Read Proverbs 28 side by side with translations · The Final Bible
1 ϣⲁⲣⲉⲡⲁⲥⲉⲃⲏⲥ ⲡⲱⲧ ⲉⲙⲛⲡⲉⲧⲡⲏⲧ ⲛⲥⲱϥ ⲉⲣⲉⲡⲇⲓⲕⲁⲓⲟⲥ ⲇⲉ ⲧⲁϫⲣⲏⲩ ⲛⲧϩⲉ ⲛⲛⲓⲙⲟⲩⲓ
2 ϣⲁⲣⲉϩⲉⲛϩⲁⲡ ⲛⲉϩⲥⲉ ⲉⲧⲃⲉⲛⲛⲟⲃⲉ ⲛⲛⲁⲥⲉⲃⲏⲥ ⲡⲣⲱⲙⲉ ⲇⲉ ⲛⲥⲁⲃⲉ ⲛⲁⲱϣⲙ ⲛⲛⲟⲣⲅⲏ
3 ϣⲁⲣⲉⲡⲉⲧⲧⲏⲕ ϩⲛⲧⲉϥⲙⲛⲧϣⲁϥⲧⲉ ϩⲓⲗⲁ ⲉⲩϩⲏⲕⲉ ⲛⲧϩⲉ ⲛⲟⲩϩⲱⲟⲩ ⲉϥⲟϣ ⲉⲛϥⲣⲛⲟϥⲣⲉ ⲁⲛ
4 ⲧⲁⲓ ⲧⲉ ⲧϩⲉ ⲛⲛⲉⲧⲕⲱ ⲛⲥⲱⲟⲩ ⲙⲡⲛⲟⲙⲟⲥ ⲉⲩⲧⲁⲉⲓⲟ ⲛⲙⲛⲧϣⲁϥⲧⲉ ⲛⲉⲧⲙⲉ ⲇⲉ ⲙⲡⲛⲟⲙⲟⲥ ⲉⲩⲕⲧⲟ ⲉⲣⲟⲟⲩ ⲛⲟⲩⲥⲟⲃⲧ
5 ⲛⲣⲱⲙⲉ ⲉⲧϩⲟⲟⲩ ⲛⲁⲛⲟⲉⲓ ⲁⲛ ⲛⲟⲩϩⲁⲡ ⲛⲉⲧϣⲓⲛⲉ ⲇⲉ ⲛⲥⲁⲡϫⲟⲉⲓⲥ ⲛⲁⲛⲟⲉⲓ ϩⲛⲁⲅⲁⲑⲟⲛ ⲛⲓⲙ
6 ⲛⲁⲛⲟⲩⲟⲩϩⲏⲕⲉ ⲉϥⲙⲟⲟϣⲉ ϩⲛⲧⲉϥⲙⲛⲧⲙⲉ ⲉϩⲟⲩⲉⲟⲩⲣⲙⲙⲁⲟ ⲛⲣⲉϥϫⲓϭⲟⲗ
7 ϣⲁⲣⲉⲡϣⲏⲣⲉ ⲛⲥⲁⲃⲉ ϩⲁⲣⲉϩ ⲉⲡⲛⲟⲙⲟⲥ ⲡⲉⲧϣⲟⲟⲡ ⲇⲉ ϩⲛⲟⲩⲙⲛⲧϣⲛⲁ ⲉϥϯϣⲓⲡⲉ ⲙⲡⲉϥⲉⲓⲱⲧ
8 ⲡⲉⲧⲧⲁϣⲟ ⲛⲧⲉϥⲙⲛⲧⲣⲙⲙⲁⲟ ϩⲛⲟⲩϫⲓⲙⲏⲥⲉ ⲛⲉⲧⲛⲁ ⲛⲛϩⲏⲕⲉ ⲛⲉⲧⲛⲁⲧⲥⲓⲟⲟⲩ ⲙⲙⲟⲥ
9 ⲡⲉⲧⲛⲁⲣⲓⲕⲉ ⲉⲃⲟⲗ ⲙⲡⲉϥⲙⲁⲁϫⲉ ⲉⲧⲙⲥⲱⲧⲙ ⲉⲡⲛⲟⲙⲟⲥ ⲡⲉϣⲗⲏⲗ ⲙⲡⲁⲓ ⲃⲏⲧ
10 ⲡⲉⲧⲥⲱⲣⲙ ⲛⲛⲉⲧⲥⲟⲩⲧⲱⲛ ϩⲛⲟⲩϩⲓⲏ ⲉⲥϩⲟⲟⲩ ⲉϥⲛⲁϩⲉ ⲛⲧⲟϥ ⲉϩⲣⲁⲓ ⲉϩⲉⲛⲡⲉⲧϩⲟⲟⲩ ⲛⲉⲧⲟⲩⲁⲁⲃ ⲇⲉ ⲛⲁⲡⲱϣ ⲉϫⲱⲟⲩ ⲛⲙⲡⲉⲧⲛⲁⲛⲟⲩⲟⲩ
