Leviticus 5 — Coptic (Sahidic)

1 ⲉⲣϣⲁⲛⲟⲩⲯⲩⲭⲏ ⲇⲉ ⲣⲛⲟⲃⲉ ⲁⲩⲱ ⲛⲥⲥⲱⲧⲙ ⲉⲩϩⲣⲟⲟⲩ ⲛⲁⲛⲁϣ ⲁⲩⲱ ⲛⲧⲉⲡⲁⲓ ⲣⲙⲛⲧⲣⲉ ϫⲉⲁϥⲛⲁⲩ ⲏ ϥⲥⲟⲟⲩⲛ ⲛϥⲧⲙⲟⲩⲉⲛϩⲡϩⲱⲃ ⲉⲃⲟⲗ ϥⲛⲁϫⲓ ⲙⲡⲉϥⲛⲟⲃⲉ

2 ⲏ ⲟⲩⲯⲩⲭⲏ ⲉⲥϣⲁⲛϫⲱϩ ⲉⲗⲁⲁⲩ ⲉϥϫⲁϩⲙ ⲏ ⲟⲩⲧⲃⲛⲏ ⲉⲁϥⲙⲟⲩ ⲏ ⲕⲉⲧⲃⲛⲏ ⲉϥϫⲁϩⲙ ⲉⲁⲛⲉⲑⲏⲣⲓⲟⲛ ⲁⲁϥ ⲛⲁⲕⲱ ⲏ ⲛⲉⲧⲟ ⲛⲃⲟⲧⲉ ⲉⲩϫⲁϩⲙ ⲉⲩϣⲁⲛⲙⲟⲩ

3 ⲏ ⲛⲧⲉⲧⲉⲯⲩⲭⲏ ϫⲱϩ ⲉⲩⲁⲕⲁⲑⲁⲣⲥⲓⲁ ⲛⲣⲱⲙⲉ ⲉⲃⲟⲗ ϩⲛⲧⲉϥⲁⲕⲁⲑⲁⲣⲥⲓⲁ ⲧⲏⲣⲥ ⲧⲁⲓ ⲉϥϣⲁⲛϫⲱϩ ⲉⲣⲟⲥ ⲛϥϫⲱϩⲙ ⲛϩⲏⲧⲥ ⲛⲧⲉⲧⲙⲡⲁⲓ ⲉⲓⲙⲉ ⲉⲣⲟϥ ⲙⲛⲛⲥⲁⲡⲁⲓ ⲇⲉ ⲛⲥⲉⲓⲙⲉ ⲁⲩⲱ ⲛⲥⲣⲛⲟⲃⲉ

4 ⲏ ⲧⲉⲯⲩⲭⲏ ⲛⲁⲛⲟⲙⲟⲥ ⲧⲉⲧⲛⲁϣⲁϫⲉ ϩⲛⲛⲉⲥⲡⲟⲧⲟⲩ ⲉⲉⲓⲣⲉ ⲙⲡⲡⲉⲧϩⲟⲟⲩ ⲏ ⲡⲉⲧⲛⲁⲛⲟⲩϥ ⲕⲁⲧⲁϣⲁϫⲉ ⲛⲓⲙ ⲉⲧⲉⲣⲉⲡⲣⲱⲙⲉ ⲛⲁϫⲟⲟⲩ ϩⲛⲟⲩⲁⲛⲁϣ ⲁⲩⲱ ⲛϥϩⲱⲡ ⲉⲣⲟϥ ⲛⲧⲉⲡⲁⲓ ⲇⲉ ⲉⲓⲙⲉ ⲛϥⲣⲛⲟⲃⲉ ϩⲛⲟⲩⲁ ⲛⲛⲁⲓ

5 ⲁⲩⲱ ⲛϥϣⲁⲛⲣⲛⲟⲃⲉ ϩⲛⲟⲩⲁ ⲛⲛⲁⲓ ⲁⲩⲱ ⲛϥⲧⲁⲩⲉⲡⲉϥⲛⲟⲃⲉ ⲛⲧⲁϥⲁⲁϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

