Read Proverbs 4 side by side with translations · The Final Bible
1 ⲥⲱⲧⲙ ⲛⲁϣⲏⲣⲉ ⲉⲧⲉⲥⲃⲱ ⲙⲡⲉⲧⲛⲉⲓⲱⲧ ⲁⲩⲱ ϯϩⲧⲏⲧⲛ ⲉⲉⲓⲙⲉ ⲉⲩⲙⲉⲉⲩⲉ
2 ⲟⲩⲇⲱⲣⲟⲛ ⲅⲁⲣ ⲉⲛⲁⲛⲟⲩϥ ⲡⲉⲧⲓϯ ⲙⲙⲟϥ ⲛⲏⲧⲛ ⲙⲡⲣⲕⲱ ⲛⲥⲱⲧⲛ ⲙⲡⲁϣⲁϫⲉ
3 ⲁⲓⲣϣⲏⲣⲉ ⲅⲁⲣ ϩⲱ ⲡⲉ ⲉⲓⲥⲱⲧⲙ ⲛⲥⲁⲡⲁⲉⲓⲱⲧ ⲁⲩⲱ ⲉⲣⲉⲧⲁⲙⲁⲁⲩ ⲙⲉ ⲙⲙⲟⲓ
4 ⲛⲁⲓ ⲟⲛ ⲉⲩϯⲥⲃⲱ ⲛⲁⲓ ⲉⲩϫⲱ ⲙⲙⲟⲥ
5 ϫⲉⲙⲁⲣⲉⲡⲉⲛϣⲁϫⲉ ⲧⲁϫⲣⲟ ϩⲙⲡⲉⲕϩⲏⲧ ϩⲁⲣⲉϩ ⲉⲛⲁⲉⲛⲧⲟⲗⲏ ⲛⲅⲧⲙⲣⲡⲉⲩⲱⲃϣ ⲁⲩⲱ ⲙⲡⲣⲟⲃϣ ⲉⲛϣⲁϫⲉ ⲛⲧⲁⲧⲁⲡⲣⲟ
6 ⲙⲡⲣⲕⲁⲁϥ ⲛⲥⲱⲕ ⲧⲁⲣⲉϥϣⲟⲡⲕ ⲉⲣⲟϥ ⲙⲉⲣⲓⲧϥ ⲧⲁⲣⲉϥϩⲁⲣⲉϩ ⲉⲣⲟⲕ
7 ⲡϣⲱⲣⲡ ⲛⲧⲙⲛⲧⲥⲁⲃⲉ ⲥⲉⲕⲥⲟⲟⲩⲛ ⲁⲩⲱ ⲥⲉⲕⲡⲉⲓⲙⲉ ϩⲁϩⲱⲃ ⲛⲓⲙ ⲉⲧⲛⲧⲁⲕ
8 ⲙⲁⲕⲧⲟⲕ ⲉⲣⲟϥ ϫⲉⲉϥⲉϫⲁⲥⲧⲕ ⲙⲁⲧⲁⲉⲓⲟϥ ϫⲉⲉϥⲉϣⲟⲡⲕ ⲉⲣⲟϥ
9 ϫⲉⲉϥⲉϯ ⲛⲟⲩⲕⲗⲟⲙ ⲛϩⲙⲟⲧ ⲉϫⲛⲧⲉⲕⲁⲡⲉ ⲛϥⲣⲛⲁϣⲧⲉ ⲉⲣⲟⲕ ϩⲛⲟⲩⲕⲗⲟⲙ ⲛⲧⲣⲩⲫⲏ
10 ⲥⲱⲧⲙ ⲡⲁϣⲏⲣⲉ ⲛⲅϣⲱⲡ ⲉⲣⲟⲕ ⲛⲛⲁϣⲁϫⲉ ϫⲉⲕⲁⲥ ⲉⲣⲉϩⲁϩ ⲛϩⲓⲏ ⲛⲱⲛϩ ϣⲱⲡⲉ ⲛⲁⲕ
