Read Psalms 108 side by side with translations · The Final Bible
1 ⲉⲡϫⲱⲕ ⲉⲃⲟⲗ ⲡⲉⲯⲁⲗⲙⲟⲥ ⲛⲇⲁⲩⲉⲓⲇ ⲡⲛⲟⲩⲧⲉ ⲙⲡⲣⲕⲁⲣⲱⲕ ⲉⲡⲁⲥⲙⲟⲩ
2 ϫⲉⲧⲧⲁⲡⲣⲟ ⲙⲡⲣⲉϥⲣⲛⲟⲃⲉ ⲙⲛⲧⲁⲡⲉⲕⲣⲟϥ ⲁⲩⲟⲩⲱⲛ ⲉϩⲣⲁⲓ ⲉϫⲱⲓ ⲁⲩϣⲁϫⲉ ⲉⲣⲟⲓ ϩⲛⲟⲩⲗⲁⲥ ⲛⲕⲣⲟϥ
3 ⲁⲩⲕⲱⲧⲉ ⲉⲣⲟⲓ ϩⲛϩⲉⲛϣⲁϫⲉ ⲙⲙⲟⲥⲧⲉ ⲁⲩϯ ⲛⲙⲙⲁⲓ ⲉⲡϫⲓⲛϫⲏ ⲉⲡⲙⲁ
4 ⲛⲥⲉⲙⲉⲣⲓⲧⲧ ⲁⲩⲇⲓⲁⲃⲁⲗⲗⲉ ⲙⲙⲟⲓ ⲁⲛⲟⲕ ⲇⲉ ⲛⲉⲓϣⲗⲏⲗ ⲡⲉ
5 ⲁⲩⲥⲙⲓⲛⲉ ⲛϩⲉⲛⲡⲉⲧϩⲟⲟⲩ ⲉⲣⲟⲓ ⲉⲡⲙⲁ ⲛϩⲉⲛⲡⲉⲧⲛⲁⲛⲟⲩⲟⲩ ⲁⲩⲱ ⲟⲩⲙⲟⲥⲧⲉ ⲉⲡⲙⲁ ⲙⲡⲁⲙⲉ
6 ⲕⲁⲑⲓⲥⲧⲁ ⲙⲡⲣⲉϥⲣⲛⲟⲃⲉ ⲉϫⲱϥ ⲙⲁⲣⲉⲡⲇⲓⲁⲃⲟⲗⲟⲥ ⲁϩⲉⲣⲁⲧϥ ϩⲓⲟⲩⲛⲁⲙ ⲙⲙⲟϥ
7 ϩⲙⲡⲧⲣⲉϥϫⲓϩⲁⲡ ⲙⲁⲣⲉϥⲉⲓ ⲉⲃⲟⲗ ⲉϥⲧϭⲁⲓⲏⲩ ⲙⲁⲣⲉⲡⲉϥϣⲗⲏⲗ ϣⲱⲡⲉ ⲛⲁϥ ⲉⲩⲛⲟⲃⲉ
8 ⲛⲧⲉⲛⲉϥϩⲟⲟⲩ ⲥⲃⲟⲕ ⲛⲧⲉⲕⲉⲟⲩⲁ ϫⲓ ⲛⲧⲉϥⲙⲛⲧⲉⲡⲓⲥⲕⲟⲡⲟⲥ
9 ⲙⲁⲣⲉⲛⲉϥϣⲏⲣⲉ ⲣⲟⲣⲫⲁⲛⲟⲥ ⲁⲩⲱ ⲧⲉϥⲥϩⲓⲙⲉ ⲛⲭⲏⲣⲁ
10 ϩⲛⲟⲩⲕⲓⲙ ⲙⲁⲣⲟⲩⲡⲉⲛⲉⲛⲉϥϣⲏⲣⲉ ⲉⲃⲟⲗ ⲛⲥⲉⲧⲱⲃϩ ⲙⲁⲣⲟⲩⲛⲟϫⲟⲩ ⲉⲃⲟⲗ ϩⲛⲛⲉⲩⲏⲓ
11 ⲛⲧⲉⲡⲇⲁⲛⲓⲥⲧⲏⲥ ⲙⲉϣⲧⲡⲉⲧⲛⲧⲁϥ ⲧⲏⲣϥ ⲛⲧⲉϩⲉⲛϣⲙⲙⲟ ⲧⲉⲣⲡⲛⲉϥϩⲓⲥⲉ
12 ⲙⲡⲣⲧⲣⲉϥϣⲱⲡⲉ ⲛⲁϥ ⲛϭⲓⲡⲉⲧⲛⲁϣⲟⲡϥ ⲉⲣⲟϥ ⲙⲡⲣⲧⲣⲉϣⲁⲛϩⲧⲏϥ ϣⲱⲡⲉ ⲛⲛⲉϥⲟⲣⲫⲁⲛⲟⲥ
