Leviticus 10 — Coptic (Sahidic)

1 ⲁⲩⲱ ⲡϣⲏⲣⲉ ⲥⲛⲁⲩ ⲛⲁⲁⲣⲱⲛ ⲁⲇⲁⲃ ⲙⲛⲁⲃⲓⲟⲩⲇ ⲁⲡⲟⲩⲁ ⲡⲟⲩⲁ ϫⲓ ⲛⲧⲉϥϣⲟⲩⲣⲏ ⲁⲩⲧⲁⲗⲉϣⲟⲩϩⲏⲛⲉ ⲉϫⲱⲟⲩ ⲁⲩϫⲓ ⲉϩⲟⲩⲛ ⲛⲟⲩⲕⲱϩⲧ ⲛϣⲙⲙⲟ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉⲙⲡⲉⲡϫⲟⲉⲓⲥ ⲟⲩⲉϩⲥⲁϩⲛⲉ ⲛⲁⲩ ⲉⲧⲃⲏⲏⲧϥ

2 ⲁⲩⲱ ⲟⲩⲕⲱϩⲧ ⲁϥⲉⲓ ⲉⲃⲟⲗ ϩⲓⲧⲙⲡϫⲟⲉⲓⲥ ⲁϥⲟⲩⲱⲙ ⲙⲙⲟⲟⲩ ⲁⲩⲱ ⲁⲩⲙⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

3 ⲁⲩⲱ ⲡⲉϫⲉⲙⲱⲩⲥⲏⲥ ⲛⲁⲁⲣⲱⲛ ϫⲉⲡⲁⲓ ⲡⲉ ⲡϣⲁϫⲉ ⲉⲛⲧⲁⲡϫⲟⲉⲓⲥ ϫⲟⲟϥ ⲉϥϫⲱ ⲙⲙⲟⲥ ϫⲉⲛⲉⲧϩⲏⲛ ⲉϩⲟⲩⲛ ⲉⲣⲟⲓ ⲛⲉⲧⲓⲛⲁⲧⲃⲃⲟ ⲛϩⲏⲧⲟⲩ ⲁⲩⲱ ⲛⲧⲁϯⲉⲟⲟⲩ ⲛⲁⲩ ϩⲛⲧⲥⲩⲛⲁⲅⲱⲅⲏ ⲧⲏⲣⲥ ⲁⲩⲱ ⲁⲁⲣⲱⲛ ⲁϥⲙⲕⲁϩ ⲛϩⲏⲧ

4 ⲁⲩⲱ ⲁⲙⲱⲩⲥⲏⲥ ⲙⲟⲩⲧⲉ ⲉⲙⲓⲥⲁⲇⲁⲓ ⲙⲛⲉⲗⲓⲥⲁⲫⲁⲛ ⲛϣⲏⲣⲉ ⲛⲟⲍⲓⲏⲗ ⲛϣⲏⲣⲉ ⲡⲥⲟⲛ ⲙⲡⲉⲓⲱⲧ ⲛⲁⲁⲣⲱⲛ ⲉϥϫⲱ ⲙⲙⲟⲥ ⲛⲁⲩ ϫⲉⲃⲱⲕ ⲛⲧⲉⲧⲛϥⲓ ⲛⲛⲉⲧⲛⲥⲛⲏⲩ ϩⲓϩⲏ ⲛⲛⲉⲧⲟⲩⲁⲁⲃ ⲙⲡⲃⲟⲗ ⲛⲧⲡⲁⲣⲉⲙⲃⲟⲗⲏ

5 ⲁⲩⲱ ⲁⲩⲃⲱⲕ ⲁⲩϥⲓⲧⲟⲩ ϩⲣⲁⲓ ϩⲛⲛⲉⲩϩⲟⲓⲧⲉ ϩⲣⲁⲓ ⲡⲃⲟⲗ ⲧⲡⲁⲣⲉⲙⲃⲟⲗⲏ ⲕⲁⲧⲁⲧϩⲉ ⲉⲛⲧⲁⲡϫⲟⲉⲓⲥ ϫⲟⲟⲥ ⲉⲙⲱⲩⲥⲏⲥ

