Read Psalms 55 side by side with translations · The Final Bible
1 ⲉⲡϫⲱⲕ ⲉⲃⲟⲗ ϩⲁⲡⲗⲁⲟⲥ ⲉⲛⲧⲁϥⲟⲩⲉ ⲉⲃⲟⲗ ϩⲛⲛⲉⲧⲟⲩⲁⲁⲃ ⲡⲉⲛⲧⲁⲇⲁⲩⲉⲓⲇ ⲥⲁϩϥ ⲉⲧⲉⲥⲧⲏⲗⲏ ⲛⲧⲉⲣⲟⲩⲁⲙⲁϩⲧⲉ ⲙⲙⲟϥ ⲛϭⲓⲛⲁⲗⲗⲟⲫⲩⲗⲟⲥ ϩⲛⲅⲉⲑ
2 ⲛⲁⲛⲁⲓ ⲡϫⲟⲉⲓⲥ ϫⲉⲁⲩⲣⲱⲙⲉ ⲕⲁⲧⲁⲡⲁⲧⲓ ⲙⲙⲟⲓ ⲁⲩⲑⲗⲓⲃⲉ ⲙⲙⲟⲓ ϩⲙⲡⲡⲟⲗⲉⲙⲟⲥ ⲙⲡⲉϩⲟⲟⲩ ⲧⲏⲣϥ
3 ⲁⲛⲁϫⲓϫⲉⲉⲩⲉ ϩⲱⲙ ⲉϫⲱⲓ ⲙⲡⲉϩⲟⲟⲩ ⲧⲏⲣϥ ϫⲉⲛⲁϣⲉⲛⲉⲧϯ ⲟⲩⲃⲏⲓ ϩⲛⲟⲩⲁϣⲏ ⲛϩⲟⲟⲩ
4 ⲛϯⲛⲁⲣϩⲟⲧⲉ ⲁⲛ ⲁⲛⲟⲕ ⲉⲓⲛⲁϩⲧⲉ ⲉⲣⲟⲕ
5 ϯⲛⲁⲧⲁⲉⲓⲟ ⲛⲛⲁϣⲁϫⲉ ϩⲙⲡⲁⲛⲟⲩⲧⲉ ⲙⲡⲉϩⲟⲟⲩ ⲧⲏⲣϥ ⲁⲓⲛⲁϩⲧⲉ ⲉⲡⲛⲟⲩⲧⲉ ⲛϯⲛⲁⲣϩⲟⲧⲉ ⲁⲛ ϫⲉⲉⲣⲉⲥⲁⲣⲝ ⲛⲁⲣⲟⲩ ⲛⲁⲓ
6 ⲁⲩⲃⲱⲧⲉ ⲛⲛⲁϣⲁϫⲉ ⲙⲡⲉϩⲟⲟⲩ ⲧⲏⲣϥ ⲉⲣⲉⲛⲉⲩⲙⲉⲉⲩⲉ ⲧⲏⲣⲟⲩ ϣⲟⲟⲡ ⲉϩⲟⲩⲛ ⲉⲣⲟⲓ ⲉⲡⲡⲉⲧϩⲟⲟⲩ
7 ⲥⲉⲛⲁϭⲟⲓⲗⲉ ⲛⲥⲉϩⲱⲡ ⲛⲧⲟⲟⲩ ⲥⲉⲛⲁϩⲁⲣⲉϩ ⲉⲡⲁϯⲃⲥ ⲕⲁⲧⲁⲧϩⲉ ⲉⲛⲧⲁⲩϩⲩⲡⲟⲙⲉⲓⲛⲉ ⲉⲧⲁⲯⲩⲭⲏ
8 ⲉⲕⲉⲧⲁⲛϩⲟⲟⲩ ϩⲁⲗⲁⲁⲩ ⲡⲛⲟⲩⲧⲉ ⲕⲛⲁⲧⲁⲩⲟ ⲉϩⲣⲁⲓ ⲛⲛϩⲉⲑⲛⲟⲥ ϩⲛⲧⲉⲕⲟⲣⲅⲏ
9 ⲁⲓϫⲱ ⲛⲁⲕ ⲛⲛⲁϩⲃⲏⲩⲉ ⲁⲕⲕⲱ ⲛⲛⲁⲣⲙⲉⲓⲟⲟⲩⲉ ⲙⲡⲉⲕⲙⲧⲟ ⲉⲃⲟⲗ ⲛⲧϩⲉ ⲟⲛ ϩⲙⲡⲉⲕⲉⲣⲏⲧ
10 ⲛⲁϫⲓϫⲉⲉⲩⲉ ⲛⲁⲕⲟⲧⲟⲩ ⲉⲡⲁϩⲟⲩ ⲙⲡⲉϩⲟⲟⲩ ⲉϯⲛⲁⲱϣ ⲉϩⲣⲁⲓ ⲉⲣⲟⲕ ⲉⲓⲥ ϩⲏⲏⲧⲉ ⲁⲓⲉⲓⲙⲉ ϫⲉⲛⲧⲟⲕ ⲡⲉ ⲡⲁⲛⲟⲩⲧⲉ
11 ϯⲛⲁⲥⲙⲟⲩ ⲉⲡⲁⲛⲟⲩⲧⲉ ϩⲙⲡⲁϣⲁϫⲉ ϯⲛⲁⲥⲙⲟⲩ ϩⲙⲡⲁϣⲁϫⲉ ⲉⲡⲁⲛⲟⲩⲧⲉ
12 ⲁⲓϩⲉⲗⲡⲓⲍⲉ ⲉⲡⲛⲟⲩⲧⲉ ⲛϯⲛⲁⲣϩⲟⲧⲉ ⲁⲛ ϫⲉⲉⲣⲉⲣⲱⲙⲉ ⲛⲁⲣⲟⲩ ⲛⲁⲓ
13 ⲡⲛⲟⲩⲧⲉ ⲉⲣⲉⲛⲉⲣⲏⲧ ⲛϩⲏⲧ ⲉϯⲛⲁⲧⲁⲁⲩ ϯⲛⲁⲥⲙⲟⲩ ⲉⲣⲟⲕ
14 ϫⲉⲁⲕⲧⲟⲩϫⲉⲧⲁⲯⲩⲭⲏ ⲉⲃⲟⲗ ϩⲙⲡⲙⲟⲩ ⲁⲩⲱ ⲛⲁⲟⲩⲉⲣⲏⲧⲉ ⲉⲡⲉⲥⲗⲁⲁⲧⲉ ⲉⲧⲣⲁⲣⲁⲛⲁϥ ⲙⲡⲛⲟⲩⲧⲉ ⲙⲡⲉϥⲙⲧⲟ ⲉⲃⲟⲗ ϩⲙⲡⲟⲩⲟⲉⲓⲛ ⲛⲛⲉⲧⲟⲛϩ
Psalms 54 · Psalms 56 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)