Read Psalms 140 side by side with translations · The Final Bible
1 ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲁⲓϫⲓϣⲕⲁⲕ ⲉϩⲣⲁⲓ ⲉⲣⲟⲕ ⲡϫⲟⲉⲓⲥ ⲥⲱⲧⲙ ⲉⲣⲟⲓ ϯϩⲧⲏⲕ ⲉⲡⲁϩⲣⲟⲟⲩ ϩⲙⲡⲧⲣⲁⲱϣ ⲉϩⲣⲁⲓ ⲉⲣⲟⲕ
2 ⲙⲁⲣⲉⲡⲁϣⲗⲏⲗ ⲥⲟⲟⲩⲧⲛ ⲛⲧϩⲉ ⲛⲟⲩϣⲟⲩϩⲏⲛⲉ ⲙⲡⲉⲕⲙⲧⲟ ⲉⲃⲟⲗ ⲡϥⲓ ⲛⲛⲁϭⲓϫ ⲉϩⲣⲁⲓ ⲛⲧϩⲉ ⲛⲟⲩⲑⲩⲥⲓⲁ ⲙⲡⲛⲁⲩ ⲛⲣⲟⲩϩⲉ
3 ⲡϫⲟⲉⲓⲥ ⲁⲕⲕⲱ ⲛⲟⲩϩⲁⲣⲉϩ ϩⲓⲣⲛ ⲣⲱⲓ ⲁⲩⲱ ⲟⲩⲣⲟ ⲉϥⲧⲁϫⲣⲏⲩ ϩⲛⲛⲁⲥⲡⲟⲧⲟⲩ
4 ⲙⲡⲣⲣⲕⲡⲁϩⲏⲧ ⲉϩⲉⲛϣⲁϫⲉ ⲉⲩϩⲟⲟⲩ ⲉⲧⲣⲁϭⲛⲗⲟⲓϭⲉ ϩⲛϩⲉⲛⲛⲟⲃⲉ ⲙⲛⲛⲣⲱⲙⲉ ⲉⲧⲉⲓⲣⲉ ⲛⲧⲁⲛⲟⲙⲓⲁ ⲁⲩⲱ ⲛⲛⲁϫⲓϣⲟϫⲛⲉ ⲙⲛⲛⲉⲩⲥⲱⲧⲡ
5 ⲡⲇⲓⲕⲁⲓⲟⲥ ⲛⲁⲡⲁⲓⲇⲉⲩⲉ ⲙⲙⲟⲓ ϩⲛⲟⲩⲛⲁ ⲁⲩⲱ ⲛϥϫⲡⲓⲟⲓ ⲙⲡⲣⲧⲣⲉⲡⲛⲉϩ ⲇⲉ ⲛⲧⲟϥ ⲙⲡⲣⲉϥⲣⲛⲟⲃⲉ ⲧⲱϩⲥ ⲛⲧⲁⲁⲡⲉ ⲉⲧⲓ ⲉⲧⲓ ⲡⲁϣⲗⲏⲗ ϩⲙⲡⲉⲩⲟⲩⲱϣ
6 ⲁⲩⲟⲩⲱⲙⲕ ⲛⲛϫⲱⲱⲣⲉ ⲙⲡⲕⲁϩ ϩⲁⲧⲛⲧⲡⲉⲧⲣⲁ ⲥⲱⲧⲙ ⲉⲛⲁϣⲁϫⲉ ϫⲉⲁⲩϭⲙϭⲟⲙ ⲛⲧϩⲉ ⲙⲡⲟⲩⲙⲟⲧ ⲙⲡⲕⲁϩ ⲁⲩⲡⲱϩ ϩⲓϫⲙⲡⲕⲁϩ
7 ⲁⲛⲉⲛⲕⲉⲉⲥ ϫⲱⲱⲣⲉ ⲉⲃⲟⲗ ϩⲁⲧⲛⲁⲙⲛⲧⲉ
8 ϫⲉⲉⲣⲉⲛⲁⲃⲁⲗ ⲡϫⲟⲉⲓⲥ ϥⲏⲩ ⲉϩⲣⲁⲓ ⲉⲣⲟⲕ ⲁⲓϩⲉⲗⲡⲓⲍⲉ ⲉⲣⲟⲕ ⲙⲡⲣϥⲓ ⲛⲧⲁⲯⲩⲭⲏ
9 ϩⲁⲣⲉϩ ⲉⲣⲟⲓ ⲉⲡⲡⲁϣ ⲛⲧⲁⲩⲧⲁϩⲟϥ ⲉⲣⲁⲧϥ ⲉⲣⲟⲓ ⲁⲩⲱ ⲉⲃⲟⲗ ϩⲛⲛⲉⲥⲕⲁⲛⲇⲁⲗⲟⲛ ⲛⲛⲉⲧⲣϩⲱⲃ ⲉⲧⲁⲛⲟⲙⲓⲁ
10 ⲡⲣⲉϥⲣⲛⲟⲃⲉ ⲛⲁϩⲉ ϩⲙⲡⲉϥϣⲛⲉ ϯϣⲟⲟⲡ ⲁⲛⲟⲕ ⲙⲁⲩⲁⲁⲧ ϣⲁⲛⲧⲓⲥⲁⲁⲧϥ
Psalms 139 · Psalms 141 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)