Read Psalms 33 side by side with translations · The Final Bible
1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲛⲧⲉⲣⲉϥϣⲓⲃⲉ ⲙⲡⲉϥϩⲟ ⲙⲡⲉⲙⲧⲟ ⲉⲃⲟⲗ ⲛⲁⲭⲓⲙⲉⲗⲉⲭ ⲁϥⲕⲁⲁϥ ⲉⲃⲟⲗ ⲁϥⲃⲱⲕ
2 ϯⲛⲁⲥⲙⲟⲩ ⲉⲡϫⲟⲉⲓⲥ ⲛⲟⲩⲟⲉⲓϣ ⲛⲓⲙ ⲛⲟⲩⲟⲉⲓϣ ⲛⲓⲙ ⲡⲉϥⲥⲙⲟⲩ ϩⲛⲣⲱⲓ
3 ⲧⲁⲯⲩⲭⲏ ⲛⲁϫⲓⲧⲁⲉⲓⲟ ϩⲙⲡϫⲟⲉⲓⲥ ⲙⲁⲣⲉⲛⲣⲙⲣⲁϣ ⲥⲱⲧⲙ ⲛⲥⲉⲟⲩⲛⲟϥ
4 ϫⲓⲥⲉ ⲛⲙⲙⲁⲓ ϩⲙⲡϫⲟⲉⲓⲥ ⲁⲩⲱ ⲛⲧⲉⲧⲛϫⲓⲥⲉ ⲙⲡⲉϥⲣⲁⲛ ϩⲓⲟⲩⲥⲟⲡ
5 ⲁⲛⲟⲕ ⲁⲓϣⲓⲛⲉ ⲛⲥⲁⲡϫⲟⲉⲓⲥ ⲁϥⲥⲱⲧⲙ ⲉⲣⲟⲓ ⲁⲩⲱ ⲁϥⲧⲟⲩϫⲟⲓ ⲉⲃⲟⲗ ϩⲛⲛⲁⲙⲁ ⲛϭⲟⲓⲗⲉ ⲧⲏⲣⲟⲩ
6 ϯ ⲙⲡⲉⲧⲛⲟⲩⲟⲓ ⲉⲣⲟϥ ⲛⲧⲉⲧⲛⲣⲟⲩⲟⲉⲓⲛ ⲁⲩⲱ ⲛⲉⲧⲛϩⲟ ⲛⲛⲉⲩϫⲓϣⲓⲡⲉ
7 ⲡⲁⲓ ⲡⲉ ⲡϩⲏⲕⲉ ⲛⲧⲁϥⲱϣ ⲉⲃⲟⲗ ⲁⲡϫⲟⲉⲓⲥ ⲥⲱⲧⲙ ⲉⲣⲟϥ ⲁⲩⲱ ⲁϥⲧⲟⲩϫⲟϥ ϩⲛⲛⲉϥⲑⲗⲓⲯⲓⲥ ⲧⲏⲣⲟⲩ
8 ϣⲁⲣⲉⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲕⲱⲧⲉ ⲉⲛⲉⲧⲣϩⲟⲧⲉ ϩⲏⲧϥ ⲛϥⲛⲁϩⲙⲟⲩ
9 ϫⲓϯⲡⲉ ⲛⲧⲉⲧⲛⲉⲓⲙⲉ ϫⲉⲡϫⲟⲉⲓⲥ ϩⲟⲗϭ ⲛⲁⲓⲁⲧϥ ⲙⲡⲣⲱⲙⲉ ⲉⲧⲛⲁϩⲉⲗⲡⲓⲍⲉ ⲉⲣⲟϥ
10 ⲁⲣⲓϩⲟⲧⲉ ϩⲏⲧϥ ⲙⲡϫⲟⲉⲓⲥ ⲛⲉϥⲡⲉⲧⲟⲩⲁⲁⲃ ϫⲉⲙⲛϭⲣⲱϩ ϣⲟⲟⲡ ⲛⲛⲉⲧⲣϩⲟⲧⲉ ϩⲏⲧϥ
11 ⲁⲛⲣⲙⲙⲁⲟ ⲣϩⲏⲕⲉ ⲁⲩⲱ ⲁⲩϩⲕⲟ ⲛⲉⲧϣⲓⲛⲉ ⲇⲉ ⲛⲥⲁⲡϫⲟⲉⲓⲥ ⲛⲥⲉⲛⲁϣⲱⲱⲧ ⲁⲛ ⲛⲁⲅⲁⲑⲟⲛ ⲛⲓⲙ ⲇⲓⲁⲯⲁⲗⲙⲁ
