⲗ ⲛϭⲣⲟⲟⲙⲡⲉ ⲛⲉ

16 ⲉⲓⲥ ϩⲏⲏⲧⲉ ⲛⲁⲛⲟⲩⲕ ⲡⲁⲥⲟⲛ ⲁⲩⲱ ⲛⲉⲥⲱⲕ ⲉϭⲱϣⲧ ⲛⲥⲱⲕ ⲉⲕⲟ ⲛϩⲁⲓⲃⲉⲥ ⲉⲃⲟⲗ ⲉϫⲙⲡⲉⲛⲙⲁ ⲛⲛⲕⲟⲧⲕ

17 ⲛⲥⲟⲩⲟⲓ ⲙⲡⲉⲛⲏⲓ ϩⲛⲉⲃⲟⲗ ⲛⲉ ϩⲛⲛϣⲉ ⲙⲡⲗⲓⲃⲁⲛⲟⲥ ⲛⲉϣⲛⲉ ⲛⲟⲩⲉϩⲥⲟⲓ ϩⲉⲛⲕⲩⲡⲁⲣⲓⲥⲥⲟⲥ ⲛⲉ