Leviticus 27 — Coptic (Sahidic)

1 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ ϫⲉ

2 ϣⲁϫⲉ ⲙⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲅϫⲟⲟⲥ ⲛⲁⲩ ϫⲉⲟⲩⲣⲱⲙⲉ ⲉϥϣⲁⲛⲉⲣⲏⲧ ⲛⲟⲩⲉⲣⲏⲧ ⲉⲧⲣⲉϥϯ ⲛⲧⲁⲥⲟⲩ ⲛⲧⲉϥⲯⲩⲭⲏ ⲙⲡϫⲟⲉⲓⲥ

3 ⲧⲧⲓⲙⲏ ⲙⲡϫⲟⲉⲓⲥ ϫⲓⲛⲉϫⲟⲩⲱⲧⲉ ⲛⲣⲟⲙⲧⲉ ϣⲁϩⲣⲁⲓ ⲉⲥⲉⲛⲣⲟⲙⲡⲉ ⲧⲉϥⲧⲓⲙⲏ ⲉⲥⲉϣⲱⲡⲉ ⲛⲧⲁⲉⲓⲟⲩ ⲛⲥⲁⲧⲉⲉⲣⲉ ⲛϩⲁⲧ ⲙⲡϣⲓ ⲉⲧⲟⲩⲁⲁⲃ

4 ⲧⲁⲥⲟⲩ ⲇⲉ ⲛⲧⲉⲥϩⲓⲙⲉ ⲧⲉⲥⲧⲓⲙⲏ ⲉⲥⲉϣⲱⲡⲉ ⲙⲙⲁⲁⲃⲉ ⲛⲥⲁⲧⲉⲉⲣⲉ

5 ⲉϣⲱⲡⲉ ⲇⲉ ϫⲓⲛϯ ⲛⲣⲟⲙⲡⲉ ϣⲁϫⲟⲩⲱⲧⲉ ⲧⲉ ⲧⲧⲓⲙⲏ ⲙⲡϩⲟⲟⲩⲧ ⲉⲥⲉϣⲱⲡⲉ ⲉⲥⲛⲁⲣϫⲟⲩⲱⲧⲉ ⲧⲧⲓⲙⲏ ⲇⲉ ⲛⲧⲉⲥϩⲓⲙⲉ ⲉⲥⲉⲣⲙⲏⲧⲉ ⲛⲥⲁⲧⲉⲉⲣⲉ

6 ϫⲓⲛⲡⲉⲧϩⲛⲟⲩⲉⲃⲟⲧ ⲇⲉ ϣⲁϯ ⲛⲣⲟⲙⲡⲉ ⲧⲧⲓⲙⲏ ⲙⲡϩⲟⲟⲩⲧ ⲉⲥⲉϣⲱⲡⲉ ⲉⲥⲛⲁⲣϯ ⲛⲥⲁⲧⲉⲉⲣⲉ ⲛϩⲁⲧ ⲧⲧⲓⲙⲏ ⲇⲉ ⲛⲧⲉⲥϩⲓⲙⲉ ⲉⲥⲛⲁⲣϣⲟⲙⲧⲉ ⲛⲥⲁⲧⲉⲉⲣⲉ ⲛϩⲁⲧ

7 ⲉϣⲱⲡⲉ ⲇⲉ ϫⲓⲛⲥⲉⲛⲣⲟⲙⲡⲉ ⲉⲧⲡⲉ ⲉϣⲱⲡⲉ ⲙⲉⲛ ⲟⲩϩⲟⲟⲩⲧ ⲡⲉ ⲧⲉϥⲧⲓⲙⲏ ⲉⲥⲉⲣⲙⲛⲧⲏ ⲛⲥⲁⲧⲉⲉⲣⲉ ⲛϩⲁⲧ ⲉϣⲱⲡⲉ ⲇⲉ ⲟⲩⲥϩⲓⲙⲉ ⲧⲉ ⲉⲥⲉⲣⲙⲏⲧⲉ ⲛⲥⲁⲧⲉⲉⲣⲉ

