Read Psalms 73 side by side with translations · The Final Bible
1 ⲧⲙⲛⲧⲣⲙⲛϩⲏⲧ ⲛⲁⲥⲁⲫ ⲉⲧⲃⲉⲟⲩ ⲡⲛⲟⲩⲧⲉ ⲁⲕⲕⲁⲁⲛ ⲛⲥⲱⲕ ϣⲁⲃⲟⲗ ⲁϥⲛⲟⲩϭⲥ ⲛϭⲓⲡⲉⲕϭⲱⲛⲧ ⲉϫⲛⲛⲉⲥⲟⲟⲩ ⲙⲡⲉⲕⲟϩⲉ
2 ⲁⲣⲓⲡⲙⲉⲉⲩⲉ ⲛⲧⲉⲕⲥⲩⲛⲁⲅⲱⲅⲏ ⲛⲧⲁⲕϫⲡⲟⲥ ⲛⲁⲕ ϫⲓⲛⲛϣⲟⲣⲡ ⲁⲕⲥⲱⲧⲉ ⲙⲡϭⲉⲣⲱⲃ ⲛⲧⲉⲕⲕⲗⲏⲣⲟⲛⲟⲙⲓⲁ ⲡⲉⲓⲧⲟⲟⲩ ⲛⲥⲓⲱⲛ ⲛⲧⲁⲕⲟⲩⲱϩ ϩⲣⲁⲓ ⲛϩⲏⲧϥ
3 ϥⲓ ⲛⲛⲉⲕϭⲓϫ ⲉϩⲣⲁⲓ ⲉϫⲛⲛⲉⲩⲙⲛⲧϫⲁⲥⲓϩⲏⲧ ϣⲁⲃⲟⲗ ⲛⲉⲛⲧⲁⲡϫⲁϫⲉ ⲡⲟⲛⲏⲣⲉⲩⲉ ⲙⲙⲟⲟⲩ ϩⲛⲛⲉⲕⲡⲉⲧⲟⲩⲁⲁⲃ
4 ⲉⲁⲩϣⲟⲩϣⲟⲩ ⲙⲙⲟⲟⲩ ⲛϭⲓⲛⲉⲧⲙⲟⲥⲧⲉ ⲙⲙⲟⲕ ⲛⲧⲙⲏⲧⲉ ⲙⲡⲉⲕϣⲁ ⲁⲩⲕⲁⲛⲉⲩⲙⲁⲉⲓⲛ ⲙⲙⲁⲉⲓⲛ ⲁⲩⲱ ⲙⲡⲟⲩⲉⲓⲙⲉ
5 ⲕⲛⲁⲧⲁⲕⲟ ⲛⲧⲉⲩϩⲓⲏ ⲛⲉⲓⲉϩⲟⲩⲛ ⲙⲡⲉⲩⲉⲧⲡⲉ ⲁⲩϣⲱⲱⲧ ⲛⲛⲉⲥⲣⲟ ϩⲛϩⲉⲛⲕⲉⲗⲉⲃⲓⲛ ⲛⲧϩⲉ ⲛϩⲉⲛϣⲏⲛ ϩⲛⲧⲥⲱϣⲉ
6 ⲁⲩⲧⲁⲩⲟⲥ ⲉϩⲣⲁⲓ ϩⲛⲟⲩⲕⲉⲗⲉⲃⲓⲛ ⲙⲛⲟⲩⲥⲟⲧⲃⲉϥ ϩⲓⲟⲩⲥⲟⲡ
7 ⲁⲩⲣⲱⲕϩ ⲙⲡⲉⲕⲡⲉⲧⲟⲩⲁⲁⲃ ϩⲛⲟⲩⲕⲱϩⲧ ⲁⲩⲧⲁⲟⲩⲟ ⲉⲡⲉⲥⲏⲧ ⲙⲡⲙⲁ ⲛϣⲱⲡⲉ ⲙⲡⲉⲕⲣⲁⲛ
8 ⲁⲧⲉⲩⲥⲩⲅⲅⲉⲛⲉⲓⲁ ϩⲓⲟⲩⲥⲟⲡ ϫⲟⲟⲥ ϩⲙⲡⲉⲩϩⲏⲧ ϫⲉⲁⲙⲏⲓⲧⲛ ⲛⲧⲛϥⲓ ⲛⲛϣⲁ ⲙⲡⲛⲟⲩⲧⲉ ϩⲓϫⲙⲡⲕⲁϩ
9 ⲙⲡⲛⲛⲁⲩ ⲉⲛⲉⲩⲙⲁⲉⲓⲛ ⲙⲛⲡⲣⲟⲫⲏⲧⲏⲥ ⲁⲩⲱ ϭⲉ ϥⲛⲁⲥⲟⲩⲱⲛⲛ ⲁⲛ
10 ϣⲁⲧⲛⲁⲩ ⲡⲛⲟⲩⲧⲉ ⲡϫⲁϫⲉ ⲛⲟϭⲛⲉϭ ϥϯⲛⲟⲩϭⲥ ⲙⲡⲉⲕⲣⲁⲛ ⲛϭⲓⲡⲉⲧϯ ⲟⲩⲃⲏⲕ ϣⲁⲃⲟⲗ
11 ⲉⲧⲃⲉⲟⲩ ⲁⲕⲕⲧⲉⲧⲉⲕϭⲓϫ ϣⲁⲃⲟⲗ ⲁⲩⲱ ⲧⲉⲕⲟⲩⲛⲁⲙ ⲛⲧⲙⲏⲧⲉ ⲛⲕⲟⲩⲟⲩⲛⲕ
12 ⲡⲉⲛⲛⲟⲩⲧⲉ ⲡⲉ ⲡⲉⲛⲣⲣⲟ ϫⲓⲛⲉⲛⲉϩ ⲁϥⲣϩⲱⲃ ⲉⲡⲉϥⲟⲩϫⲁⲓ ϩⲛⲧⲙⲏⲧⲉ ⲙⲡⲕⲁϩ
