Proverbs 26 — Coptic (Sahidic)

1 ⲛⲧϩⲉ ⲛⲟⲩⲉⲓⲱⲧⲉ ϩⲙⲡⲱϩⲥ ⲁⲩⲱ ⲟⲩϩⲱⲟⲩ ϩⲙⲡϣⲱⲙ ⲉⲛⲥⲉⲧⲁⲓⲏⲩ ⲁⲛ ⲧⲁⲓ ⲧⲉ ⲧϩⲉ ⲉⲧⲉⲙⲛⲧⲏⲁⲧϩⲏⲧ ⲧⲁⲉⲓⲟ

2 ⲛⲧϩⲉ ⲛϩⲉⲛϩⲁⲗⲁⲧⲉ ⲙⲛϩⲉⲛϫⲁϫ ⲉⲩϩⲏⲗ ⲧⲁⲓ ⲧⲉ ⲧϩⲉ ⲛⲟⲩⲥⲁϩⲟⲩ ⲉϥϣⲟⲩⲉⲓⲧ ⲉⲛϥⲛⲏⲩ ⲁⲛ ⲉϫⲛⲗⲁⲁⲩ

3 ⲟⲩⲙⲁⲥⲧⲓⲅⲝ ⲛⲟⲩϩⲧⲟ ⲁⲩⲱ ⲟⲩϫⲟⲟⲕⲉϥ ⲛⲟⲩⲉⲓⲱ ⲟⲩϭⲉⲣⲱⲃ ⲇⲉ ⲛⲟⲩϩⲉⲑⲛⲟⲥ ⲛⲁⲧϩⲏⲧ

4 ⲙⲡⲣⲟⲩⲱϣⲃ ⲛⲟⲩⲁⲧϩⲏⲧ ⲕⲁⲧⲁⲧⲙⲛⲧⲁⲧϩⲏⲧ ⲙⲡⲉⲧⲙⲙⲁⲩ ϫⲉⲛⲛⲉⲕⲣⲧⲏϥϩⲉ

5 ⲁⲗⲗⲁ ⲟⲩⲱϣⲃ ⲛⲟⲩⲁⲧϩⲏⲧ ⲟⲩⲃⲉⲧⲉϥⲙⲛⲧⲁⲧϩⲏⲧ ϫⲉⲛⲛⲉϥⲟⲩⲱⲛϩ ⲉⲃⲟⲗ ⲛⲥⲟⲫⲟⲥ ⲛⲁϩⲣⲁϥ ⲙⲁⲩⲁⲁϥ

6 ⲁⲩⲱ ϣⲁϥϫⲡⲟ ⲛⲟⲩⲛⲟϭⲛⲉϭ ⲉⲃⲟⲗ ϩⲛⲛⲉϥϣⲁϫⲉ ⲉⲕϣⲁⲛϫⲟⲟⲩ ⲛⲟⲩϣⲁϫⲉ ϩⲓⲧⲛⲟⲩϥⲁⲓϣⲓⲛⲉ ⲛⲁⲧϩⲏⲧ

7 ϥⲓ ⲙⲙⲁⲩ ⲛⲧⲉϩⲓⲏ ⲛⲧⲉϥⲟⲩⲉⲣⲏⲧⲉ ⲁⲩⲱ ⲟⲩⲡⲁⲣϩⲟⲓⲙⲓⲁ ⲉⲃⲟⲗ ϩⲛⲣⲱⲟⲩ ⲛⲛⲁⲧϩⲏⲧ

8 ⲛⲧϩⲉ ⲙⲡⲉⲧⲛⲁⲙⲟⲩⲣ ⲛⲟⲩⲱⲛⲉ ϩⲛⲟⲩⲥⲫⲉⲛⲇⲟⲛⲏ ⲧⲁⲓ ⲧⲉ ⲧϩⲉ ⲙⲡⲉⲧϯⲉⲟⲟⲩ ⲛⲟⲩⲁⲧϩⲏⲧ

9 ϣⲁⲣⲉϩⲉⲛϣⲟⲛⲧⲉ ⲣⲱⲧ ϩⲛⲛϭⲓϫ ⲙⲡⲣⲉϥϯϩⲉ ⲁⲩⲱ ⲟⲩⲙⲛⲧϩⲙϩⲁⲗ ϩⲛⲛϭⲓϫ ⲛⲛⲁⲧϩⲏⲧ

10 ϣⲁⲣⲉⲣⲱⲙⲉ ⲛⲓⲙ ⲥⲱⲃⲉ ⲛⲥⲁⲛⲁⲧϩⲏⲧ ⲧⲉⲩϩⲓⲏ ⲅⲁⲣ ⲛⲁⲧⲁⲕⲟ

11 ⲛⲧϩⲉ ⲛⲟⲩⲟⲩϩⲟⲣ ⲉϣⲁϥⲕⲟⲧϥ ⲉⲡⲉϥⲕⲁⲃⲟⲗ ⲛⲥⲉⲙⲉⲥⲧⲱϥ ⲧⲁⲓ ⲧⲉ ⲧϩⲉ ⲙⲡⲁⲧϩⲏⲧ ϩⲛⲧⲉϥⲕⲁⲕⲓⲁ ⲉϣⲁϥⲕⲟⲧϥ ⲉⲡⲉϥⲛⲟⲃⲉ ⲟⲩⲛⲟⲩϣⲓⲡⲉ ⲉϣⲁϥϫⲡⲉⲡⲛⲟⲃⲉ ⲁⲩⲱ ⲟⲩⲛⲟⲩϣⲓⲡⲉ ⲉⲩⲉⲟⲟⲩ ⲡⲉ ⲙⲛⲟⲩⲭⲁⲣⲓⲥ

12 ⲁⲓⲛⲁⲩ ⲉⲩⲣⲱⲙⲉ ⲉⲣⲟϥ ⲟⲩⲁⲁϥ ϫⲉⲟⲩⲥⲁⲃⲉ ⲡⲉ ⲟⲩⲛⲧⲉⲡⲁⲧϩⲏⲧ ⲇⲉ ϩⲉⲗⲡⲓⲥ ⲉϩⲟⲩⲉⲣⲟϥ

13 ϣⲁⲣⲉⲡⲣⲉϥϫⲛⲁⲁⲩ ϫⲟⲟⲥ ⲉⲩⲛⲁϫⲟⲟϥ ⲉⲩϩⲓⲏ ϫⲉⲡⲙⲟⲩⲓ ϩⲛⲛⲉϩⲓⲟⲩⲉ ⲁⲩⲱ ⲥⲉϩⲱⲧⲃ ⲙⲙⲟⲟⲩ ϩⲛⲛⲉⲡⲗⲁϯⲁ

