Read Psalms 78 side by side with translations · The Final Bible
1 ⲡⲉⲯⲁⲗⲙⲟⲥ ⲛⲁⲥⲁⲫ ⲡⲛⲟⲩⲧⲉ ⲁϩⲉⲛϩⲉⲑⲛⲟⲥ ⲉⲓ ⲉϩⲟⲩⲛ ⲉⲧⲉⲕⲕⲗⲏⲣⲟⲛⲟⲙⲓⲁ ⲁⲩⲥⲱⲱϥ ⲙⲡⲉⲕⲣⲡⲉ ⲉⲧⲟⲩⲁⲁⲃ ⲁⲩⲕⲁⲧϩⲓⲉⲣⲟⲩⲥⲁⲗⲏⲙ ⲛⲧϩⲉ ⲛⲟⲩⲙⲁ ⲛϩⲁⲣⲉϩ
2 ⲁⲩⲕⲁⲛⲉⲧⲙⲟⲟⲩⲧ ⲛⲛⲉⲕϩⲙϩⲁⲗ ⲛϩⲣⲉ ⲛⲛϩⲁⲗⲁⲧⲉ ⲛⲧⲡⲉ ⲛⲥⲁⲣⲝ ⲛⲛⲉⲕⲡⲉⲧⲟⲩⲁⲁⲃ ⲛⲛⲉⲑⲏⲣⲓⲟⲛ ⲙⲡⲕⲁϩ
3 ⲁⲩⲡⲉϩⲧⲡⲉⲩⲥⲛⲟϥ ⲉⲃⲟⲗ ⲛⲧϩⲉ ⲛⲛⲓⲙⲟⲟⲩ ⲙⲡⲕⲱⲧⲉ ⲛⲧϩⲓⲉⲣⲟⲩⲥⲁⲗⲏⲙ ⲁⲩⲱ ⲛⲉⲙⲙⲛⲡⲉⲧⲧⲱⲙⲥ ⲙⲙⲟⲟⲩ
4 ⲁⲛϣⲱⲡⲉ ⲛⲛⲟϭⲛⲉϭ ⲛⲛⲉⲧϩⲓⲧⲟⲩⲱⲛ ⲛⲕⲱⲙϣ ⲁⲩⲱ ⲛⲥⲱⲃⲉ ⲛⲛⲉⲧⲙⲡⲉⲛⲕⲱⲧⲉ
5 ϣⲁⲧⲛⲁⲩ ⲡϫⲟⲉⲓⲥ ⲕⲛⲁⲛⲟⲩϭⲥ ϣⲁⲃⲟⲗ ⲡⲉⲕⲕⲱϩⲧ ⲛⲁⲙⲟⲩϩ ⲛⲧϩⲉ ⲛⲟⲩⲕⲱϩⲧ
6 ⲡⲱϩⲧ ⲛⲧⲉⲕⲟⲣⲅⲏ ⲉϫⲛⲛϩⲉⲑⲛⲟⲥ ⲉⲧⲉⲙⲡⲟⲩⲥⲟⲩⲱⲛⲅ ⲁⲩⲱ ⲉϫⲛⲙⲙⲛⲧⲉⲣⲱⲟⲩ ⲉⲧⲉⲙⲡⲟⲩⲉⲡⲓⲕⲁⲗⲉⲓ ⲙⲡⲉⲕⲣⲁⲛ
7 ϫⲉⲁⲩⲟⲩⲱⲙ ⲛⲓⲁⲕⲱⲃ ⲁⲩⲱ ⲁⲩⲣⲡⲉϥⲙⲁ ⲛϫⲁⲓⲉ
8 ⲙⲡⲣⲣⲡⲙⲉⲉⲩⲉ ⲛⲛⲉⲛⲁⲛⲟⲙⲓⲁ ⲛϣⲟⲣⲡ ⲙⲁⲣⲉⲛⲉⲕⲙⲛⲧϣⲁⲛϩⲧⲏϥ ⲧⲁϩⲟⲛ ϩⲛⲟⲩϭⲉⲡⲏ ϫⲉⲁⲛⲣϩⲏⲕⲉ ⲉⲙⲁⲧⲉ
