Nahum 1 — Coptic (Sahidic)

1 ⲡϫⲱⲱⲙⲉ ⲛⲧϩⲟⲣⲁⲥⲓⲥ ⲛⲛⲁⲟⲩⲙ ⲡϣⲏⲣⲉ ⲛⲉⲗⲕⲉⲥⲁⲓⲟⲥ

2 ⲟⲩⲛⲟⲩⲧⲉ ⲛⲣⲉϥⲕⲱϩ ⲡⲉ ⲡϫⲟⲉⲓⲥ ⲉϥϫⲓⲕⲃⲁ ϩⲛⲟⲩϭⲱⲛⲧ ⲛⲛⲉⲧϯⲟⲩⲃⲏϥ ⲁⲩⲱ ⲉϥⲧⲁⲕⲟ ⲛⲧⲟϥ ⲛⲛⲉϥϫⲁϫⲉ

3 ⲡϫⲟⲉⲓⲥ ⲟⲩϩⲁⲣϣϩⲏⲧ ⲡⲉ ⲁⲩⲱ ⲟⲩⲛⲟϭ ⲧⲉ ⲧⲉϥϭⲟⲙ ⲁⲩⲱ ⲡⲉⲧⲧⲃⲃⲏⲩ ⲛϥⲛⲁⲧⲃⲃⲟϥ ⲁⲛ ⲡϫⲟⲉⲓⲥ ⲉⲣⲉⲧⲉϥϩⲓⲏ ⲙⲙⲟⲟϣⲉ ϣⲟⲟⲡ ϩⲛⲟⲩⲥⲩⲛⲧⲉⲗⲉⲓⲁ ⲙⲛⲟⲩⲕⲙⲧⲟ ⲁⲩⲱ ⲛⲕⲗⲟⲟⲗⲉ ⲛⲛϣⲟⲉⲓϣ ⲛⲛⲉϥⲟⲩⲉⲣⲏⲧⲉ

4 ⲉϥⲉⲡⲓⲧⲓⲙⲁ ⲛⲧⲉⲑⲁⲗⲁⲥⲥⲁ ⲉϥⲧⲣⲉⲥϣⲟⲟⲩⲉ ⲁⲩⲱ ⲛⲉⲓⲉⲣⲱⲟⲩ ⲧⲏⲣⲟⲩ ⲛϥⲧⲣⲉⲩⲱϣⲙ ⲁⲧⲃⲁⲥⲁⲛ ⲥⲃⲟⲕ ⲙⲛⲡⲕⲁⲣⲙⲏⲗⲟⲥ ⲁⲩⲱ ⲛϯⲟⲩⲱ ⲙⲡⲗⲓⲃⲁⲛⲟⲥ ⲁⲩⲕⲓⲙ

5 ⲛⲧⲟⲩⲉⲓⲏ ⲁⲩⲛⲟⲉⲓⲛ ϩⲁⲧⲉϥϩⲏ ⲁⲩⲱ ⲁⲛⲃⲟⲩⲛⲟⲥ ⲕⲓⲙ ⲡⲕⲁϩ ⲧⲏⲣϥ ⲁϥϩⲟⲡϥ ϩⲁⲧⲉϥϩⲏ ⲙⲛⲟⲩⲟⲛ ⲛⲓⲙ ⲉⲧⲟⲩⲏϩ ⲛϩⲏⲧϥ

6 ⲛⲓⲙ ⲡⲉⲧⲛⲁϣⲁϩⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲛⲧⲉϥⲟⲣⲅⲏ ⲁⲩⲱ ⲛⲓⲙ ⲡⲉⲧⲛⲁϣϯ ⲟⲩⲃⲉ ⲉⲧⲟⲣⲅⲏ ⲙⲡⲉϥϭⲱⲛⲧ ⲡⲉϥϭⲱⲛⲧ ⲃⲱⲗ ⲉⲃⲟⲗ ⲛϩⲉⲛⲁⲣⲭⲏ ⲁⲩⲱ ⲙⲡⲉⲧⲣⲁ ⲁⲩⲟⲩⲱϣⲃ ϩⲁⲧⲉϥϩⲏ

7 ⲟⲩⲭⲣⲏⲥⲧⲟⲥ ⲡⲉ ⲡϫⲟⲉⲓⲥ ⲛⲛⲉⲧϩⲩⲡⲟⲙⲟⲛⲏ ⲉⲣⲟϥ ϩⲙⲡⲉϩⲟⲟⲩ ⲛⲧⲉⲩⲑⲗⲓⲯⲓⲥ ⲉϥⲥⲟⲟⲩⲛ ⲛⲛⲉⲧⲣϩⲟⲧⲉ ϩⲏⲧϥ

8 ⲁⲩⲱ ϩⲛⲧⲉϥϩⲓⲏ ⲙⲙⲟⲟϣⲉ ⲉⲧⲛⲁϣⲱⲥ ϥⲛⲁⲉⲓ ⲉϫⲛⲟⲩⲟⲛ ⲛⲓⲙ ⲉⲧⲧⲱⲟⲩⲛ ⲉϩⲣⲁⲓ ⲉϫⲱϥ ⲁⲩⲱ ⲛⲉϥϫⲓⲛϫⲉⲉⲩⲉ ⲡⲕⲁⲕⲉ ⲛⲁⲡⲱⲧ ⲛⲥⲱⲟⲩ

9 ⲉⲧⲉⲧⲛⲙⲟⲕⲙⲕ ⲉϩⲟⲩⲛ ⲉⲡϫⲟⲉⲓⲥ ⲛⲧⲟϥ ϥⲛⲁⲉⲓⲣⲉ ⲛⲟⲩⲥⲩⲛⲧⲉⲗⲉⲓⲁ ⲛϥⲛⲁϫⲓⲕⲃⲁ ⲁⲛ ⲛⲥⲡⲥⲛⲁⲩ ϩⲓⲟⲩⲥⲟⲡ ϩⲛⲟⲩⲑⲗⲓⲯⲓⲥ

10 ϫⲉⲥⲉⲛⲁϣⲱϥ ϣⲁⲧⲉⲩⲥⲛⲧⲉ ⲛⲧϩⲉ ⲛⲟⲩⲙⲁ ⲛϣⲟⲛⲧⲉ ⲁⲩⲱ ⲥⲉⲛⲁⲟⲩⲟⲙⲟⲩ ⲛⲧϩⲉ ⲛⲟⲩⲥⲙⲓⲗⲁⲝ ⲉϣⲁⲥϭⲗⲟⲙⲗⲙ ⲁⲩⲱ ⲛⲅⲣⲧϩⲉ ⲛⲟⲩⲙⲁ ⲛⲕⲁϣ ⲉϥⲟⲃⲉ ⲉⲙⲁⲧⲉ

11 ⲉⲣⲉⲟⲩⲗⲟⲅⲓⲥⲙⲟⲥ ⲛⲏⲩ ⲉⲃⲟⲗ ⲛϩⲏⲧⲕ ⲉϩⲟⲩⲛ ⲉⲡϫⲟⲉⲓⲥ ⲉⲕϣⲟϫⲛⲉ ⲉϩⲉⲛⲡⲉⲧϩⲟⲟⲩ ⲉⲩϯ ⲟⲩⲃⲏⲕ

12 ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ⲉϥⲁⲣⲭⲏ ⲉϫⲛϩⲉⲛⲙⲟⲟⲩ ⲉⲛⲁϣⲱⲟⲩ...