8 ⲉϣⲱⲡⲉ ⲇⲉ ⲉϥⲑⲃⲃⲓⲏⲩ ⲏ ⲉϥϣⲁⲁⲧ ⲛⲧⲉϥⲧⲓⲙⲏ ⲉϥⲉⲁϩⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲙⲡⲟⲩⲏⲏⲃ ⲛⲧⲉⲡⲟⲩⲏⲏⲃ ⲥⲩⲛⲧⲓⲙⲁⲍⲉ ⲙⲙⲟϥ

9 ⲉϣⲱⲡⲉ ⲇⲉ ⲉⲃⲟⲗ ϩⲛⲛⲧⲃⲛⲟⲟⲩⲉ ⲛⲉϣⲁⲩⲧⲁⲗⲟ ⲉϩⲣⲁⲓ ⲉⲃⲟⲗ ⲛϩⲏⲧⲟⲩ ⲛⲛⲇⲱⲣⲟⲛ ⲙⲡϫⲟⲉⲓⲥ ⲡⲉⲧⲛⲁϯ ⲇⲉ ⲉⲃⲟⲗ ϩⲛⲛⲁⲓ ⲙⲡϫⲟⲉⲓⲥ ⲉϥⲉϣⲱⲡⲉ ⲉϥⲟⲩⲁⲁⲃ

10 ⲛⲛⲉⲕϣⲓⲃⲉ ⲉⲡⲉϥⲙⲁ ⲙⲡⲡⲉⲧⲛⲁⲛⲟⲩϥ ϩⲁⲡⲉⲧϩⲟⲟⲩ ⲟⲩⲇⲉ ⲡⲉⲧϩⲟⲟⲩ ϩⲁⲡⲉⲧⲛⲁⲛⲟⲩϥ ⲉϣⲱⲡⲉ ϩⲛⲟⲩϣⲓⲃⲉ ⲉϥϣⲁⲛϣⲓⲃⲉ ⲙⲙⲟϥ ⲛⲟⲩⲧⲃⲛⲏ ϩⲁⲟⲩⲧⲃⲛⲏ ⲛⲧⲟϥ ⲡⲧⲃⲛⲏ ⲁⲩⲱ ⲧⲉϥϣⲃⲃⲓⲱ ⲉⲩⲉϣⲱⲡⲉ ⲉⲩⲟⲩⲁⲁⲃ

11 ⲉϣⲱⲡⲉ ⲇⲉ ⲧⲃⲛⲏ ⲛⲓⲙ ⲛⲁⲕⲁⲑⲁⲣⲧⲟⲛ ⲛⲁⲓ ⲉⲧⲉⲙⲉⲩⲧⲁⲗⲉⲇⲱⲣⲟⲛ ⲉϩⲣⲁⲓ ⲙⲡϫⲟⲉⲓⲥ ⲉⲃⲟⲗ ⲛϩⲏⲧⲟⲩ ⲉϥⲉⲧⲁϩⲟ ⲉⲣⲁⲧϥ ⲙⲡⲧⲃⲛⲏ ⲙⲡⲉⲙⲧⲟ ⲉⲃⲟⲗ ⲙⲡⲟⲩⲏⲏⲃ