9 ⲃⲟⲏⲑⲉⲓ ⲉⲣⲟⲛ ⲡⲛⲟⲩⲧⲉ ⲡⲉⲛⲥⲱⲧⲏⲣ ⲉⲧⲃⲉⲡⲉⲟⲟⲩ ⲙⲡⲉⲕⲣⲁⲛ ⲡϫⲟⲉⲓⲥ ⲙⲁⲧⲟⲩϫⲟⲛ ⲛⲅⲕⲱ ⲉⲃⲟⲗ ⲛⲛⲉⲛⲁⲛⲟⲙⲓⲁ ⲉⲧⲃⲉⲡⲉⲕⲣⲁⲛ
10 ⲙⲏⲡⲟⲧⲉ ⲛⲥⲉϫⲟⲟⲥ ϩⲛⲛϩⲉⲑⲛⲟⲥ ϫⲉⲉϥⲧⲱⲛ ⲡⲉⲩⲛⲟⲩⲧⲉ ⲙⲁⲣⲉϥⲟⲩⲱⲛϩ ⲉⲃⲟⲗ ϩⲛⲛϩⲉⲑⲛⲟⲥ ⲙⲡⲉⲛⲙⲧⲟ ⲉⲃⲟⲗ ⲡϫⲓⲕⲃⲁ ⲙⲡⲉⲥⲛⲟϥ ⲛⲛⲉⲕϩⲙϩⲁⲗ ⲉⲛⲧⲁⲩⲡⲁϩⲧϥ ⲉⲃⲟⲗ
11 ⲙⲁⲣⲉⲡⲁϣⲁϩⲟⲙ ⲛⲛⲉⲧⲧⲟ ⲙⲡⲉⲓⲛⲉ ⲛϩⲟⲙⲛⲧ ⲉⲓ ⲉϩⲟⲩⲛ ⲙⲡⲉⲕⲙⲧⲟ ⲉⲃⲟⲗ ⲙⲁⲧⲟⲩϫⲟ ⲛⲛϣⲏⲣⲉ ⲛⲛⲉⲛⲧⲁⲩⲙⲟⲟⲩⲧⲟⲩ ⲕⲁⲧⲁⲧⲙⲛⲧⲛⲟϭ ⲙⲡⲉⲕϭⲃⲟⲓ
12 ⲧⲱⲱⲃⲉ ⲛⲛⲉⲧϩⲓⲧⲟⲩⲱⲛ ⲛⲥⲁϣϥ ⲛⲕⲱⲃ ⲉϩⲣⲁⲓ ⲉⲕⲟⲩⲟⲩⲛⲟⲩ ⲡⲉⲩⲛⲟϭⲛⲉϭ ⲉⲛⲧⲁⲩⲛⲉϭⲛⲟⲩϭⲕ ⲙⲙⲟϥ ⲡϫⲟⲉⲓⲥ
13 ⲁⲛⲟⲛ ⲅⲁⲣ ⲁⲛⲟⲛ ⲡⲉⲕⲗⲁⲟⲥ ⲁⲩⲱ ⲛⲉⲥⲟⲟⲩ ⲙⲡⲉⲕⲟϩⲉ ⲧⲛⲛⲁⲟⲩⲱⲛϩ ⲛⲁⲕ ⲉⲃⲟⲗ ϣⲁⲉⲛⲉϩ ⲧⲛⲛⲁϫⲱ ⲛⲛⲉⲕⲥⲙⲟⲩ ϣⲁⲟⲩϫⲱⲙ ⲙⲛⲟⲩϫⲱⲙ
Psalms 77 · Psalms 79 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)