13 ⲙⲁⲣⲟⲩϥⲉⲧⲛⲉϥϣⲏⲣⲉ ⲉⲃⲟⲗ ⲛⲥⲉϥⲉⲧⲡⲉϥⲣⲁⲛ ⲉⲃⲟⲗ ϩⲛⲟⲩϫⲱⲙ ⲛⲟⲩⲱⲧ
14 ⲛⲥⲉⲣⲡⲙⲉⲉⲩⲉ ⲛⲛⲁⲛⲟⲙⲓⲁ ⲛⲛⲉϥⲉⲓⲟⲧⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲥⲉⲧⲙϥⲱⲧⲉ ⲉⲃⲟⲗ ⲙⲡⲛⲟⲃⲉ ⲛⲧⲉϥⲙⲁⲁⲩ
15 ⲙⲁⲣⲟⲩϣⲱⲡⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲟⲩⲟⲉⲓϣ ⲛⲓⲙ ⲛⲥⲉϥⲉⲧⲡⲉϥⲣⲡⲙⲉⲉⲩⲉ ⲉⲃⲟⲗ ϩⲓϫⲙⲡⲕⲁϩ
16 ⲉⲃⲟⲗ ϫⲉⲙⲡϥⲣⲡⲙⲉⲉⲩⲉ ⲉⲉⲓⲣⲉ ⲛⲟⲩⲛⲁ ⲁϥⲡⲱⲧ ⲛⲥⲁⲟⲩⲉⲃⲓⲏⲛ ⲙⲛⲟⲩϩⲏⲕⲉ ⲙⲛⲡⲉⲧⲙⲟⲕϩ ⲛϩⲏⲧ ⲉⲙⲟⲟⲩⲧϥ
17 ⲁϥⲙⲉⲣⲉⲡⲥⲁϩⲟⲩ ⲉϥⲉⲉⲓ ⲛⲁϥ ⲙⲡϥⲟⲩⲉϣⲡⲉⲥⲙⲟⲩ ⲉϥⲉⲡⲱⲧ ⲉⲃⲟⲗ ⲙⲙⲟϥ
18 ⲁϥϯⲡⲥⲁϩⲟⲩ ϩⲓⲱⲱϥ ⲛⲧϩⲉ ⲛⲟⲩϩⲟⲓⲧⲉ ⲁϥⲃⲱⲕ ⲉϩⲟⲩⲛ ⲉⲛⲉϥⲙⲁϩⲧ ⲛⲧϩⲉ ⲛⲟⲩⲙⲟⲟⲩ ⲁⲩⲱ ⲛⲧϩⲉ ⲛⲟⲩⲛⲉϩ ϩⲛⲛⲉϥⲕⲉⲉⲥ
19 ⲙⲁⲣⲉϥϣⲱⲡⲉ ⲛⲁϥ ⲛⲧϩⲉ ⲙⲡϩⲟⲓⲧⲉ ⲉϣⲁϥϭⲟⲟⲗⲉϥ ⲙⲙⲟϥ ⲁⲩⲱ ⲛⲧϩⲉ ⲛⲟⲩⲙⲟϫϩ ⲉϣⲁϥⲙⲟⲣϥ ⲙⲙⲟϥ ⲛⲟⲩⲟⲉⲓϣ ⲛⲓⲙ
20 ⲡⲁⲓ ⲡⲉ ⲡϩⲱⲃ ⲛⲛⲉⲧⲇⲓⲁⲃⲁⲗⲗⲉ ⲙⲙⲟⲓ ϩⲁⲧⲙ ⲡϫⲟⲉⲓⲥ ⲁⲩⲱ ⲛⲉⲧϫⲱ ⲛϩⲉⲛⲡⲉⲧϩⲟⲟⲩ ⲛⲥⲁⲧⲁⲯⲩⲭⲏ
