Read Psalms 57 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲙⲡⲣⲧⲁⲕⲟ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲡⲉⲛⲧⲁϥⲥⲁϩϥ ⲉⲧⲉⲥⲧⲏⲗⲏ
2 ⲉϣϫⲉ ⲛⲁⲙⲉ ⲧⲉⲧⲛϫⲱ ⲛⲧⲇⲓⲕⲁⲓⲟⲥⲩⲛⲏ ⲕⲣⲓⲛⲉ ⲙⲡⲥⲟⲟⲩⲧⲛ ⲛϣⲏⲣⲉ ⲛⲛⲣⲱⲙⲉ
3 ⲕⲁⲓ ⲅⲁⲣ ⲧⲉⲧⲛⲣϩⲱⲃ ϩⲛⲡⲉⲧⲛϩⲏⲧ ⲉϩⲉⲛⲁⲛⲟⲙⲓⲁ ϩⲓϫⲙⲡⲕⲁϩ ⲛⲛⲉⲧⲛϭⲓϫ ϭⲗⲟⲙⲗⲙ ϩⲛϩⲉⲛϫⲓⲛϭⲟⲛⲥ
4 ⲁⲛⲣⲉϥⲣⲛⲟⲃⲉ ⲣϣⲙⲙⲟ ϫⲓⲛϩⲛⲧⲟⲟⲧⲉ ⲁⲩⲡⲗⲁⲛⲁ ϫⲓⲛϩⲛⲧϩⲏ ⲁⲩϫⲱ ⲛϩⲉⲛϭⲟⲗ
5 ⲟⲩⲛⲟⲩϭⲱⲛⲧ ⲙⲙⲟⲟⲩ ⲛⲧϩⲉ ⲙⲡⲁⲧⲡϩⲟϥ ⲛⲧϩⲉ ⲛⲟⲩϩⲟϥ ⲛⲁⲗ ⲉϥϣⲧⲁⲙ ⲛⲛⲉϥⲙⲁⲁϫⲉ
6 ⲉⲙⲉϥⲥⲱⲧⲙ ⲉⲡⲉϩⲣⲟⲟⲩ ⲛⲛⲉⲧⲙⲟⲩⲧⲉ ⲉⲣⲟϥ ⲁⲩⲱ ⲉⲩⲡⲁϩⲣⲉ ⲉⲩⲉⲓⲣⲉ ⲙⲙⲟϥ ϩⲓⲧⲛⲟⲩⲥⲟⲫⲟⲥ
7 ⲡⲛⲟⲩⲧⲉ ⲛⲁⲟⲩⲱϣϥ ⲛⲛⲉⲩⲟⲃϩⲉ ϩⲛⲣⲱⲟⲩ ⲁⲡϫⲟⲉⲓⲥ ⲟⲩⲱϭⲡ ⲛⲛⲛⲁϫϩⲉ ⲛⲙⲙⲟⲩⲓ
8 ⲁϥⲥⲟϣϥⲟⲩ ⲛⲧϩⲉ ⲛⲟⲩⲙⲟⲟⲩ ⲉϥⲥⲱⲕ ϥⲛⲁⲥⲱⲙⲛⲧ ⲛⲧⲉϥⲡⲓⲧⲉ ϣⲁⲛⲧⲟⲩⲣϭⲱⲃ
9 ⲥⲉⲛⲁⲱϫⲛ ⲛⲧϩⲉ ⲛⲟⲩⲙⲟⲩⲗϩ ⲉⲁϥⲃⲱⲗ ⲉⲃⲟⲗ ⲁⲩⲕⲱϩⲧ ϩⲉ ⲉϩⲣⲁⲓ ⲉϫⲱⲟⲩ ⲙⲡⲟⲩⲛⲁⲩ ⲉⲡⲣⲏ
10 ⲉⲙⲡⲁⲧⲟⲩⲉⲓⲙⲉ ⲉⲛⲉⲩϣⲟⲛⲧⲉ ⲧⲉϩⲣⲁⲙⲛⲟⲥ ⲛⲧϩⲉ ⲛⲛⲉⲧⲟⲛϩ ϥⲛⲁⲉⲙⲕⲧⲏⲩⲧⲛ ϩⲛⲟⲩⲟⲣⲅⲏ
11 ⲡⲇⲓⲕⲁⲓⲟⲥ ⲛⲁⲉⲩⲫⲣⲁⲛⲉ ⲉϥϣⲁⲛⲛⲁⲩ ⲉⲡϫⲓⲕⲃⲁ ⲛⲛⲁⲥⲉⲃⲏⲥ ϥⲛⲁⲉⲓⲱ ⲛⲛⲉϥϭⲓϫ ϩⲙⲡⲉⲥⲛⲟϥ ⲙⲡⲣⲉϥⲣⲛⲟⲃⲉ
12 ⲁⲩⲱ ⲡⲣⲱⲙⲉ ⲛⲁϫⲟⲟⲥ ϫⲉⲉⲓⲉ ⲟⲩⲛⲧⲉⲡⲇⲓⲕⲁⲓⲟⲥ ⲕⲁⲣⲡⲟⲥ ⲉⲓⲉ ⲡⲛⲟⲩⲧⲉ ϣⲟⲟⲡ ⲡⲉⲧⲕⲣⲓⲛⲉ ⲙⲙⲟⲟⲩ ϩⲙⲡⲕⲁϩ
Psalms 56 · Psalms 58 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)