11 ⲡⲣⲱⲙⲉ ⲛⲣⲙⲙⲁⲟ ⲟ ⲛⲥⲁⲃⲉ ⲛⲁϥ ⲟⲩⲁⲁϥ ⲡϩⲏⲕⲉ ⲇⲉ ⲛⲥⲁⲃⲉ ⲛⲁϭⲛⲁⲣⲓⲕⲉ ⲉⲣⲟϥ
12 ϣⲁⲣⲉⲟⲩⲛⲟϭ ⲛⲉⲟⲟⲩ ϣⲱⲡⲉ ⲉⲧⲃⲉⲧⲃⲟⲏⲑⲓⲁ ⲛⲛⲇⲓⲕⲁⲓⲟⲥ ϣⲁⲣⲉⲛⲣⲱⲙⲉ ⲇⲉ ⲧⲁⲕⲟ ϩⲛⲙⲙⲁ ⲛⲛⲁⲥⲉⲃⲏⲥ
13 ⲡⲉⲧϩⲱⲃⲥ ⲇⲉ ⲛⲧⲉϥⲙⲛⲧϣⲁϥⲧⲉ ⲛⲁⲥⲟⲟⲩⲧⲛ ⲁⲛ ⲡⲉⲧϫⲱ ⲇⲉ ⲙⲙⲟⲥ ⲁⲩⲱ ⲉⲧϫⲡⲓⲟ ⲥⲉⲛⲁⲙⲉⲣⲓⲧϥ
14 ⲛⲁⲓⲁⲧϥ ⲙⲡⲣⲱⲙⲉ ⲉⲧϯⲥⲟ ⲉⲟⲩⲟⲛ ⲛⲓⲙ ⲉⲧⲃⲉⲧϩⲟⲧⲉ ⲡⲛⲁϣⲧϩⲏⲧ ⲇⲉ ⲛⲧⲟϥ ⲛⲁϩⲉ ⲉϩⲣⲁⲓ ⲉϩⲉⲛⲡⲉⲧϩⲟⲟⲩ
15 ⲟⲩⲙⲟⲩⲓ ⲡⲉ ⲉϥϩⲕⲁⲉⲓⲧ ⲁⲩⲱ ⲟⲩⲱⲛϣ ⲉϥⲟⲃⲉ ⲡⲉ ⲟⲩϩⲏⲕⲉ ⲉϥⲛⲁⲣϫⲟⲉⲓⲥ ⲉⲩⲙⲏⲏϣⲉ ⲛϩⲏⲕⲉ
16 ⲟⲩⲣⲣⲟ ⲉϥϣⲁⲁⲧ ⲛⲭⲣⲏⲙⲁ ⲟⲩⲛⲟϭ ⲛⲣⲉϥϫⲓⲛϭⲟⲛⲥ ⲡⲉ ⲛⲉⲧⲙⲟⲥⲧⲉ ⲇⲉ ⲛϫⲓⲛϭⲟⲛⲥ ⲛⲁⲱⲛϩ ϩⲛⲟⲩⲛⲟϭ ⲛⲟⲩⲟⲉⲓϣ
17 ⲡⲉⲧⲛⲁϣⲡⲧⲱⲣⲉ ⲛⲟⲩⲣⲱⲙⲉ ⲉϥϩⲛⲟⲩⲗⲟⲓϭⲉ ⲛϩⲱⲧⲃ ϥⲛⲁⲡⲱⲧ ⲁⲩⲱ ⲛϥⲧⲁϫⲣⲏⲩ ⲁⲛ ⲡⲉⲧⲙⲟⲟϣⲉ ⲇⲓⲕⲁⲓⲱⲥ ⲥⲉⲛⲁⲃⲟⲏⲑⲉⲓ ⲉⲣⲟϥ
18 ⲡⲉⲧⲙⲟⲟϣⲉ ⲇⲉ ϩⲓϩⲉⲛϩⲓⲟⲟⲩⲉ ⲉⲩϭⲟⲟⲙⲉ ⲛⲁϭⲗⲟⲙⲗⲙ
19 ⲡⲉⲧⲣϩⲱⲃ ⲉⲡⲉϥⲕⲁϩ ⲛⲁⲥⲉⲓ ⲛⲟⲉⲓⲕ ⲡⲉⲧⲡⲏⲧ ⲇⲉ ⲛⲥⲁⲟⲩⲱⲥϥ ⲛⲁⲥⲉⲓⲧⲙⲛⲧϩⲏⲕⲉ
20 ⲡⲣⲱⲙⲉ ⲛⲥⲁⲃⲉ ⲛⲁϫⲓⲥⲙⲟⲩ ⲉⲙⲁⲧⲉ ⲡⲣⲉϥⲣⲡⲉⲧϩⲟⲟⲩ ⲇⲉ ⲛⲁⲣⲃⲟⲗ ⲁⲛ ⲉⲡⲉⲧϩⲟⲟⲩ