21 ⲛⲧⲟⲕ ⲇⲉ ⲡϫⲟⲉⲓⲥ ⲡϫⲟⲉⲓⲥ ⲁⲣⲓⲣⲉ ⲛⲙⲙⲁⲓ ⲛⲟⲩⲛⲁ ⲉⲧⲃⲉⲡⲉⲕⲣⲁⲛ ϫⲉⲟⲩⲭⲣⲏⲥⲧⲟⲥ ⲡⲉ ⲡⲉⲕⲛⲁ
22 ⲛⲁϩⲙⲉⲧ ϫⲉⲁⲛⲅ ⲟⲩϩⲏⲕⲉ ⲁⲩⲱ ⲁⲛⲅ ⲟⲩⲉⲃⲓⲏⲛ ϫⲉⲁⲡⲁϩⲏⲧ ϣⲧⲟⲣⲧⲣ ⲙⲡⲁⲥⲁ ⲛϩⲟⲩⲛ
23 ⲁⲓⲗⲟ ⲛⲧⲙⲏⲧⲉ ⲛⲧϩⲉ ⲛⲟⲩϩⲁⲓⲃⲉⲥ ⲉⲁⲥⲣⲓⲕⲉ ⲁⲩⲛⲟϣⲡⲧ ⲉⲃⲟⲗ ⲛⲧϩⲉ ⲛⲛⲓϣϫⲉ
24 ⲁⲛⲁⲡⲉⲓⲁⲧ ϭⲃⲃⲉ ⲉⲃⲟⲗ ϩⲛⲧⲁⲛⲏⲥⲧⲉⲓⲁ ⲁⲧⲁⲥⲁⲣⲝ ϣⲓⲃⲉ ⲉⲧⲃⲉⲛⲉϩ
25 ⲁⲩⲱ ⲁⲛⲟⲕ ⲁⲓϣⲱⲡⲉ ⲛⲁⲩ ⲛⲛⲟϭⲛⲉϭ ⲁⲩⲛⲁⲩ ⲉⲣⲟⲓ ⲁⲩⲕⲓⲙ ⲛⲛⲉⲩⲁⲡⲏⲩⲉ
26 ⲃⲟⲏⲑⲉⲓ ⲉⲣⲟⲓ ⲡϫⲟⲉⲓⲥ ⲡⲁⲛⲟⲩⲧⲉ ⲙⲁⲧⲟⲩϫⲟⲓ ⲕⲁⲧⲁⲡⲉⲕⲛⲁ
27 ⲛⲥⲉⲉⲓⲙⲉ ϫⲉⲧⲉⲕϭⲓϫ ⲧⲉ ⲧⲁⲓ ⲛⲧⲟⲕ ⲡϫⲟⲉⲓⲥ ⲁⲕⲧⲁⲙⲓⲟⲥ
28 ⲥⲉⲛⲁⲥⲁϩⲟⲩ ⲛⲧⲟⲕ ⲇⲉ ⲉⲕⲉⲥⲙⲟⲩ ⲛⲉⲧⲧⲱⲟⲩⲛ ⲉϩⲣⲁⲓ ⲉϫⲱⲓ ⲛⲁϫⲓϣⲓⲡⲉ ⲡⲉⲕϩⲙϩⲁⲗ ⲇⲉ ⲛⲁⲉⲩⲫⲣⲁⲛⲉ
29 ⲙⲁⲣⲉⲛⲉⲧϯϣⲧⲟⲩⲏⲧ ⲉⲣⲟⲓ ϯ ϩⲓⲱⲟⲩ ⲙⲡϣⲓⲡⲉ ⲛⲥⲉϭⲟⲟⲗⲟⲩ ⲙⲙⲟϥ ⲛⲧϩⲉ ⲛⲟⲩⲇⲓⲡⲗⲟⲉⲓⲥ
30 ϯⲛⲁⲟⲩⲱⲛϩ ⲉⲃⲟⲗ ⲙⲡⲁϫⲟⲉⲓⲥ ⲉⲙⲁⲧⲉ ⲁⲩⲱ ϯⲛⲁⲥⲙⲟⲩ ⲉⲣⲟϥ ϩⲛⲧⲁⲧⲁⲡⲣⲟ ⲛⲧⲙⲏⲧⲉ ⲛⲟⲩⲙⲏⲏϣⲉ
31 ϫⲉⲁϥⲁϩⲉⲣⲁⲧϥ ϩⲓⲟⲩⲛⲁⲙ ⲙⲡϩⲏⲕⲉ ⲉⲛⲉϩⲙⲧⲁⲯⲩⲭⲏ ⲉⲛⲉⲧⲡⲏⲧ ⲛⲥⲱⲓ
Psalms 107 · Psalms 109 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)