Leviticus 17 — Coptic (Sahidic)

1 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ ⲛⲁϥ ϫⲉ

2 ϣⲁϫⲉ ⲙⲛⲁⲁⲣⲱⲛ ⲁⲩⲱ ⲙⲛⲛⲉϥϣⲏⲣⲉ ⲁⲩⲱ ⲙⲛⲛϣⲏⲣⲉ ⲧⲏⲣⲟⲩ ⲙⲡⲓⲥⲣⲁⲏⲗ ⲛⲅϫⲟⲟⲥ ⲛⲁⲩ ϫⲉⲡⲁⲓ ⲡⲉ ⲡϣⲁϫⲉ ⲉⲛⲧⲁⲡϫⲟⲉⲓⲥ ϩⲱⲛ ⲉⲧⲃⲏⲏⲧϥ ⲉϥϫⲱ ⲙⲙⲟⲥ ϫⲉ

3 ⲡⲣⲱⲙⲉ ⲡⲣⲱⲙⲉ ϩⲛⲛϣⲏⲣⲉ ⲙⲡⲓⲥⲣⲁⲏⲗ ⲏ ϩⲛⲛⲉⲡⲣⲟⲥⲏⲗⲩⲧⲟⲥ ⲧⲉⲧⲛⲁϣⲱⲱⲧ ⲛⲟⲩⲙⲁⲥⲉ ⲏ ⲟⲩⲉⲥⲟⲟⲩ ⲏ ⲟⲩⲃⲁⲁⲙⲡⲉ ϩⲛⲧⲡⲁⲣⲉⲙⲃⲟⲗⲏ ⲁⲩⲱ ⲡⲉⲧⲛⲁϣⲱⲱⲧ ϩⲛⲧⲡⲁⲣⲉⲙⲃⲟⲗⲏ

4 ⲛϥⲧⲙⲛⲧⲟⲩ ⲉⲣⲙ ⲡⲣⲟ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲉⲧⲣⲉⲩⲧⲁⲗⲟϥ ⲉϩⲣⲁⲓ ⲉⲩϩⲟⲗⲟⲕⲁⲩⲧⲱⲙⲁ ⲛⲟⲩϫⲁⲓ ⲉϥϣⲏⲡ ⲉⲩⲥϯⲛⲟⲩϥⲉ ⲁⲩⲱ ⲡⲉⲧⲛⲁϣⲱⲱⲧ ϩⲓⲃⲟⲗ ⲛϥⲧⲙⲛⲧⲟⲩ ⲉⲣⲙ ⲡⲣⲟ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲉⲧⲁⲗⲉⲡⲇⲱⲣⲟⲛ ⲉϩⲣⲁⲓ ⲉⲡϫⲟⲉⲓⲥ ⲙⲡⲉⲙⲧⲟ ⲉⲃⲟⲗ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲡⲁⲓ ⲉⲩⲉⲟⲡϥ ⲉⲩⲥⲛⲟϥ ⲙⲡⲣⲱⲙⲉ ⲉⲧⲙⲙⲁⲩ ⲟⲩⲥⲛⲟϥ ⲡⲉⲛⲧⲁϥⲡⲁϩⲧϥ ⲉⲃⲟⲗ ⲧⲉⲯⲩⲭⲏ ⲉⲧⲙⲙⲁⲩ ⲉⲩⲉⲃⲟⲧⲥ ⲉⲃⲟⲗ ϩⲙⲡⲉⲥⲗⲁⲟⲥ

5 ϫⲉⲕⲁⲥ ⲛϣⲏⲣⲉ ⲙⲡⲓⲥⲣⲁⲏⲗ ⲉⲩⲉⲉⲓⲛⲉ ⲛⲛⲉⲩⲑⲩⲥⲓⲁ ⲉⲧⲟⲩⲛⲁⲧⲱϣ ⲉⲧⲟⲟⲧⲟⲩ ⲉϣⲁⲁⲧⲟⲩ ϩⲛⲛⲥⲱϣⲉ ⲛⲥⲉⲛⲧⲟⲩ ⲉⲣⲁⲧϥ ⲙⲡϫⲟⲉⲓⲥ ⲉⲣⲙ ⲡⲣⲟ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲉⲣⲁⲧϥ ⲙⲡⲟⲩⲏⲏⲃ ⲛⲥⲉϣⲁⲁⲧⲟⲩ ⲛⲟⲩⲑⲩⲥⲓⲁ ⲛⲟⲩϫⲁⲓ ⲙⲙⲁϩ ⲡϫⲟⲉⲓⲥ

