Read Letter of Jeremiah 1 side by side with translations · The Final Bible
1 ܡܛܠ ܚ̈ܛܗܐ ܕܚܛܝܬܘܢ ܩܕܡ ܡܪܝܐ ܐܫܬܒܝܬܘܢ ܠܒܒܠ̇ ܡܢ ܢܒܘܟܕܢܨܪ ܡ̇ܠܟܐ ܕܒܒܠ
2 ܡܐ ܕܥܠܬܘܢ ܠܒܒܠ̣ ܬܗܘܘܢ ܬܡ̇ܢ ܫ̈ܢܝܢ ܣܓܝܐ̈ܬܐ̣ ܘܙܒܢܐ ܢܓܝܪܐ̣ ܥܕܡܐ ܠܫܒܥܝܢ ܫ̈ܢܝܢ ܘܡܢ ܒܬܪ ܫܒܥܝܢ ܫ̈ܢܝ̣ܢ ܐܦܩܟܘܢ ܡܢ ܬܡ̇ܢ̣ ܒܫܠܡܐ
3 ܗܫܐ ܕܝܢ ܗܐ ܚ̇ܙܝܢ ܐܢܬܘܢ ܒܒܒܠ̣ ܐ̈ܠܗܐ ܕܣܐܡܐ ܘܕܕܗܒܐ ܘܕܩܝܣܐ̣ ܘܕܟܐܦܐ ܕܡܫܬ̇ܩܠܝܢ ܥܠ ܟܬ̈ܦܬܐ ܘܗ̇ܘܝܢ ܕܚ̈ܠܬܐ ܠܥܡ̈ܡܐ
4 ܐܙܕܗ̇ܪܘ ܗܟܝܠ ܕܠܡܐ ܐܦ ܐܢܬܘܢ ܬܬܕܡ̇ܘܢ ܠܗܘܢ ܠܥܡ̈ܡܐ ܠܐ ܬܕܚܠܘܢ ܡܢܗܘܢ̣ ܘܠܐ ܬܙܘܥܘܢ̇
5 ܟܕ ܬܚܙܘܢ ܟܢ̈ܫܐ ܣܓ̈ܝܐܐ ܩܕܡܝܗܘܢ ܘܒܣܬܪܗܘܢ ܕܣ̇ܓܕܝܢ ܠܗܘܢ ܐܠܐ ܐܡܪܘ ܐܢܬܘܢ ܒܬܪ̈ܥܝܬܟܘܢ̣ ܠܟ ܗ̇ܘ ܡܪܝܐ ܘ̇ܠܐ ܠܡܣܓܕ ܒܠܚܘܕ
6 ܡܛܠ ܕܡܠܐܟܗ ܕܡܪܝܐ̣ ܥܡܟܘܢ ܗܘ ܘܗ̣ܘ ܢܬܒ̣ܥ ܢܦܫ̈ܬܟܘܢ
7 ܠܫܢܐ ܓܝܪ ܐܝܬ ܠܗܘܢ ܕܓܠܝܦ̣ ܒܝܕ ܢܓܪܐ ܘܩܪܝܡܝܢ ܒܕܗܒܐ ܘܒܣܐܡܐ ܘܠܐ ܡܫܟܚܝܢ ܠܡܡܠܠܘ ܡܛܠ ܕܣܪ̈ܝܩܐ ܐܢܘܢ̣ ܘܡ̈ܝܬܐ
8 ܘܐܝܟ ܕܫܦܝܪ ܨܒܬܐ ܠܒܬܘܠܬܐ̣ ܗܟܢܐ ܫܩܠܝܢ ܕܗܒܐ̇
9 ܘܚܫܠܝܢ ܟ̈ܠܝܠܐ ܘܣܝܡܝܢ ܒܪܝܫܐ ܕܐ̈ܠܗܝܗܘܢ ܝܕܝܥܐ ܗܝ ܕܝܢ ܕܡܐ ܕܟܘܡܪ̈ܝܗܘܢ ܒܣ̇ܡܝܢ ܡܪܝܡܝܢ ܕܗܒܐ ܘܣܐܡܐ ܡܢ ܐ̈ܠܗܝܗܘܢ̣ ܘܥܠܝܗܘܢ̣ ܡ̇ܦܩܝܢ
