Read Psalms 90 side by side with translations · The Final Bible
1 ⲡⲉⲥⲙⲟⲩ ⲛⲧⲱⲇⲏ ⲛⲇⲁⲩⲉⲓⲇ ⲡⲉⲧⲟⲩⲏϩ ϩⲛⲧⲃⲟⲏⲑⲉⲓⲁ ⲙⲡⲉⲧϫⲟⲥⲉ ϥⲛⲁϣⲱⲡⲉ ϩⲛⲧϩⲁⲓⲃⲉⲥ ⲙⲡⲛⲟⲩⲧⲉ ⲛⲧⲡⲉ
2 ϥⲛⲁϫⲟⲟⲥ ⲙⲡϫⲟⲉⲓⲥ ϫⲉⲛⲧⲕ ⲡⲁⲣⲉϥϣⲟⲡⲧ ⲉⲣⲟϥ ⲁⲩⲱ ⲡⲁⲙⲁ ⲙⲡⲱⲧ ⲡⲁⲛⲟⲩⲧⲉ ⲉⲓⲛⲁⲛⲁϩⲧⲉ ⲉⲣⲟϥ
3 ϫⲉⲛⲧⲟϥ ⲡⲉⲧⲛⲁⲧⲟⲩϫⲟⲓ ⲉⲧϭⲟⲣϭⲥ ⲛⲛϭⲉⲣⲏϭ ⲁⲩⲱ ⲉⲩϣⲁϫⲉ ⲉϥⲛⲁϣⲧ
4 ϥⲛⲁⲣϩⲁⲓⲃⲉⲥ ⲉⲣⲟⲕ ϩⲁⲧⲉϥⲙⲉⲥⲧϩⲏⲧ ⲁⲩⲱ ⲕⲛⲁⲛⲁϩⲧⲉ ϩⲁⲛⲉϥⲧⲛϩ ⲧⲉϥⲙⲉ ⲛⲁⲕⲱⲧⲉ ⲉⲣⲟⲕ ⲛⲧϩⲉ ⲛⲛⲓϩⲟⲡⲗⲟⲛ
5 ⲛⲅⲛⲁⲣϩⲟⲧⲉ ⲁⲛ ⲉⲩϩⲟⲧⲉ ⲛϭⲱⲣϩ ⲁⲩⲱ ϩⲏⲧϥ ⲛⲟⲩⲥⲟⲧⲉ ⲉϥϩⲏⲗ ⲙⲡⲉϩⲟⲟⲩ
6 ϩⲏⲧϥ ⲛⲟⲩϩⲱⲃ ⲉϥⲙⲟⲟϣⲉ ϩⲙⲡⲕⲁⲕⲉ ⲉⲃⲟⲗ ϩⲛⲟⲩϩⲧⲟⲡ ⲙⲛⲟⲩⲇⲁⲓⲙⲟⲛⲓⲟⲛ ⲙⲡⲛⲁⲩ ⲙⲙⲉⲉⲣⲉ
7 ⲟⲩⲛϣⲟ ⲛⲁϩⲉ ϩⲓϩⲃⲟⲩⲣ ⲙⲙⲟⲕ ⲁⲩⲱ ⲟⲩⲧⲃⲁ ϩⲓⲟⲩⲛⲁⲙ ⲙⲙⲟⲕ ⲛⲥⲉⲛⲁϩⲱⲛ ⲇⲉ ⲉⲣⲟⲕ ⲁⲛ
8 ⲡⲗⲏⲛ ⲕⲛⲁⲙⲉϩⲉⲓⲁⲧⲕ ⲙⲙⲟⲟⲩ ⲛⲅⲛⲁⲩ ⲉⲡⲧⲱⲱⲃⲉ ⲛⲛⲣⲉϥⲣⲛⲟⲃⲉ
9 ϫⲉⲛⲧⲟⲕ ⲡϫⲟⲉⲓⲥ ⲡⲉ ⲧⲁϩⲉⲗⲡⲓⲥ ⲁⲕⲕⲱ ⲛⲁⲕ ⲙⲡⲉⲧϫⲟⲥⲉ ⲙⲙⲁ ⲙⲡⲱⲧ
10 ⲙⲙⲛⲡⲉⲧϩⲟⲟⲩ ⲛⲁϩⲱⲛ ⲉⲣⲟⲕ ⲙⲙⲛⲙⲁⲥⲧⲓⲝ ⲛⲁϩⲱⲛ ⲉϩⲟⲩⲛ ⲉⲡⲉⲕⲙⲁ ⲛϣⲱⲡⲉ
11 ϫⲉϥⲛⲁϩⲱⲛ ⲉⲧⲟⲟⲧⲟⲩ ⲛⲛⲉϥⲁⲅⲅⲉⲗⲟⲥ ⲉⲧⲃⲏⲏⲧⲕ ⲉⲧⲣⲉⲩϩⲁⲣⲉϩ ⲉⲣⲟⲕ ϩⲛⲛⲉⲕϩⲓⲟⲟⲩⲉ ⲧⲏⲣⲟⲩ
12 ⲛⲥⲉϥⲓⲧⲕ ⲉϫⲛⲛⲉⲩϭⲓϫ ⲙⲏⲡⲟⲧⲉ ⲛⲅϫⲱⲣⲡ ⲛⲧⲉⲕⲟⲩⲉⲣⲏⲧⲉ ⲉⲩⲱⲛⲉ
13 ⲕⲛⲁⲧⲁⲗⲉ ⲉϩⲣⲁⲓ ⲉϫⲛⲟⲩϩⲟϥ ⲙⲛⲟⲩⲥⲓⲧ ⲛⲅϩⲱⲙ ⲉϫⲛⲟⲩⲙⲟⲩⲓ ⲙⲛⲟⲩⲇⲣⲁⲕⲱⲛ
14 ϫⲉⲁϥⲛⲁϩⲧⲉ ⲉⲣⲟⲓ ϯⲛⲁⲧⲟⲩϫⲟϥ ϯⲛⲁⲣϩⲁⲓⲃⲉⲥ ⲉⲣⲟϥ ϫⲉⲁϥⲥⲟⲩⲛⲡⲁⲣⲁⲛ
15 ϥⲛⲁⲱϣ ⲉϩⲣⲁⲓ ⲉⲣⲟⲓ ⲁⲩⲱ ⲁⲛⲟⲕ ϯⲛⲁⲥⲱⲧⲙ ⲉⲣⲟϥ ϯⲛⲙⲙⲁϥ ϩⲛⲧⲉϥⲑⲗⲓⲯⲓⲥ ⲁⲩⲱ ϯⲛⲁⲧⲟⲩϫⲟϥ ⲛⲧⲁϯⲉⲟⲟⲩ ⲛⲁϥ
16 ϯⲛⲁⲧⲁϣⲟϥ ⲛⲟⲩⲙⲏⲏϣⲉ ⲛϩⲟⲟⲩ ⲧⲁⲧⲥⲁⲃⲟϥ ⲉⲡⲁⲟⲩϫⲁⲓ
Psalms 89 · Psalms 91 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)