Numbers 17 — Coptic (Sahidic)

1 ⲁⲡϫⲟⲉⲓⲥ ϣⲁϫⲉ ⲙⲛⲙⲱⲩⲥⲏⲥ

2 ⲙⲛⲉⲗⲉⲁⲍⲁⲣ ⲡϣⲏⲣⲉ ⲛⲁⲁⲣⲱⲛ ⲡⲟⲩⲏⲏⲃ ϫⲉϥⲓ ⲛⲛⲉⲓϣⲟⲩⲣⲏ ⲛϩⲟⲙⲛⲧ ⲉⲃⲟⲗ ϩⲛⲧⲙⲏⲧⲉ ⲛⲛⲉⲛⲧⲁⲩⲣⲱⲕϩ ⲁⲩⲱ ⲡⲉⲓⲕⲱϩⲧ ⲛϣⲙⲙⲟ ϫⲟⲟⲣⲉϥ ⲉⲃⲟⲗ ⲙⲙⲟⲟⲩ

3 ϫⲉⲁⲩⲧⲃⲃⲟ ⲛϭⲓⲛϣⲟⲩⲣⲏ ⲛⲛⲉⲓⲣⲉϥⲣⲛⲟⲃⲉ ϩⲣⲁⲓ ϩⲛⲛⲉⲩⲯⲩⲭⲏ ⲛⲅⲧⲁⲙⲓⲟ ⲙⲙⲟⲟⲩ ⲛϩⲉⲛⲃⲏⲧⲉ ⲛϫⲁϩϫϩ ⲛⲅⲟϥⲧⲟⲩ ⲉⲡⲉⲑⲩⲥⲓⲁⲥⲧⲏⲣⲓⲟⲛ ⲉⲧⲃⲉϫⲉⲁⲩⲉⲛⲧⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲡⲁⲓ ⲁⲩⲧⲃⲃⲟ ⲁⲩⲱ ⲁⲩϣⲱⲡⲉ ⲙⲙⲁⲉⲓⲛ ⲛⲛϣⲏⲣⲉ ⲙⲡⲓⲥⲣⲁⲏⲗ

4 ⲁⲩⲱ ⲁϥϫⲓ ⲛϭⲓⲉⲗⲉⲁⲍⲁⲣ ⲡϣⲏⲣⲉ ⲛⲁⲁⲣⲱⲛ ⲡⲟⲩⲏⲏⲃ ⲉⲛⲉⲛϣⲟⲩⲣⲏ ⲛϩⲟⲙⲛⲧ ⲛⲉⲛⲧⲁⲩⲉⲛⲧⲟⲩ ⲛϭⲓⲛⲉⲛⲧⲁⲩⲣⲟⲕϩⲟⲩ ⲁⲩⲧⲁⲙⲓⲟ ⲙⲙⲟⲟⲩ ⲛϩⲉⲛⲡⲟⲕϥ ⲛϩⲟⲙⲛⲧ ⲁⲩⲱϥⲧ ⲙⲙⲟⲟⲩ ⲉⲡⲉⲑⲩⲥⲓⲁⲥⲧⲏⲣⲓⲟⲛ

5 ⲉⲩⲣⲡⲙⲉⲉⲩⲉ ⲛⲛϣⲏⲣⲉ ⲙⲡⲓⲥⲣⲁⲏⲗ ϫⲉⲕⲁⲥ ⲛⲛⲉⲗⲁⲁⲩ ⲛϣⲙⲙⲟ ⲉⲛⲟⲩⲉⲃⲟⲗ ⲁⲛ ⲡⲉ ϩⲙⲡⲉⲥⲡⲉⲣⲙⲁ ⲛⲁⲁⲣⲱⲛ ϩⲓⲧⲟⲟⲧϥ ϫⲛ ⲉⲡⲉⲓⲛⲁⲩ ⲉⲧⲁⲗⲉϣⲟⲩϩⲏⲛⲉ ⲉϩⲣⲁⲓ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲛⲥⲉⲧⲙϣⲱⲡⲉ ⲛⲕⲟⲣⲉ ⲙⲛⲧⲉϥⲥⲟⲟⲩϩⲥ ⲕⲁⲧⲁⲧϩⲉ ⲛⲧⲁⲡϫⲟⲉⲓⲥ ϣⲁϫⲉ ϩⲛⲧϭⲓϫ ⲙⲙⲱⲩⲥⲏⲥ