10 ܘܝܗܒܝܢ ܡܢܗ ܡܢ ܥܒ̇ܕܐ ܠܙܢܝ̈ܬܐ ܘܡܨ̇ܒܬܝܢ ܠܗܘܢ ܐܝܟ ܒܢ̈ܝ ܐܢܫܐ ܒ̈ܠܒܘܫܐ̇ ܠܐ̈ܠܗܐ ܕܕܗܒܐ ܘܕܣܐܡܐ ܘܕܩܝܣܐ
11 ܗ̇ܢܘܢ ܕܝ̣ܢ ܠܐ ܡܬܦܪܩܝܢ ܡܢ ܫܘܚܬܐ ܘܡܢ ܚܒ̇ܠܐ ܠܒܝܫܝܢ ܠܒܘܫܐ ܕܐܪܓܘܢܐ̣
12 ܘܡܪܩܝܢ ܐ̈ܦܝܗܘܢ ܡܛܠ ܚܠܐ ܕܣ̇ܠܩ ܥܠܝܗܘܢ ܡܢ ܒܝܬܐ
13 ܘܫܒܛܐ ܐܚܝ̣ܕ ܐܝܟ ܓܒ̇ܪܐ ܕܝ̇ܢܐ ܕܐܬܪܐ ܗܢܐ ܰ ܕܠܐܝܠܝܢ ܕܚ̇ܛܝܢ ܒܗ ܠܡܘܒܕܘ̣ ܠܐ ܡܫܟܚ
14 ܘܐܚܝܕ ܚܪܒܐ ܒܝܡܝܢܗ̣ ܘܢܪܓܐ ܒܣܡܠܗ ܘܢܦܫܗ ܡܢ ܩܪܒܐ ܘܡܢ ܠܣ̈ܛܝܐ̣ ܠܐ ܡܫܟܚ ܠܡܫܘܙܒܘ ܕܡܢ ܗܠܝܢ ܢܬܝܕܥܘܢ̣ ܕܠܐ ܗܘ̣ܘ ܐ̈ܠܗܐ ܠܐ ܬܕܚܠܘܢ ܠܗܘܢ
15 ܐܝܟܢܐ ܓܝܪ ܕܡܐܢܐ ܕܦܚܪܐ ܡܐ ܕܐܬܬ̣ܒܪ ܠܝܬ ܒܗ ܚܫܚܘ̣
16 ܗܟܢܐ ܐܢܘܢ ܐ̈ܠܗܝܗܘܢ ܙܩܝܦܝܢ ܠܗܘܢ ܒܒ̈ܬܐ ܥܝܢ̈ܝܗܘܢ ܡܠܝܢ ܥܦܪܐ̇ ܡܢ ܚܠܐ ܕܪ̈ܓܠܝܗܘ̇ܢ ܕܐܝܠܝܢ ܕܥܐ̇ܠܝܢ ܘܕܢܦܩܝܢ
17 ܘܐܝܟ ܐܢܫ ܕܡܬ̇ܚܝܒ ܡܢ ܡ̇ܠܟܐ̣ ܗܟܢܐ ܡܬܚ̣ܡܝܢ ܕܪ̈ܥ̇ܝܗܘܢ̣ ܐܝܟ ܡܚܝ̈ܒܐ ܠܡܘܬܐ ܒܬ̈ܝܗܘܢ̣ ܡܫܪܪܝܢ ܟܘܡܪ̈ܝܗܘܢ ܘܐܚܕܝܢ ܒܣܘܟܪ̈ܐ ܘܒܡܘ̈ܟܠܐ̣ ܕܠܐ ܢܓܢܒܘܢ ܐܢܘܢ ܠܣ̈ܛܝܐ
18 ܘܫܪ̈ܓܐ ܣ̈ܓܝܐܐ ܡܢܗܪ̈ܝܢ ܠܗܘܢ̣ ܠܐܝܠܝܢ ܕܥܝܢ̈ܝܗܘܢ ܠܐ ܚ̇ܙܝܢ
19 ܐܝܬܝܗܘܢ ܕܝܢ̣ ܐܝܟ ܩܪ̈ܝܬܐ ܕܡܢ ܒܬ̈ܐ ܘܠܒܗܘܢ ܫ̇ܛܐ̣ ܘܛܥ̇ܐ ܘܡܬܚ̇ܒܠܝܢ ܡܢ ܝܕ ܪܚܫܐ ܕܐܪܥܐ ܘܡܬܐܟܠܝܢ ܗ̣ܢܘܢ̣ ܘܠܒ̈ܘܫܝܗܘܢ ܘܠܐ ܝܕܥܝܢ
20 ܕܡܫܚܪ̈ܢ ܐ̈ܦܝܗܘܢ ܘܐܘ̈ܟܡܢ̇ ܡܢ ܬܢܢܐ ܕܣ̇ܠܩ ܡܢ ܒܝܬܐ