6 ⲁⲩⲱ ⲙⲱⲩⲥⲏⲥ ⲡⲉϫⲁϥ ⲛⲁⲁⲣⲱⲛ ⲙⲛⲉⲗⲉⲁⲍⲁⲣ ⲙⲛⲓⲑⲁⲙⲁⲣ ⲛⲉϥϣⲏⲣⲉ ⲉⲛⲧⲁⲩⲥⲉⲉⲡⲉ ϫⲉⲧⲉⲧⲛⲁⲡⲉ ⲙⲡⲣϩⲟⲟⲕⲉⲥ ⲟⲩⲇⲉ ⲙⲡⲣϣⲟϥⲥ ⲁⲩⲱ ⲙⲡⲣⲡⲱϩ ⲛⲛⲉⲧⲛϩⲟⲓⲧⲉ ϫⲉⲕⲁⲥ ⲛⲛⲉⲧⲛⲙⲟⲩ ⲛⲧⲉⲟⲩϭⲱⲛⲧ ϣⲱⲡⲉ ⲉϫⲛⲧⲥⲩⲛⲁⲅⲱⲅⲏ ⲧⲏⲣⲥ ⲛⲉⲧⲛⲥⲛⲏⲩ ⲇⲉ ⲉⲧⲉⲡⲏⲓ ⲧⲏⲣϥ ⲡⲉ ⲙⲡⲓⲥⲣⲁⲏⲗ ⲉⲩⲉⲣⲓⲙⲉ ⲉⲡⲣⲱⲕϩ ⲛⲧⲁⲩϣⲱⲡⲉ ⲛϩⲏⲧϥ ϩⲙⲡⲕⲱϩⲧ ⲛⲧⲁⲡϫⲟⲉⲓⲥ ⲣⲟⲕϩⲟⲩ ⲛϩⲏⲧϥ

7 ⲁⲩⲱ ⲛⲛⲧⲉⲧⲛⲣⲡⲃⲟⲗ ⲛⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ϫⲉⲕⲁⲥ ⲛⲛⲉⲧⲛⲙⲟⲩ ⲡⲛⲉϩ ⲅⲁⲣ ⲙⲡⲧⲱϩⲥ ⲡⲉ ⲉⲃⲟⲗ ϩⲓⲧⲙⲡϫⲟⲉⲓⲥ ⲉϥϩⲓϫⲱⲧⲛ ⲁⲩⲱ ⲁⲩⲉⲓⲣⲉ ⲕⲁⲧⲁⲡϣⲁϫⲉ ⲙⲙⲱⲩⲥⲏⲥ

8 ⲁⲩⲱ ⲡϫⲟⲉⲓⲥ ⲁϥϣⲁϫⲉ ⲙⲛⲁⲁⲣⲱⲛ ⲉϥϫⲱ ⲙⲙⲟⲥ ϫⲉ

9 ⲟⲩⲏⲣⲡ ⲙⲛⲟⲩⲥⲓⲕⲉⲣⲁ ⲛⲛⲉⲧⲛⲥⲟⲟϥ ⲛⲧⲟⲕ ⲙⲛⲛⲉⲕϣⲏⲣⲉ ⲉⲧⲛⲙⲙⲁⲕ ⲉⲧⲉⲧⲛϣⲁⲛⲛⲟⲩⲉ ⲉⲃⲱⲕ ⲉϩⲟⲩⲛ ⲉⲧⲉⲥⲕⲏⲛⲏ ⲙⲡⲙⲁⲣⲧⲩⲣⲓⲟⲛ ⲏ ⲉⲧⲉⲧⲛⲁϯ ⲙⲡⲉⲧⲛⲟⲩⲟⲓ ⲉϩⲟⲩⲛ ⲉⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲛⲧⲉⲧⲛⲁⲙⲟⲩ ⲁⲛ ⲡⲁⲓ ⲟⲩⲛⲟⲙⲓⲙⲟⲛ ⲡⲉ ϣⲁⲉⲛⲉϩ ⲉⲛⲉⲧⲛⲅⲉⲛⲉⲁ

10 ⲁⲩⲱ ⲉⲕⲉⲡⲱⲣϫ ϩⲛⲧⲙⲏⲧⲉ ⲛⲛⲉⲧⲟⲩⲁⲁⲃ ⲁⲩⲱ ϩⲛⲧⲙⲏⲧⲉ ⲛⲛⲉⲧⲥⲟⲟϥ ⲁⲩⲱ ϩⲛⲧⲙⲏⲧⲉ ⲛⲛⲉⲧϫⲁϩⲙ ⲁⲩⲱ ϩⲛⲧⲙⲏⲧⲉ ⲛⲛⲉⲧⲧⲃⲃⲏⲩ

11 ⲁⲩⲱ ⲉⲕⲉⲧⲥⲁⲃⲉⲛϣⲏⲣⲉ ⲙⲡⲓⲥⲣⲁⲏⲗ ⲉⲛⲛⲟⲙⲓⲙⲟⲛ ⲧⲏⲣⲟⲩ ⲉⲛⲧⲁⲡϫⲟⲉⲓⲥ ⲧⲁⲩⲟⲟⲩ ⲉⲣⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲙⲱⲩⲥⲏⲥ

12 ⲁⲩⲱ ⲙⲱⲩⲥⲏⲥ ⲡⲉϫⲁϥ ⲛⲁⲁⲣⲱⲛ ⲙⲛⲉⲗⲉⲁⲍⲁⲣ ⲙⲛⲓⲑⲁⲙⲁⲣ ⲛϣⲏⲣⲉ ⲛⲁⲁⲣⲱⲛ ⲉⲛⲧⲁⲩⲥⲉⲉⲡⲉ ⲉⲩϫⲱ ⲙⲙⲟⲥ ⲛⲁⲩ ϫⲉϫⲓ ⲛⲧⲉⲑⲩⲥⲓⲁ ⲉⲛⲧⲁⲥⲥⲉⲉⲡⲉ ⲉⲃⲟⲗ ϩⲛⲛⲉϭⲗⲓⲗ ⲙⲡϫⲟⲉⲓⲥ ⲛⲧⲉⲧⲛⲟⲩⲱⲙ ⲛϩⲉⲛⲁⲧⲑⲁⲃ ϩⲁⲧⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲛⲉⲧⲟⲩⲁⲁⲃ ⲛⲧⲉⲛⲉⲧⲟⲩⲁⲁⲃ ⲛⲉ

13 ⲁⲩⲱ ⲉⲧⲉⲧⲛⲉⲟⲩⲱⲙ ⲙⲙⲟⲥ ϩⲙⲡⲙⲁ ⲉⲧⲟⲩⲁⲁⲃ ⲟⲩⲛⲟⲙⲓⲙⲟⲛ ⲅⲁⲣ ⲛⲁⲕ ⲡⲉ ⲡⲁⲓ ⲁⲩⲱ ⲟⲩⲛⲟⲙⲓⲙⲟⲛ ⲡⲉ ⲛⲛⲉⲕϣⲏⲣⲉ ⲉⲧⲣⲉϥϣⲱⲡⲉ ⲛⲏⲧⲛ ⲉⲃⲟⲗ ϩⲛⲛⲉϭⲗⲓⲗ ⲙⲡϫⲟⲉⲓⲥ ⲧⲁⲓ ⲅⲁⲣ ⲧⲉ ⲧϩⲉ ⲉⲛⲧⲁϥϩⲱⲛ ⲉⲧⲟⲟⲧ

14 ⲁⲩⲱ ⲡⲉⲥⲧⲏⲑⲩⲛⲓⲟⲛ ⲙⲡⲡⲱⲣϫ ⲉⲃⲟⲗ ⲁⲩⲱ ⲡⲉϭⲃⲟⲓ ⲙⲡⲁⲫⲁⲓⲣⲉⲙⲁ ⲉⲧⲉⲧⲛⲉⲟⲩⲟⲙⲟⲩ ϩⲙⲡⲙⲁ ⲉⲧⲟⲩⲁⲁⲃ ⲛⲧⲟⲕ ⲙⲛⲛⲉⲕϣⲏⲣⲉ ⲙⲛⲡⲉⲕⲏⲓ ⲛⲙⲙⲁⲕ ⲟⲩⲛⲟⲙⲓⲙⲟⲛ ⲅⲁⲣ ⲛⲁⲕ ⲡⲉ ⲁⲩⲱ ⲟⲩⲛⲟⲙⲓⲙⲟⲛ ⲡⲉ ⲛⲛⲉⲕϣⲏⲣⲉ ⲛⲧⲁⲩⲧⲁⲁϥ ⲛⲏⲧⲛ ⲉⲃⲟⲗ ϩⲛⲛⲉⲑⲩⲥⲓⲁ ⲙⲡⲟⲩϫⲁⲓ ⲛⲛϣⲏⲣⲉ ⲙⲡⲓⲥⲣⲁⲏⲗ

15 ⲡⲉϭⲃⲟⲓ ⲙⲡⲁⲫⲁⲓⲣⲉⲙⲁ ⲁⲩⲱ ⲡⲉⲥⲧⲏⲑⲩⲛⲓⲟⲛ ⲉⲧⲛⲏϩ ⲉⲃⲟⲗ ⲉϫⲛⲛⲉϭⲗⲓⲗ ⲛⲛⲱⲧ ⲉⲩⲉⲛⲧϥ ⲉⲡⲱⲣϫ ⲉⲃⲟⲗ ⲛⲟⲩⲁⲫⲟⲣⲓⲥⲙⲁ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϫⲉⲉϥⲉϣⲱⲡⲉ ⲛⲁⲕ ⲙⲛⲛⲉⲕϣⲏⲣⲉ ⲙⲛⲛⲉⲕϣⲉⲉⲣⲉ ⲛⲙⲙⲁⲕ ⲉⲩⲛⲟⲙⲓⲙⲟⲛ ϣⲁⲉⲛⲉϩ ⲕⲁⲧⲁⲧϩⲉ ⲉⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲙⲱⲩⲥⲏⲥ

16 ⲁⲩⲱ ⲡⲃⲁⲁⲙⲡϩⲟⲟⲩⲧ ⲉⲧⲃⲉⲛⲟⲃⲉ ϩⲛⲟⲩϣⲓⲛⲉ ⲁⲙⲱⲩⲥⲏⲥ ϣⲓⲛⲉ ⲛⲥⲱϥ ⲡⲁⲓ ⲇⲉ ⲁⲩⲣⲟⲕϩϥ ⲁⲩⲱ ⲙⲱⲩⲥⲏⲥ ⲁϥϭⲱⲛⲧ ⲉⲉⲗⲉⲁⲍⲁⲣ ⲙⲛⲓⲑⲁⲙⲁⲣ ⲛϣⲏⲣⲉ ⲛⲁⲁⲣⲱⲛ ⲉⲛⲧⲁⲩⲥⲉⲉⲡⲉ ⲉϥϫⲱ ⲙⲙⲟⲥ ⲛⲁⲩ ϫⲉ

17 ⲉⲧⲃⲉⲟⲩ ⲙⲡⲉⲧⲛⲟⲩⲱⲙ ⲙⲡⲃⲁⲁⲙⲡⲉ ϩⲁⲛⲟⲃⲉ ϩⲙⲡⲙⲁ ⲉⲧⲟⲩⲁⲁⲃ ϫⲉⲛⲉⲧⲟⲩⲁⲁⲃ ⲛⲉ ⲛⲧⲉⲛⲉⲧⲟⲩⲁⲁⲃ ⲡⲁⲓ ⲁⲡϫⲟⲉⲓⲥ ⲧⲁⲁϥ ⲛⲏⲧⲛ ⲉⲧⲣⲉⲧⲉⲧⲛⲟⲩⲟⲙϥ ϫⲉⲕⲁⲥ ⲉⲧⲉⲧⲛⲉϥⲓ ⲙⲙⲁⲩ ⲙⲡⲛⲟⲃⲉ ⲛⲧⲥⲩⲛⲁⲅⲱⲅⲏ ⲛⲧⲉⲧⲛⲧⲱⲃϩ ⲉϩⲣⲁⲓ ⲉϫⲱⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

18 ⲙⲡⲟⲩϫⲓ ⲅⲁⲣ ⲉⲃⲟⲗ ϩⲙⲡⲉϥⲥⲛⲟϥ ⲉϩⲟⲩⲛ ⲉⲡⲙⲁ ⲉⲧⲟⲩⲁⲁⲃ ⲙⲡⲉϥⲙⲧⲟ ⲉⲃⲟⲗ ⲉⲧⲉⲧⲛⲉⲟⲩⲱⲙ ⲙⲙⲟϥ ⲛϩⲟⲩⲛ ϩⲙⲡⲙⲁ ⲉⲧⲟⲩⲁⲁⲃ ⲕⲁⲧⲁⲧϩⲉ ⲉⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧ

19 ⲁⲩⲱ ⲁⲁⲣⲱⲛ ⲁϥϣⲁϫⲉ ⲙⲛⲙⲱⲩⲥⲏⲥ ⲉϥϫⲱ ⲙⲙⲟⲥ ϫⲉⲉⲛⲉⲙⲡⲟⲟⲩ ⲛⲧⲁⲩⲉⲓⲛⲉ ⲛⲛⲉⲩⲑⲩⲥⲓⲁ ϩⲁⲛⲟⲃⲉ ⲛⲧⲁⲩ ⲙⲛⲛⲉⲩϭⲗⲓⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲁⲛⲁⲓ ϣⲱⲡⲉ ⲙⲙⲟⲓ ⲁⲩⲱ ϯⲛⲁⲟⲩⲱⲙ ⲛⲛⲉⲑⲩⲥⲓⲁ ϩⲁⲡⲛⲟⲃⲉ ⲙⲡϩⲟⲟⲩ ⲙⲏ ⲡⲁⲓ ⲛⲁⲣⲁⲛⲁϥ ⲙⲡϫⲟⲉⲓⲥ

20 ⲁⲩⲱ ⲙⲱⲩⲥⲏⲥ ⲁϥⲥⲱⲧⲙ ⲁϥⲣⲁⲛⲁϥ