12 ⲁⲙⲏⲓⲧⲛ ⲛⲁϣⲏⲣⲉ ⲛⲧⲉⲧⲛⲥⲱⲧⲙ ⲉⲣⲟⲓ ⲧⲁϯⲥⲃⲱ ⲛⲏⲧⲛ ⲛⲧϩⲟⲧⲉ ⲙⲡϫⲟⲉⲓⲥ
13 ⲛⲓⲙ ⲡⲉ ⲡⲣⲱⲙⲉ ⲉⲧⲟⲩⲉϣⲡⲱⲛϩ ⲉⲧⲙⲉ ⲛⲛⲁⲩ ⲉⲛⲉϩⲟⲟⲩ ⲉⲧⲛⲁⲛⲟⲩⲟⲩ
14 ⲙⲁⲧⲁⲗϭⲉⲡⲉⲕⲗⲁⲥ ⲉⲃⲟⲗ ϩⲙⲡⲡⲉⲧϩⲟⲟⲩ ⲁⲩⲱ ⲛⲉⲕⲥⲡⲟⲧⲟⲩ ⲉⲧⲙϫⲱ ⲛⲟⲩⲕⲣⲟϥ
15 ⲣⲁⲕⲧⲕ ⲉⲃⲟⲗ ⲙⲡⲡⲉⲧϩⲟⲟⲩ ⲛⲅⲉⲓⲣⲉ ⲙⲡⲡⲉⲧⲛⲁⲛⲟⲩϥ ϣⲓⲛⲉ ⲛⲥⲁϯⲣⲏⲛⲏ ⲛⲅⲡⲱⲧ ⲛⲥⲱⲥ
16 ϫⲉⲉⲣⲉⲛⲃⲁⲗ ⲙⲡϫⲟⲉⲓⲥ ϭⲱϣⲧ ⲉϫⲛⲛⲇⲓⲕⲁⲓⲟⲥ ⲁⲩⲱ ⲛⲉϥⲙⲁⲁϫⲉ ⲉⲩⲣⲟⲕⲉ ⲉⲡⲉⲩⲥⲟⲡⲥ
17 ⲉⲣⲉⲡϩⲟ ⲇⲉ ⲙⲡϫⲟⲉⲓⲥ ϭⲱϣⲧ ⲉϫⲛⲛⲉⲧⲉⲓⲣⲉ ⲛⲙⲡⲉⲧϩⲟⲟⲩ ⲉϥⲱⲧⲉ ⲙⲡⲉⲩⲣⲡⲙⲉⲉⲩⲉ ⲉⲃⲟⲗ ϩⲓϫⲙⲡⲕⲁϩ
18 ⲁⲛⲇⲓⲕⲁⲓⲟⲥ ϫⲓϣⲕⲁⲕ ⲉⲃⲟⲗ ⲁⲡϫⲟⲉⲓⲥ ⲥⲱⲧⲙ ⲉⲣⲟⲟⲩ ⲁⲩⲱ ⲁϥⲧⲟⲩϫⲟⲟⲩ ϩⲛⲛⲉⲩⲑⲗⲓⲯⲓⲥ ⲧⲏⲣⲟⲩ
19 ⲡϫⲟⲉⲓⲥ ϩⲏⲛ ⲉϩⲟⲩⲛ ⲉⲛⲉⲧⲟⲩⲟϣϥ ϩⲙⲡⲉⲩϩⲏⲧ ⲁⲩⲱ ϥⲛⲁⲧⲁⲛϩⲉⲛⲉⲧⲑⲃⲃⲓⲏⲩ ϩⲙⲡⲉⲩⲡⲛⲉⲩⲙⲁ
20 ⲛⲁϣⲱⲟⲩⲛⲉⲑⲗⲓⲯⲓⲥ ⲛⲛⲇⲓⲕⲁⲓⲟⲥ ⲁⲩⲱ ⲡϫⲟⲉⲓⲥ ⲛⲁⲛⲁϩⲙⲟⲩ ⲛϩⲏⲧⲟⲩ ⲧⲏⲣⲟⲩ
21 ⲡϫⲟⲉⲓⲥ ⲛⲁϩⲁⲣⲉϩ ⲉⲛⲉⲩⲕⲉⲉⲥ ⲧⲏⲣⲟⲩ ⲛⲛⲉⲟⲩⲁ ⲟⲩⲱϣϥ ⲉⲃⲟⲗ ⲛϩⲏⲧⲟⲩ
22 ⲡⲙⲟⲩ ⲛⲧⲟⲟⲩ ⲛⲛⲣⲉϥⲣⲛⲟⲃⲉ ϩⲟⲟⲩ ⲁⲩⲱ ⲛⲉⲧⲙⲟⲥⲧⲉ ⲙⲡⲇⲓⲕⲁⲓⲟⲥ ⲛⲁⲣⲛⲟⲃⲉ
23 ⲡϫⲟⲉⲓⲥ ⲛⲁⲥⲱⲧⲉ ⲛⲛⲉⲯⲩⲭⲏ ⲛⲛⲉϥϩⲙϩⲁⲗ ⲁⲩⲱ ⲛⲛⲉⲩⲣⲛⲟⲃⲉ ⲛϭⲓⲟⲩⲟⲛ ⲛⲓⲙ ⲉⲧϩⲉⲗⲡⲓⲍⲉ ⲉⲣⲟϥ
Psalms 32 · Psalms 34 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)