Read Psalms 87 side by side with translations · The Final Bible
1 ⲧⲱⲇⲏ ⲡⲉⲯⲁⲗⲙⲟⲥ ⲛⲛϣⲏⲣⲉ ⲛⲕⲟⲣⲉ ⲉⲡϫⲱⲕ ⲉⲃⲟⲗ ϩⲁⲙⲁⲉⲗⲗⲉⲑ ⲉⲟⲩⲱϣⲃ ⲧⲙⲛⲧⲣⲙⲛϩⲏⲧ ⲛⲛⲁⲓⲙⲁ ⲛⲡⲓⲥⲣⲁⲏⲗⲓⲧⲏⲥ
2 ⲡϫⲟⲉⲓⲥ ⲡⲛⲟⲩⲧⲉ ⲙⲡⲁⲟⲩϫⲁⲓ ⲁⲓⲱϣ ⲉϩⲣⲁⲓ ⲙⲡⲉⲕⲙⲧⲟ ⲉⲃⲟⲗ ⲙⲡⲉϩⲟⲟⲩ ⲙⲛⲧⲉⲩϣⲏ
3 ⲙⲁⲣⲉⲡⲁϣⲗⲏⲗ ⲉⲓ ⲉϩⲟⲩⲛ ⲙⲡⲉⲕⲙⲧⲟ ⲉⲃⲟⲗ ⲣⲓⲕⲉ ⲙⲡⲉⲕⲙⲁⲁϫⲉ ⲡϫⲟⲉⲓⲥ ⲉⲡⲁⲥⲟⲡⲥ
4 ϫⲉⲁⲧⲁⲯⲩⲭⲏ ⲙⲟⲩϩ ⲙⲡⲉⲧϩⲟⲟⲩ ⲁⲡⲁⲱⲛϩ ϩⲱⲛ ⲉϩⲟⲩⲛ ⲉⲁⲙⲛⲧⲉ
5 ⲁⲩⲟⲡⲧ ⲙⲛⲛⲉⲧⲃⲏⲕ ⲉⲡⲉⲥⲏⲧ ⲉⲡϣⲏⲓ ⲁⲓⲣⲧϩⲉ ⲛⲟⲩⲣⲱⲙⲉ ⲉⲙⲛⲧϥⲃⲟⲏⲑⲟⲥ ⲛⲉⲗⲉⲩⲑⲉⲣⲟⲥ ϩⲛⲛⲉⲧⲙⲟⲟⲩⲧ
6 ⲛⲧϩⲉ ⲛϩⲉⲛϩⲁⲧⲃⲉⲥ ⲉⲩⲛⲏϫ ⲉⲩⲛⲕⲟⲧⲕ ϩⲛⲛⲧⲁⲫⲟⲥ ⲛⲁⲓ ⲉⲧⲉⲙⲡⲕⲣⲡⲉⲩⲙⲉⲉⲩⲉ ϭⲉ ⲁⲩⲱ ⲛⲧⲟⲟⲩ ⲁⲩⲧⲁⲕⲟ ⲉⲃⲟⲗ ϩⲛⲧⲉⲕϭⲓϫ
7 ⲁⲩⲕⲁⲁⲧ ϩⲛⲟⲩϣⲏⲓ ⲙⲡⲉⲥⲏⲧ ϩⲛϩⲉⲛⲕⲁⲕⲉ ⲙⲛⲧϩⲁⲓⲃⲉⲥ ⲙⲡⲙⲟⲩ
8 ⲁⲡⲉⲕϭⲱⲛⲧ ⲧⲁϫⲣⲟ ⲉϩⲣⲁⲓ ⲉϫⲱⲓ ⲁⲩⲱ ⲛⲉⲕⲣⲟⲟⲩϣ ⲧⲏⲣⲟⲩ ⲁⲕⲛⲧⲟⲩ ⲉϩⲣⲁⲓ ⲉϫⲱⲓ ⲇⲓⲁⲯⲁⲗⲙⲁ
9 ⲁⲕⲧⲣⲉⲛⲉⲧⲥⲟⲟⲩⲛ ⲙⲙⲟⲓ ⲟⲩⲉ ⲙⲙⲟⲓ ⲁⲩⲕⲁⲁⲧ ⲛⲁⲩ ⲛⲃⲟⲧⲉ ⲁⲩⲧⲁⲁⲧ ⲁⲩⲱ ⲙⲡⲓⲃⲱⲕ
