Read Psalms 31 side by side with translations · The Final Bible
1 ⲡⲁⲧⲙⲛⲧⲣⲙⲛϩⲏⲧ ⲛⲇⲁⲩⲉⲓⲇ ⲛⲁⲓⲁⲧⲟⲩ ⲛⲛⲉⲛⲧⲁⲩⲕⲱ ⲉⲃⲟⲗ ⲛⲛⲉⲩⲁⲛⲟⲙⲓⲁ ⲙⲛⲛⲉⲛⲧⲁⲩϩⲱⲃⲥ ⲉⲃⲟⲗ ⲉϫⲛⲛⲉⲩⲛⲟⲃⲉ
2 ⲛⲁⲓⲁⲧϥ ⲙⲡⲣⲱⲙⲉ ⲉⲧⲉⲙⲡϫⲟⲉⲓⲥ ⲛⲁⲉⲡⲛⲟⲃⲉ ⲉⲣⲟϥ ⲁⲛ ⲟⲩⲇⲉ ⲉⲙⲛⲕⲣⲟϥ ϩⲛⲧⲉϥⲧⲁⲡⲣⲟ
3 ⲁⲓⲕⲁⲣⲱⲓ ϫⲉⲁⲛⲁⲕⲉⲉⲥ ⲣⲁⲥ ϩⲙⲡⲧⲣⲁϫⲓϣⲕⲁⲕ ⲉⲃⲟⲗ ⲙⲡⲉϩⲟⲟⲩ ⲧⲏⲣϥ
4 ϫⲉϩⲙⲡⲉϩⲟⲟⲩ ⲙⲛⲧⲉⲩϣⲏ ⲁⲧⲉⲕϭⲓϫ ϩⲣⲟϣ ⲉϩⲣⲁⲓ ⲉϫⲱⲓ ⲁⲓⲕⲧⲟⲓ ⲉⲩⲧⲁⲗⲁⲓⲡⲱⲣⲓⲁ ϩⲙⲡⲧⲣⲁⲧⲱⲗⲥ ⲛⲧϩⲉ ⲛⲛⲓϣⲟⲛⲧⲉ ⲇⲓⲁⲯⲁⲗⲙⲁ
5 ⲁⲓϫⲱ ⲙⲡⲁⲛⲟⲃⲉ ⲙⲡⲓϩⲉⲡⲧⲁⲁⲛⲟⲙⲓⲁ ⲁⲓϫⲟⲟⲥ ϫⲉϯⲛⲁϫⲉⲡⲁⲛⲟⲃⲉ ⲉⲧϯ ⲟⲩⲃⲏⲓ ⲉⲡϫⲟⲉⲓⲥ ⲁⲩⲱ ⲛⲧⲟⲕ ⲡⲉⲧⲛⲁⲕⲱ ⲉⲃⲟⲗ ⲛⲧⲙⲛⲧϣⲁϥⲧⲉ ⲙⲡⲁϩⲏⲧ ⲇⲓⲁⲯⲁⲗⲙⲁ
6 ⲉⲣⲉⲟⲩⲟⲛ ⲛⲓⲙ ⲉⲧⲟⲩⲁⲁⲃ ⲛⲁϣⲗⲏⲗ ⲉⲣⲟⲕ ϩⲁⲧⲁⲓ ⲙⲡⲉⲟⲩⲟⲉⲓϣ ⲉⲧⲥⲃⲧⲱⲧ ⲡⲗⲏⲛ ϩⲛⲟⲩⲕⲁⲧⲁⲕⲗⲩⲥⲙⲟⲥ ⲙⲙⲟⲟⲩ ⲉⲛⲁϣⲱϥ ⲛⲥⲉⲛⲁϩⲱⲛ ⲉⲣⲟϥ ⲁⲛ
7 ⲛⲧⲟⲕ ⲡⲉ ⲡⲁⲙⲁ ⲙⲡⲱⲧ ⲉⲃⲟⲗ ϩⲛⲧⲉⲑⲗⲓⲯⲓⲥ ⲉⲧⲕⲱⲧⲉ ⲉⲣⲟⲓ ⲡⲁⲧⲉⲗⲏⲗ ⲥⲟⲧⲧ ⲉⲃⲟⲗ ϩⲛⲛⲉⲧϩⲙⲡⲁⲕⲱⲧⲉ ⲇⲓⲁⲯⲁⲗⲙⲁ
8 ϯⲛⲁⲧⲁⲙⲟⲕ ⲛⲧⲁⲧⲥⲁⲃⲟⲕ ⲉⲧⲉϩⲓⲏ ⲉⲧⲕⲛⲁⲃⲱⲕ ⲛϩⲏⲧⲥ ϯⲛⲁⲧⲁϫⲣⲉⲛⲁⲃⲁⲗ ⲉϩⲣⲁⲓ ⲉϫⲱⲕ
9 ⲙⲡⲣⲣⲧϩⲉ ⲛⲛⲓϩⲧⲟ ⲙⲛⲛⲓⲙⲁⲥⲡⲟⲣⲕ ⲉⲧⲉⲙⲛⲧⲟⲩⲙⲛⲧⲥⲁⲃⲉ ⲥⲱⲕ ⲛⲛⲟⲩⲟⲟϭⲉ ⲛⲛⲉⲧⲉⲛⲥⲉϩⲱⲛ ⲉⲣⲟⲕ ⲁⲛ ϩⲛⲟⲩⲭⲁⲗⲓⲛⲟⲥ ⲙⲛⲟⲩϣⲧⲟϥ
10 ϩⲁϩ ⲛⲉ ⲙⲙⲁⲥⲧⲓⲝ ⲙⲡⲣⲉϥⲣⲛⲟⲃⲉ ⲡⲛⲉⲩⲙⲁ ⲇⲉ ⲛⲁⲕⲱⲧⲉ ⲉⲛⲉⲧϩⲉⲗⲡⲓⲍⲉ ⲉⲡϫⲟⲉⲓⲥ
11 ⲛⲇⲓⲕⲁⲓⲟⲥ ⲉⲩⲫⲣⲁⲛⲉ ⲉϫⲙⲡϫⲟⲉⲓⲥ ⲛⲧⲉⲧⲛⲧⲉⲗⲏⲗ ⲛⲧⲉⲧⲛϣⲟⲩϣⲟⲩ ⲙⲙⲱⲧⲛ ⲧⲏⲣⲧⲛ ⲛⲉⲧⲥⲟⲩⲧⲱⲛ ϩⲙⲡⲉⲩϩⲏⲧ
Psalms 30 · Psalms 32 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)