Read Psalms 43 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲛⲛϣⲏⲣⲉ ⲛⲕⲟⲣⲉ ⲡⲉⲯⲁⲗⲙⲟⲥ ⲛⲧⲙⲛⲧⲣⲙⲛϩⲏⲧ
2 ⲡⲛⲟⲩⲧⲉ ⲁⲛⲥⲱⲧⲙ ϩⲛⲛⲉⲛⲙⲁⲁϫⲉ ⲛⲉⲛⲉⲓⲟⲧⲉ ⲁⲩⲧⲁⲙⲟⲛ ⲉⲡϩⲱⲃ ⲛⲧⲁⲕⲁⲁϥ ϩⲛⲛⲉⲩϩⲟⲟⲩ ϩⲛⲛⲉϩⲟⲟⲩ ⲛϣⲟⲣⲡ
3 ⲁⲧⲉⲕϭⲓϫ ϥⲱⲧⲉ ⲉⲃⲟⲗ ⲛϩⲉⲛϩⲉⲑⲛⲟⲥ ⲁⲕⲧⲟϭⲟⲩ ⲁⲕⲑⲙⲕⲟ ⲛϩⲉⲛⲗⲁⲟⲥ ⲁⲕⲛⲟϫⲟⲩ ⲉⲃⲟⲗ
4 ⲛⲧⲁⲩⲕⲗⲏⲣⲟⲛⲟⲙⲉⲓ ⲅⲁⲣ ⲁⲛ ⲙⲡⲕⲁϩ ϩⲛⲧⲉⲩⲥⲏϥⲉ ⲁⲩⲱ ⲙⲡⲉⲩϭⲃⲟⲓ ⲁⲛ ⲡⲉⲛⲧⲁϥⲧⲟⲩϫⲟⲟⲩ ⲁⲗⲗⲁ ⲧⲉⲕⲟⲩⲛⲁⲙ ⲧⲉ ⲙⲛⲡⲉⲕϭⲃⲟⲓ ⲁⲩⲱ ⲡⲟⲩⲟⲉⲓⲛ ⲙⲡⲉⲕϩⲟ ϫⲉⲁⲕⲟⲩⲁϣⲟⲩ
5 ⲛⲧⲟⲕ ⲡⲉ ⲡⲁⲣⲣⲟ ⲁⲩⲱ ⲡⲁⲛⲟⲩⲧⲉ ⲡⲉⲧϩⲱⲛ ⲛⲛⲉⲩϫⲟⲉⲓ ⲛⲓⲁⲕⲱⲃ
6 ϩⲣⲁⲓ ⲛϩⲏⲧⲕ ⲧⲛⲛⲁⲕⲱⲛⲥ ⲛⲛⲉⲛϫⲁϫⲉ ⲁⲩⲱ ϩⲙⲡⲉⲕⲣⲁⲛ ⲧⲛⲛⲁⲥⲱϣϥ ⲛⲛⲉⲧⲧⲱⲟⲩⲛ ⲉϫⲱⲛ
7 ⲛⲉⲓⲕⲱ ⲅⲁⲣ ⲁⲛ ⲛϩⲧⲏⲓ ⲉⲧⲁⲡⲓⲧⲉ ⲁⲩⲱ ⲛⲧⲁⲥⲏϥⲉ ⲁⲛ ⲧⲉⲧⲛⲛⲁϫⲟⲩϫⲟⲓ
8 ⲁⲕⲧⲟⲩϫⲟⲛ ⲅⲁⲣ ⲉⲃⲟⲗ ϩⲓⲧⲛⲛⲉⲧⲑⲗⲓⲃⲉ ⲙⲙⲟⲛ ⲁⲩⲱ ⲁⲕϯϣⲓⲡⲉ ⲛⲛⲉⲧⲙⲟⲥⲧⲉ ⲙⲙⲟⲛ