6 ⲁⲩⲱ ⲁⲩⲕⲣⲙⲣⲙ ⲛϭⲓⲛϣⲏⲣⲉ ⲙⲡⲓⲥⲣⲁⲏⲗ ⲙⲡⲉϥⲣⲁⲥⲧⲉ ⲉϫⲙⲙⲱⲩⲥⲏⲥ ⲙⲛⲁⲁⲣⲱⲛ ⲉⲩϫⲱ ⲙⲙⲟⲥ ϫⲉⲛⲧⲱⲧⲛ ⲡⲉ ⲛⲧⲁⲧⲉⲧⲛⲙⲟⲩⲟⲩⲧ ⲡⲗⲁⲟⲥ ⲙⲡϫⲟⲉⲓⲥ

7 ⲁⲥϣⲱⲡⲉ ⲛⲧⲉⲣⲉⲥⲥⲱⲟⲩϩ ⲛϭⲓⲧⲥⲩⲛⲁⲅⲱⲅⲏ ⲉϩⲣⲁⲓ ⲉϫⲙⲙⲱⲩⲥⲏⲥ ⲙⲛⲁⲁⲣⲱⲛ ⲁⲩϯ ⲙⲡⲉⲩⲟⲩⲟⲓ ⲉⲧⲉⲥⲕⲏⲛⲏ ⲙⲡⲙⲛⲧⲣⲉ ⲧⲉⲕⲗⲟⲟⲗⲉ ⲁⲥϩⲱⲃⲉⲥ ⲙⲙⲟⲥ ⲁⲩⲱ ⲡⲉⲟⲟⲩ ⲙⲡϫⲟⲉⲓⲥ ⲁϥⲟⲩⲱⲛϩ ⲉⲃⲟⲗ

8 ⲁⲩⲱ ⲁϥⲃⲱⲕ ⲉϩⲟⲩⲛ ⲛϭⲓⲙⲱⲩⲥⲏⲥ ⲙⲛⲁⲁⲣⲱⲛ ⲙⲡⲉⲙⲧⲟ ⲉⲃⲟⲗ ⲛⲧⲉⲥⲕⲏⲛⲏ ⲙⲡⲙⲛⲧⲣⲉ

9 ⲁⲩⲱ ⲁϥϣⲁϫⲉ ⲛϭⲓⲡϫⲟⲉⲓⲥ ⲛⲁϩⲣⲙ ⲙⲱⲩⲥⲏⲥ ⲙⲛⲁⲁⲣⲱⲛ ⲉϥϫⲱ ⲙⲙⲟⲥ

10 ϫⲉⲡⲉⲣϫⲧⲏⲩⲧⲛ ⲉⲃⲟⲗ ⲛⲧⲙⲏⲧⲉ ⲛⲧⲉⲓⲥⲩⲛⲁⲅⲱⲅⲏ ⲧⲁⲟϫⲛⲟⲩ ⲛⲟⲩⲥⲟⲡ ⲛⲟⲩⲱⲧ ⲁⲩⲱ ⲁⲩⲡⲁϩⲧⲟⲩ ⲉϩⲣⲁⲓ ⲉϫⲙⲡⲉⲩϩⲟ

