Micah 7 — Coptic (Sahidic)

1 ⲟⲩⲟⲓ ⲛⲁⲓ ϫⲉⲁⲓⲣⲧϩⲉ ⲙⲡⲉⲧⲥⲉⲩϩⲣⲟⲟⲩⲉ ⲉϩⲟⲩⲛ ϩⲙⲡⲱϩⲥ ⲁⲩⲱ ⲛⲧϩⲉ ⲙⲡⲉⲧⲕⲉⲧϥϫⲗⲗⲉ ϩⲙⲡϫⲱⲱⲗⲉ ⲉⲙⲛⲥⲙⲁϩ ϣⲟⲟⲡ ⲉⲟⲩⲱⲙ ⲛⲛⲧⲁⲩⲡⲱϩ ⲛϣⲟⲣⲡ ⲟⲩⲟⲓ ⲛⲁⲓ ⲧⲁⲯⲩⲭⲏ

2 ϫⲉⲁⲡⲣⲉϥⲣⲛⲟⲃⲉ ⲧⲁⲕⲟ ϩⲓϫⲙⲡⲕⲁϩ ⲁⲩⲱ ⲡⲉⲧⲥⲟⲩⲧⲱⲛ ϩⲛⲛⲣⲱⲙⲉ ⲉⲛϥϣⲟⲟⲡ ⲁⲛ ⲥⲉϭⲟⲣϭ ⲧⲏⲣⲟⲩ ⲉϩⲉⲛⲥⲛⲟϥ ⲡⲟⲩⲁ ⲡⲟⲩⲁ ϩⲟϫϩϫ ⲙⲡⲉⲧϩⲓⲧⲟⲩⲱϥ ϩⲛⲟⲩϩⲟϫϩϫ

3 ⲥⲉⲥⲟⲃⲧⲉ ⲛⲛⲉⲩϭⲓϫ ⲉⲡⲡⲉⲧϩⲟⲟⲩ ⲡⲁⲣⲭⲱⲛ ϥⲁⲓⲧⲉⲓ ⲁⲩⲱ ⲡⲉⲕⲣⲓⲧⲏⲥ ϥϫⲓ ϩⲛϩⲉⲛⲧⲟⲩⲓⲟ ϥϫⲱ ⲁⲩⲱ ϥⲧⲁⲩⲟ ⲛϩⲉⲛϣⲁϫⲉ ⲛⲉⲓⲣⲏⲛⲓⲕⲟⲛ ⲁⲩⲱ ⲡϫⲱⲱⲣⲉ ⲉϥϣⲁϫⲉ ⲉⲡⲟⲩⲱϣ ⲡⲉ ⲛⲧⲉϥⲯⲩⲭⲏ ⲁⲩⲱ ϯⲛⲁϥⲓ ⲛⲛⲉⲩⲁⲅⲁⲑⲟⲛ

4 ⲛⲧϩⲉ ⲛⲟⲩϩⲟⲟⲗⲉ ⲉⲥⲟⲩⲱⲙ ⲁⲩⲱ ⲉⲥⲙⲟⲟϣⲉ ϩⲓϫⲛⲟⲩⲕⲁⲛⲱⲛ ϩⲙⲡⲉϩⲟⲟⲩ ⲙⲡϭⲱϣⲧ ⲉⲃⲟⲗ ⲟⲩⲟⲓ ⲟⲩⲟⲓ ⲛⲕⲃⲁ ⲁⲩⲉⲓ ⲧⲉⲛⲟⲩ ⲥⲉⲛⲁϣⲱⲡⲉ ⲛϭⲓⲛⲉⲩⲣⲓⲙⲉ