11 ⲉⲓϯⲥⲃⲱ ⲅⲁⲣ ⲛⲁⲕ ⲉⲛⲉϩⲓⲟⲟⲩⲉ ⲛⲧⲥⲟⲫⲓⲁ ⲉⲓⲧⲁⲗⲟ ⲇⲉ ⲙⲙⲟⲕ ⲉϩⲣⲁⲓ ⲉϫⲛϩⲉⲛϩⲓⲟⲟⲩⲉ ⲉⲩⲥⲟⲩⲧⲱⲛ
12 ⲉⲕϣⲁⲛⲙⲟⲟϣⲉ ⲅⲁⲣ ⲛⲉⲕϩⲓⲟⲟⲩⲉ ⲛⲁϣⲧⲁⲙ ⲉⲣⲱⲕ ⲁⲛ ⲉⲕϣⲁⲛⲡⲱⲧ ⲉⲕϣⲁⲛⲡⲱⲧ ⲇⲉ ⲕⲛⲁϩⲓⲥⲉ ⲁⲛ
13 ⲁⲙⲁϩⲧⲉ ⲛⲧⲁⲥⲃⲱ ⲙⲡⲣⲕⲁⲁⲥ ⲛⲥⲱⲕ ϩⲁⲣⲉϩ ⲉⲣⲟⲥ ⲛⲁⲕ ⲉⲡⲉⲕⲁϩⲉ
14 ⲙⲡⲣⲙⲟⲟϣⲉ ϩⲓⲛⲉϩⲓⲟⲟⲩⲉ ⲛⲛⲣⲉϥⲣⲛⲟⲃⲉ
15 ⲙⲡⲣⲃⲱⲕ ⲉϩⲟⲩⲛ ⲛⲙⲙⲁⲩ ⲉⲡⲙⲁ ⲉⲧⲟⲩⲥⲟⲟⲩϩ ⲉⲣⲟϥ ⲣⲁⲕⲧⲕ ⲉⲃⲟⲗ ⲛⲅϣⲃⲧⲕⲕ ⲉⲣⲟⲟⲩ
16 ⲛⲛⲉⲩⲱⲃϣ ⲅⲁⲣ ⲉⲙⲡⲟⲩⲣⲡⲉⲧϩⲟⲟⲩ ⲁⲡϩⲓⲛⲏⲃ ⲅⲁⲣ ⲟⲩⲉ ⲙⲙⲟⲟⲩ ⲁⲩⲱ ⲙⲉⲩⲱⲃϣ
17 ⲛⲧⲟⲟⲩ ⲅⲁⲣ ⲉⲩⲥⲁⲛⲁϣⲧ ϩⲛϩⲉⲛϩⲣⲉ ⲙⲙⲛⲧϣⲁϥⲧⲉ ⲥⲉⲧⲁϩⲉ ⲇⲉ ϩⲛⲟⲩⲏⲣⲡ ⲛⲣⲉϥⲣⲛⲟⲃⲉ
18 ⲛⲉϩⲓⲟⲟⲩⲉ ⲇⲉ ⲛⲛⲇⲓⲕⲁⲓⲟⲥ ⲥⲉⲣⲟⲩⲟⲓⲛ ⲛⲧϩⲉ ⲙⲡⲟⲩⲟⲉⲓⲛ ⲥⲉⲙⲟⲟϣⲉ ⲅⲁⲣ ⲉⲩⲣⲟⲩⲟⲉⲓⲛ ϣⲁⲛⲧⲉⲡⲉϩⲟⲟⲩ ϫⲱⲕ
19 ϩⲉⲛⲕⲁⲕⲉ ⲇⲉ ⲛⲉ ⲛⲉϩⲓⲟⲟⲩⲉ ⲛⲛⲁⲥⲉⲃⲏⲥ ⲁⲩⲱ ⲛⲥⲉⲥⲟⲟⲩⲛ ⲁⲛ ϫⲉⲉⲩϫⲓϫⲣⲟⲡ ⲛⲁϣ ⲛϩⲉ
20 ⲡⲁϣⲏⲣⲉ ϯϩⲧⲏⲕ ⲉⲡⲁϣⲁϫⲉ ⲣⲉⲕⲧⲡⲉⲕⲙⲁⲁϫⲉ ⲇⲉ ⲉⲛⲁϫⲡⲓⲟ