9 ϩⲣⲁⲓ ϩⲙⲡⲉⲛⲛⲟⲩⲧⲉ ⲧⲛⲛⲁϫⲓⲧⲁⲉⲓⲟ ⲙⲡⲉϩⲟⲟⲩ ⲧⲏⲣϥ ⲁⲩⲱ ⲧⲛⲛⲁⲉⲝⲟⲙⲟⲗⲟⲅⲉⲓ ⲙⲡⲉⲕⲣⲁⲛ ϣⲁⲉⲛⲉϩ ⲇⲓⲁⲯⲁⲗⲙⲁ
10 ⲧⲉⲛⲟⲩ ⲇⲉ ⲁⲕⲥⲁϩⲱⲛ ⲉⲃⲟⲗ ⲁⲕϯϣⲓⲡⲉ ⲛⲁⲛ ⲁⲩⲱ ⲛⲅⲛⲏⲩ ⲁⲛ ⲉⲃⲟⲗ ϩⲛⲛⲉⲛϭⲟⲙ
11 ⲁⲕⲕⲧⲟⲛ ⲉⲡⲁϩⲟⲩ ⲡⲁⲣⲁⲛⲉⲛϫⲁϫⲉ ⲁⲛⲉⲧⲙⲟⲥⲧⲉ ⲙⲙⲟⲛ ⲧⲟⲣⲡⲛ ⲛⲁⲩ
12 ⲁⲕⲧⲁⲁⲛ ⲛⲧϩⲉ ⲛⲛⲓⲉⲥⲟⲟⲩ ⲉϣⲁⲩⲟⲩⲟⲙⲟⲩ ⲁⲩⲱ ⲁⲕϫⲟⲟⲣⲛ ⲉⲃⲟⲗ ϩⲛⲛϩⲉⲑⲛⲟⲥ
13 ⲁⲕϯ ⲙⲡⲉⲕⲗⲁⲟⲥ ⲁϫⲛⲁⲥⲟⲩ ⲁⲩⲱ ⲛⲉⲙⲛⲙⲏⲏϣⲉ ϩⲛⲛⲉⲛⲗⲟⲩⲗⲁⲓ
14 ⲁⲕⲕⲱ ⲙⲙⲟⲛ ⲛⲛⲟϭⲛⲉϭ ⲛⲛⲉⲧϩⲓⲧⲟⲩⲱⲛ ⲛⲕⲱⲙϣ ⲁⲩⲱ ⲛⲥⲱⲃⲉ ⲛⲛⲉⲧⲙⲡⲉⲛⲕⲱⲧⲉ
15 ⲁⲕⲕⲱ ⲙⲙⲟⲛ ⲉⲩⲡⲁⲣⲁⲃⲟⲗⲏ ⲛⲛϩⲉⲑⲛⲟⲥ ⲁⲩⲱ ⲛⲕⲓⲙ ⲛⲁⲡⲉ ⲛϩⲉⲛⲗⲁⲟⲥ
16 ϫⲉⲡⲁϣⲓⲡⲉ ⲙⲡⲁⲙⲧⲟ ⲉⲃⲟⲗ ⲙⲡⲉϩⲟⲟⲩ ⲧⲏⲣϥ ⲁⲩⲱ ⲡϣⲓⲡⲉ ⲙⲡⲁϩⲟ ⲁϥϩⲱⲃⲥ ⲉⲃⲟⲗ ⲉϫⲱⲓ
17 ⲉⲃⲟⲗ ⲙⲡⲉϩⲣⲟⲟⲩ ⲙⲡⲉⲧⲛⲟϭⲛⲉϭ ⲙⲛⲡⲉⲧⲡⲁⲣⲁⲗⲁⲗⲉⲓ ⲙⲡⲉⲙⲧⲟ ⲉⲃⲟⲗ ⲙⲡϫⲁϫⲉ ⲙⲛⲡⲉⲧⲇⲓⲱⲕⲉ
18 ⲛⲁⲓ ⲧⲏⲣⲟⲩ ⲁⲩⲉⲓ ⲉϩⲣⲁⲓ ⲉϫⲱⲛ ⲙⲡⲛⲣⲡⲉⲕⲱⲃϣ ⲁⲩⲱ ⲙⲡⲛϫⲓⲛϭⲟⲛⲥ ϩⲛⲧⲉⲕⲇⲓⲁⲑⲏⲕⲏ
