Psalms 30 — Aramaic (Peshitta)

2 ܐܪܡܪܡܟ ܡܪܝܐ ܕܐܪܝܡܬܢܝ ܘܠܐ ܚܕܝܬ ܒܝ ܠܒ̈ܥܠܕܒܒܝ

3 ܡܪܝܐ ܐܠܗܝ ܒܥܝܬ ܡܢܟ ܘܐܣܝܬܢܝ

4 ܘܐܣܩܬ ܡܢ ܫܝܘܠ ܠܢܦܫܝ ܘܐܚܝܬܢܝ ܡܢ ܢܚ̈ܬܝ ܓܘܒܐ

5 ܙܡܪܘ ܠܡܪܝܐ ܓܒ̈ܘܗܝ ܘܐܘܕܘ ܠܕܘܟܪܢܐ ܕܩܘܕܫܗ

6 ܡܛܠ ܕܟܐܬܐ ܒܪܘܓܙܗ ܘܚ̈ܝܐ ܒܨܒܝܢܗ ܒܪܡܫܐ ܬܒܘܬ ܒܟܬܐ ܘܒܨܦܪܐ ܚܕܘܬܐ

7 ܐܢܐ ܐܡܪܬ ܒܫܠܝܘܬܝ ܕܠܐ ܐܙܘܥ ܠܥܠܡ

8 ܐܠܗܐ ܒܨܒܝܢܟ ܐܩܝܡܬ ܥܠ ܫܘܒܚܝ ܚܝܠܐ ܘܐܗܦܟܬ ܐ̈ܦܝܟ ܘܙܥܬ

9 ܘܩܪܝܬܟ ܡܪܝܐ ܘܡܢܟ ܡܪܝ ܒܥܝܬ

10 ܡܢܐ ܝܘܬܪܢܐ ܐܝܬ ܒܕܡܝ ܕܐܚܘܬ ܠܚܒܠܐ ܠܐ ܡܘܕܐ ܠܟ ܥܦܪܐ ܘܠܐ ܡܚܘܐ ܗܝܡܢܘܬܟ

11 ܫܡܥ ܐܠܗܐ ܘܪܚܡ ܥܠܝ ܡܪܝܐ ܗܘܝ ܠܝ ܥܕܘܪܐ

12 ܕܐܗܦܟܬ ܡܪ̈ܩܕܬܝ ܠܚܕܘܬܐ ܫܪܝܬ ܣܩܝ ܘܐܟܒܢܬܢܝ ܚܕܘܬܐ

13 ܡܛܠ ܗܢܐ ܐܙܡܪ ܠܟ ܫܘܒܚܐ ܘܠܐ ܐܫܬܘܩ ܡܪܝܐ ܐܠܗܝ ܠܥܠܡ ܐܘܕܐ ܠܟ