Read Psalms 59 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲛⲛⲉⲧⲛⲁϣⲓⲃⲉ ⲛⲕⲉⲥⲟⲡ ⲉⲧⲉⲥⲧⲏⲗⲟⲅⲣⲁⲫⲓⲁ ⲛⲇⲁⲩⲉⲓⲇ ⲉⲧⲇⲓⲁⲇⲟⲭⲏ
2 ⲛⲧⲉⲣⲉϥⲣⲱⲕϩ ⲛⲧⲉⲙⲉⲥⲟⲡⲟⲧⲁⲙⲓⲁ ⲛⲧⲥⲩⲣⲓⲁ ⲙⲛⲧⲥⲩⲣⲓⲁ ⲛⲥⲱⲩⲃⲁⲗ ⲁⲩⲱ ⲁϥⲕⲧⲟϥ ⲛϭⲓⲓⲱⲁⲃ ⲁϥⲡⲁⲧⲁⲥⲥⲉⲓ ⲛⲧⲓⲇⲟⲩⲙⲁⲓⲁ ϩⲙⲡⲉⲓⲁ ⲛⲛⲉϩⲙⲟⲩ ⲙⲛⲧⲥⲛⲟⲟⲩⲥ ⲛϣⲟ
3 ⲡⲛⲟⲩⲧⲉ ⲁⲕⲕⲁⲁⲛ ⲛⲥⲱⲕ ⲁⲕϣⲣϣⲱⲣⲛ ⲁⲕⲛⲟⲩϭⲥ ⲁⲩⲱ ⲟⲛ ⲁⲕϣⲛϩⲧⲏⲕ ⲉϫⲱⲛ
4 ⲁⲕⲛⲟⲉⲓⲛ ⲙⲡⲕⲁϩ ⲁⲕϣⲧⲣⲧⲱⲣϥ ⲙⲁⲧⲁⲗϭⲉⲛⲉϥⲟⲩⲱϣϥ ⲧⲏⲣⲟⲩ ϫⲉⲁϥⲕⲓⲙ
5 ⲁⲕⲧⲥⲁⲃⲉⲡⲉⲕⲗⲁⲟⲥ ⲉϩⲉⲛϩⲃⲏⲩⲉ ⲉⲩⲛⲁϣⲧ ⲁⲕⲧⲥⲟⲛ ⲛⲟⲩⲏⲣⲡ ⲛⲙⲕⲁϩ ⲛϩⲏⲧ
6 ⲁⲕϯ ⲛⲟⲩⲙⲁⲉⲓⲛ ⲛⲛⲉⲧⲣϩⲟⲧⲉ ϩⲏⲧⲕ ⲉⲧⲣⲉⲩⲡⲱⲧ ϩⲁⲧϩⲏ ⲛⲟⲩⲥⲟⲧⲉ
7 ϫⲉⲕⲁⲥ ⲉⲣⲉⲛⲉⲕⲙⲉⲣⲓⲧ ⲛⲟⲩϩⲙ ⲙⲁⲧⲟⲩϫⲟⲓ ϩⲛⲧⲉⲕⲟⲩⲛⲁⲙ ⲛⲅⲥⲱⲧⲙ ⲉⲣⲟⲓ ⲇⲓⲁⲯⲁⲗⲙⲁ
8 ⲁⲡⲛⲟⲩⲧⲉ ϣⲁϫⲉ ϩⲙⲡⲉϥⲡⲉⲧⲟⲩⲁⲁⲃ ϫⲉϯⲛⲁⲧⲉⲗⲏⲗ ⲧⲁⲡⲉϣⲥⲓⲕⲓⲙⲁ ⲧⲁⲉⲡⲡⲉⲓⲁ ⲛⲛⲉⲥⲕⲏⲛⲏ
9 ⲡⲱⲓ ⲡⲉ ⲅⲁⲗⲁⲁⲇ ⲡⲱⲓ ⲡⲉ ⲙⲁⲛⲁⲥⲥⲏ ⲉⲫⲣⲁⲓⲙ ⲡⲉ ⲡⲧⲁϫⲣⲟ ⲛⲧⲁⲁⲡⲉ ⲓⲟⲩⲇⲁⲥ ⲡⲉ ⲡⲁⲣⲣⲟ
10 ⲙⲱⲁⲃ ⲡⲉ ⲡⲗⲉⲃⲏⲥ ⲛⲧⲁϩⲉⲗⲡⲓⲥ ϯⲛⲁⲥⲟⲟⲩⲧⲛ ⲙⲡⲁⲧⲟⲟⲩⲉ ⲉϫⲛⲧⲓⲇⲟⲩⲙⲁⲓⲁ ⲛⲧⲁⲛⲁⲗⲗⲟⲫⲩⲗⲟⲥ ϩⲩⲡⲟⲧⲁⲥⲥⲉ ⲛⲁⲓ
11 ⲛⲓⲙ ⲡⲉⲧⲛⲁϫⲓⲧⲧ ⲉⲧⲡⲟⲗⲓⲥ ⲉⲧⲕⲧⲏⲩ ⲛⲓⲙ ⲡⲉⲧⲛⲁϫⲓⲙⲟⲉⲓⲧ ϩⲏⲧ ϣⲁⲧⲓⲇⲟⲩⲙⲁⲓⲁ
12 ⲙⲏ ⲛⲧⲟⲕ ⲁⲛ ⲡⲉ ⲡⲛⲟⲩⲧⲉ ⲛⲧⲁⲕⲕⲁⲁⲛ ⲛⲥⲱⲕ ⲉⲛⲅⲛⲏⲩ ⲁⲛ ⲉⲃⲟⲗ ⲡⲛⲟⲩⲧⲉ ϩⲛⲛⲉⲛⲙⲏⲏϣⲉ
13 ⲡϫⲟⲉⲓⲥ ⲙⲁ ⲛⲁⲛ ⲛⲟⲩⲃⲟⲏⲑⲓⲁ ϩⲛⲛⲉⲛⲑⲗⲓⲯⲓⲥ ⲁⲩⲱ ⲡⲟⲩϫⲁⲓ ⲙⲡⲣⲱⲙⲉ ϣⲟⲩⲉⲓⲧ
14 ϩⲙⲡⲉⲛⲛⲟⲩⲧⲉ ⲧⲛⲛⲁⲣⲟⲩϭⲟⲙ ⲁⲩⲱ ⲛⲧⲟϥ ⲡⲉⲧⲛⲁⲥⲱϣϥ ⲛⲛⲉⲧⲑⲗⲓⲃⲉ ⲙⲙⲟⲛ
Psalms 58 · Psalms 60 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)