12 ⲁⲩⲱ ⲉⲣⲉⲡⲟⲩⲏⲏⲃ ⲥⲩⲛⲧⲓⲙⲁⲍⲉ ⲙⲙⲟϥ ⲉϥⲉϯ ⲛⲧⲉϥⲧⲓⲙⲏ ϩⲁⲛⲁⲓ

13 ϩⲛⲟⲩⲥⲱⲧⲉ ⲇⲉ ⲉϥϣⲁⲛⲥⲱⲧⲉ ⲙⲙⲟϥ ⲉϥⲉⲟⲩⲱϩ ⲙⲡⲓⲟⲩⲱⲛ ⲉϯⲟⲩ ⲉϫⲛⲧⲉϥⲧⲓⲙⲏ

14 ⲁⲩⲱ ⲡⲣⲱⲙⲉ ⲉⲧⲛⲁⲧⲃⲃⲟ ⲙⲡⲉϥⲏⲓ ⲧⲣⲉϥϣⲱⲡⲉ ⲉϥⲟⲩⲁⲁⲃ ⲙⲡϫⲟⲉⲓⲥ ⲉⲣⲉⲡⲟⲩⲏⲏⲃ ⲥⲩⲛⲧⲓⲙⲁⲍⲉ ⲙⲙⲟϥ ϩⲛⲧⲙⲏⲧⲉ ⲙⲡⲡⲉⲧⲛⲁⲛⲟⲩϥ ⲁⲩⲱ ϩⲛⲧⲙⲏⲧⲉ ⲙⲡⲡⲉⲧϩⲟⲟⲩ ⲕⲁⲧⲁⲧϩⲉ ⲉⲧⲉⲣⲉⲡⲟⲩⲏⲏⲃ ⲛⲁϯⲧⲓⲙⲏ ⲉⲣⲟϥ ⲉⲩⲉⲧⲁϩⲟϥ ⲉⲣⲁⲧϥ ϩⲓⲛⲁⲓ

15 ⲉⲣϣⲁⲛⲡⲉⲛⲧⲁϥⲧⲃⲃⲟ ⲇⲉ ϯⲥⲱⲧⲉ ⲙⲡⲉϥⲏⲓ ⲉϥⲉⲟⲩⲱϩ ⲉϫⲱϥ ⲙⲡⲟⲩⲱⲛ ⲉϯⲟⲩ ⲙⲡϩⲁⲧ ⲛⲧⲉϥⲧⲓⲙⲏ ⲛϥϣⲱⲡⲉ ⲛⲁϥ

16 ⲉⲣϣⲁⲛⲡⲣⲱⲙⲉ ⲇⲉ ⲉⲣⲏⲧ ⲙⲡϫⲟⲉⲓⲥ ⲉⲃⲟⲗ ϩⲛⲧⲥⲱϣⲉ ⲛⲧⲉϥⲕⲗⲏⲣⲟⲛⲟⲙⲓⲁ ⲧⲧⲓⲙⲏ ⲉⲥⲉϣⲱⲡⲉ ⲕⲁⲧⲁⲡⲉⲥϭⲣⲟϭ ⲡϣⲓ ⲛⲉⲓⲱⲧ ϩⲁⲧⲁⲉⲓⲟⲩ ⲛⲥⲁⲧⲉⲉⲣⲉ ⲛϩⲁⲧ

17 ⲉϣⲱⲡⲉ ⲇⲉ ϫⲓⲛⲧⲉⲣⲟⲙⲡⲉ ⲙⲡⲕⲱ ⲉⲃⲟⲗ ⲉϥϣⲁⲛⲧⲃⲃⲟ ⲛⲧⲉϥⲥⲱϣⲉ ⲉϥⲉⲥⲙⲛⲧⲥ ⲕⲁⲧⲁⲧⲉϥⲧⲓⲙⲏ

18 ⲉϣⲱⲡⲉ ⲇⲉ ⲛϩⲁⲉ ⲙⲛⲛⲥⲁⲡⲕⲱ ⲉⲃⲟⲗ ⲉϥϣⲁⲛⲧⲃⲃⲟ ⲛⲧⲉϥⲥⲱϣⲉ ⲕⲁⲧⲁⲧⲉϥⲧⲓⲙⲏ ⲉⲣⲉⲡⲟⲩⲏⲏⲃ ⲱⲡ ⲉⲣⲟϥ ⲙⲡⲉϥϩⲁⲧ ⲉⲡⲕⲉⲥⲉⲉⲡⲉ ⲛⲣⲟⲙⲡⲉ ϣⲁϩⲣⲁⲓ ⲉⲧⲉⲣⲟⲙⲡⲉ ⲙⲡⲕⲱ ⲉⲃⲟⲗ ⲁⲩⲱ ⲉϥⲉϭⲱϫⲃ ⲉⲃⲟⲗ ϩⲛⲧⲉϥⲧⲓⲙⲏ

