Read Psalms 104 side by side with translations · The Final Bible
1 ⲁⲗⲗⲏⲗⲟⲩⲓⲁ ⲟⲩⲱⲛϩ ⲉⲃⲟⲗ ⲙⲡϫⲟⲉⲓⲥ ⲛⲧⲉⲧⲛⲉⲡⲓⲕⲁⲗⲉⲓ ⲙⲡⲉϥⲣⲁⲛ ⲛⲧⲉⲧⲛϫⲱ ⲛⲛⲉϥϩⲃⲏⲩⲉ ϩⲛⲛϩⲉⲑⲛⲟⲥ
2 ϫⲱ ⲉⲣⲟϥ ⲛⲧⲉⲧⲛⲯⲁⲗⲗⲉⲓ ⲉⲣⲟϥ ⲛⲧⲉⲧⲛϫⲱ ⲛⲛⲉϥϣⲡⲏⲣⲉ ⲧⲏⲣⲟⲩ
3 ⲛⲧⲉⲧⲛϫⲓⲧⲁⲉⲓⲟ ϩⲙⲡⲉϥⲣⲁⲛ ⲉⲧⲟⲩⲁⲁⲃ ⲙⲁⲣⲉⲡϩⲏⲧ ⲉⲩⲫⲣⲁⲛⲉ ⲛⲛⲉⲧϣⲓⲛⲉ ⲛⲥⲁⲡϫⲟⲉⲓⲥ
4 ϣⲓⲛⲉ ⲛⲥⲁⲡϫⲟⲉⲓⲥ ⲛⲧⲉⲧⲛϭⲙϭⲟⲙ ϣⲓⲛⲉ ⲛⲥⲁⲡⲉϥϩⲟ ⲛⲟⲩⲟⲉⲓϣ ⲛⲓⲙ
5 ⲁⲣⲓⲡⲙⲉⲉⲩⲉ ⲛⲛⲉϥϣⲡⲏⲣⲉ ⲛⲧⲁϥⲁⲁⲩ ⲛⲉϥϩⲃⲏⲩⲉ ⲁⲩⲱ ⲛϩⲁⲡ ⲛⲧⲉϥⲧⲁⲡⲣⲟ
6 ⲡⲉⲥⲡⲉⲣⲙⲁ ⲛⲁⲃⲣⲁϩⲁⲙ ⲛⲉϥϩⲙϩⲁⲗ ⲛϣⲏⲣⲉ ⲛⲓⲁⲕⲱⲃ ⲛⲉϥⲥⲱⲧⲡ
7 ⲛⲧⲟϥ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ⲛⲉϥϩⲁⲡ ϩⲙⲡⲕⲁϩ ⲧⲏⲣϥ
8 ⲁϥⲣⲡⲙⲉⲉⲩⲉ ⲛⲧⲉϥⲇⲓⲁⲑⲏⲕⲏ ϣⲁⲉⲛⲉϩ ⲡϣⲁϫⲉ ⲛⲧⲁϥϩⲱⲛ ⲙⲙⲟϥ ⲉϣⲟ ⲛⲅⲉⲛⲉⲁ
9 ⲡⲉⲛⲧⲁϥⲥⲙⲛⲧϥ ⲙⲛⲁⲃⲣⲁϩⲁⲙ ⲁⲩⲱ ⲡⲉϥⲁⲛⲁϣ ⲙⲛⲓⲥⲁⲁⲕ
10 ⲁϥⲧⲁϩⲟϥ ⲉⲣⲁⲧϥ ⲛⲓⲁⲕⲱⲃ ⲙⲡⲣⲟⲥⲧⲁⲅⲙⲁ ⲁⲩⲱ ⲡⲓⲥⲣⲁⲏⲗ ⲉⲩⲇⲓⲁⲑⲏⲕⲏ ⲛϣⲁ ⲉⲛⲉϩ