21 ϫⲉⲕⲁⲥ ⲛⲛⲉⲛⲉⲕⲡⲏⲅⲏ ⲱϫⲛ ϩⲁⲣⲉϩⲛⲁⲓ ϩⲙⲉⲕϩⲏⲧ
22 ⲟⲩⲱⲛϩ ⲅⲁⲣ ⲡⲉ ⲛⲛⲉⲧϭⲟⲗϫ ⲙⲙⲟⲟⲩ ⲁⲩⲱ ⲟⲩⲧⲁⲗϭⲟ ⲡⲉ ⲙⲡⲥⲱⲙⲁ
23 ϩⲛϩⲁⲣⲉϩ ⲛⲓⲙ ϩⲁⲣⲉϩ ⲉⲡⲉⲕϩⲏⲧ ϩⲉⲛϩⲓⲟⲟⲩⲉ ⲅⲁⲣ ⲛⲱⲛϩ ⲛⲉ ⲛⲉⲃⲟⲗ ϩⲛⲛⲁⲓ
24 ϥⲓ ⲉⲃⲟⲗ ⲙⲙⲟⲕ ⲛⲟⲩⲧⲁⲡⲣⲟ ⲉⲥϭⲟⲟⲙⲉ ⲁⲩⲱ ⲙⲁⲣⲉϩⲉⲛⲥⲡⲟⲧⲟⲩ ⲛϫⲓⲛϭⲟⲛⲥ ⲟⲩⲉ ⲛⲥⲁⲃⲟⲗ ⲙⲙⲟⲕ
25 ⲙⲁⲣⲉⲛⲉⲕⲃⲁⲕ ϭⲱϣⲧ ⲉⲛⲉⲧⲥⲟⲩⲧⲱⲛ ⲛⲧⲉⲛⲉⲕⲃⲟⲩϩⲉ ⲉⲓⲱⲣⲙ ⲉⲙⲙⲛⲧⲙⲉ
26 ⲥⲟⲩⲧⲛϩⲉⲛϩⲓⲟⲟⲩⲉ ⲛⲛⲉⲕⲟⲩⲉⲣⲏⲧⲉ ⲁⲩⲱ ⲛⲅⲥⲟⲟⲩⲧⲛ ⲛⲛⲉⲕϩⲓⲟⲟⲩⲉ
27 ⲙⲡⲣⲣⲁⲕⲧⲕ ⲉⲟⲩⲛⲁⲙ ⲟⲩⲇⲉ ⲉϩⲃⲟⲩⲣ ⲕⲧⲟ ⲇⲉ ⲉⲃⲟⲗ ⲛⲧⲉⲕⲟⲩⲉⲣⲏⲧⲉ ⲉⲃⲟⲗ ϩⲓϩⲓⲏ ⲛⲓⲙ ⲉⲧϩⲟⲟⲩ ⲡⲛⲟⲩⲧⲉ ⲅⲁⲣ ⲥⲟⲟⲩⲛ ⲛⲛⲉϩⲓⲟⲟⲩⲉ ⲉⲧϩⲓⲟⲩⲛⲁⲙ ⲥⲉϭⲟⲟⲙⲉ ⲇⲉ ⲛϭⲓⲛⲉⲧϩⲓϩⲃⲟⲩⲣ ⲛⲧⲟϥ ⲇⲉ ϥⲛⲁⲥⲟⲟⲩⲧⲛ ⲛⲛⲉⲕϩⲓⲟⲟⲩⲉ ⲁⲩⲱ ϥⲛⲁⲉⲓⲛⲉ ⲉⲃⲟⲗ ⲛⲛⲉⲕϩⲓⲏ ⲙⲙⲟⲟϣⲉ ϩⲛⲟⲩⲉⲓⲣⲏⲛⲏ
Proverbs 3 · Proverbs 5 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)