6 ⲉϥⲉⲉⲓⲛⲉ ⲙⲡϫⲟⲉⲓⲥ ϩⲁⲛⲛⲟⲃⲉ ⲛⲧⲁϥⲁⲁⲩ ⲛⲟⲩϩⲓⲉⲓⲃ ⲉⲃⲟⲗ ϩⲛⲛⲉⲥⲟⲟⲩ ⲏ ⲟⲩⲃⲁⲁⲙⲡⲉ ⲛⲥϩⲓⲙⲉ ⲉⲃⲟⲗ ϩⲛⲛⲃⲁⲁⲙⲡⲉ ϩⲁⲡⲉϥⲛⲟⲃⲉ ⲁⲩⲱ ⲉⲣⲉⲡⲟⲩⲏⲏⲃ ⲧⲱⲃϩ ⲉϫⲙⲡⲉϥⲛⲟⲃⲉ ⲛⲥⲉⲕⲱ ⲛⲁϥ ⲉⲃⲟⲗ ⲙⲡⲉϥⲛⲟⲃⲉ

7 ⲉϣⲱⲡⲉ ⲇⲉ ⲛⲧⲟⲟⲧϥ ⲛⲁⲧⲁϩⲉⲡⲉⲥⲟⲟⲩ ⲁⲛ ⲉϥⲉⲉⲓⲛⲉ ϩⲁⲡⲉϥⲛⲟⲃⲉ ⲛⲧⲁϥⲁⲁϥ ⲛϭⲣⲙⲡϣⲁⲛ ⲥⲛⲁⲩ ⲏ ⲙⲁⲥ ⲥⲛⲁⲩ ⲛϭⲣⲟⲟⲙⲡⲉ ⲛⲧⲁⲗⲟ ⲙⲡϫⲟⲉⲓⲥ ⲟⲩⲁ ϩⲁⲛⲟⲃⲉ ⲁⲩⲱ ⲟⲩⲁ ⲉⲩϭⲗⲓⲗ

8 ⲁⲩⲱ ⲉϥⲉⲛⲧⲟⲩ ⲉⲣⲁⲧϥ ⲙⲡⲟⲩⲏⲏⲃ ⲁⲩⲱ ⲉⲣⲉⲡⲟⲩⲏⲏⲃ ϫⲓ ⲛϣⲟⲣⲡ ⲙⲡⲉⲧⲟⲩⲛⲁⲧⲁⲁϥ ϩⲁⲛⲟⲃⲉ ⲁⲩⲱ ⲉⲣⲉⲡⲟⲩⲏⲏⲃ ϭⲱⲛϭ ⲛⲧⲉϥⲁⲡⲉ ⲉϫⲙⲡⲉϥⲥⲫⲟⲛⲇⲩⲗⲟⲥ ⲛϥⲧⲙⲡⲟϣϥ

9 ⲁⲩⲱ ⲉϥⲉϭⲟϣϭϣ ⲉⲃⲟⲗ ϩⲙⲡⲉⲥⲛⲟϥ ⲡⲁⲓ ⲉⲧⲟⲩⲛⲁⲧⲁⲁϥ ϩⲁⲛⲟⲃⲉ ⲉϩⲟⲩⲛ ⲉⲧϫⲟ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲡⲕⲉⲥⲉⲉⲡⲉ ⲇⲉ ⲙⲡⲉϥⲥⲛⲟϥ ⲉϥⲉϫⲗϫⲱⲗϥ ⲉϫⲛⲧⲃⲁⲥⲓⲥ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲟⲩϯ ⲅⲁⲣ ⲡⲉ ϩⲁⲛⲟⲃⲉ

10 ⲡⲙⲉϩⲥⲛⲁⲩ ⲇⲉ ⲉϥⲉⲁⲁϥ ⲛϩⲟⲗⲟⲕⲁⲩⲧⲱⲙⲁ ⲕⲁⲧⲁⲧϩⲉ ⲉⲧⲉϣϣⲉ ⲁⲩⲱ ⲉⲣⲉⲡⲟⲩⲏⲏⲃ ⲧⲱⲃϩ ⲉϫⲱϥ ⲉⲧⲃⲉⲡⲉϥⲛⲟⲃⲉ ⲛⲧⲁϥⲁⲁϥ ⲛⲥⲉⲕⲁⲁϥ ⲛⲁϥ ⲉⲃⲟⲗ