13 ⲛⲧⲟⲕ ⲁⲕⲧⲁϫⲣⲉⲑⲁⲗⲁⲥⲥⲁ ϩⲛⲧⲉⲕϭⲟⲙ ⲛⲧⲟⲕ ⲁⲕⲟⲩⲉϣϥⲧⲁⲡⲉ ⲛⲛⲉⲇⲣⲁⲕⲟⲛ ϩⲓϫⲙⲡⲙⲟⲟⲩ
14 ⲛⲧⲟⲕ ⲁⲕⲗⲉϫⲛⲁⲡⲏⲩⲉ ⲙⲡⲉⲇⲣⲁⲕⲟⲛ ⲁⲕϯ ⲙⲙⲟϥ ⲛϩⲣⲉ ⲛⲛⲗⲁⲟⲥ ⲛⲛⲉϭⲟⲟϣ
15 ⲛⲧⲟⲕ ⲡⲉⲛⲧⲁⲕⲡⲉϩⲙⲡⲏⲅⲏ ⲙⲛⲙⲙⲟⲩ ⲛⲥⲱⲣⲙ ⲛⲧⲟⲕ ⲉⲛⲧⲁⲕⲧⲣⲉⲛⲓⲉⲣⲱⲟⲩ ⲉⲧⲧⲁϫⲣⲏⲩ ϣⲟⲟⲩⲉ
16 ⲡⲱⲕ ⲡⲉ ⲡⲉϩⲟⲟⲩ ⲁⲩⲱ ⲧⲱⲕ ⲧⲉ ⲧⲉⲩϣⲏ ⲛⲧⲟⲕ ⲡⲉ ⲛⲧⲁⲕⲥⲃⲧⲉⲡⲟⲩⲟⲉⲓⲛ ⲙⲛⲡⲣⲏ
17 ⲛⲧⲟⲕ ⲡⲉ ⲛⲧⲁⲕⲥⲃⲧⲉⲛⲧⲟϣ ⲧⲏⲣⲟⲩ ⲙⲡⲕⲁϩ ⲡϣⲱⲙ ⲙⲛⲡⲉⲁⲣ ⲛⲧⲟⲕ ⲡⲉ ⲛⲧⲁⲕⲡⲗⲁⲥⲥⲉ ⲙⲙⲟⲟⲩ
18 ⲁⲣⲓⲡⲙⲉⲉⲩⲉ ⲙⲡⲉⲓⲥⲱⲛⲧ ⲛⲧⲁⲕ ⲡϫⲁϫⲉ ⲁϥⲛⲟϭⲛⲉϭ ⲙⲡϫⲟⲉⲓⲥ ⲟⲩⲗⲁⲟⲥ ⲛⲁⲧϩⲏⲧ ⲁϥϯⲛⲟⲩϭⲥ ⲙⲡⲉϥⲣⲁⲛ
19 ⲟⲩⲯⲩⲭⲏ ⲉⲥⲟⲩⲱⲛϩ ⲛⲁⲕ ⲉⲃⲟⲗ ⲙⲡⲣⲧⲁⲁⲥ ⲛⲛⲉⲑⲏⲣⲓⲟⲛ ⲙⲡⲣⲣⲡⲱⲃϣ ⲛⲛⲉⲯⲩⲭⲏ ⲛⲛϩⲏⲕⲉ ϣⲁⲃⲟⲗ
20 ϭⲱϣⲧ ⲉϩⲣⲁⲓ ⲉϫⲛⲧⲉⲕⲇⲓⲁⲑⲏⲕⲏ ϫⲉⲁⲩⲙⲟⲩϩ ⲛⲁⲛⲟⲙⲓⲁ ⲛϭⲓⲛⲏⲓ ⲛⲛⲉⲧϫⲟⲟⲣⲉ ⲉⲃⲟⲗ ⲛⲧⲉⲡⲕⲁϩ
21 ⲙⲡⲣⲧⲣⲉⲡⲉⲧⲑⲃⲃⲓⲏⲩ ⲕⲟⲧϥ ⲉⲃⲟⲗ ⲉϥϫⲓϣⲓⲡⲉ ⲡϩⲏⲕⲉ ⲙⲛⲡⲉⲃⲓⲏⲛ ⲛⲁⲥⲙⲟⲩ ⲉⲡⲉⲕⲣⲁⲛ
22 ⲧⲱⲟⲩⲛⲅ ⲡⲛⲟⲩⲧⲉ ⲛⲅϯϩⲁⲡ ⲉⲡⲁϩⲁⲡ ⲁⲣⲓⲡⲙⲉⲉⲩⲉ ⲛⲛⲉⲕⲛⲟϭⲛⲉϭ ⲉⲧⲉⲣⲉⲡⲁⲧϩⲏⲧ ⲉⲓⲣⲉ ⲙⲙⲟⲟⲩ ⲙⲡⲉϩⲟⲟⲩ ⲧⲏⲣϥ
23 ⲙⲡⲣⲣⲡⲱⲃϣ ⲙⲡⲉϩⲣⲟⲟⲩ ⲛⲛⲉⲕϩⲙϩⲁⲗ ⲧⲙⲛⲧϫⲁⲥⲓϩⲏⲧ ⲛⲛⲉⲧⲙⲟⲥⲧⲉ ⲙⲙⲟⲕ ⲁⲥⲉⲓ ⲉϩⲣⲁⲓ ϣⲁⲣⲟⲕ ⲛⲟⲩⲟⲉⲓϣ ⲛⲓⲙ
Psalms 72 · Psalms 74 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)