Sirach 47 — Coptic (Sahidic)

1 ⲙⲛⲛⲥⲁⲛⲁⲓ ⲁⲛⲁⲑⲁⲛ ⲧⲱⲟⲩⲛ ⲁϥⲡⲣⲟⲫⲏⲧⲉⲩⲉ ϩⲛⲛⲉϩⲟⲟⲩ ⲛⲇⲁⲩⲉⲓⲇ

2 ⲛⲧϩⲉ ⲛⲟⲩⲱⲧ ⲉⲁⲩⲡⲟⲣϫϥ ⲉⲃⲟⲗ ϩⲛⲟⲩⲥⲱⲧⲏⲣⲓⲟⲛ ⲧⲁⲓ ⲧⲉ ⲧϩⲉ ⲛⲇⲁⲩⲉⲓⲇ ⲉⲃⲟⲗ ϩⲛⲛϣⲏⲣⲉ ⲙⲡⲓⲥⲣⲁⲏⲗ

3 ⲁϥⲥⲱⲃⲉ ⲙⲛⲙⲙⲟⲩⲓ ⲛⲧϩⲉ ⲛⲟⲩⲙⲁⲥ ⲛⲃⲁⲁⲙⲡⲉ ⲁⲩⲱ ⲙⲛⲛⲁⲣⲝ ⲛⲧϩⲉ ⲛⲟⲩϩⲓⲉⲓⲃ ]

4 ⲙⲡϥⲙⲟⲩⲟⲩⲧ ⲛⲟⲩⲅⲓⲅⲁⲥ ϩⲛⲧⲉϥⲙⲛⲧⲕⲟⲩⲓ ⲁⲩⲱ ⲁϥϥⲓ ⲛⲟⲩⲛⲟϭⲛⲉϭ ⲉⲃⲟⲗ ϩⲙⲡⲗⲁⲟⲥ ϩⲙⲡⲧⲣⲉϥϥⲓ ⲛⲧⲉϥϭⲓϫ ⲉϩⲣⲁⲓ ϩⲛⲟⲩⲱⲛⲉ ⲛⲥⲫⲉⲛⲇⲟⲛⲏ ⲉⲧⲁⲟⲩⲟ ⲉϩⲣⲁⲓ ⲙⲡϫⲓⲥⲉ ⲛⲅⲟⲗⲓⲁⲑ

5 ⲁϥⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲡⲉⲧϫⲟⲥⲉ ⲁⲩⲱ ⲁϥϯ ⲛⲟⲩϭⲟⲙ ϩⲛⲧⲉϥⲟⲩⲛⲁⲙ ⲉⲧⲁⲕⲉⲟⲩⲣⲱⲙⲉ ⲛϫⲱⲱⲣⲉ ϩⲙⲡⲡⲟⲗⲉⲙⲟⲥ ⲉϫⲓⲥⲉ ⲙⲡⲧⲁⲡ ⲙⲡⲉϥⲗⲁⲟⲥ

6 ⲁⲩϯⲉⲟⲟⲩ ⲛⲁϥ ϩⲛϩⲉⲛⲧⲃⲁ ⲛⲧⲃⲁ ⲛⲧⲉⲓϩⲉ ⲁⲩⲱ ⲁⲩⲥⲙⲟⲩ ⲉⲣⲟϥ ϩⲛⲛⲉⲥⲙⲟⲩ ⲙⲡϫⲟⲉⲓⲥ ϩⲙⲡⲧⲣⲉⲩⲉⲓⲛⲉ ⲛⲁϥ ⲛⲟⲩϭⲣⲏⲡⲉ ⲛⲉⲟⲟⲩ