11 ⲉϣⲱⲡⲉ ⲇⲉ ⲉⲣⲧⲙⲧⲟⲟⲧϥ ⲧⲁϩⲉⲡⲉϭⲣⲙⲡϣⲁⲛ ⲥⲛⲁⲩ ⲏ ⲡⲙⲁⲥ ⲥⲛⲁⲩ ⲛϭⲣⲟⲟⲙⲡⲉ ⲉϥⲉⲉⲓⲛⲉ ⲙⲡⲉϥⲇⲱⲣⲟⲛ ϩⲁⲡⲛⲟⲃⲉ ⲛⲧⲁϥⲁⲁϥ ⲙⲡⲣⲉⲙⲏⲧ ⲙⲡϣⲓ ⲛⲥⲁⲙⲓⲧ ϩⲁⲡⲉϥⲛⲟⲃⲉ ⲛϥⲧⲙⲡⲉϩⲧⲛⲉϩ ⲉϩⲣⲁⲓ ⲉϫⲱϥ ⲟⲩⲇⲉ ⲛϥⲧⲙⲕⲁⲗⲓⲃⲁⲛⲟⲥ ϩⲓϫⲱϥ ϫⲉⲟⲩⲧⲁⲗⲟ ⲡⲉ ϩⲁⲛⲟⲃⲉ

12 ⲁⲩⲱ ⲉϥⲉⲛⲧϥ ⲉⲣⲁⲧϥ ⲙⲡⲟⲩⲏⲏⲃ ⲁⲩⲱ ⲉⲣⲉⲡⲟⲩⲏⲏⲃ ⲙⲉϩⲧⲟⲟⲧϥ ⲉⲃⲟⲗ ⲛϩⲏⲧϥ ⲛϥⲧⲁⲗⲟ ⲙⲡⲉϥⲣⲡⲙⲉⲉⲩⲉ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲛϩⲟⲗⲟⲕⲁⲩⲧⲱⲙⲁ ⲙⲡϫⲟⲉⲓⲥ ⲟⲩϯ ⲅⲁⲣ ⲡⲉ ϩⲁⲛⲟⲃⲉ

13 ⲁⲩⲱ ⲉⲣⲉⲡⲟⲩⲏⲏⲃ ⲧⲱⲃϩ ⲉϫⲱϥ ⲉⲧⲃⲉⲡⲉϥⲛⲟⲃⲉ ⲛⲧⲁϥⲁⲁϥ ⲉⲃⲟⲗ ϩⲛⲟⲩⲁ ⲛⲛⲁⲓ ⲛⲥⲉⲕⲁⲁϥ ⲛⲁϥ ⲉⲃⲟⲗ ⲡⲕⲉⲥⲉⲉⲡⲉ ⲇⲉ ⲉϥⲉϣⲱⲡⲉ ⲙⲡⲟⲩⲏⲏⲃ ⲛⲧϩⲉ ⲛⲧⲉⲑⲩⲥⲓⲁ ⲙⲡⲥⲁⲙⲓⲧ

14 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ ⲛⲁϥ ϫⲉ

15 ⲟⲩⲯⲩⲭⲏ ⲉⲥϣⲁⲛⲣⲡⲱⲃϣ ϩⲛⲟⲩⲱⲃϣ ⲁⲩⲱ ⲛⲥⲣⲛⲟⲃⲉ ⲉϩⲛⲁⲥ ⲁⲛ ⲉⲃⲟⲗ ϩⲛⲛⲉⲧⲟⲩⲁⲁⲃ ⲙⲡϫⲟⲉⲓⲥ ⲉϥⲉⲉⲓⲛⲉ ⲉⲣⲁⲧϥ ⲙⲡϫⲟⲉⲓⲥ ϩⲁⲡⲛⲟⲃⲉ ⲛⲧⲁϥⲁⲁϥ ⲛⲟⲩⲟⲉⲓⲗⲉ ⲉⲙⲛϫⲃⲓⲛ ⲛϩⲏⲧϥ ⲉⲃⲟⲗ ϩⲛⲛⲉⲥⲟⲟⲩ ⲛⲟⲩⲧⲓⲙⲏ ⲛϩⲁⲧ ϫⲟⲩⲱⲧ ⲛⲥⲓⲕⲗⲟⲥ ϩⲙⲡⲥⲓⲕⲗⲟⲥ ⲉⲧⲟⲩⲁⲁⲃ ⲉⲧⲃⲉⲡⲛⲟⲃⲉ ⲛⲧⲁϥⲁⲁϥ

