Read Psalms 41 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲛⲧⲙⲛⲧⲣⲙⲛϩⲏⲧ ⲛⲛϣⲏⲣⲉ ⲛⲕⲟⲣⲉ
2 ⲛⲧϩⲉ ⲉⲧⲉⲣⲉⲟⲩⲉⲉⲓⲟⲩⲗ ⲙⲉ ⲛϭⲱ ϩⲓϫⲛϩⲉⲛϩⲟⲛⲃⲉ ⲙⲙⲟⲟⲩ ⲧⲁⲓ ⲧⲉ ⲧϩⲉ ⲉⲧⲉⲣⲉⲧⲁⲯⲩⲭⲏ ⲙⲉ ⲛⲉⲓⲉⲣⲁⲧⲕ ⲡⲛⲟⲩⲧⲉ
3 ⲁⲧⲁⲯⲩⲭⲏ ⲉⲉⲓⲃ ⲙⲡⲛⲟⲩⲧⲉ ⲉⲧⲟⲛϩ ϫⲉⲉⲓⲛⲏⲩ ⲧⲛⲁⲩ ⲧⲁⲟⲩⲱⲛϩ ⲉⲃⲟⲗ ⲙⲡϩⲟ ⲙⲡⲁⲛⲟⲩⲧⲉ
4 ⲁⲛⲁⲣⲙⲉⲓⲟⲟⲩⲉ ϣⲱⲡⲉ ⲛⲁⲓ ⲛⲟⲉⲓⲕ ⲙⲡⲉϩⲟⲟⲩ ⲙⲛⲧⲉⲩϣⲏ ϩⲙⲡⲧⲣⲉⲩϫⲟⲟⲥ ⲛⲁⲓ ⲙⲙⲏⲛⲉ ϫⲉⲉϥⲧⲱⲛ ⲡⲉⲕⲛⲟⲩⲧⲉ
5 ⲛⲁⲓ ⲁⲓⲣⲡⲉⲩⲙⲉⲉⲩⲉ ⲁⲓⲡⲱϩⲧ ⲛⲧⲁⲯⲩⲭⲏ ⲉϩⲣⲁⲓ ⲉϫⲱⲓ ϫⲉϯⲛⲏⲩ ⲉⲃⲟⲗ ϩⲓⲧⲛⲟⲩⲙⲁ ⲛⲥⲕⲏⲛⲏ ⲛϣⲡⲏⲣⲉ ϣⲁⲡⲏⲓ ⲙⲡⲛⲟⲩⲧⲉ ϩⲛⲟⲩⲥⲙⲏ ⲛⲧⲉⲗⲏⲗ ϩⲓⲟⲩⲱⲛϩ ⲉⲃⲟⲗ ⲛϩⲣⲟⲟⲩ ⲙⲡⲉⲧⲣϣⲁ
6 ⲉⲧⲃⲉⲟⲩ ⲧⲉⲗⲩⲡⲉⲓ ⲧⲁⲯⲩⲭⲏ ⲁⲩⲱ ⲉⲧⲃⲉⲟⲩ ⲧⲉϣⲧⲟⲣⲧⲣ ⲙⲙⲟⲓ ϩⲉⲗⲡⲓⲍⲉ ⲉⲡⲛⲟⲩⲧⲉ ϫⲉϯⲛⲁⲟⲩⲱⲛϩ ⲛⲁϥ ⲉⲃⲟⲗ ⲡⲟⲩϫⲁⲓ ⲙⲡⲁϩⲟ ⲡⲉ ⲡⲁⲛⲟⲩⲧⲉ
7 ⲁⲧⲁⲯⲩⲭⲏ ϣⲧⲟⲣⲧⲣ ⲛϩⲏⲧⲧ ⲉⲧⲃⲉⲡⲁⲓ ϯⲛⲁⲣⲡⲉⲕⲙⲉⲉⲩⲉ ⲡϫⲟⲉⲓⲥ ϩⲙⲡⲕⲁϩ ⲙⲡⲓⲟⲣⲇⲁⲛⲏⲥ ⲙⲛϩⲉⲣⲙⲱⲛ ⲉⲃⲟⲗ ϩⲙⲡⲧⲟⲟⲩ ϣⲏⲙ
8 ⲡⲛⲟⲩⲛ ⲛⲁⲱϣ ⲟⲩⲃⲉ ⲡⲛⲟⲩⲛ ⲉⲡⲉϩⲣⲟⲟⲩ ⲛⲛⲉⲕⲕⲁⲧⲁϩⲣⲁⲕⲧⲏⲥ ⲛⲉⲕⲣⲟⲟⲩϣ ⲧⲏⲣⲟⲩ ⲙⲛⲛⲉⲕϩⲟⲉⲓⲙ ⲁⲩⲉⲓ ⲉϩⲣⲁⲓ ⲉϫⲱⲓ
9 ⲡϫⲟⲉⲓⲥ ⲛⲁϩⲱⲛ ⲙⲡⲉϥⲛⲁ ⲙⲡⲉϩⲟⲟⲩ ⲛϥⲟⲩⲟⲛϩϥ ⲉⲃⲟⲗ ⲛⲧⲉⲩϣⲏ ⲉⲣⲉⲡⲁϣⲗⲏⲗ ⲛⲧⲟⲟⲧⲉⲡⲛⲟⲩⲧⲉ ⲙⲡⲁⲱⲛϩ
10 ϯⲛⲁϫⲟⲟⲥ ⲙⲡⲁⲛⲟⲩⲧⲉ ϫⲉⲛⲧⲕ ⲡⲁⲣⲉϥϣⲟⲡⲧ ⲉⲣⲟⲕ ⲉⲧⲃⲉⲟⲩ ⲁⲕⲣⲡⲁⲱⲃϣ ⲉⲧⲃⲉⲟⲩ ⲁⲕⲕⲁⲁⲧ ⲛⲥⲱⲕ ⲁⲩⲱ ⲉⲧⲃⲉⲟⲩ ϯⲙⲟⲟϣⲉ ⲉⲓⲟⲕⲙ ϩⲙⲡⲧⲣⲉϥⲑⲗⲓⲃⲉ ⲙⲙⲟⲓ ⲛϭⲓⲡⲁϫⲁϫⲉ
11 ϩⲙⲡⲧⲣⲉⲩⲗⲱϫϩ ⲛⲛⲁⲕⲉⲉⲥ ⲁⲩⲛⲉϭⲛⲟⲩϭⲧ ⲛϭⲓⲛⲉⲧⲑⲗⲓⲃⲉ ⲙⲙⲟⲓ ϩⲙⲡⲧⲣⲉⲩϫⲟⲟⲥ ⲛⲁⲓ ⲙⲙⲏⲛⲉ ϫⲉⲉϥⲧⲱⲛ ⲡⲉⲕⲛⲟⲩⲧⲉ
12 ⲉⲧⲃⲉⲟⲩ ⲧⲁⲯⲩⲭⲏ ⲧⲉⲗⲩⲡⲉⲓ ⲁⲩⲱ ⲉⲧⲃⲉⲟⲩ ⲧⲉϣⲧⲟⲣⲧⲣ ⲙⲙⲟⲓ ϩⲉⲗⲡⲓⲍⲉ ⲉⲡⲛⲟⲩⲧⲉ ϫⲉϯⲛⲁⲟⲩⲱⲛϩ ⲛⲁϥ ⲉⲃⲟⲗ ⲡⲟⲩϫⲁⲓ ⲙⲡⲁϩⲟ ⲡⲉ ⲡⲁⲛⲟⲩⲧⲉ
Psalms 40 · Psalms 42 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)