11 ⲉϥϫⲱ ⲙⲙⲟⲥ ϫⲉϯⲛⲁϯ ⲛⲁⲕ ⲙⲡⲕⲁϩ ⲛⲭⲁⲛⲁⲁⲛ ⲛⲥⲕⲛⲟⲩϩ ⲛⲧⲉⲧⲛⲕⲗⲏⲣⲟⲛⲟⲙⲓⲁ
12 ϩⲙⲡⲧⲣⲉⲩϣⲱⲡⲉ ⲉⲩⲥⲟⲃⲕ ϩⲛⲧⲉⲩⲏⲡⲉ ⲉⲩⲥⲟⲃⲕ ⲉⲩⲟ ⲛⲣⲙⲛϭⲟⲓⲗⲉ ⲛϩⲏⲧϥ
13 ⲁⲩⲉⲓ ⲉⲃⲟⲗ ϩⲛⲟⲩϩⲉⲑⲛⲟⲥ ⲉⲩϩⲉⲑⲛⲟⲥ ⲁⲩⲱ ⲉⲃⲟⲗ ϩⲛⲕⲉⲙⲛⲧⲣⲣⲟ ⲉⲕⲉⲗⲁⲟⲥ
14 ⲙⲡϥⲕⲁⲣⲱⲙⲉ ⲉϫⲓⲧⲟⲩ ⲛϭⲟⲛⲥ ⲁϥϫⲡⲓⲉϩⲉⲛⲉⲣⲱⲟⲩ ⲉⲧⲃⲏⲧⲟⲩ
15 ϫⲉⲙⲡⲣϫⲱϩ ⲉⲛⲁⲭⲣⲓⲥⲧⲟⲥ ⲙⲡⲣⲡⲟⲛⲏⲣⲉⲩⲉ ϩⲛⲛⲁⲡⲣⲟⲫⲏⲧⲏⲥ
16 ⲁϥⲙⲟⲩⲧⲉ ⲉⲩϩⲉⲃⲱⲱⲛ ⲉϫⲙⲡⲕⲁϩ ⲁϥⲟⲩⲱϣϥ ⲙⲡⲧⲁϫⲣⲟ ⲙⲡⲟⲉⲓⲕ
17 ⲁϥϫⲉⲩⲟⲩⲣⲱⲙⲉ ϩⲁⲧⲉⲩϩⲏ ⲁⲩϯ ⲛⲓⲱⲥⲏⲫ ⲉⲃⲟⲗ ⲉⲩϩⲙϩⲁⲗ
18 ⲁⲩⲑⲃⲃⲓⲉⲛⲉϥⲟⲩⲉⲣⲏⲧⲉ ϩⲙⲡⲉⲓⲛⲉ ⲛϩⲟⲙⲛⲧ ⲁⲧⲉϥⲯⲩⲭⲏ ⲥⲉⲓⲛⲉ ϩⲛⲟⲩⲡⲉⲛⲓⲡⲉ
19 ϣⲁⲛⲧϥⲉⲓ ⲛϭⲓⲡⲉϥϣⲁϫⲉ ⲡϣⲁϫⲉ ⲙⲡϫⲟⲉⲓⲥ ⲡⲉⲛⲧⲁϥⲡⲁⲥⲧϥ
20 ⲁⲡⲣⲣⲟ ϫⲟⲟⲩ ⲁϥⲃⲟⲗϥ ⲉⲃⲟⲗ ⲡⲁⲣⲭⲱⲛ ⲛⲛⲗⲁⲟⲥ ⲁϥⲕⲁⲁϥ ⲉⲃⲟⲗ
21 ⲁϥⲕⲁⲑⲓⲥⲧⲁ ⲙⲙⲟϥ ⲛϫⲟⲉⲓⲥ ⲉϫⲙⲡⲉϥⲏⲓ ⲁⲩⲱ ⲛⲁⲣⲭⲱⲛ ⲙⲡⲉⲧⲛⲧⲁϥ ⲧⲏⲣϥ
22 ⲉϯⲥⲃⲱ ⲛⲛⲉϥⲁⲣⲭⲱⲛ ⲛⲧⲉϥϩⲉ ⲁⲩⲱ ⲉⲧⲥⲁⲃⲉⲛⲉϥϩⲗⲗⲟ