11 ⲁⲩⲱ ⲡⲉϫⲁϥ ⲛϭⲓⲙⲱⲩⲥⲏⲥ ⲛⲁϩⲣⲛ ⲁⲁⲣⲱⲛ ϫⲉϫⲓ ⲛⲧϣⲟⲩⲣⲏ ⲛⲅⲧⲁⲗⲟ ⲉϩⲣⲁⲓ ⲉϫⲱⲥ ⲛⲟⲩⲕⲱϩⲧ ⲉⲃⲟⲗ ϩⲙⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲛⲅⲧⲁⲗⲟ ⲉϩⲣⲁⲓ ⲉϫⲱⲥ ⲛⲟⲩϣⲟⲩϩⲏⲛⲉ ⲛⲅϫⲓⲧⲥ ϩⲛⲟⲩϭⲉⲡⲏ ⲉϩⲟⲩⲛ ⲉⲧⲡⲁⲣⲉⲙⲃⲟⲗⲏ ⲛⲅⲧⲁⲗⲟ ⲉϩⲣⲁⲓ ϩⲁⲣⲟⲟⲩ ⲁⲥⲉⲓ ⲅⲁⲣ ⲉⲃⲟⲗ ⲛϭⲓⲟⲩⲟⲣⲅⲏ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲥϩⲓⲧⲟⲟⲧⲥ ⲉⲟⲩⲱϣϥ ⲙⲡⲗⲁⲟⲥ

12 ⲁⲩⲱ ⲁϥϫⲓ ⲛϭⲓⲁⲁⲣⲱⲛ ⲕⲁⲧⲁⲧϩⲉ ⲛⲧⲁⲙⲱⲩⲥⲏⲥ ϣⲁϫⲉ ⲛⲙⲙⲁϥ ⲁϥⲡⲱⲧ ⲉⲧⲥⲩⲛⲁⲅⲱⲅⲏ ⲁⲩⲱ ⲏⲇⲏ ⲛⲉⲁϥϩⲓⲧⲟⲟⲧϥ ⲡⲉ ⲛϭⲓⲡⲟⲩⲱϣϥ ϩⲣⲁⲓ ϩⲙⲡⲗⲁⲟⲥ ⲁⲩⲱ ⲁϥϯ ⲉϩⲣⲁⲓ ⲙⲡϣⲟⲩϩⲏⲛⲉ ⲁϥⲧⲁⲗⲟ ⲉϩⲣⲁⲓ ϩⲁⲡⲗⲁⲟⲥ

13 ⲁⲩⲱ ⲁϥⲁϩⲉⲣⲁⲧϥ ϩⲛⲧⲙⲏⲧⲉ ⲛⲛⲉⲧⲟⲛϩ ⲙⲛⲛⲉⲧⲙⲟⲟⲩⲧ ⲁϥϩⲣⲟⲕ ⲛϭⲓⲡⲟⲩⲱϣϥ

14 ⲛⲉⲛⲧⲁⲩⲙⲟⲩ ⲇⲉ ϩⲣⲁⲓ ϩⲙⲡⲟⲩⲱϣϥ ⲁⲩⲣⲙⲛⲧⲁϥⲧⲉ ⲛϣⲟ ⲙⲛⲥⲁϣϥ ⲛϣⲉ ⲛⲃⲗ ⲛⲉⲛⲧⲁⲩⲙⲟⲩ ⲉⲧⲃⲉⲕⲟⲣⲉ

15 ⲁⲩⲱ ⲁϥⲕⲧⲟϥ ⲛϭⲓⲁⲁⲣⲱⲛ ϣⲁⲙⲱⲩⲥⲏⲥ ⲉⲣⲙ ⲡⲣⲟ ⲛⲧⲉⲥⲕⲏⲛⲏ ⲙⲡⲙⲛⲧⲣⲉ ⲁϥϩⲣⲣⲉ ⲛϭⲓⲡⲟⲩⲱϣϥ

16 ⲁⲩⲱ ⲁⲡϫⲟⲉⲓⲥ ϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ

17 ϫⲉϣⲁϫⲉ ⲙⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲅϫⲓ ⲛϩⲉⲛϭⲉⲣⲱⲃ ⲉⲃⲟⲗ ϩⲓⲧⲟⲟⲧⲟⲩ ⲛⲟⲩϭⲉⲣⲱⲃ ⲟⲩϭⲉⲣⲱⲃ ⲕⲁⲧⲁⲛⲏⲓ ⲛⲛⲙⲡⲁⲧⲣⲓⲁ ⲉⲃⲟⲗ ϩⲓⲧⲛⲁⲣⲭⲱⲛ ⲛⲓⲙ ⲛⲧⲁⲩ ⲕⲁⲧⲁⲛⲏⲓ ⲛⲛⲉⲩⲡⲁⲧⲣⲓⲁ ⲙⲛⲧⲥⲛⲟⲟⲩⲥ ⲛϭⲉⲣⲱⲃ ⲁⲩⲱ ⲥϩⲁⲓ ⲙⲡⲣⲁⲛ ⲙⲡⲟⲩⲁ ⲡⲟⲩⲁ ⲉϩⲣⲁⲓ ⲉϫⲙⲡⲉϥϭⲉⲣⲱⲃ