19 ϩⲛⲟⲩⲥⲱⲧⲉ ⲇⲉ ⲉϥϣⲁⲛⲥⲱⲧⲉ ⲛⲧⲉϥⲥⲱϣⲉ ⲛϭⲓⲡⲉⲛⲧⲁϥⲧⲃⲃⲟϥ ⲉϥⲉⲡⲣⲟⲥⲧⲏⲑⲉⲓ ⲙⲡⲟⲩⲛⲛϯⲟⲩ ⲙⲡϩⲁⲧ ⲉϫⲛⲧⲉϥⲧⲓⲙⲏ ⲛϥϣⲱⲡⲉ ⲛⲁϥ

20 ⲉϥⲧⲙϯⲥⲱⲧⲉ ⲇⲉ ⲛⲧⲉϥⲥⲱϣⲉ ⲁⲗⲗⲁ ⲛϥϯⲧⲥⲱϣⲉ ⲉⲃⲟⲗ ⲛⲕⲉⲣⲱⲙⲉ ⲛⲛⲉϥⲕⲟⲧϥ ⲉϯⲥⲱⲧⲉ ⲙⲙⲟⲥ

21 ⲁⲗⲗⲁ ⲧⲥⲱϣⲉ ⲉⲣϣⲁⲛⲧⲉⲣⲟⲙⲡⲉ ⲙⲡⲕⲱ ⲉⲃⲟⲗ ⲉⲓ ⲉⲥⲉϣⲱⲡⲉ ⲉⲥⲟⲩⲁⲁⲃ ⲙⲡϫⲟⲉⲓⲥ ⲛⲧϩⲉ ⲙⲡⲕⲁϩ ⲉⲛⲧⲁⲩⲡⲟⲣϫϥ ⲉⲃⲟⲗ ⲛⲥⲱⲡ ⲉⲡⲟⲩⲏⲏⲃ ⲉⲧⲣⲉϥⲣϫⲟⲉⲓⲥ ⲉϫⲱⲥ

22 ⲉϣⲱⲡⲉ ⲉⲃⲟⲗ ϩⲛⲧⲥⲱϣⲉ ⲉⲛⲧⲁϥⲧⲟⲟⲩⲥ ⲉⲛⲟⲩⲉⲃⲟⲗ ⲁⲛ ⲧⲉ ϩⲛⲧⲥⲱϣⲉ ⲛⲧⲉϥⲕⲗⲏⲣⲟⲛⲟⲙⲓⲁ ⲉϥϣⲁⲛⲉⲣⲏⲧ ⲙⲡϫⲟⲉⲓⲥ

23 ⲉⲣⲉⲡⲟⲩⲏⲏⲃ ⲱⲡ ⲉⲣⲟϥ ⲙⲡⲧⲉⲗⲟⲥ ⲛⲧⲧⲓⲙⲏ ϣⲁϩⲣⲁⲓ ⲉⲧⲉⲣⲟⲙⲡⲉ ⲙⲡⲕⲱ ⲉⲃⲟⲗ ⲛϥϯ ⲛⲧⲧⲓⲙⲏ ⲙⲡⲉϩⲟⲟⲩ ⲉⲧⲙⲙⲁⲩ ⲙⲡϫⲟⲉⲓⲥ ⲉⲥⲟⲩⲁⲁⲃ

