Psalms 138 — Aramaic (Peshitta)

1 ܐܘܕܐ ܠܟ ܡܪܝܐ ܡܢ ܟܠܗ ܠܒܝ ܘܩܕܡ ܡ̈ܠܟܐ ܐܙܡܪ ܠܟ

2 ܐܣܓܘܕ ܒܗܝܟܠܐ ܕܩܘܕܫܟ ܘܐܘܕܐ ܠܫܡܟ ܥܠ ܛܝܒܘܬܟ ܘܥܠ ܩܘܫܬܟ ܡܛܠ ܕܐܘܪܒܬ ܥܠ ܟܠ ܫܡ ܡܐܡܪܟ

3 ܒܝܘܡܐ ܕܩܪܝܬܟ ܥܢܝܬܢܝ ܘܐܣܓܝܬ ܥܘܫܢܗ̇ ܕܢܦܫܝ

4 ܢܘܕܘܢ ܠܟ ܡܪܝܐ ܟܠܗܘܢ ܡ̈ܠܟܐ ܕܐܪܥܐ ܡܛܠ ܕܫܡܥܘ ܡܐܡܪܗ ܕܦܘܡܟ

5 ܘܢܫܒܚܘܢ ܐܘܪ̈ܚܬܗ ܕܡܪܝܐ ܡܛܠ ܕܪܒ ܗܘ ܐܝܩܪܗ ܕܡܪܝܐ

6 ܘܪܡ ܗܘ ܡܪܝܐ ܕܒܥܘܡܩܐ ܚܙܐ ܘܐܝܢܐ ܕܡܬܬܪܝܡ ܡܢ ܪܘܚܩܐ ܝܕܥ

7 ܐܢ ܐܗܠܟ ܒܐܘܠܨܢܐ ܬܐܚܝܢܝ ܒܪܘܓܙܐ ܕܒ̈ܥܠܕܒܒܝ ܬܘܫܛ ܐܝܕܟ ܘܬܦܪܩܢܝ ܝܡܝܢܟ

8 ܡܪܝܐ ܐܓܢ ܥܠܝ ܡܪܝܐ ܪ̈ܚܡܝܟ ܠܥܠܡ ܘܥܒܕ ܐ̈ܝܕܝܟ ܠܐ ܬܪܦܐ