18 ⲛⲗⲉⲩⲉⲓ ⲟⲩϭⲉⲣⲱⲃ ⲅⲁⲣ ⲛⲟⲩⲱⲧ ⲡⲉ ⲉⲩⲉϯ ⲕⲁⲧⲁⲡϩⲩⲗⲏ ⲛⲧⲉⲛⲏⲓ ⲛⲛⲉⲩⲡⲁⲧⲣⲓⲁ

19 ⲁⲩⲱ ⲉⲕⲉⲕⲁⲁⲩ ϩⲣⲁⲓ ϩⲛⲧⲉⲥⲕⲏⲛⲏ ⲙⲡⲙⲛⲧⲣⲉ ⲙⲡⲉⲙⲧⲟ ⲉⲃⲟⲗ ⲙⲡⲙⲛⲧⲣⲉ ϩⲛⲛⲁⲓ ϯⲛⲁⲟⲩⲟⲛϩⲧ ⲉⲃⲟⲗ ⲉⲣⲟⲕ ϩⲙⲡⲙⲁ ⲉⲧⲙⲙⲁⲩ

20 ⲁⲩⲱ ⲥⲛⲁϣⲱⲡⲉ ⲡⲣⲱⲙⲉ ⲡⲁⲓ ⲉϯⲛⲁⲥⲱⲧⲡ ⲙⲙⲟϥ ⲡⲉϥϭⲉⲣⲱⲃ ⲛⲁϯⲟⲩⲱ ⲁⲩⲱ ϯⲛⲁϥⲓ ⲉⲃⲟⲗ ⲙⲙⲟⲕ ⲙⲡⲉⲕⲣⲙⲣⲙ ⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲉⲧⲟⲩⲕⲣⲙⲣⲙ ⲛⲧⲟⲟⲩ ⲙⲙⲟⲟⲩ ⲉϩⲣⲁⲓ ⲉϫⲱⲧⲛ

21 ⲁⲩⲱ ⲁⲙⲱⲩⲥⲏⲥ ϣⲁϫⲉ ⲙⲛⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲱ ⲁⲩϯ ⲛⲁϥ ⲧⲏⲣⲟⲩ ⲛϭⲓⲛⲉⲩⲁⲣⲭⲱⲛ ⲟⲩϭⲉⲣⲱⲃ ⲉⲡⲟⲩⲁ ⲁⲣⲭⲱⲛ ⲟⲩϭⲉⲣⲱⲃ ⲕⲁⲧⲁⲁⲣⲭⲱⲛ ⲕⲁⲧⲁⲛⲏⲓ ⲛⲛⲉⲩⲡⲁⲧⲣⲓⲁ ⲙⲛⲧⲥⲛⲟⲟⲩⲥ ⲛϭⲉⲣⲱⲃ ⲁⲩⲱ ⲡϭⲉⲣⲱⲃ ⲛⲛⲁⲁⲣⲱⲛ ϩⲛⲧⲙⲏⲧⲉ ⲛⲛϭⲉⲣⲱⲃ

22 ⲁⲩⲱ ⲁⲙⲱⲩⲥⲏⲥ ⲕⲁⲛϭⲉⲣⲟⲟⲃ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲣⲁⲓ ϩⲛⲧⲉⲥⲕⲏⲛⲏ ⲙⲡⲙⲛⲧⲣⲉ