24 ⲁⲩⲱ ϩⲛⲧⲉⲣⲟⲙⲡⲉ ⲙⲡⲕⲱ ⲉⲃⲟⲗ ⲉϥⲉϯ ⲛⲧⲥⲱϣⲉ ⲙⲡⲣⲱⲙⲉ ⲙⲡⲉⲛⲧⲁϥⲧⲟⲟⲩⲥ ⲛⲧⲟⲟⲧϥ ⲡⲉⲧⲉⲣⲉⲡⲕⲁϩ ⲛⲧⲉϥⲕⲗⲏⲣⲟⲛⲟⲙⲓⲁ ϩⲓⲧⲟⲩⲱϥ

25 ⲁⲩⲱ ⲧⲓⲙⲏ ⲛⲓⲙ ⲙⲡⲉⲧⲛⲁϣⲱⲡⲉ ⲛⲁϥ ⲧⲥⲁⲧⲉⲉⲣⲉ ⲉⲥⲉϣⲱⲡⲉ ⲛϫⲟⲩⲱⲧ ⲛϩⲟⲃⲟⲗⲟⲥ ⲛⲛϣⲓ ⲉⲧⲟⲩⲁⲁⲃ

26 ⲁⲩⲱ ϣⲣⲡⲙⲓⲥⲉ ⲛⲓⲙ ⲉⲧⲛⲁϣⲱⲡⲉ ⲛⲛⲉⲕⲧⲃⲛⲟⲟⲩⲉ ⲉϥⲉϣⲱⲡⲉ ⲙⲡϫⲟⲉⲓⲥ ⲁⲩⲱ ⲛⲛⲉⲗⲁⲁⲩ ⲧⲃⲃⲟϥ ⲉϣⲱⲡⲉ ⲟⲩⲙⲁⲥⲉ ⲡⲉ ⲉϣⲱⲡⲉ ⲟⲩⲉⲥⲟⲟⲩ ⲡⲉ ⲉϥⲉϣⲱⲡⲉ ⲙⲡϫⲟⲉⲓⲥ

27 ⲉϣⲱⲡⲉ ⲇⲉ ⲉⲃⲟⲗ ϩⲛⲛⲧⲃⲛⲟⲟⲩⲉ ⲉⲧϫⲁϩⲙ ⲉϥⲉϣⲃⲧϥ ⲕⲁⲧⲁⲧⲉϥⲧⲓⲙⲏ ⲁⲩⲱ ⲉϥⲉⲟⲩⲱϩ ⲙⲡⲟⲩⲱⲛ ⲉϯⲟⲩ ⲉϫⲱϥ ⲛϥϣⲱⲡⲉ ⲛⲁϥ ⲉϥⲧⲙⲥⲟⲧϥ ⲇⲉ ⲉⲩⲉⲧⲁⲁϥ ⲉⲃⲟⲗ ⲕⲁⲧⲁⲡⲙⲡϣⲁ ⲛⲧⲉϥⲧⲓⲙⲏ

28 ⲁⲛⲁⲑⲉⲙⲁ ⲇⲉ ⲛⲓⲙ ⲉⲣⲉⲡⲣⲱⲙⲉ ⲛⲁⲧⲁⲁϥ ⲉⲛⲉⲣⲏⲧ ⲙⲡϫⲟⲉⲓⲥ ⲉⲃⲟⲗ ϩⲛⲛⲕⲁ ⲛⲓⲙ ⲉⲧϣⲟⲟⲡ ⲛⲁϥ ϫⲓⲛⲉⲡⲣⲱⲙⲉ ϣⲁⲡⲧⲃⲛⲏ ⲁⲩⲱ ϫⲓⲛⲉⲧⲥⲱϣⲉ ⲛⲧⲉϥⲕⲗⲏⲣⲟⲛⲟⲙⲓⲁ ⲛⲛⲉϥⲧⲁⲁⲩ ⲉⲃⲟⲗ ⲟⲩⲇⲉ ⲛⲛⲉϥⲥⲱⲧⲉ ⲙⲙⲟⲟⲩ ⲁⲛⲁⲑⲉⲙⲁ ⲛⲓⲙ ⲉⲩⲉϣⲱⲡⲉ ⲉⲩⲟⲩⲁⲁⲃ ⲛⲛⲉⲧⲟⲩⲁⲁⲃ ⲙⲡϫⲟⲉⲓⲥ