16 ⲁⲩⲱ ⲡⲉⲛⲧⲁϥⲣϩⲉⲛⲛⲟⲃⲉ ⲉϥⲉⲧⲁⲁϥ ⲉⲃⲟⲗ ϩⲛⲛⲉⲧⲟⲩⲁⲁⲃ ⲁⲩⲱ ⲡⲧⲱϣ ⲛⲟⲩⲟⲩⲱⲛ ⲛϯⲟⲩ ⲉϥⲉⲧⲁⲁϥ ⲉϫⲱϥ ⲛϥⲧⲁⲁϥ ⲙⲡⲟⲩⲏⲏⲃ ⲁⲩⲱ ⲡⲟⲩⲏⲏⲃ ⲉϥⲉⲧⲱⲃϩ ⲉϫⲱϥ ϩⲙⲡⲟⲉⲓⲗⲉ ⲙⲡⲉϥⲛⲟⲃⲉ ⲛⲥⲉⲕⲁⲁϥ ⲛⲁϥ ⲉⲃⲟⲗ

17 ⲁⲩⲱ ⲧⲉⲯⲩⲭⲏ ⲉⲧⲛⲁⲣⲛⲟⲃⲉ ⲛⲥⲉⲓⲣⲉ ⲛⲟⲩⲉⲓ ⲉⲃⲟⲗ ϩⲛⲛⲉⲛⲧⲟⲗⲏ ⲧⲏⲣⲟⲩ ⲙⲡϫⲟⲉⲓⲥ ⲉⲛϣϣⲉ ⲁⲛ ⲉⲁⲁϥ ⲁⲩⲱ ⲙⲡⲉϥⲉⲓⲙⲉ ⲛϥⲣⲛⲟⲃⲉ ⲛϥϫⲓ ⲙⲡⲉϥⲛⲟⲃⲉ

18 ⲉϥⲉⲉⲓⲛⲉ ⲛⲟⲩⲟⲉⲓⲗⲉ ⲉⲙⲛϫⲃⲓⲛ ⲛϩⲏⲧϥ ⲉⲃⲟⲗ ϩⲛⲛⲉⲥⲟⲟⲩ ϩⲁⲟⲩⲧⲓⲙⲏ ⲛϩⲟⲙⲛⲧ ϩⲁⲡⲉϥⲛⲟⲃⲉ ⲉⲣⲁⲧϥ ⲙⲡⲟⲩⲏⲏⲃ ⲁⲩⲱ ⲉⲣⲉⲡⲟⲩⲏⲏⲃ ⲧⲱⲃϩ ⲉϫⲱϥ ⲉⲧⲃⲉⲧⲉϥⲙⲛⲧⲁⲧⲥⲟⲟⲩⲛ ⲛⲧⲁϥϣⲱⲡⲉ ⲛϩⲏⲧⲥ ⲁⲩⲱ ⲛⲧⲟϥ ⲙⲡⲉϥⲉⲓⲙⲉ ⲛⲥⲉⲕⲁⲁϥ ⲛⲁϥ ⲉⲃⲟⲗ

19 ⲁϥϣⲱⲃⲧ ⲅⲁⲣ ⲁⲩⲱ ⲁϥϣⲱⲡⲉ ϩⲛⲟⲩⲙⲛⲧⲁⲧⲥⲟⲟⲩⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

20 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ ⲛⲁϥ ϫⲉ

21 ⲟⲩⲯⲩⲭⲏ ⲉⲥϣⲁⲛⲣⲛⲟⲃⲉ ⲁⲩⲱ ϩⲛⲟⲩⲱⲃϣ ⲛⲥⲟⲃϣⲥ ⲉⲛⲉⲛⲧⲟⲗⲏ ⲙⲡϫⲟⲉⲓⲥ ⲛϥϫⲓϭⲟⲗ ⲉⲡⲉⲧϩⲓⲧⲟⲩⲱϥ ϩⲛⲟⲩⲡⲁⲣⲁⲑⲏⲕⲏ ⲏ ⲉⲧⲃⲉⲟⲩⲕⲟⲓⲛⲱⲛⲓⲁ ⲏ ⲉⲧⲃⲉⲟⲩϩⲁⲣⲡⲁⲅⲏ ⲏ ⲁϥⲁⲇⲓⲕⲉⲓ ⲙⲡⲉⲧϩⲓⲧⲟⲩⲱϥ ϩⲛⲟⲩϩⲱⲃ

