Numbers 29 — Coptic (Sahidic)

1 ⲁⲩⲱ ⲙⲡⲙⲉϩⲥⲁϣϥ ⲛⲉⲃⲟⲧ ⲥⲟⲩⲟⲩⲁ ⲙⲡⲉⲃⲟⲧ ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲡⲡⲉⲧⲟⲩⲁⲁⲃ ⲛⲏⲧⲛ ⲛⲛⲉⲧⲛⲣⲗⲁⲁⲩ ⲛϩⲱⲃ ⲛϣⲙϣⲉ ⲛϩⲏⲧϥ ⲉϥⲉϣⲱⲡⲉ ⲛⲏⲧⲛ ⲛⲛⲟⲩϩⲟⲟⲩ ⲙⲙⲁⲉⲓⲛ

2 ⲁⲩⲱ ⲉⲧⲉⲧⲛⲉⲧⲁⲙⲓⲟ ⲛϩⲉⲛϭⲗⲓⲗ ⲛⲥϯⲛⲟⲩϥⲉ ⲙⲡϫⲟⲉⲓⲥ ⲟⲩⲙⲁⲥⲉ ⲉⲃⲟⲗ ϩⲛⲛⲉϩⲟⲟⲩ ⲁⲩⲱ ⲟⲩⲟⲉⲓⲗⲉ ⲥⲁϣϥ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

3 ⲁⲩⲱ ⲧⲉⲩⲑⲩⲥⲓⲁ ⲟⲩⲥⲁⲙⲓⲧ ⲉϥⲟⲩⲟϣϥ ϩⲓⲛⲉϩ ϣⲟⲙⲛⲧ ⲛⲣⲉⲙⲏⲧ ⲉⲡⲙⲁⲥⲉ ⲁⲩⲱ ⲣⲉⲙⲏⲧ ⲥⲛⲁⲩ ⲉⲡⲟⲩⲁ ⲛⲟⲉⲓⲗⲉ

4 ⲟⲩⲣⲉⲙⲏⲧ ⲉⲡⲟⲩⲁ ⲛϩⲓⲉⲓⲃ ⲙⲡⲥⲁϣϥ ⲛϩⲓⲉⲓⲃ

5 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲉⲧⲱⲃϩ ϩⲁⲣⲱⲧⲛ

6 ⲛⲃⲗ ⲛⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲕⲁⲧⲁⲡⲉⲩⲧⲱϣ ⲛⲥϯⲛⲟⲩϥⲉ ⲙⲡϫⲟⲉⲓⲥ

7 ⲁⲓⲱ ⲥⲟⲩⲙⲏⲧⲧ ⲙⲡⲉⲓⲉⲃⲟⲧ ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲡⲉⲧⲟⲩⲁⲁⲃ ⲛⲏⲧⲛ ⲉⲧⲉⲧⲛⲉⲑⲙⲕ ⲉⲛⲉⲧⲛⲯⲩⲭⲏ ⲛⲛⲉⲧⲛⲣⲗⲁⲁⲩ ⲛϩⲱⲃ ⲛϣⲙϣⲉ

8 ⲉⲧⲉⲧⲛⲉⲉⲓⲛⲉ ϩⲉⲛϭⲗⲓⲗ ⲙⲛϩⲉⲛⲥϯⲛⲟⲩϥⲉ ⲙⲡϫⲟⲉⲓⲥ ⲟⲩⲙⲁⲥⲉ ⲉⲃⲟⲗ ϩⲛⲛⲉϩⲟⲟⲩ ⲙⲛⲟⲩⲟⲉⲓⲗⲉ ⲁⲩⲱ ⲥⲁϣϥ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