7 ⲁϥⲟⲩⲱϣϥ ⲅⲁⲣ ⲛⲛϫⲁϫⲉ ⲉⲧⲙⲡⲉϥⲕⲱⲧⲉ ⲁⲩⲱ ⲁϥⲥⲉϣϥⲛⲉⲫⲓⲗⲓⲥⲧⲓⲉⲓⲙ ⲉⲧⲟⲩⲃⲏϥ ⲁϥⲟⲩⲱⲥϥ ⲙⲡⲉⲩⲧⲁⲡ ϣⲁϩⲣⲁⲓ ⲉⲡϩⲟⲟⲩ

8 ⲁϥϯ ⲛⲟⲩⲉⲝⲟⲙⲟⲗⲟⲅⲏⲥⲓⲥ ϩⲛⲛⲉϥϩⲃⲏⲩⲉ ⲧⲏⲣⲟⲩ ⲙⲡⲉⲧϫⲟⲥⲉ ⲉⲧⲟⲩⲁⲁⲃ ϩⲛⲟⲩϣⲁϫⲉ ⲛⲉⲟⲟⲩ ⲁϥⲥⲙⲟⲩ ϩⲙⲡⲉϥϩⲏⲧ ⲧⲏⲣϥ ⲁⲩⲱ ⲁϥⲙⲉⲣⲉⲡⲉⲛⲧⲁϥⲧⲁⲙⲓⲟϥ

9 ⲁϥⲱϩⲉⲣⲁⲧⲟⲩ ⲛϩⲛⲣⲉϥⲯⲁⲗⲗⲉⲓ ϩⲁⲧϩⲏ ⲙⲡⲑⲩⲥⲓⲁⲥⲧⲏⲣⲓⲟⲛ ⲉⲧⲣⲉⲩϫⲱ ⲛⲟⲩⲗⲗⲉ ⲙⲡⲉϥϩⲣⲟⲟⲩ

10 ⲁϥϯ ⲛⲟⲩⲥⲁ ϩⲛⲛϣⲁ ⲁⲩⲱ ⲁϥⲕⲟⲥⲙⲉⲓ ⲛⲛⲉⲟⲩⲟⲉⲓϣ ϣⲁⲧϩⲁⲏ ϩⲙⲡⲧⲣⲉⲩⲥⲙⲟⲩ ⲉⲡⲉϥⲣⲁⲛ ⲉⲧⲟⲩⲁⲁⲃ ⲁⲩⲱ ⲛⲧⲉⲡⲉⲧⲟⲩⲁⲁⲃ ⲱϣ ⲉⲃⲟⲗ ϫⲓⲛϩⲧⲟⲟⲩⲉ

11 ⲁⲡϫⲟⲉⲓⲥ ⲕⲁⲛⲉϥⲛⲟⲃⲉ ⲉⲃⲟⲗ ⲁⲩⲱ ⲁϥϫⲓⲥⲉ ⲙⲡⲉϥⲧⲁⲡ ⲛϣⲁⲉⲛⲉϩ ⲁϥϯ ⲛⲁϥ ⲛⲧⲇⲓⲁⲑⲏⲕⲏ ⲛⲛⲉⲣⲣⲱⲟⲩ ⲁⲩⲱ ⲟⲩⲑⲣⲟⲛⲟⲥ ⲛⲉⲟⲟⲩ ϩⲙⲡⲓⲥⲣⲁⲏⲗ

12 ⲁϥⲧⲱⲟⲩⲛ ⲙⲛⲛⲥⲱϥ ⲛϭⲓⲡⲉϥϣⲏⲣⲉ ⲛⲥⲁⲃⲉ ⲁϥⲟⲩⲱϩ ϩⲛⲟⲩⲟⲩⲱϣⲥ ⲉⲃⲟⲗ ⲉⲧⲃⲏⲧϥ

13 ⲁⲥⲟⲗⲟⲙⲱⲛ ⲣⲣⲣⲟ ϩⲛⲛⲉϩⲟⲟⲩ ⲛⲧⲉⲓⲣⲏⲛⲏ ⲡⲁⲓ ⲉⲛⲧⲁⲡⲛⲟⲩⲧⲉ ϯⲙⲧⲟⲛ ⲛⲁϥ ⲙⲡⲉϥⲕⲱⲧⲉ ϫⲉⲉϥⲉⲥⲙⲓⲛⲉ ⲛⲟⲩⲏⲓ ϩⲓⲡⲉϥⲣⲁⲛ ⲁⲩⲱ ⲛϥⲥⲟⲃⲧⲉ ⲙⲡⲉⲧⲟⲩⲁⲁⲃ ⲛϣⲁⲉⲛⲉϩ