21 ⲡⲉⲧϣⲓⲡⲉ ϩⲏⲧⲟⲩ ⲛⲛϩⲟ ⲛⲛⲣⲉϥϫⲓⲛϭⲟⲛⲥ ⲛⲁⲥⲟⲟⲩⲧⲛ ⲁⲛ ⲡⲁⲓ ⲅⲁⲣ ⲛⲧⲉⲓⲙⲓⲛⲉ ⲛⲁϯⲟⲩⲣⲱⲙⲉ ϩⲁⲟⲩⲟⲉⲓⲕ
22 ϣⲁϥϭⲉⲡⲏ ⲣⲣⲙⲙⲁⲟ ⲛϭⲓⲟⲩⲣⲱⲙⲉ ⲛⲉⲓⲉⲣⲃⲟⲟⲛⲉ ⲁⲩⲱ ⲛϥⲥⲟⲟⲩⲛ ⲁⲛ ϫⲉⲟⲩⲛⲁϩⲏⲧ ⲡⲉⲧⲛⲁⲣϫⲟⲉⲓⲥ ⲉϫⲱϥ ⲡⲉⲧⲧⲁϣⲟ ⲛⲧⲉϥⲙⲛⲧⲣⲙⲙⲁⲟ ϩⲛⲟⲩϫⲓⲙⲏⲥⲉ ⲉϥⲛⲁⲥⲟⲟⲩϩⲥ ⲉϩⲟⲩⲛ ⲙⲡⲉⲧⲛⲁ ⲛⲛϩⲏⲕⲉ
23 ⲡⲉⲧϫⲡⲓⲟ ⲛⲟⲩⲣⲱⲙⲉ ϩⲛⲛⲉϩⲓⲟⲟⲩⲉ ϥⲛⲁϭⲛϩⲙⲟⲧ ⲉϩⲟⲩⲉⲡⲉⲧϯϩⲙⲟⲧ ϩⲙⲡⲉϥⲗⲁⲥ
24 ⲡⲉⲧϫⲓ ⲙⲡⲉϥⲉⲓⲱⲧ ⲛϭⲟⲛⲥ ⲙⲛⲧⲉϥⲙⲁⲁⲩ ⲉϥⲙⲉⲉⲩⲉ ϫⲉⲛϯⲣⲛⲟⲃⲉ ⲁⲛ ⲟⲩⲕⲟⲓⲛⲱⲛⲟⲥ ⲡⲉ ⲡⲁⲓ ⲛⲟⲩⲣⲱⲙⲉ ⲛⲁⲥⲉⲃⲏⲥ
25 ϣⲁⲣⲉⲟⲩⲣⲱⲙⲉ ⲛⲁⲧⲥⲉⲓ ⲕⲣⲓⲛⲉ ⲉⲓⲕⲏ ⲡⲉⲧⲕⲱ ⲇⲉ ⲛϩⲏⲧϥ ⲉⲡϫⲟⲉⲓⲥ ⲛⲁϣⲱⲡⲉ ϩⲛⲟⲩϩⲁⲣⲉϩ
26 ⲡⲉⲧⲕⲱ ⲛϩⲧⲏϥ ⲉⲩⲙⲛⲧⲛⲁϣⲧϩⲏⲧ ⲡⲁⲓ ⲟⲩⲁⲧϩⲏⲧ ⲡⲉ ⲡⲉⲧⲙⲟⲟϣⲉ ⲇⲉ ϩⲛⲟⲩⲥⲟⲫⲓⲁ ⲛⲁⲟⲩϫⲁⲓ
27 ⲡⲉⲧϯ ⲛⲛϩⲏⲕⲉ ⲛⲁϭⲣⲱϩ ⲁⲛ ⲡⲉⲧⲕⲧⲟ ⲇⲉ ⲛⲛⲉϥⲃⲁⲗ ⲉⲃⲟⲗ ⲙⲙⲟⲟⲩ ⲛⲁϣⲱⲱⲧ ⲉⲙⲁⲧⲉ
28 ϣⲁⲣⲉⲛⲇⲓⲕⲁⲓⲟⲥ ϩⲟϫϩϫ ϩⲛⲙⲁ ⲛⲛⲁⲥⲉⲃⲏⲥ ϣⲁⲩⲁϣⲁⲓ ⲇⲉ ϩⲙⲡⲧⲁⲕⲟ ⲛⲛⲉⲧⲙⲙⲁⲩ
Proverbs 27 · Proverbs 29 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)