5 ⲙⲡⲣⲧⲁⲛϩⲉⲧⲧⲏⲩⲧⲛ ⲙⲛⲛⲉⲧⲛϣⲃⲉⲉⲣⲉ ⲟⲩⲇⲉ ⲙⲡⲣⲕⲁϩⲧⲏⲧⲛ ⲉⲛⲉⲧϩⲓϫⲱⲧⲛ ϩⲁⲣⲉϩ ⲉⲣⲟⲕ ⲉⲧⲉⲕⲥϩⲓⲙⲉ ⲉⲧⲙⲧⲁⲙⲟⲥ ⲉⲗⲁⲁⲩ

6 ⲉⲃⲟⲗ ϫⲉⲟⲩⲛⲟⲩϣⲏⲣⲉ ⲛⲁⲥⲉϣⲡⲉϥⲉⲓⲱⲧ ⲁⲩⲱ ⲟⲩⲛⲟⲩϣⲉⲉⲣⲉ ⲛⲁⲧⲱⲟⲩⲛ ⲉϫⲛⲧⲉⲥⲙⲁⲁⲩ ⲁⲩⲱ ⲟⲩϣⲉⲗⲉⲉⲧ ⲉϫⲛⲧⲉⲥϣⲱⲙⲉ ⲛϫⲓⲛϫⲉⲉⲩⲉ ⲙⲡⲣⲱⲙⲉ ⲉⲛⲛⲣⲱⲙⲉ ⲧⲏⲣⲟⲩ ⲉⲧϩⲙⲡⲉϥⲏⲓ

7 ⲁⲛⲟⲕ ⲇⲉ ϯⲛⲁϭⲱϣⲧ ⲉϩⲣⲁⲓ ⲉⲡϫⲟⲉⲓⲥ ϯⲛⲁϩⲩⲡⲟⲙⲟⲛⲏ ⲉⲡⲛⲟⲩⲧⲉ ⲡⲁⲥⲱⲧⲏⲣ ⲡⲁⲛⲟⲩⲧⲉ ϥⲛⲁⲥⲱⲧⲙ ⲉⲣⲟⲓ

8 ⲧⲁⲙⲛⲧϫⲁϫⲉ ⲙⲡⲣⲣⲁϣⲉ ⲉϩⲣⲁⲓ ⲉϫⲱⲓ ϫⲉⲁⲓϩⲉ ϯⲛⲁⲧⲱⲟⲩⲛ ⲟⲛ ϫⲉⲉⲓϣⲁⲛϩⲙⲟⲟⲥ ϩⲙⲡⲕⲁⲕⲉ ⲡϫⲟⲉⲓⲥ ⲛⲁⲣⲟⲩⲟⲉⲓⲛ ⲉⲣⲟⲓ

9 ⲧⲟⲣⲅⲏ ⲙⲡϫⲟⲉⲓⲥ ϯⲛⲁϥⲓ ϩⲁⲣⲟⲥ ϫⲉⲁⲓⲣⲛⲟⲃⲉ ⲉⲣⲟϥ ϣⲁⲛⲧⲉϥⲧⲙⲁⲉⲓⲉⲡϩⲁⲡ ⲉϥⲛⲁⲉⲓⲣⲉ ⲙⲡϫⲓⲕⲃⲁ ⲉϥⲛⲁⲛⲧ ⲉⲃⲟⲗ ⲉⲡⲟⲩⲟⲉⲓⲛ ϯⲛⲁⲛⲁⲩ ⲉⲧⲉϥⲇⲓⲕⲁⲓⲟⲥⲩⲛⲏ

10 ⲁⲩⲱ ⲥⲛⲁⲛⲁⲩ ⲉⲣⲟⲓ ⲛϭⲓⲧⲁⲙⲛⲧϫⲁϫⲉ ⲁⲩⲱ ⲥϭⲟⲟⲗⲉⲥ ⲙⲡϣⲓⲡⲉ ⲧⲉⲧϫⲱ ⲙⲙⲟⲥ ⲛⲁⲓ ϫⲉⲉϥⲧⲱⲛ ⲡϫⲟⲉⲓⲥ ⲛⲉⲕⲛⲟⲩⲧⲉ ⲁⲩⲱ ⲛⲁⲃⲁⲗ ⲥⲉⲛⲁⲙⲉϩⲉⲓⲁⲧⲟⲩ ⲙⲙⲟⲥ ⲧⲉⲛⲟⲩ ⲥⲉⲛⲁϩⲱⲙ ⲉϫⲱⲥ ⲛⲧϩⲉ ⲛⲟⲩⲟⲙⲉ ϩⲛⲛⲉϩⲓⲟⲟⲩⲉ

