Read Psalms 134 side by side with translations · The Final Bible
1 ⲁⲗⲗⲏⲗⲟⲩⲓⲁ ⲥⲙⲟⲩ ⲉⲡⲣⲁⲛ ⲙⲡϫⲟⲉⲓⲥ ⲛϩⲙϩⲁⲗ ⲥⲙⲟⲩ ⲉⲡϫⲟⲉⲓⲥ
2 ⲛⲉⲧⲁϩⲉⲣⲁⲧⲟⲩ ϩⲙⲡⲏⲓ ⲙⲡϫⲟⲉⲓⲥ ϩⲛⲛⲁⲩⲗⲏ ⲙⲡⲏⲓ ⲙⲡⲉⲛⲛⲟⲩⲧⲉ
3 ⲥⲙⲟⲩ ⲉⲡϫⲟⲉⲓⲥ ϫⲉⲟⲩⲭⲣⲏⲥⲧⲟⲥ ⲡⲉ ⲡϫⲟⲉⲓⲥ ⲯⲁⲗⲗⲉⲓ ⲉⲡⲉϥⲣⲁⲛ ϫⲉϥⲛⲟⲧⲙ
4 ϫⲉⲁⲡϫⲟⲉⲓⲥ ⲥⲉⲧⲡⲓⲁⲕⲱⲃ ⲛⲁϥ ⲡⲓⲥⲣⲁⲏⲗ ⲉⲩⲥⲟⲟⲩϩⲥ ⲛⲁϥ
5 ϫⲉⲁⲓⲉⲓⲙⲉ ⲁⲛⲟⲕ ϫⲉⲟⲩⲛⲟϭ ⲡⲉ ⲡϫⲟⲉⲓⲥ ⲁⲩⲱ ⲡⲉⲛϫⲟⲉⲓⲥ ⲡⲁⲣⲁⲛⲛⲟⲩⲧⲉ ⲧⲏⲣⲟⲩ
6 ϩⲱⲃ ⲛⲓⲙ ⲉⲛⲧⲁⲡϫⲟⲉⲓⲥ ⲟⲩⲁϣⲟⲩ ⲁⲩⲁⲁⲩ ϩⲛⲧⲡⲉ ⲁⲩⲱ ϩⲙⲡⲕⲁϩ
7 ϩⲛⲛⲑⲁⲗⲁⲥⲥⲁ ⲙⲛⲛⲛⲟⲩⲛ ⲡⲉⲛⲧⲁϥⲛⲛⲉⲕⲗⲟⲟⲗⲉ ⲉϩⲣⲁⲓ ϫⲓⲛⲁⲣⲏϫϥ ⲙⲡⲕⲁϩ ⲁϥⲕⲁⲛⲉⲃⲣⲏϭⲉ ⲉⲩϩⲱⲟⲩ ⲡⲉⲛⲧⲁϥⲛⲛⲧⲏⲩ ⲉⲃⲟⲗ ϩⲛⲛⲉⲩⲁϩⲱⲱⲣ
8 ⲡⲉⲛⲧⲁϥⲡⲁⲧⲁⲥⲥⲉⲓ ⲛϣⲣⲡⲙⲓⲥⲉ ⲛⲓⲙ ⲛⲕⲏⲙⲉ ϫⲓⲛⲣⲱⲙⲉ ϣⲁⲧⲃⲛⲏ
9 ⲁϥϫⲟⲟⲩ ⲛϩⲉⲛⲙⲁⲓⲉⲛ ⲙⲛϩⲉⲛϣⲡⲏⲣⲉ ϩⲛⲧⲉⲕⲙⲏⲧⲉ ⲕⲏⲙⲉ ϩⲙⲫⲁⲣⲁⲱ ⲙⲛⲛⲉϥϩⲙϩⲁⲗ ⲧⲏⲣⲟⲩ
10 ⲡⲉⲛⲧⲁϥⲡⲁⲣⲁⲥⲥⲉ ⲛϩⲉⲛϩⲉⲑⲛⲟⲥ ⲉⲛⲁϣⲱⲟⲩ ⲉⲁϥⲙⲟⲩⲟⲩⲧ ⲛϩⲉⲛⲉⲣⲱⲟⲩ ⲉⲩⲧⲁϫⲣⲏⲩ
11 ⲥⲏⲱⲛ ⲡⲣⲣⲟ ⲛⲛⲁⲙⲟⲣⲣⲁⲓⲟⲥ ⲙⲛⲱⲅ ⲡⲣⲣⲟ ⲛⲧⲃⲁⲥⲁⲛ ⲙⲛⲛⲉⲣⲣⲱⲟⲩ ⲧⲏⲣⲟⲩ ⲛⲭⲁⲛⲁⲁⲛ