14 ⲛⲧϩⲉ ⲛⲟⲩⲣⲟ ⲉϥⲕⲱⲧⲉ ϩⲓϫⲙⲡⲉϥⲙⲉϣϯⲃⲥ ⲧⲁⲓ ⲧⲉ ⲧϩⲉ ⲛⲟⲩⲣⲉϥϫⲛⲁⲁⲩ ϩⲓⲡⲉϥϭⲗⲟϭ

15 ϣⲁⲣⲉⲡⲣⲉϥϫⲛⲁⲁⲩ ⲕⲗϫⲛⲉϥϭⲓϫ ϩⲁⲕⲟⲩⲛϥ ⲛϥⲧⲙⲉϣⲛⲧⲟⲩ ⲉⲣⲱϥ

16 ⲟⲩⲥⲁⲃⲉ ⲡⲉ ⲡⲣⲉϥϫⲛⲁⲁⲩ ⲛⲁϥ ⲟⲩⲁⲁϥ ⲉϩⲟⲩⲉ ⲡⲉⲧⲧⲥⲓⲏⲩ ⲉⲧⲥⲧⲟ ⲉⲃⲟⲗ ⲛⲟⲩⲟⲩⲱ

17 ⲛⲧϩⲉ ⲙⲡⲉⲧⲁⲙⲁϩⲧⲉ ⲛⲟⲩⲟⲩϩⲟⲣ ⲧⲁⲓ ⲧⲉ ⲧϩⲉ ⲙⲡⲉⲧⲁϩⲉⲣⲁⲧϥ ⲙⲡⲃⲟⲗ ⲛⲟⲩⲙⲓⲏⲉ ⲉⲙⲡⲱϥ ⲁⲛ ⲡⲉ

18 ⲛⲧϩⲉ ⲛⲛⲉⲧϫⲱⲛⲧ ⲉⲧⲛⲟⲩϫⲉ ⲉϩⲟⲩⲛ ⲛϩⲉⲛϣⲁϫⲉ ⲛϣⲟⲣⲡ ⲛⲁⲥⲗⲁⲁⲧⲉ

19 ⲧⲁⲓ ⲧⲉ ⲧϩⲉ ⲛⲟⲩⲟⲛ ⲛⲓⲙ ⲉⲧϭⲱⲣϭ ⲉⲛⲉⲩϣⲃⲉⲉⲣ ⲉⲩϣⲁⲛⲧⲁϩⲟⲟⲩ ⲇⲉ ϣⲁⲩϫⲟⲟⲥ ϫⲉⲛⲧⲁⲓⲁⲁⲥ ⲉⲓⲥⲱⲃⲉ

20 ϣⲁⲣⲉⲡⲕⲱϩⲧ ⲙⲟⲩϩ ϩⲛϩⲁϩ ⲛϣⲉ ⲡⲙⲓϣⲉ ⲇⲉ ⲛⲁϭⲱ ϩⲙⲡⲙⲁ ⲉⲧⲉⲙⲛⲣⲉϥϭⲱⲛⲧ ⲛϩⲏⲧϥ

21 ϩⲉⲛϫⲃⲃⲉⲥ ⲛⲟⲩⲉⲥⲭⲁⲣⲁ ⲁⲩⲱ ϩⲉⲛϣⲉ ⲙⲡⲕⲱϩⲧ ⲟⲩⲣⲱⲙⲉ ϩⲱⲱϥ ⲛⲣⲉϥⲥⲁϩⲟⲩ ⲉϥϣⲧⲟⲣⲧⲣ ⲛⲟⲩⲙⲓϣⲉ