23 ⲁⲩⲱ ⲁⲥϣⲱⲡⲉ ⲙⲡⲉϥⲣⲁⲥⲧⲉ ⲁϥⲃⲱⲕ ⲉϩⲟⲩⲛ ⲛϭⲓⲙⲱⲩⲥⲏⲥ ⲙⲛⲁⲁⲣⲱⲛ ⲉⲧⲉⲥⲕⲏⲛⲏ ⲙⲡⲙⲛⲧⲣⲉ ⲁⲩⲱ ⲉⲓⲥ ϩⲏⲏⲧⲉ ⲁϥϯⲟⲩⲱ ⲛϭⲓⲡϭⲉⲣⲱⲃ ⲛⲛⲁⲁⲣⲱⲛ ⲉⲩⲏⲓ ⲛⲗⲉⲩⲉⲓ ⲁϥⲧⲁⲩⲟ ⲉⲃⲟⲗ ⲛⲟⲩϯⲟⲩⲱ ⲁϥⲧⲉⲕϩⲣⲏⲣⲉ ⲉⲃⲟⲗ ⲁϥⲧⲁⲩⲟ ⲉⲃⲟⲗ ⲛϩⲛⲕⲁⲣⲟⲓⲁ

24 ⲁⲩⲱ ⲁⲙⲱⲩⲥⲏⲥ ⲉⲓⲛⲉ ⲉⲃⲟⲗ ⲛⲛϭⲉⲣⲟⲟⲃ ⲧⲏⲣⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲁϩⲣⲛ ⲛϣⲏⲣⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲁⲩⲱ ⲁⲩⲛⲁⲩ ⲉⲣⲟⲟⲩ ⲁϥϫⲓ ⲛϭⲓⲡⲟⲩⲁ ⲡⲟⲩⲁ ⲙⲡⲉϥϭⲉⲣⲱⲃ

25 ⲁⲩⲱ ⲡⲉϫⲁϥ ⲛϭⲓⲡϫⲟⲉⲓⲥ ⲛⲁϩⲣⲙ ⲙⲱⲩⲥⲏⲥ ϫⲉⲕⲁⲡϭⲉⲣⲱⲃ ⲉϩⲣⲁⲓ ⲛⲁⲁⲣⲱⲛ ⲙⲡⲉⲙⲧⲟ ⲉⲃⲟⲗ ⲛⲛⲙⲙⲛⲧⲣⲉ ⲉⲩⲉϩⲁⲣⲉϩ ⲉⲣⲟϥ ⲛⲟⲩⲙⲁⲉⲓⲛ ⲛⲛϣⲏⲣⲉ ⲛⲛⲁⲧⲥⲱⲧⲙ ⲛⲧⲉⲡⲉⲩⲕⲣⲙⲣⲙ ⲗⲟ ϩⲓϫⲱⲓ ⲛⲥⲉⲧⲙⲙⲟⲩ

26 ⲁⲩⲱ ⲁϥⲉⲓⲣⲉ ⲛϭⲓⲙⲱⲩⲥⲏⲥ ⲙⲛⲁⲁⲣⲱⲛ ⲕⲁⲧⲁⲧϩⲉ ⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ ⲧⲁⲓ ⲧⲉ ⲧϩⲉ ⲛⲧⲁⲩⲁⲁⲥ

27 ⲁⲩⲱ ⲡⲉϫⲁⲩ ⲛϭⲓⲛϣⲏⲣⲉ ⲙⲡⲓⲥⲣⲁⲏⲗ ⲉϩⲟⲩⲛ ϩⲙⲙⲱⲩⲥⲏⲥ ⲉⲩϫⲱ ⲙⲙⲟⲥ ϫⲉⲉⲓⲥϩⲏⲏⲧⲉ ⲁⲛⲱϫⲛ ⲁⲛⲧⲁⲕⲟ ⲁⲩϫⲟⲛ ⲉⲃⲟⲗ

28 ⲟⲩⲟⲛ ⲛⲓⲙ ⲉⲧϫⲱϩ ⲉⲧⲉⲥⲕⲏⲛⲏ ⲙⲡϫⲟⲉⲓⲥ ϥⲙⲟⲩ ϣⲁⲧⲙⲙⲟⲩ ϣⲁⲃⲟⲗ