14 ⲛⲧϩⲉ ⲉⲛⲧⲁⲕⲣⲥⲁⲃⲉ ϩⲛⲧⲉⲕⲙⲛⲧⲕⲟⲩⲓ ⲁⲩⲱ ⲁⲕⲙⲟⲩϩ ⲙⲙⲛⲧⲣⲙⲛⲧϩⲏⲧ ⲛⲧϩⲉ ⲙⲡⲓⲉⲣⲟ

15 ⲁⲧⲉⲕⲯⲩⲭⲏ ⲡⲱⲣϣ ⲉⲃⲟⲗ ϩⲓϫⲛⲡⲕⲁϩ ⲁⲩⲱ ⲁⲕⲙⲟⲩϩ ⲙⲡⲁⲣⲁⲃⲟⲗⲏ ⲛⲁⲓⲛⲓⲅⲙⲁ

16 ⲁⲡⲉⲕⲣⲁⲛ ⲡⲱϩ ϣⲁⲛⲛⲏⲥⲟⲥ ⲉⲧⲟⲩⲏⲟⲩ ⲁⲩⲱ ⲁⲩⲙⲉⲣⲉⲧⲉⲕⲉⲓⲣⲏⲛⲏ

17 ϩⲛⲛⲉⲕϩⲱⲇⲏ ⲙⲛⲛⲉⲕⲡⲁⲣϩⲟⲓⲙⲓⲁ ⲙⲛⲙⲡⲁⲣⲁⲃⲟⲗⲏ ⲁⲩⲱ ⲁϩⲛⲭⲱⲣⲁ ⲣϣⲡⲏⲣⲉ ⲙⲙⲟⲕ ϩⲛϩⲉⲛⲃⲱⲗ

18 ϩⲙⲡⲣⲁⲛ ⲙⲡϫⲟⲉⲓⲥ ⲡⲛⲟⲩⲧⲉ ⲡⲉⲧⲟⲩⲙⲟⲩⲧⲉ ⲉⲣⲟϥ ϫⲉⲡⲛⲟⲩⲧⲉ ⲙⲡⲓⲥⲣⲁⲏⲗ ⲁⲕⲥⲉⲩϩⲛⲟⲩⲃ ⲉϩⲟⲩⲛ ⲛⲧϩⲉ ⲙⲡⲃⲁⲥⲛϭ ⲁⲩⲱ ⲡϩⲁⲧ ⲛⲧϩⲉ ⲙⲡⲧⲁϩⲧ

19 ⲁⲕⲣⲓⲕⲉ ⲛⲛⲉⲕⲕⲉϩⲧⲉ ⲉⲛⲉϩⲓⲟⲙⲉ ⲁⲩⲱ ⲁⲩⲣϫⲟⲉⲓⲥ ⲉⲣⲟⲕ ϩⲛⲛⲉⲕⲥⲱⲙⲁ

20 ⲁⲕϯ ⲛⲟⲩⲧⲱⲗⲙ ⲙⲡⲉⲕⲉⲟⲟⲩ ⲁⲩⲱ ⲁⲕϥⲱⲧⲉ ⲙⲡⲉⲕⲥⲡⲉⲣⲙⲁ ⲉⲉⲓⲛⲉ ⲛⲟⲩⲟⲣⲅⲏ ⲉϫⲛⲛⲉⲕϣⲏⲣⲉ ⲁⲩⲱ ⲟⲩⲙⲕⲁϩ ⲛϩⲏⲧ ⲉϫⲛⲧⲉⲕⲙⲛⲧⲁⲧϩⲏⲧ

