Read Psalms 27 side by side with translations · The Final Bible
1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲁⲓϫⲓϣⲕⲁⲕ ⲉϩⲣⲁⲓ ⲉⲣⲟⲕ ⲡϫⲟⲉⲓⲥ ⲡⲁⲛⲟⲩⲧⲉ ⲙⲡⲣⲕⲁⲣⲱⲕ ⲉⲣⲟⲓ ⲙⲏⲡⲱⲥ ⲛⲅⲕⲁⲣⲱⲕ ⲉⲣⲟⲓ ⲧⲁⲣⲑⲉ ⲛⲛⲉⲧⲃⲏⲕ ⲉⲡⲉⲥⲏⲧ ⲉⲡϣⲏⲓ
2 ⲥⲱⲧⲙ ⲉⲡⲉϩⲣⲟⲟⲩ ⲙⲡⲁⲥⲟⲡⲥ ϩⲙⲡⲧⲣⲁⲥⲉⲡⲥⲱⲡⲕ ⲛⲧⲁϥⲓ ⲛⲛⲁϭⲓϫ ⲉϩⲣⲁⲓ ⲉⲡⲉⲕⲣⲡⲉ ⲉⲧⲟⲩⲁⲁⲃ
3 ⲙⲡⲣⲥⲉⲕⲧⲁⲯⲩⲭⲏ ⲙⲛⲛⲣⲉϥⲣⲛⲟⲃⲉ ⲁⲩⲱ ⲙⲡⲣⲧⲁⲕⲟⲓ ⲙⲛⲛⲉⲧⲣϩⲱⲃ ⲉⲧⲁⲛⲟⲙⲓⲁ ⲛⲉⲧϣⲁϫⲉ ϩⲛⲟⲩⲉⲓⲣⲏⲛⲏ ⲙⲛⲛⲉⲧϩⲓⲧⲟⲩⲱⲟⲩ ⲉⲣⲉⲙⲡⲉⲧϩⲟⲟⲩ ϩⲛⲛⲉⲩϩⲏⲧ
4 ϯⲛⲁⲩ ⲕⲁⲧⲁⲛⲉⲩϩⲃⲏⲩⲉ ⲁⲩⲱ ⲕⲁⲧⲁⲧⲡⲟⲛⲏⲣⲓⲁ ⲛⲛⲉⲩⲙⲉⲉⲩⲉ ⲧⲱⲱⲃⲉ ⲛⲁⲩ ⲕⲁⲧⲁⲛⲉϩⲃⲏⲩⲉ ⲛⲛⲉⲩϭⲓϫ ϯⲛⲁⲩ ⲙⲡⲉⲩⲧⲟⲩⲉⲓⲟ
5 ϫⲉⲙⲡⲟⲩⲉⲓⲙⲉ ⲉⲛⲉϩⲃⲏⲩⲉ ⲙⲡϫⲟⲉⲓⲥ ⲁⲩⲱ ⲛⲉϩⲃⲏⲩⲉ ⲛⲛⲉϥϭⲓϫ ⲕⲛⲁϣⲣϣⲱⲣⲟⲩ ⲛⲅⲧⲙⲕⲟⲧⲟⲩ
6 ⲡϫⲟⲉⲓⲥ ⲥⲙⲁⲙⲁⲁⲧ ϫⲉⲁϥⲥⲱⲧⲙ ⲉⲡⲉϩⲣⲟⲟⲩ ⲙⲡⲁⲥⲟⲡⲥ
7 ⲡϫⲟⲉⲓⲥ ⲡⲉ ⲡⲁⲃⲟⲏⲑⲟⲥ ⲁⲩⲱ ⲧⲁⲛⲁϣⲧⲉ ⲛⲧⲁⲡⲁϩⲏⲧ ⲕⲁϩⲧⲏϥ ⲉⲣⲟϥ ⲁⲓⲣϩⲟⲧⲉ ⲁⲧⲁⲥⲁⲣⲝ ϯⲟⲩⲱ ϯⲁⲛⲉⲝⲟⲙⲟⲗⲟⲅⲉⲓ ⲛⲁϥ ϩⲙⲡⲁⲟⲩⲱϣ
8 ⲡϫⲟⲉⲓⲥ ⲡⲉ ⲡⲧⲁϫⲣⲟ ⲙⲡⲉϥⲗⲁⲟⲥ ⲁⲩⲱ ⲧⲛⲁϣⲧⲉ ⲡⲉ ⲛⲛⲉⲩϫⲟⲉⲓ ⲙⲡⲉϥⲭⲣⲓⲥⲧⲟⲥ
9 ⲙⲁⲧⲟⲩϫⲉⲡⲉⲕⲗⲁⲟⲥ ⲛⲅⲥⲙⲟⲩ ⲉⲧⲉⲕⲕⲗⲏⲣⲟⲛⲟⲙⲓⲁ ⲛⲅⲙⲟⲟⲛⲉ ⲙⲙⲟⲟⲩ ⲛⲅϫⲁⲥⲧⲟⲩ ϣⲁⲉⲛⲉϩ
Psalms 26 · Psalms 28 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)