9 ⲁⲩⲱ ⲧⲉⲩⲑⲩⲥⲓⲁ ⲟⲩⲥⲁⲙⲓⲧ ⲉϥⲟⲩⲱϣⲙ ϩⲓⲛⲉϩ ϣⲟⲙⲛⲧ ⲛⲣⲉⲙⲏⲧ ⲉⲡⲙⲁⲥⲉ ⲁⲩⲱ ⲣⲉⲙⲏⲧ ⲥⲛⲁⲩ ⲉⲡⲟⲉⲓⲗⲉ

10 ⲁⲩⲱ ⲟⲩⲣⲉⲙⲏⲧ ⲉⲡⲟⲩⲁ ⲛϩⲓⲉⲓⲃ ⲉⲡⲥⲁϣϥ ⲛϩⲓⲉⲓⲃ

11 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲉⲧⲱⲃϩ ϩⲁⲣⲱⲧⲛ ⲛⲃⲗ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲉⲧⲉⲧⲛⲁⲧⲁⲁϥ ϩⲁⲡⲕⲁⲛⲟⲃⲉ ⲉⲃⲟⲗ ⲁⲩⲱ ⲧⲉϥⲑⲩⲥⲓⲁ ⲙⲛⲧⲉϥⲥⲡⲟⲛⲇⲏ ⲕⲁⲧⲁⲡⲉϥⲧⲱϣ ⲉϥⲉⲧⲁⲗⲟⲟⲩ ⲛⲥϯⲛⲟⲩϥⲉ ⲙⲡϫⲟⲉⲓⲥ

12 ⲁⲩⲱ ⲛⲥⲟⲩⲙⲛⲧⲏ ⲙⲡⲙⲉϩⲥⲁϣϥ ⲉⲛⲉⲃⲟⲧ ⲉⲩⲉⲙⲟⲩⲧⲉ ⲉⲣⲟϥ ϫⲉⲡⲉⲧⲟⲩⲁⲁⲃ ⲛⲏⲧⲛ ⲛⲛⲉⲧⲛⲣⲗⲁⲁⲩ ⲛϩⲱⲃ ⲛϣⲙϣⲉ ⲛϩⲏⲧϥ ϩⲛⲟⲩϣⲁ ⲉⲧⲉⲧⲛⲉⲉⲓⲣⲉ ⲙⲙⲟϥ ⲛϣⲁ ⲙⲡϫⲟⲉⲓⲥ ⲥⲁϣϥ ⲛϩⲟⲟⲩ

13 ⲉⲧⲉⲧⲛⲉⲉⲓⲛⲉ ⲛϩⲉⲛϭⲗⲓⲗ ⲙⲛⲟⲩⲧⲁⲗⲟ ⲉϩⲣⲁⲓ ⲛⲥϯⲛⲟⲩϥⲉ ⲙⲡϫⲟⲉⲓⲥ ϩⲙⲡϣⲟⲣⲡ ⲛϩⲟⲟⲩ ⲉⲧⲉⲧⲛⲉⲉⲓⲛⲉ ⲛⲙⲙⲏⲧⲛ ⲛϣⲟⲙⲛⲧ ⲙⲙⲁⲥⲉ ⲉⲃⲟⲗ ϩⲛⲛⲉϩⲟⲟⲩ ⲙⲛⲟⲉⲓⲗⲉ ⲥⲛⲁⲩ ⲙⲛⲙⲛⲧⲁϥⲧⲉ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲩⲉϣⲱⲡⲉ ⲉⲙⲛϫⲃⲓⲛ ⲛϩⲏⲧⲟⲩ

14 ⲁⲩⲱ ⲛⲉⲩⲑⲩⲥⲓⲁ ⲟⲩⲥⲁⲙⲓⲧ ⲉϥⲟⲩⲟϣⲙ ϩⲓⲛⲉϩ ⲟⲩⲣⲉⲙⲏⲧ ⲉⲡⲟⲩⲁ ⲙⲙⲟⲟⲩ ⲣⲉⲙⲏⲧ ⲥⲛⲁⲩ ⲉⲡⲟⲩⲁ ⲛⲟⲉⲓⲗⲉ

15 ⲟⲩⲣⲉⲙⲏⲧ ⲉⲡⲟⲩⲁ ⲛϩⲓⲉⲓⲃ ⲙⲡⲙⲛⲧⲁϥⲧⲉ ⲛϩⲓⲉⲓⲃ

16 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲁⲩⲱ ⲛⲉⲩⲑⲩⲥⲓⲁ ⲙⲉⲛ ⲛⲉⲩⲥⲡⲟⲛⲇⲏ

17 ⲁⲩⲱ ϩⲙⲡⲙⲉϩϩⲟⲟⲩ ⲥⲛⲁⲩ ⲉⲧⲉⲧⲛⲉⲓⲛⲉ ⲛⲙⲙⲏⲧⲛ ⲙⲙⲛⲧⲥⲛⲟⲟⲩⲥ ⲙⲙⲁⲥⲉ ⲙⲛⲟⲉⲓⲗⲉ ⲥⲛⲁⲩ ⲙⲛⲙⲛⲧⲁϥⲧⲉ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