23 ⲁⲡⲓⲥⲣⲁⲏⲗ ⲃⲱⲕ ⲉϩⲣⲁⲓ ⲉⲕⲏⲙⲉ ⲓⲁⲕⲱⲃ ⲁϥϭⲟⲓⲗⲉ ⲉⲡⲕⲁϩ ⲛⲭⲁⲙ
24 ⲁϥⲁⲩⲝⲁⲛⲉ ⲙⲡⲉϥⲗⲁⲟⲥ ⲉⲙⲁⲧⲉ ⲁϥϯϭⲟⲙ ⲛⲁϥ ⲉϩⲟⲩⲉ ⲛⲉϥϫⲓϫⲉⲉⲩⲉ
25 ⲁϥⲕⲧⲉⲡⲉϥϩⲏⲧ ⲉⲙⲉⲥⲧⲉⲡⲉϥⲗⲁⲟⲥ ⲁⲩⲱ ⲉⲣⲕⲣⲟϥ ϩⲛⲛⲉϥϩⲙϩⲁⲗ
26 ⲁϥϫⲉⲩⲙⲱⲩⲥⲏⲥ ⲡⲉϥϩⲙϩⲁⲗ ⲙⲛⲁⲁⲣⲱⲛ ⲡⲉⲛⲧⲁϥⲥⲟⲧⲡϥ
27 ⲁϥⲕⲱ ⲛϩⲏⲧⲟⲩ ⲛⲛϣⲁϫⲉ ⲛⲛⲉϥⲙⲁⲉⲓⲛ ⲁⲩⲱ ⲛⲉϥϣⲡⲏⲣⲉ ϩⲙⲡⲕⲁϩ ⲛⲭⲁⲙ
28 ⲁϥϫⲟⲟⲩ ⲛⲟⲩⲕⲁⲕⲉ ⲁϥϩⲟⲃⲥⲟⲩ ⲁⲩⲱ ⲁϥϯⲛⲟⲩϭⲥ ⲛⲛⲉϥϣⲁϫⲉ
29 ⲁϥⲕⲧⲟ ⲛⲛⲉⲩⲙⲟⲟⲩ ⲉⲩⲥⲛⲟϥ ⲁⲩⲱ ⲁϥⲙⲟⲩⲟⲩⲧ ⲛⲛⲉⲩⲧⲃⲧ
30 ⲁⲡⲉⲩⲕⲁϩ ⲧⲁⲩⲟ ⲉϩⲣⲁⲓ ⲛϩⲉⲛⲕⲣⲟⲩⲣ ϩⲛⲛⲧⲁⲙⲉⲓⲟⲛ ⲛⲛⲉⲩⲣⲣⲱⲟⲩ
31 ⲁϥϫⲟⲟⲥ ⲁϥⲉⲓ ⲛϭⲓⲡⲁϥ ⲛⲟⲩϩⲟⲣ ⲁⲩⲱ ⲡⲉϩⲗⲱⲙ ϩⲛⲛⲉⲩⲧⲟϣ ⲧⲏⲣⲟⲩ
32 ⲁϥⲕⲱ ⲛⲛⲉⲩϩⲱⲟⲩ ⲛⲁⲗ ⲙⲡⲉⲛⲕⲱϩⲧ ⲉϥⲙⲟⲩϩ ϩⲙⲡⲉⲩⲕⲁϩ
33 ⲁϥⲡⲁⲧⲁⲥⲥⲉⲓ ⲛⲛⲉⲩⲃⲱ ⲛⲉⲗⲟⲟⲗⲉ ⲙⲛⲛⲉⲩⲃⲱ ⲛⲕⲛⲧⲉ
34 ⲁϥⲟⲩⲱϣϥ ⲛϣⲏⲛ ⲛⲓⲙ ⲛⲛⲉⲩⲧⲟϣ ⲁϥϫⲟⲟⲥ ⲁϥⲉⲓ ⲛϭⲓⲡⲉϣϫⲉ ⲁⲩⲱ ⲡⲉⲃⲣⲟⲩⲭⲟⲥ ⲉⲧⲉⲙⲛⲧϥⲏⲡⲉ
35 ⲁϥⲟⲩⲱⲙ ⲙⲡⲉⲭⲟⲣⲧⲟⲥ ⲧⲏⲣϥ ⲙⲡⲉⲩⲕⲁϩ
