Psalms 94 — Coptic (Sahidic)

1 ⲡⲉⲥⲙⲟⲩ ⲛⲧⲱⲇⲏ ⲛⲇⲁⲩⲉⲓⲇ ⲁⲙⲏⲓⲧⲛ ⲛⲧⲛⲧⲉⲗⲏⲗ ⲙⲡϫⲟⲉⲓⲥ ⲛⲧⲛϯⲗⲟⲩⲗⲁⲓ ⲙⲡⲛⲟⲩⲧⲉ ⲡⲉⲛⲟⲩϫⲁⲓ

2 ⲙⲁⲣⲛⲉⲓ ⲃⲟⲗ ϩⲏⲧϥ ϩⲛⲟⲩⲟⲩⲱⲛϩ ⲉⲃⲟⲗ ⲛⲧⲛϯⲗⲟⲩⲗⲁⲓ ⲛⲁϥ ϩⲛϩⲉⲛⲯⲁⲗⲙⲟⲥ

3 ϫⲉⲟⲩⲛⲟϭ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ⲁⲩⲱ ⲟⲩⲛⲟϭ ⲛⲣⲣⲟ ⲡⲉ ⲉϫⲛⲛⲛⲟⲩⲧⲉ ⲧⲏⲣⲟⲩ

4 ϫⲉⲉⲣⲉⲛⲉⲕⲣⲣⲱⲟⲩ ⲧⲏⲣⲟⲩ ⲙⲡⲕⲁϩ ϩⲛⲧⲉϥϭⲓϫ ⲁⲩⲱ ⲛⲟⲩϥ ⲛⲉ ⲛϫⲓⲥⲉ ⲛⲛⲧⲟⲟⲩ

5 ⲧⲱϥ ⲧⲉ ⲑⲁⲗⲁⲥⲥⲁ ⲁⲩⲱ ⲛⲧⲟϥ ⲡⲉⲛⲧⲁϥⲧⲁⲙⲓⲟⲥ ⲁⲩⲱ ⲛⲉϥϭⲓϫ ⲛⲉⲛⲧⲁⲩⲡⲗⲁⲥⲥⲉ ⲙⲡⲡⲉⲧϣⲟⲩⲱⲟⲩ

6 ⲁⲙⲏⲓⲧⲛ ⲛⲧⲛⲟⲩⲱϣⲧ ⲛⲧⲛⲡⲁϩⲧⲛ ⲛⲁϥ ⲛⲧⲛⲣⲓⲙⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲧⲁϥⲧⲁⲙⲓⲟⲛ

7 ϫⲉⲛⲧⲟϥ ⲡⲉ ⲡⲉⲛⲛⲟⲩⲧⲉ ⲁⲩⲱ ⲁⲛⲟⲛ ⲁⲛⲟⲛ ⲡⲉϥⲗⲁⲟⲥ ⲁⲩⲱ ⲛⲉⲥⲟⲟⲩ ⲛⲧⲉϥϭⲓϫ ⲙⲡϩⲟⲟⲩ ⲉⲧⲉⲧⲛϣⲁⲛⲥⲱⲧⲙ ⲉⲧⲉϥⲥⲙⲏ

8 ⲙⲡⲣϯⲛϣⲟⲧ ⲛⲛⲉⲧⲛϩⲏⲧ ⲛⲧϩⲉ ⲛⲛⲉϩⲟⲟⲩ ⲙⲡϯϭⲛⲁⲧ ⲕⲁⲧⲁⲡⲉϩⲟⲟⲩ ⲙⲡⲡⲉⲓⲣⲁⲥⲙⲟⲥ ϩⲛⲧⲉⲣⲏⲙⲟⲥ

9 ⲉⲛⲧⲁⲛⲉⲧⲛⲉⲓⲟⲧⲉ ⲡⲉⲓⲣⲁⲍⲉ ⲛϩⲏⲧϥ ⲁⲩⲇⲟⲕⲓⲙⲁⲍⲉ ⲁⲩⲛⲁⲩ ⲉⲛⲁϩⲃⲏⲩⲉ

10 ⲁⲓⲙⲉⲥⲧⲉⲧⲉⲓⲅⲉⲛⲉⲁ ⲛϩⲙⲉ ⲛⲣⲟⲙⲡⲉ ⲁⲩⲱ ⲁⲓϫⲟⲟⲥ ϫⲉⲥⲉⲡⲗⲁⲛⲁ ⲛⲟⲩⲟⲉⲓϣ ⲛⲓⲙ ϩⲙⲡⲉⲩϩⲏⲧ ⲁⲩⲱ ⲛⲧⲟⲟⲩ ⲙⲡⲟⲩⲥⲟⲩⲛⲛⲁϩⲓⲟⲟⲩⲉ

11 ⲛⲧϩⲉ ⲛⲧⲁⲓⲱⲣⲕ ⲙⲙⲟⲥ ϩⲛⲧⲁⲟⲣⲅⲏ ϫⲉⲥⲉⲛⲏⲩ ⲉϩⲟⲩⲛ ⲉⲡⲁⲙⲁ ⲛⲙⲧⲟⲛ