12 ⲁϥϯⲡⲉⲩⲕⲁϩ ⲛⲕⲗⲏⲣⲟⲛⲟⲙⲓⲁ ⲙⲡⲓⲥⲣⲁⲏⲗ ⲡⲉϥⲗⲁⲟⲥ
13 ⲡϫⲟⲉⲓⲥ ⲡⲉⲕⲣⲁⲛ ϣⲟⲟⲡ ϣⲁⲉⲛⲉϩ ⲡⲉⲕⲣⲡⲙⲉⲉⲩⲉ ⲡϫⲟⲉⲓⲥ ϣⲁⲟⲩϫⲱⲙ ⲙⲛⲟⲩϫⲱⲙ
14 ϫⲉⲡϫⲟⲉⲓⲥ ⲛⲁⲕⲣⲓⲛⲉ ⲙⲡⲉϥⲗⲁⲟⲥ ⲁⲩⲱ ⲥⲉⲛⲁⲥⲗⲥⲱⲗϥ ⲉϫⲛⲛⲉϥϩⲙϩⲁⲗ
15 ⲛⲉⲓⲇⲱⲗⲟⲛ ⲛⲛϩⲉⲑⲛⲟⲥ ϩⲉⲛϩⲁⲧ ⲛⲉ ϩⲓⲛⲟⲩⲃ ϩⲉⲛϩⲃⲏⲩⲉ ⲛⲉ ⲛϭⲓϫ ⲛⲣⲱⲙⲉ
16 ⲟⲩⲛⲃⲁⲗ ⲙⲙⲟⲟⲩ ⲙⲉⲩⲛⲁⲩ ⲉⲃⲟⲗ ⲟⲩⲛⲙⲁⲁϫⲉ ⲙⲙⲟⲟⲩ ⲙⲉⲩⲥⲱⲧⲙ
17 ⲣⲣⲱⲟⲩ ⲙⲙⲟⲟⲩ ⲙⲉⲩϣⲁϫⲉ ϣⲁⲁⲛⲧⲟⲩ ⲙⲙⲟⲟⲩ ⲙⲉⲩϣⲱⲗⲙ ⲛⲉⲩϭⲓϫ ⲙⲙⲟⲟⲩ ⲙⲉⲩϭⲙϭⲟⲙ ⲛⲉⲩⲟⲩⲉⲣⲏⲧⲉ ⲙⲙⲟⲟⲩ ⲙⲉⲩⲙⲟⲟϣⲉ ⲙⲉⲩⲙⲟⲩⲧⲉ ϩⲛⲧⲉⲩϣⲟⲩⲱⲃⲉ ⲙⲛⲡⲛⲉⲩⲙⲁ ⲅⲁⲣ ϩⲛⲣⲱⲟⲩ
18 ⲉⲩⲉⲉⲓⲛⲉ ⲙⲙⲟⲟⲩ ⲛϭⲓⲛⲉⲛⲧⲁⲩⲧⲁⲙⲓⲟⲟⲩ ⲙⲛⲟⲩⲟⲛ ⲛⲓⲙ ⲉⲧⲛⲁϩⲧⲉ ⲉⲣⲟⲟⲩ
19 ⲡⲏⲓ ⲙⲡⲓⲥⲣⲁⲏⲗ ⲥⲙⲟⲩ ⲉⲡϫⲟⲉⲓⲥ ⲡⲏⲓ ⲛⲗⲉⲩⲉⲓ ⲥⲙⲟⲩ ⲉⲡϫⲟⲉⲓⲥ
20 ⲡⲏⲓ ⲛⲁⲁⲣⲱⲛ ⲥⲙⲟⲩ ⲉⲡϫⲟⲉⲓⲥ ⲛⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲥⲙⲟⲩ ⲉⲡϫⲟⲉⲓⲥ
21 ⲡϫⲟⲉⲓⲥ ⲥⲙⲁⲙⲁⲁⲧ ϩⲛⲥⲓⲱⲛ ⲡⲉⲧⲟⲩⲏϩ ϩⲛⲧϩⲓⲉⲣⲟⲩⲥⲁⲗⲏⲙ
Psalms 133 · Psalms 135 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)