36 ⲁϥⲡⲁⲧⲁⲥⲥⲉⲓ ⲛϣⲣⲡ ⲙⲙⲓⲥⲉ ⲛⲓⲙ ⲙⲡⲉⲩⲕⲁϩ ⲧⲁⲡⲁⲣⲭⲏ ⲛⲛⲉⲩϩⲓⲥⲉ ⲧⲏⲣⲟⲩ
37 ⲁϥⲛⲧⲟⲩ ⲉⲃⲟⲗ ϩⲙⲡϩⲁⲧ ⲙⲛⲡⲛⲟⲩⲃ ⲛⲉⲛⲛⲡⲉⲧϭⲟⲟⲃ ϩⲛⲛⲉⲩⲫⲩⲗⲏ
38 ⲁⲕⲏⲙⲉ ⲉⲩⲫⲣⲁⲛⲉ ϩⲙⲡⲉⲩⲉⲓ ⲉⲃⲟⲗ ϫⲉⲁⲧⲉⲩϩⲟⲧⲉ ⲉⲓ ⲉϩⲣⲁⲓ ⲉϫⲱⲟⲩ
39 ⲁϥⲡⲉⲣϣⲟⲩⲕⲗⲟⲟⲗⲉ ⲉⲃⲟⲗ ⲣϩⲁⲓⲃⲉⲥ ⲉⲣⲟⲟⲩ ⲙⲛⲟⲩⲕⲱϩⲧ ⲉⲣⲟⲩⲟⲉⲓⲛ ⲉⲣⲟⲟⲩ ⲛⲧⲉⲩϣⲏ
40 ⲁⲩⲁⲓⲧⲉⲓ ⲛϩⲉⲛⲁϥ ⲁⲥⲉⲓ ⲛⲁⲩ ⲛϭⲓⲟⲩϩⲏ ⲙⲡⲏⲣⲉ ⲁϥⲧⲥⲓⲟⲩ ⲙⲡⲟⲉⲓⲕ ⲛⲧⲡⲉ
41 ⲁϥⲡⲱϩ ⲛⲟⲩⲡⲉⲧⲣⲁ ⲁϩⲉⲛⲙⲟⲟⲩ ϣⲟⲩⲟ ⲉⲃⲟⲗ ⲁϩⲉⲛⲓⲉⲣⲱⲟⲩ ⲥⲱⲕ ϩⲛϩⲉⲛⲙⲁ ⲉⲙⲛⲙⲟⲟⲩ ⲛϩⲏⲧⲟⲩ
42 ϫⲉⲁϥⲣⲡⲙⲉⲉⲩⲉ ⲙⲡⲉϥϣⲁϫⲉ ⲉⲧⲟⲩⲁⲁⲃ ⲉⲛⲧⲁϥⲥⲙⲛⲧϥ ⲙⲛⲁⲃⲣⲁϩⲁⲙ ⲡⲉϥϩⲙϩⲁⲗ
43 ⲁϥⲙⲡⲉϥⲗⲁⲟⲥ ⲉⲃⲟⲗ ϩⲛⲟⲩⲧⲉⲗⲏⲗ ⲁⲩⲱ ⲛⲉϥⲥⲱⲧⲡ ϩⲛⲟⲩⲟⲩⲛⲟϥ
44 ⲁϥϯ ⲛⲁⲩ ⲛⲛⲉⲭⲱⲣⲁ ⲛⲛϩⲉⲑⲛⲟⲥ ⲁⲩⲕⲗⲏⲣⲟⲛⲟⲙⲉⲓ ⲛⲛϩⲓⲥⲉ ⲛⲛⲗⲁⲟⲥ
45 ϫⲉⲕⲁⲥ ⲉⲩⲉϩⲁⲣⲉϩ ⲉⲛⲉϥⲇⲓⲕⲁⲓⲱⲙⲁ ⲁⲩⲱ ⲛⲥⲉϣⲓⲛⲉ ⲛⲥⲁⲡⲉϥⲛⲟⲙⲟⲥ
Psalms 103 · Psalms 105 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)