19 ⲁⲩⲱ ⲙⲡⲉⲡⲉⲛϩⲏⲧ ⲥⲁϩⲱϥ ⲉⲡⲁϩⲟⲩ ⲁⲕⲣⲓⲛⲉ ⲛⲛⲉⲛϩⲓⲟⲟⲩⲉ ⲉⲃⲟⲗ ϩⲛⲧⲉⲕϩⲓⲏ
20 ϫⲉⲁⲕⲑⲃⲃⲓⲟⲛ ϩⲛⲟⲩⲙⲁ ⲛⲙⲕⲁϩ ⲁⲩⲱ ⲁⲥϩⲟⲃⲥⲛ ⲛϭⲓⲑⲁⲓⲃⲉⲥ ⲙⲡⲙⲟⲩ
21 ⲉϣϫⲉ ⲁⲛⲣⲡⲱⲃϣ ⲙⲡⲣⲁⲛ ⲙⲡⲉⲛⲛⲟⲩⲧⲉ ⲉϣϫⲉ ⲁⲛⲡⲉⲣϣⲛⲉⲛϭⲓϫ ⲉⲃⲟⲗ ⲉⲩⲛⲟⲩⲧⲉ ⲛϣⲙⲙⲟ
22 ⲙⲏ ⲙⲡⲛⲟⲩⲧⲉ ⲁⲛ ⲡⲉⲧⲛⲁϣⲓⲛⲉ ⲛⲥⲁⲛⲁⲓ ⲛⲧⲟϥ ⲅⲁⲣ ⲉⲧⲥⲟⲟⲩⲛ ⲉⲛⲉⲧϩⲏⲡ ⲙⲡϩⲏⲧ
23 ϫⲉⲉⲧⲃⲏⲏⲧⲕ ⲥⲉⲙⲟⲩⲟⲩⲧ ⲙⲙⲟⲛ ⲙⲡⲉϩⲟⲟⲩ ⲧⲏⲣϥ ⲁⲩⲟⲡⲛ ⲛⲧϩⲉ ⲛⲛⲓⲉⲥⲟⲟⲩ ⲉⲕⲟⲛⲥⲟⲩ
24 ⲧⲱⲟⲩⲛ ⲡϫⲟⲉⲓⲥ ⲉⲧⲃⲉⲟⲩ ⲕⲛⲕⲟⲧⲕ ⲧⲱⲟⲩⲛ ⲙⲡⲣⲕⲁⲁⲛ ⲛⲥⲱⲕ ϣⲁⲃⲟⲗ
25 ⲉⲧⲃⲉⲟⲩ ⲁⲕⲕⲧⲉⲡⲉⲕϩⲟ ⲉⲃⲟⲗ ⲁⲕⲣⲡⲱⲃϣ ⲛⲧⲉⲛⲙⲛⲧϩⲏⲕⲉ ⲙⲛⲧⲉⲛⲑⲗⲓⲯⲓⲥ
26 ϫⲉⲁⲧⲉⲛⲯⲩⲭⲏ ⲑⲃⲃⲓⲟ ϣⲁⲡⲕⲁϩ ⲁϩⲏⲧⲛ ⲧⲱϭⲉ ⲉⲡⲉⲥⲏⲧ
27 ⲧⲱⲟⲩⲛ ⲃⲟⲏⲑⲉⲓ ⲉⲣⲟⲛ ⲡϫⲟⲉⲓⲥ ⲁⲩⲱ ⲥⲟⲧⲛ ⲉⲧⲃⲉⲡⲉⲕⲣⲁⲛ
Psalms 42 · Psalms 44 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)