6 ⲁⲩⲱ ⲉⲣⲉⲡⲟⲩⲏⲏⲃ ⲡⲱϩⲧ ⲙⲡⲉϥⲥⲛⲟϥ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϩⲁⲧⲛⲛⲣⲟ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲉϥⲉⲧⲁⲗⲟ ⲉϩⲣⲁⲓ ⲙⲡⲱⲧ ⲉⲩⲥϯⲛⲟⲩϥⲉ ⲙⲙⲁϩ ⲡϫⲟⲉⲓⲥ

7 ⲛⲥⲉⲧⲙⲕⲟⲧⲟⲩ ⲉϣⲱⲱⲧ ⲛⲛⲉⲩⲑⲩⲥⲓⲁ ⲛⲙⲡⲉⲧϣⲟⲩⲉⲓⲧ ⲛⲁⲓ ⲉⲧⲟⲩⲡⲟⲣⲛⲉⲩⲉ ⲛⲙⲙⲁⲩ ⲉⲩⲟⲩⲏϩ ⲛⲥⲱⲟⲩ ⲡⲁⲓ ⲉϥⲉϣⲱⲡⲉ ⲛⲏⲧⲛ ⲉⲩⲛⲟⲙⲓⲙⲟⲛ ϣⲁⲉⲛⲉϩ ⲉⲛⲉⲧⲛⲅⲉⲛⲉⲁ

8 ⲁⲩⲱ ⲉⲕⲉϫⲟⲟⲥ ⲛⲁⲩ ϫⲉⲡⲣⲱⲙⲉ ⲡⲣⲱⲙⲉ ⲉⲃⲟⲗ ϩⲛⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲱ ⲉⲃⲟⲗ ϩⲛⲛϣⲏⲣⲉ ⲛⲛⲉⲡⲣⲟⲥⲏⲗⲩⲧⲟⲥ ⲛⲁⲓ ⲉⲛⲧⲁⲩⲱⲡ ⲉⲣⲱⲧⲛ ⲡⲉⲧⲛⲁⲉⲓⲛⲉ ⲛⲟⲩϩⲟⲗⲟⲕⲁⲩⲧⲱⲙⲁ ⲏ ⲟⲩⲑⲩⲥⲓⲁ

9 ⲛϥⲧⲙⲛⲧϥ ⲉⲣⲙ ⲡⲣⲟ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲉⲧⲁⲗⲟϥ ⲉϩⲣⲁⲓ ⲙⲙⲁϩ ⲡϫⲟⲉⲓⲥ ⲡⲣⲱⲙⲉ ⲉⲧⲙⲙⲁⲩ ⲉⲩⲉⲃⲱⲧⲉ ⲙⲙⲟϥ ⲉⲃⲟⲗ ϩⲙⲡⲉϥⲗⲁⲟⲥ

10 ⲁⲩⲱ ⲡⲣⲱⲙⲉ ⲡⲣⲱⲙⲉ ϩⲛⲛϣⲏⲣⲉ ⲙⲡⲓⲥⲣⲁⲏⲗ ⲏ ϩⲛⲛϣⲏⲣⲉ ⲛⲛⲉⲡⲣⲟⲥⲏⲗⲩⲧⲟⲥ ⲉⲛⲧⲁⲩⲱⲡ ⲉⲣⲱⲧⲛ ⲉϥϣⲁⲛⲟⲩⲉⲙⲗⲁⲁⲩ ⲛⲥⲛⲟϥ ϯⲛⲁⲧⲁϩⲉⲡⲁϩⲟ ⲉⲣⲁⲧϥ ⲉϫⲛⲧⲉⲯⲩⲭⲏ ⲉⲧⲛⲁⲟⲩⲱⲙ ⲙⲡⲉⲥⲛⲟϥ ⲧⲁⲧⲁⲕⲟⲥ ⲉⲃⲟⲗ ϩⲙⲡⲉⲥⲗⲁⲟⲥ

11 ⲧⲉⲯⲩⲭⲏ ⲅⲁⲣ ⲛⲥⲁⲣⲝ ⲛⲓⲙ ⲡⲉ ⲡⲉⲥⲛⲟϥ ⲁⲩⲱ ⲁⲛⲟⲕ ⲁⲓϯ ⲙⲙⲟϥ ⲛⲏⲧⲛ ⲉϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲧⲱⲃϩ ⲉϫⲛⲛⲉⲧⲙⲯⲩⲭⲏ ⲡⲉϥⲥⲛⲟϥ ⲅⲁⲣ ⲉϥⲛⲁⲧⲱⲃϩ ⲛϩⲏⲧϥ ⲉⲡⲙⲁ ⲛⲧⲉⲯⲩⲭⲏ