10 ⲁⲡⲁⲃⲁⲗ ϭⲃⲃⲉ ⲉⲃⲟⲗ ϩⲛⲧⲁⲙⲛⲧϩⲏⲕⲉ ⲁⲓϫⲓϣⲕⲁⲕ ⲉϩⲣⲁⲓ ⲉⲡϫⲟⲉⲓⲥ ⲙⲡⲉϩⲟⲟⲩ ⲧⲏⲣϥ ⲁⲓⲡⲱⲣϣⲛⲁϭⲓϫ ⲉϩⲣⲁⲓ ⲉⲣⲟⲕ
11 ⲙⲏ ⲉⲕⲛⲁⲣⲛⲉⲕϣⲡⲏⲣⲉ ϩⲛⲛⲉⲧⲙⲟⲟⲩⲧ ⲏ ⲛⲥⲁⲉⲓⲛ ⲛⲉⲧⲛⲁⲧⲱⲟⲩⲛ ⲛⲥⲉⲉⲝⲟⲙⲟⲗⲟⲅⲉⲓ ⲛⲁⲕ
12 ⲙⲏ ⲉⲩⲛⲁϫⲱ ⲙⲡⲉⲕⲛⲁ ϩⲛⲛⲧⲁⲫⲟⲥ ⲁⲩⲱ ⲧⲉⲕⲙⲉ ϩⲣⲁⲓ ϩⲙⲡⲧⲁⲕⲟ
13 ⲙⲏ ⲉⲩⲛⲁⲉⲓⲙⲉ ⲉⲛⲉⲕϣⲡⲏⲣⲉ ϩⲙⲡⲕⲁⲕⲉ ⲁⲩⲱ ⲧⲉⲕⲇⲓⲕⲁⲓⲟⲥⲩⲛⲏ ϩⲛⲟⲩⲕⲁϩ ⲉⲁⲕⲣⲡⲉϥⲱⲃϣ
14 ⲁⲛⲟⲕ ⲇⲉ ⲁⲓϫⲓϣⲕⲁⲕ ⲉϩⲣⲁⲓ ⲉⲣⲟⲕ ⲡϫⲟⲉⲓⲥ ⲁⲩⲱ ⲡⲁϣⲗⲏⲗ ⲛⲁⲧⲁϩⲟⲕ ⲙⲡⲛⲟⲩ ⲛϣⲱⲣⲡ
15 ⲉⲧⲃⲉⲟⲩ ⲡϫⲟⲉⲓⲥ ⲕⲛⲁⲕⲱ ⲛⲥⲱⲕ ⲛⲧⲁⲯⲩⲭⲏ ⲙⲡⲣⲕⲱⲧⲉ ⲙⲡⲉⲕϩⲟ ⲛⲥⲁⲃⲟⲗ ⲙⲙⲟⲓ
16 ϫⲉⲁⲛⲅ ⲟⲩϩⲏⲕⲉ ⲁⲛⲟⲕ ⲉⲓϩⲛϩⲉⲛϩⲓⲥⲉ ϫⲓⲛⲧⲁⲙⲛⲧⲕⲟⲩⲓ ⲛⲧⲉⲣⲓϫⲓⲥⲉ ⲇⲉ ⲁⲓⲑⲃⲃⲓⲟ ⲁⲩⲱ ⲁⲓⲧⲱⲟⲩⲛ
17 ⲁⲛⲉⲕⲟⲣⲅⲏ ⲉⲓ ⲉϩⲣⲁⲓ ⲉϫⲱⲓ ⲁⲛⲉⲕϩⲟⲧⲉ ϣⲧⲣⲧⲱⲣⲧ
18 ⲁⲩⲕⲱⲧⲉ ⲉⲣⲟⲓ ⲛⲧϩⲉ ⲛⲛⲓⲙⲟⲟⲩ ⲁⲩⲁⲙⲁϩⲧⲉ ⲙⲙⲟⲓ ϩⲓⲟⲩⲥⲟⲡ ⲙⲡⲉϩⲟⲟⲩ ⲧⲏⲣϥ
19 ⲁⲕⲧⲣⲉⲛⲁϣⲃⲉⲉⲣ ⲟⲩⲉ ⲙⲙⲟⲓ ⲁⲩⲱ ⲛⲉⲧⲥⲟⲟⲩⲛ ⲙⲙⲟⲓ ⲉⲃⲟⲗ ϩⲛⲧⲁⲧⲁⲗⲁⲓⲡⲱⲣⲓⲁ
Psalms 86 · Psalms 88 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)