Psalms 18 — Coptic (Sahidic)

1 ⲉⲡϫⲱⲕ ⲉⲃⲟⲗ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ

2 ⲙⲡⲏⲩⲉ ϫⲱ ⲙⲡⲉⲟⲟⲩ ⲙⲡⲛⲟⲩⲧⲉ ⲁⲩⲱ ⲡⲉⲥⲧⲉⲣⲉⲱⲙⲁ ϫⲱ ⲙⲡⲧⲁⲙⲓⲟ ⲛⲛⲉϥϭⲓϫ

3 ⲡⲉϩⲟⲟⲩ ϫⲱ ⲛⲟⲩϣⲁϫⲉ ⲙⲡⲉϩⲟⲟⲩ ⲧⲉⲩϣⲏ ϫⲱ ⲛⲟⲩⲥⲟⲟⲩⲛ ⲛⲧⲉⲩϣⲏ

4 ⲛϩⲉⲛⲁⲥⲡⲉ ⲁⲛ ⲛⲉ ⲟⲩⲇⲉ ⲛϩⲉⲛϣⲁϫⲉ ⲁⲛ ⲛⲉ ⲉⲛⲥⲉⲛⲁⲥⲱⲧⲙ ⲁⲛ ⲉⲡⲉⲩϩⲣⲟⲟⲩ

5 ⲁⲡⲉⲩϩⲣⲟⲟⲩ ⲉⲓ ⲉⲃⲟⲗ ⲉϫⲙⲡⲕⲁϩ ⲧⲏⲣϥ ⲁⲩⲱ ⲁⲛⲉⲩϣⲁϫⲉ ⲡⲱϩ ϣⲁⲛⲉⲕⲣⲣⲱⲟⲩ ⲛⲧⲟⲓⲕⲟⲩⲙⲉⲛⲏ ⲁϥⲕⲱ ⲙⲡⲉϥⲙⲁ ⲛϣⲱⲡⲉ ϩⲙⲡⲣⲏ

6 ⲁⲩⲱ ⲛⲧⲟϥ ⲉϥⲟ ⲛⲧϩⲉ ⲛⲟⲩⲛⲩⲙⲫⲓⲟⲥ ⲉϥⲛⲏⲩ ⲉⲃⲟⲗ ϩⲙⲡⲉϥⲙⲁ ⲛϣⲉⲗⲉⲉⲧ ϥⲛⲁⲧⲉⲗⲏⲗ ⲛⲧϩⲉ ⲛⲟⲩⲅⲓⲅⲁⲥ ⲉⲡⲱⲧ ⲛⲧⲉϥϩⲓⲏ

7 ϫⲓⲛⲁⲣⲏϫⲥ ⲛⲧⲡⲉ ⲡⲉ ⲡⲉϥⲙⲁ ⲛⲉⲓⲉⲃⲟⲗ ⲁⲩⲱ ϣⲁⲁⲣⲏϫⲥ ⲛⲧⲡⲉ ⲡⲉ ⲡⲉϥⲙⲁ ⲛⲃⲱⲕ ⲉϩⲟⲩⲛ ⲙⲛⲡⲉⲧⲛⲁϣϩⲱⲡ ⲉⲧⲉϥϩⲙⲙⲉ

8 ⲡⲛⲟⲙⲟⲥ ⲙⲡϫⲟⲉⲓⲥ ⲟⲩⲁⲁⲃ ⲉϥⲕⲧⲟ ⲛⲛⲉⲯⲩⲭⲏ ⲧⲙⲛⲧⲙⲛⲧⲣⲉ ⲙⲡϫⲟⲉⲓⲥ ⲛϩⲟⲧ ⲉⲥⲧⲥⲁⲃⲟ ⲛⲛⲕⲟⲩⲓ

9 ⲛⲇⲓⲕⲁⲓⲱⲙⲁ ⲙⲡϫⲟⲉⲓⲥ ⲥⲟⲩⲧⲱⲛ ⲉⲩⲉⲩⲫⲣⲁⲛⲉ ⲙⲡϩⲏⲧ ⲧⲉⲛⲧⲟⲗⲏ ⲙⲡϫⲟⲉⲓⲥ ⲟⲩⲟⲩⲟⲉⲓⲛ ⲧⲉ ⲉⲥⲣⲟⲩⲟⲉⲓⲛ ⲉⲛⲃⲁⲗ ⲛⲛⲕⲟⲩⲓ

10 ⲧϩⲟⲧⲉ ⲙⲡϫⲟⲉⲓⲥ ⲟⲩⲁⲁⲃ ⲉⲥϣⲟⲟⲡ ϣⲁⲉⲛⲉϩ ⲛⲉⲛⲉϩ ⲛϩⲁⲡ ⲙⲡϫⲟⲉⲓⲥ ϩⲉⲛⲙⲉ ⲛⲉ ⲉⲩⲧⲙⲁⲉⲓⲏⲩ ϩⲓⲟⲩⲥⲟⲡ

11 ⲛⲉϥⲟⲩⲱϣ ⲥⲟⲧⲡ ⲉⲡⲛⲟⲩⲃ ⲙⲛⲡⲱⲛⲉ ⲙⲙⲉ ⲉⲧⲛⲁϣⲱϥ ⲁⲩⲱ ⲥⲉϩⲟⲗϭ ⲉⲡⲉⲃⲓⲱ ⲙⲛⲡⲙⲟⲩⲗϩ

12 ⲕⲁⲓ ⲅⲁⲣ ⲡⲉⲕϩⲙϩⲁⲗ ϩⲁⲣⲉϩ ⲉⲣⲟⲟⲩ ϩⲙⲡⲧⲣⲉϥϩⲁⲣⲉϩ ⲇⲉ ⲉⲣⲟⲟⲩ ⲟⲩⲧⲟⲩⲉⲓⲟ ⲡⲉ ⲉⲛⲁϣⲱϥ

13 ⲛⲓⲙ ⲡⲉⲧⲛⲁⲉⲓⲙⲉ ⲉⲙⲡⲁⲣⲁⲡⲧⲱⲙⲁ ⲧⲃⲃⲟⲓ ⲡϫⲟⲉⲓⲥ ⲉⲛⲁⲡⲉⲧϩⲏⲡ

14 ϯⲥⲟ ⲉⲡⲉⲕϩⲙϩⲁⲗ ⲉⲃⲟⲗ ϩⲛⲛϣⲙⲙⲟ ⲉⲩⲧⲙⲣϫⲟⲉⲓⲥ ⲉⲣⲟⲓ ϯⲛⲁϣⲱⲡⲉ ⲉⲓⲟⲩⲁⲁⲃ ⲁⲩⲱ ϯⲛⲁⲧⲃⲃⲟ ⲉⲃⲟⲗ ϩⲛⲟⲩⲛⲟϭ ⲛⲛⲟⲃⲉ

15 ⲛϣⲁϫⲉ ⲛⲧⲁⲧⲁⲡⲣⲟ ⲛⲁϣⲱⲡⲉ ⲉⲩⲥⲙⲟⲩ ⲁⲩⲱ ⲧⲙⲉⲗⲉⲧⲏ ⲙⲡⲁϩⲏⲧ ⲛⲟⲩⲟⲉⲓϣ ⲛⲓⲙ ⲙⲡⲉⲕⲙⲧⲟ ⲉⲃⲟⲗ ⲡϫⲟⲉⲓⲥ ⲡⲁⲃⲟⲏⲑⲟⲥ ⲁⲩⲱ ⲡⲁⲣⲉϥⲥⲱⲧⲉ