12 ⲉⲧⲃⲉⲡⲁⲓ ⲁⲓϫⲟⲟⲥ ⲛⲛϣⲏⲣⲉ ⲙⲡⲓⲥⲣⲁⲏⲗ ϫⲉⲯⲩⲭⲏ ⲛⲓⲙ ⲉⲃⲟⲗ ⲛϩⲏⲧⲧⲏⲩⲧⲛ ⲛⲛⲉⲩⲟⲩⲉⲙⲥⲛⲟϥ ⲁⲩⲱ ⲛⲉⲡⲣⲟⲥⲏⲗⲩⲧⲟⲥ ⲙⲛⲡⲉⲛⲧⲁϥⲱⲡ ⲉⲣⲱⲧⲛ ⲛⲛⲉϥⲟⲩⲉⲙⲥⲛⲟϥ

13 ⲁⲩⲱ ⲡⲣⲱⲙⲉ ⲡⲣⲱⲙⲉ ϩⲛⲛϣⲏⲣⲉ ⲙⲡⲓⲥⲣⲁⲏⲗ ⲁⲩⲱ ϩⲛⲛⲉⲡⲣⲟⲥⲏⲗⲩⲧⲟⲥ ⲉⲛⲧⲁⲩⲱⲡ ⲉⲣⲱⲧⲛ ⲧⲉⲧⲛⲁϭⲱⲣϭ ⲉϭⲱⲡⲉ ⲛⲟⲩⲑⲏⲣⲓⲟⲛ ⲏ ⲟⲩϩⲁⲗⲏⲧ ⲉϣⲁⲩⲟⲩⲟⲙϥ ⲉϥⲉⲡⲱϩⲧ ⲉⲃⲟⲗ ⲙⲡⲉϥⲥⲛⲟϥ ⲁⲩⲱ ⲉϥⲉⲥⲉⲕⲕⲁϩ ⲉϫⲱϥ ⲉϩⲟⲃⲥϥ

14 ⲧⲉⲯⲩⲭⲏ ⲅⲁⲣ ⲛⲥⲁⲣⲝ ⲛⲓⲙ ⲡⲉ ⲡⲉϥⲥⲛⲟϥ ⲁⲩⲱ ⲁⲓϫⲟⲟⲥ ⲛⲛϣⲏⲣⲉ ⲙⲡⲓⲥⲣⲁⲏⲗ ϫⲉⲛⲛⲉⲧⲛⲟⲩⲉⲙⲗⲁⲁⲩ ⲛⲥⲛⲟϥ ⲛⲥⲁⲣⲝ ϫⲉⲧⲉⲯⲩⲭⲏ ⲛⲥⲁⲣⲝ ⲛⲓⲙ ⲡⲉ ⲡⲉϥⲥⲛⲟϥ ⲟⲩⲟⲛ ⲛⲓⲙ ⲉⲧⲛⲁⲟⲩⲱⲙ ⲛⲧⲟϥ ⲡⲉⲧⲟⲩⲛⲁⲃⲟⲧϥ ⲉⲃⲟⲗ

15 ⲁⲩⲱ ⲯⲩⲭⲏ ⲛⲓⲙ ⲉⲥⲛⲁⲟⲩⲱⲙ ⲉⲛⲕⲁ ⲉϥⲙⲟⲟⲩⲧ ⲏ ⲡⲉⲛⲧⲁⲟⲩⲑⲏⲣⲓⲟⲛ ⲃⲱⲕ ⲉⲣⲟϥ ϩⲛⲛⲣⲙⲛϯⲙⲉ ⲏ ϩⲛⲛⲉⲡⲣⲟⲥⲏⲗⲩⲧⲟⲥ ⲉϥⲉϣⲱⲙ ⲛⲛⲉϥϩⲟⲓⲧⲉ ⲁⲩⲱ ⲉϥⲉϫⲟⲕⲙⲉϥ ϩⲛⲟⲩⲙⲟⲟⲩ ⲛϥϭⲱ ⲉϥⲟ ⲛⲁⲕⲁⲑⲁⲣⲧⲟⲥ ϣⲁⲡⲛⲁⲩ ⲛⲣⲟⲩϩⲉ ⲁⲩⲱ ⲛϥⲧⲃⲃⲟ

16 ⲉϥⲧⲙϣⲱⲙ ⲇⲉ ⲛⲛⲉϥϩⲟⲓⲧⲉ ⲁⲩⲱ ⲛϥⲧⲙϫⲱⲕⲙ ⲙⲡⲉϥⲥⲱⲙⲁ ϩⲛⲟⲩⲙⲟⲟⲩ ⲉϥⲉϫⲓ ⲛⲧⲉϥⲁⲛⲟⲙⲓⲁ ⲉϫⲱϥ