22 ⲏ ⲁϥϩⲉ ⲉⲩⲛⲕⲁ ⲉϥⲥⲟⲣⲙ ⲁⲩⲱ ⲛϥϫⲓϭⲟⲗ ⲉⲧⲃⲏⲏⲧϥ ⲛϥⲱⲣⲕ ⲁⲇⲓⲕⲟⲥ ⲉⲧⲃⲉⲟⲩⲁ ⲉⲃⲟⲗ ϩⲛⲛⲁⲓ ⲧⲏⲣⲟⲩ ⲉⲣϣⲁⲛⲛⲣⲱⲙⲉ ⲁⲁⲩ ϩⲱⲥⲧⲉ ⲉⲧⲣⲉϥⲣⲛⲟⲃⲉ ϩⲛⲛⲁⲓ

23 ⲁⲩⲱ ⲉϥϣⲁⲛⲣⲛⲟⲃⲉ ⲛϥϣⲱϥⲧ ⲁⲩⲱ ⲛϥϯ ⲛⲧϩⲁⲣⲡⲁⲅⲏ ⲛⲧⲁϥϩⲁⲣⲡⲁⲍⲉ ⲙⲙⲟⲥ ⲏ ⲡϩⲱⲃ ⲛϫⲓ ⲛϭⲟⲛⲥ ⲛⲧⲁϥⲁⲇⲓⲕⲉⲓ ⲛϩⲏⲧⲥ ⲏ ⲧⲡⲁⲣⲁⲑⲏⲕⲏ ⲛⲧⲁⲩϭⲁⲗⲱⲱⲥ ⲉⲣⲟϥ ⲏ ⲡⲉⲛⲧⲁⲩϩⲉ ⲉⲣⲟϥ ⲉϥⲥⲟⲣⲙ

24 ⲉⲃⲟⲗ ϩⲛϩⲱⲃ ⲛⲓⲙ ⲛⲧⲁϥⲱⲣⲕ ⲉⲧⲃⲏⲏⲧⲟⲩ ⲁⲇⲓⲕⲱⲥ ⲉϥⲉϯ ⲙⲡⲕⲉⲫⲁⲗⲁⲓⲟⲛ ⲁⲩⲱ ⲡⲟⲩⲱⲛ ⲛϯⲟⲩ ⲉϥⲉⲧⲁⲁϥ ⲉϫⲱϥ ⲡⲉⲧⲉⲡⲱϥ ⲡⲉ ⲉϥⲉⲧⲁⲁϥ ⲛⲁϥ ⲙⲡⲉϩⲟⲟⲩ ⲉⲧⲟⲩⲛⲁϫⲡⲓⲟϥ ⲛϩⲏⲧϥ

25 ⲁⲩⲱ ⲉⲧⲃⲉⲡⲉϥⲛⲟⲃⲉ ⲉϥⲉⲉⲓⲛⲉ ⲙⲡϫⲟⲉⲓⲥ ⲛⲟⲩⲟⲉⲓⲗⲉ ⲉⲙⲛϫⲃⲓⲛ ⲛϩⲏⲧϥ ⲉⲃⲟⲗ ϩⲛⲛⲉⲥⲟⲟⲩ ϩⲁⲟⲩⲧⲓⲙⲏ ⲛϩⲁⲧ ⲉⲧⲃⲉⲛⲉⲛⲧⲁϥⲁⲁⲩ

26 ⲁⲩⲱ ⲉⲣⲉⲡⲟⲩⲏⲏⲃ ⲧⲱⲃϩ ⲉϫⲱϥ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲛⲥⲉⲕⲱ ⲛⲁϥ ⲉⲃⲟⲗ ϩⲁⲡⲉⲛⲧⲁϥⲁⲁϥ ⲉⲃⲟⲗ ϩⲛⲛⲁⲓ ⲧⲏⲣⲟⲩ ⲉⲁϥⲣⲛⲟⲃⲉ ⲛϩⲏⲧⲟⲩ