21 ⲉⲧⲣⲉⲧⲙⲛⲧⲣⲣⲟ ⲡⲱϣ ⲉⲁⲡⲉⲃⲟⲗ ϩⲛⲉⲫⲣⲁⲓⲙ ⲁⲣⲭⲉⲓ ⲉϫⲛⲟⲩⲙⲛⲧⲣⲣⲟ ⲛⲁⲧⲥⲱⲧⲙ

22 ⲛⲛⲉⲡϫⲟⲉⲓⲥ ⲇⲉ ⲕⲱ ⲛⲥⲱϥ ⲙⲡⲉϥⲛⲁ ⲁⲩⲱ ⲛⲉϥⲕⲁⲧⲟⲟⲧϥ ⲉⲃⲟⲗ ϩⲛⲛⲉϥϩⲃⲏⲩⲉ ⲁⲩⲱ ⲛⲉϥϥⲱⲧⲉ ⲉⲃⲟⲗ ⲛⲛϣⲏⲣⲉ ⲙⲡⲉϥⲥⲱⲧⲡ ⲛⲛⲉϥϥⲓ ⲙⲡⲉⲥⲡⲉⲣⲙⲁ ⲙⲡⲉⲛⲧⲁϥⲙⲉⲣⲓⲧϥ ⲁϥϯ ⲛⲟⲩϣⲱϫⲡ ⲛⲓⲁⲕⲱⲃ ⲁⲩⲱ ⲟⲩⲛⲟⲩⲛⲉ ⲛⲇⲁⲩⲉⲓⲇ ⲉⲃⲟⲗ ⲛϩⲏⲧϥ

23 ⲙⲛⲛⲉϥⲉⲓⲟⲧⲉ ⲁϥⲕⲱ ⲙⲛⲛⲥⲱϥ ⲉⲃⲟⲗ ϩⲙⲡⲉϥⲥⲡⲉⲣⲙⲁ ⲛⲟⲩⲁⲧϩⲏⲧ ⲙⲡⲗⲁⲟⲥ ⲉϥϣⲁⲁⲧ ⲙⲙⲛⲧⲥⲁⲃⲉ ϩⲣⲟⲃⲟⲁⲙ ⲡⲉⲛⲧⲁϥⲡⲉϣⲡⲗⲁⲟⲥ ϩⲙⲡⲉϥϣⲟϫⲛⲉ aⲩⲱ ϩⲓⲉⲣⲟⲃⲟⲁⲙ ⲡϣⲏⲣⲉ ⲛⲛⲁⲃⲁⲧ ⲡⲉⲛⲧⲁϥⲧⲣⲉⲡⲓⲥⲣⲁⲏⲗ ⲣⲛⲟⲃⲉ ⲁϥϯⲧⲉϩⲓⲏ ⲙⲡⲛⲟⲃⲉ ⲛⲉⲫⲣⲁⲓⲙ

24 ⲁⲩⲱ ⲁⲩⲁϣⲁⲓ ⲛϭⲓⲛⲉⲩⲛⲟⲃⲉ ⲉⲙⲁⲧⲉ ⲉⲡⲟⲟⲛⲟⲩ ⲉⲃⲟⲗ ϩⲛⲡⲉⲩⲕⲁϩ

25 ⲁⲩⲱ ⲁϥϣⲓⲛⲉ ⲛⲥⲁⲡⲟⲛⲏⲣⲓⲁ ⲛⲓⲙ ϣⲁⲛⲧⲉⲡϫⲓⲕⲃⲁ ⲉⲓ ⲉϩⲣⲁⲓ ⲉϫⲱⲟⲩ