29 ⲁⲩⲱ ⲛⲕⲁ ⲛⲓⲙ ⲉⲧⲉⲣⲉⲛⲣⲱⲙⲉ ⲛⲁⲧⲁⲗⲟϥ ⲉϩⲣⲁⲓ ⲛⲛⲉⲩⲥⲱⲧⲉ ⲙⲙⲟϥ ⲁⲗⲗⲁ ϩⲛⲟⲩⲙⲟⲩ ⲉϥⲉⲙⲟⲩ

30 ⲣⲉⲙⲏⲧ ⲛⲓⲙ ⲛⲧⲉⲡⲕⲁϩ ⲉⲃⲟⲗ ϩⲙⲡⲉϭⲣⲟϭ ⲙⲡⲕⲁϩ ⲁⲩⲱ ⲉⲃⲟⲗ ϩⲙⲡⲕⲁⲣⲡⲟⲥ ⲙⲡϣⲉ ⲛⲁⲡϫⲟⲉⲓⲥ ⲛⲉ ⲁⲩⲱ ⲉⲩⲉϣⲱⲡⲉ ⲉⲩⲟⲩⲁⲁⲃ ⲙⲡϫⲟⲉⲓⲥ

31 ⲉϣⲱⲡⲉ ⲇⲉ ϩⲛⲟⲩⲥⲱⲧⲉ ⲉⲣϣⲁⲛⲡⲣⲱⲙⲉ ⲥⲱⲧⲉ ⲙⲡⲉϥⲣⲉⲙⲏⲧ ⲡⲉϥⲟⲩⲱⲛ ⲉϯⲟⲩ ⲉϥⲉⲟⲩⲁϩϥ ⲉϫⲱϥ ⲛϥϣⲱⲡⲉ ⲛⲁϥ

32 ⲁⲩⲱ ⲣⲉⲙⲏⲧ ⲛⲓⲙ ⲛⲛⲉϩⲟⲟⲩ ⲙⲛⲛⲉⲥⲟⲟⲩ ⲁⲩⲱ ⲛⲕⲁ ⲛⲓⲙ ⲉⲧⲛⲁⲉⲓ ϩⲛⲧⲏⲡⲉ ϩⲁⲡϭⲉⲣⲱⲃ ⲡⲣⲉⲙⲏⲧ ⲉϥⲉϣⲱⲡⲉ ⲉϥⲟⲩⲁⲁⲃ ⲙⲡϫⲟⲉⲓⲥ

33 ⲛⲛⲉⲕϣⲃⲧⲡⲉⲧⲛⲁⲛⲟⲩϥ ϩⲁⲡⲉⲧϩⲟⲟⲩ ϩⲛⲟⲩϣⲓⲃⲉ ⲇⲉ ⲉⲕϣⲁⲛϣⲓⲃⲉ ⲙⲙⲟϥ ⲛⲧⲟϥ ⲁⲩⲱ ⲧⲉϥϣⲃⲃⲓⲱ ⲉϥⲉϣⲱⲡⲉ ⲉⲩⲟⲩⲁⲁⲃ ⲛⲛⲉⲩⲥⲱⲧⲉ ⲙⲙⲟϥ

34 ⲛⲁⲓ ⲛⲉ ⲛⲉⲛⲧⲟⲗⲏ ⲛⲧⲁⲡϫⲟⲉⲓⲥ ϩⲱⲛ ⲙⲙⲟⲟⲩ ⲉⲧⲟⲟⲧϥ ⲙⲙⲱⲩⲥⲏⲥ ϩⲙⲡⲧⲟⲟⲩ ⲛⲥⲓⲛⲁ ⲉⲧⲁⲩⲟⲟⲩ ⲉⲛϣⲏⲣⲉ ⲙⲡⲓⲥⲣⲁⲏⲗ