18 ⲁⲩⲱ ⲧⲉⲩⲑⲩⲥⲓⲁ ⲙⲛⲧⲉⲩⲥⲡⲟⲛⲇⲏ ⲙⲙⲁⲥⲉ ⲙⲛⲛⲟⲉⲓⲗⲉ ⲙⲛⲛⲉϩⲓⲉⲓⲃ ⲕⲁⲧⲁⲧⲉⲩⲏⲡⲉ ⲁⲩⲱ ⲕⲁⲧⲁⲡⲉⲩⲧⲱϣ

19 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲡⲉϭⲗⲓⲗ ⲛⲛⲟⲩⲟⲉⲓϣ ⲛⲓⲙ ⲙⲛⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ

20 ⲁⲩⲱ ϩⲙⲡⲙⲉϩϣⲟⲙⲛⲧ ⲛϩⲟⲟⲩ ⲉⲧⲉⲧⲛⲉⲉⲓⲛⲉ ⲛⲙⲙⲏⲧⲛ ⲙⲙⲛⲧⲟⲩⲉ ⲙⲙⲁⲥⲉ ⲙⲛⲟⲉⲓⲗⲉ ⲥⲛⲁⲩ ⲙⲛⲙⲛⲧⲁϥⲧⲉ ⲛϩⲓⲉⲓⲃ ⲉⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

21 ⲁⲩⲱ ⲧⲉⲩⲑⲩⲥⲓⲁ ⲙⲛⲧⲉⲩⲥⲡⲟⲛⲇⲏ ⲙⲛⲙⲙⲁⲥⲉ ⲙⲛⲛⲟⲉⲓⲗⲉ ⲙⲛⲛⲉϩⲓⲉⲓⲃ ⲕⲁⲧⲁⲧⲉⲩⲏⲡⲉ ⲁⲩⲱ ⲕⲁⲧⲁⲡⲉⲩⲧⲱϣ

22 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲙⲡⲉϭⲗⲓⲗ ⲛⲛⲟⲩⲟⲉⲓϣ ⲛⲓⲙ ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ

23 ⲁⲩⲱ ϩⲙⲡⲙⲉϩϥⲧⲟⲟⲩ ⲛϩⲟⲟⲩ ⲉⲧⲉⲧⲛⲉⲉⲓⲛⲉ ⲙⲙⲏⲧ ⲙⲙⲁⲥⲉ ⲙⲛⲟⲉⲓⲗⲉ ⲥⲛⲁⲩ ⲙⲛⲙⲛⲧⲁϥⲧⲉ ⲛϩⲓⲉⲓⲃ ⲛⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

24 ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ ⲙⲙⲁⲥⲉ ⲙⲛⲛⲟⲉⲓⲗⲉ ⲁⲩⲱ ⲛⲉϩⲓⲉⲓⲃ ⲕⲁⲧⲁⲧⲉⲩⲏⲡⲉ ⲁⲩⲱ ⲕⲁⲧⲁⲡⲉⲩⲧⲱϣ

25 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ

26 ⲁⲩⲱ ϩⲙⲡⲙⲉϩϯⲟⲩ ⲛϩⲟⲟⲩ ⲉⲧⲉⲧⲛⲉⲉⲓⲛⲉ ⲙⲯⲓⲥ ⲙⲙⲁⲥⲉ ⲙⲛⲟⲉⲓⲗⲉ ⲥⲛⲁⲩ ⲙⲛⲙⲛⲧⲁϥⲧⲉ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

27 ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ ⲙⲙⲁⲥⲉ ⲙⲛⲛⲟⲉⲓⲗⲉ ⲁⲩⲱ ⲛⲉϩⲓⲉⲓⲃ ⲕⲁⲧⲁⲧⲉⲩⲏⲡⲉ ⲁⲩⲱ ⲕⲁⲧⲁⲡⲉⲩⲧⲱϣ

28 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ

29 ⲁⲩⲱ ϩⲙⲡⲙⲉϩⲥⲟⲟⲩ ⲛϩⲟⲟⲩ ⲉⲧⲉⲧⲛⲉⲉⲓⲛⲉ ⲛϣⲙⲟⲩⲛ ⲙⲙⲁⲥⲉ ⲙⲛⲟⲉⲓⲗⲉ ⲥⲛⲁⲩ ⲙⲛⲙⲛⲧⲁϥⲧⲉ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