11 ⲟⲩϩⲟⲟⲩ ⲛⲕⲱϩⲧ ⲉⲧⲟⲩϫⲟ ⲡⲉ ⲡⲉϩⲟⲟⲩ ⲉⲧⲙⲙⲁⲩ ⲉϥⲛⲁⲧⲁⲕⲟ ⲛⲛⲛⲟⲙⲓⲙⲟⲛ ⲙⲡⲁⲗⲁⲟⲥ

12 ⲁⲩⲱ ⲛⲉⲕⲡⲟⲗⲓⲥ ⲥⲉⲛⲁϣⲁϣⲟⲩ ⲙⲛⲡⲕⲁϩ ⲛⲧⲉⲛⲁⲥⲥⲩⲣⲓⲟⲥ ⲡⲟϣⲟⲩ ⲉϩⲣⲁⲩ ⲁⲩⲱ ⲛⲉⲕⲡⲟⲗⲓⲥ ⲥⲉⲛⲁⲡⲟϣⲟⲩ ϫⲓⲛⲧⲩⲣⲟⲥ ϣⲁⲡⲉⲓⲣⲣⲟ ⲛⲧⲥⲩⲣⲓⲁ ⲁⲩⲱ ϫⲓⲛⲑⲁⲗⲁⲥⲥⲁ ϣⲁⲧϩⲁⲗⲁⲥⲥⲁ ⲁⲩⲱ ϫⲓⲛⲡⲧⲟⲟⲩ ϣⲁⲡⲧⲟⲟⲩ

13 ⲁⲩⲱ ⲡⲕⲁϩ ⲉϥⲛⲁϣⲱⲡⲉ ⲉⲩⲧⲁⲕⲟ ⲙⲛⲛⲉⲧⲟⲩⲏϩ ⲛϩⲏⲧϥ ⲉⲃⲟⲗ ϩⲙⲡⲕⲁⲣⲡⲟⲥ ⲛⲛⲉϩⲃⲏⲩⲉ ⲛⲧⲉⲩⲡⲟⲛⲏⲣⲓⲁ

14 ⲙⲟⲟⲛⲉ ⲙⲡⲉⲕⲗⲁⲟⲥ ϩⲙⲡⲉⲕϭⲉⲣⲱⲃ ⲧⲉⲕⲫⲩⲗⲏ ⲛⲉⲥⲟⲟⲩ ⲛⲧⲉⲕⲕⲗⲏⲣⲟⲛⲟⲙⲓⲁ ⲉⲩⲟⲩⲏϩ ϩⲁⲣⲓϩⲁⲣⲟⲟⲩ ϩⲙⲡⲉⲇⲣⲩⲙⲟⲥ ϩⲛⲧⲙⲏⲧⲉ ⲙⲡⲕⲁⲣⲙⲉⲗⲟⲥ ⲥⲉⲛⲁⲙⲟⲟⲛⲉ ⲙⲙⲟⲟⲩ ϩⲛⲧⲃⲁⲥⲁⲛ ⲙⲛⲅⲁⲗⲁⲁⲇ ⲛⲧϩⲉ ⲛⲛⲉϩⲟⲟⲩ ⲙⲡⲁⲓⲱⲛ