22 ⲛϣⲁϫⲉ ⲙⲡⲕⲟⲣϣϥ ϭⲏⲛ ⲛⲁⲓ ⲇⲉ ⲣⲱϩⲧ ⲉϩⲟⲩⲛ ⲉⲛⲧⲁⲙⲉⲓⲟⲛ ⲛⲧϩⲏ

23 ⲛⲧϩⲉ ⲛϩⲉⲛⲃⲗϫⲉ ⲡⲉ ⲟⲩϩⲁⲧ ⲉⲩϯ ⲙⲙⲟϥ ϩⲛⲟⲩⲕⲣⲟϥ ϣⲁⲣⲉϩⲉⲛⲥⲡⲟⲧⲟⲩ ⲛⲕⲣⲟϥ ϩⲃⲥⲟⲩϩⲏⲧ ⲛⲣⲉϥⲗⲩⲡⲓ

24 ϣⲁⲣⲉⲡϫⲁϫⲉ ⲟⲩⲱϣⲃ ⲉϥϫⲱⲣⲙ ⲉⲟⲩⲟⲛ ⲛⲓⲙ ϩⲓⲛⲉϥⲥⲡⲟⲧⲟⲩ ϥⲙⲉⲉⲩⲉ ⲇⲉ ϩⲙⲡⲉϥϩⲏⲧ ⲉϩⲉⲛⲕⲣⲟϥ

25 ⲉⲣϣⲁⲛⲡⲉⲕϫⲁϫⲉ ⲥⲉⲡⲥⲱⲡⲕ ⲉϥⲕⲱⲣϣ ϩⲛⲧⲉϥⲥⲙⲏ ⲙⲡⲣⲥⲱⲧⲙ ⲛⲥⲱϥ ⲟⲩⲛⲥⲁϣϥⲉ ⲅⲁⲣ ⲙⲡⲟⲛⲏⲣⲓⲁ ϩⲙⲡⲉϥϩⲏⲧ

26 ⲡⲉⲧϩⲱⲡ ⲛⲟⲩⲙⲛⲧϫⲁϫⲉ ϣⲁϥⲧⲟⲩⲛⲉⲥⲟⲩⲡⲟⲛⲏⲣⲓⲁ ϣⲁⲣⲉⲟⲩⲥⲁⲃⲉ ⲇⲉ ϭⲱⲗⲡ ⲉⲃⲟⲗ ⲛⲛⲉϥⲛⲟⲃⲉ ϩⲛⲟⲩⲙⲏⲏϣⲉ

27 ⲡⲉⲧϣⲓⲕⲉ ⲛⲟⲩϩⲓⲉⲓⲧ ⲉⲡⲉⲧϩⲓⲧⲟⲩⲱϥ ϥⲛⲁϩⲉ ⲉϩⲣⲁⲓ ⲉⲣⲟϥ ⲡⲉⲧⲥⲕⲟⲣⲕⲣ ⲇⲉ ⲛⲟⲩⲱⲛⲉ ⲉϥⲛⲁϩⲉ ⲉϫⲱϥ

28 ⲡⲗⲁⲥ ⲛⲛⲟⲩϫ ⲙⲟⲥϩⲧⲉ ⲛⲧⲙⲉ ⲧⲧⲁⲡⲣⲟ ⲇⲉ ⲉⲧϣⲧⲣⲧⲱⲣ ⲛⲁⲉⲓⲣⲉ ⲛϩⲉⲛϣⲧⲟⲣⲧⲣ