30 ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ ⲙⲙⲁⲥⲉ ⲙⲛⲛⲟⲉⲓⲗⲉ ⲁⲩⲱ ⲛϩⲓⲉⲓⲃ ⲕⲁⲧⲁⲧⲉⲩⲏⲡⲉ ⲁⲩⲱ ⲕⲁⲧⲁⲡⲉⲩⲧⲱϣ

31 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲛⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ

32 ⲁⲩⲱ ϩⲙⲡⲙⲉϩⲥⲁϣϥ ⲛϩⲟⲟⲩ ⲉⲧⲉⲧⲛⲉⲉⲓⲛⲉ ⲛⲥⲁϣϥ ⲙⲙⲁⲥⲉ ⲙⲛⲟⲉⲓⲗⲉ ⲥⲛⲁⲩ ⲙⲛⲙⲛⲧⲁϥⲧⲉ ⲛϩⲓⲉⲓⲃ ⲉⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

33 ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ ⲙⲙⲁⲥⲉ ⲙⲛⲛⲟⲉⲓⲗⲉ ⲙⲛⲛⲉϩⲓⲉⲓⲃ ⲕⲁⲧⲁⲧⲉⲩⲏⲡⲉ ⲁⲩⲱ ⲕⲁⲧⲁⲡⲉⲩⲧⲱϣ

34 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲡⲉϭⲗⲓⲗ ⲛⲛⲟⲩⲟⲉⲓϣ ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ

35 ⲁⲩⲱ ϩⲙⲡⲙⲉϩϣⲙⲟⲩⲛ ⲛϩⲟⲟⲩ ⲡⲉ ⲉⲃⲟⲗ ⲉϥⲉϣⲱⲡⲉ ⲛⲏⲧⲛ ⲛⲛⲉⲧⲛⲣⲗⲁⲁⲩ ⲛϩⲱⲃ ⲛϣⲙϣⲉ ϩⲣⲁⲓ ⲛϩⲏⲧϥ

36 ⲁⲩⲱ ⲉⲧⲉⲧⲛⲉⲉⲓⲛⲉ ⲛϩⲉⲛϭⲗⲓⲗ ⲙⲛϩⲉⲛⲧⲁⲗⲟ ⲉϩⲣⲁⲓ ⲛⲥϯⲛⲟⲩϥⲉ ⲙⲡϫⲟⲉⲓⲥ ⲟⲩⲙⲁⲥⲉ ⲙⲛⲟⲩⲟⲉⲓⲗⲉ ⲥⲁϣϥ ⲛϩⲓⲉⲓⲃ ⲉⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

37 ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ ⲉⲡⲙⲁⲥⲉ ⲙⲛⲡⲟⲉⲓⲗⲉ ⲙⲛⲡⲉϩⲓⲉⲓⲃ ⲕⲁⲧⲁⲧⲉⲩⲏⲡⲉ ⲁⲩⲱ ⲕⲁⲧⲁⲡⲉⲩⲧⲱϣ

38 ⲁⲩⲱ ⲟⲩϭⲓⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲛⲟⲃⲉ ⲛⲃⲗ ⲡϭⲗⲓⲗ ⲛⲟⲩⲟⲉⲓϣ ⲛⲓⲙ ⲁⲩⲱ ⲛⲉⲩⲑⲩⲥⲓⲁ ⲙⲛⲛⲉⲩⲥⲡⲟⲛⲇⲏ

39 ⲛⲁⲓ ⲉⲧⲉⲧⲛⲉⲧⲁⲙⲓⲟⲟⲩ ⲙⲡϫⲟⲉⲓⲥ ϩⲣⲁⲓ ϩⲛⲛⲉⲧⲉⲛⲑⲁ ⲛⲃⲗ ⲛⲉⲧⲉⲛⲉⲣⲏⲧ ⲙⲛⲛⲉⲧⲛϭⲗⲓⲗ ⲁⲩⲱ ⲛⲉⲧⲉⲧⲛⲁⲉⲛⲧⲟⲩ ϩⲛⲛⲉⲧⲛⲟⲩⲱϣ ⲙⲛⲛⲉⲧⲛⲑⲩⲥⲓⲁ ⲙⲛⲛⲉⲧⲛⲥⲡⲟⲛⲇⲏ ⲁⲩⲱ ⲛⲉⲧⲛⲟⲩϫⲁⲓ