15 ⲁⲩⲱ ⲕⲁⲧⲁⲛⲉϩⲟⲟⲩ ⲙⲡⲉⲕⲉⲓ ⲉⲃⲟⲗ ϩⲙⲡⲕⲁϩ ⲛⲕⲏⲙⲉ ϯⲛⲁⲧⲁⲩⲟⲟⲩ ⲉϩⲉⲛϣⲡⲏⲣⲉ

16 ⲥⲉⲛⲁⲛⲁⲩ ⲛϭⲓⲛϩⲉⲑⲛⲟⲥ ⲛⲥⲉϫⲓ ϣⲓⲡⲉ ⲉⲃⲟⲗ ϩⲛⲧⲉⲩϭⲟⲙ ⲧⲏⲣⲥ ⲥⲉⲛⲁⲕⲁⲧⲟⲟⲧⲟⲩ ϩⲓⲣⲛ ⲣⲣⲱⲟⲩ ⲛⲥⲉϩⲱϫⲡ ⲛⲛⲉⲩⲙⲁⲁϫⲉ

17 ⲥⲉⲛⲁⲗⲱϫϩ ⲙⲡⲕⲁϩ ⲛⲧϩⲉ ⲛⲛϩⲟϥ ⲉⲩⲥⲱϣⲉ ϩⲓⲡⲉⲥⲏⲧ ⲥⲉⲛⲁⲥⲱⲟⲩϩ ⲉϩⲟⲩⲛ ⲉⲟⲣⲃⲟⲩ ⲉϩⲟⲩⲛ ⲥⲉⲛⲁⲣϣⲡⲏⲣⲉ ⲇⲉ ⲟⲛ ⲉϫⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲛⲥⲉⲣϩⲟⲧⲉ ϩⲁⲧⲉϥϩⲏ

18 ⲛⲓⲙ ⲡⲉ ⲡⲕⲉⲛⲟⲩⲧⲉ ⲛⲃⲗⲗⲁⲕ ⲉⲕϥⲓ ⲙⲙⲁⲩ ⲛⲛⲁⲛⲟⲙⲓⲁ ⲁⲩⲱ ⲉϥⲱⲃϣ ⲙⲙⲟϥ ⲙⲙⲛⲧϣⲁϥⲧⲉ ⲛⲛⲥⲉⲉⲡⲉ ⲛⲧⲉϥⲕⲗⲏⲣⲟⲛⲟⲙⲓⲁ ⲁⲩⲱ ⲙⲡⲉϥⲁⲙⲁϩⲧⲉ ⲛⲧⲉϥⲟⲣⲅⲏ ⲉⲕⲁⲁⲥ ⲉⲩⲙⲛⲧⲙⲛⲧⲣⲉ ⲉⲃⲟⲗ ϫⲉⲉⲣⲉⲡⲉϥⲟⲩⲱϣ ϣⲟⲟⲡ ϩⲙⲡⲛⲁ

19 ⲛⲧⲟϥ ⲉϥⲛⲁⲕⲧⲟϥ ⲛⲉϥϣⲛϩⲧⲏϥ ⲉϫⲱⲛ ⲁⲩⲱ ϥⲛⲁϩⲱⲡ ⲛⲛⲉⲛⲛⲟⲃⲉ ⲛⲛⲕⲉⲁⲛⲟⲙⲓⲁ ⲧⲏⲣⲟⲩ ⲉϥⲛⲁⲛⲟϫⲟⲩ ⲉϩⲣⲁⲓ ⲛϣⲓⲕ ⲛⲧⲉⲑⲁⲗⲁⲥⲥⲁ

20 ⲉⲕⲛⲁϯ ⲛⲧⲙⲉ ⲛⲓⲁⲕⲱⲃ ⲁⲩⲱ ⲡⲛⲉⲩⲙⲁ ⲛⲁⲃⲣⲁϩⲁⲙ ⲙⲡⲉⲥⲙⲟⲧ ⲛⲧⲁⲕⲱⲣⲕ ⲛⲛⲉⲛⲉⲓⲟⲧⲉ ϫⲓⲛⲛⲉϩⲟⲟⲩ ⲛϣⲟⲣⲡ