21 ܥܠ ܓܘܫܡܗܘܢ ܘܥܠ ܪ̈ܝܫܝܗܘܢ ܝܬܒܝܢ ܦܪ̈ܚܕܘܕܐ̣ ܘܣ̈ܢܘܢܝܬܐ ܘܢܥܒ̈ܐ̣ ܐܟܚܕܐ ܘܐܦ ܓܘܡܪ̈ܪܐ
22 ܕܡܢ ܗܠܝܢ ܬܫܬܘܕܥܘܢ̣ ܕܠܐ ܗܘ̣ܘ ܐ̈ܠܗܐ ܘܠܐ ܬܕܚܠܘܢ ܠܗܘܢ
23 ܕܗܒܐ ܓܝܪ ܕܩܪܝܡ ܥܠܝܗܘܢ ܠܫܘܦܪܐ̣ ܐܢ ܗ̣ܘ ܕܐܢܫ ܠܐ ܢܡܪܩܝܘܗܝ ܡܢ ܫܘܚܬܗ̣ ܠܐ ܡ̇ܒܪܩ ܐܦܠܐ ܟܕ ܡܬܦܫܪܝܢ ܗܘܘ ܡܪܓܫܝܢ ܗܘܘ
24 ܡܛܠ ܕܒܕܡ̈ܝܐ ܣ̈ܓܝܐܐ ܙܒܝܢܝܢ ܘܪܘܚܐ̣ ܠܝܬ ܒܗܘܢ
25 ܥܠ ܟܬ̈ܦܬܐ ܡܫܬܩܠܝ̣ܢ ܡܛܠ ܕܠܐ ܡܗܠܟܝܢ ܘܡܚܘܝܢ ܒܗܬܬܗܘܢ ܠܒܢܝܢ̈ܫܐ ܢܒܗܬܘܢ ܕܝܢ ܐܦ ܡܫ̈ܡܫܢܝܗܘܢ
26 ܡܛܠ ܕܐܢ ܢܦܠܘܢ ܥܠ ܐܪܥܐ̣ ܠܐ ܡܫܟܚܝܢ ܠܡܩܡ ܐܦ ܠܐ ܐܢ ܐܢܫ ܢܙܩܘܦ ܐܢܘܢ ܢܬܬܙܝܥܘܢ ܐܦ ܠܐ ܐܢ ܡ̣ܨܛܠܐ ܡܫܟܚ ܠܡܬܬ̣ܪܨܘ ܐܠܐ ܐܝܟ ܡ̈ܝܬܐ ܣܝܡܝܢ ܠܗܘܢ ܡܐܟ̈ܠܬܐ
27 ܕܒܚ̈ܬܐ ܕܝܢ ܕܡܩܪܒܝܢ ܠܗܘܢ̣ ܟܘܡܪ̈ܝܗܘܢ ܐ̇ܟܠܝܢ ܠܗܝܢ ܘܢܫܝܗܘܢ ܡܬ̈ܠܥܒܢ ܡܢܗܝܢ ܘܡܕܡ ܠܡ̇ܣ̈ܟܢܐ̇ ܘܠܒ̇ܝܫ̈ܐ̣ ܠܐ ܝܗܒܝܢ
28 ܡܢ ܕܒܚ̈ܬܗܘ̇ܢ ܘܐܢܬܬܐ ܒܟܦܣܗ̇ ܘܒܚܝܘܬܗ̇ ܘܒܛܢܦܘܬ̣ܗ̣̇ ܡܬ̇ܩܪܒܐ ܠܗܘܢ ܬܕܥܘܢ ܕܝܢ ܡܢ ܗܠܝ̣ܢ ܕܠܐ ܗܘ̣ܘ ܐ̈ܠܗܐ ܘܠܐ ܬܕܚܠܘܢ ܠܗܘܢ
29 ܐ̇ܝܟܢܐ ܓܝܪ ܢܬܩܪܘܢ ܐ̈ܠܗܐ ܕܗܐ̇ ܢ̣ܫ̈ܐ ܡܬ̈ܩܢܢ ܠܗܘܢ ܠܐ̈ܠܗܐ ܕܕܗܒܐ ܘܕܟܣܦܐ ܘܕܩܝܣܐ
30 ܘܒܡܘܬܒܗܘ̣ܢ ܟܘܡܪ̈ܐ ܡܘܬܒܝܢ ܠܗܘܢ ܘܟܕ ܡܨܪ̈ܝܢ ܢܚ̈ܬܝܗܘܢ ܘܪ̈ܝܫܝܗܘܢ ܓܪ̈ܝܥܝܢ ܘܓܙܝ̈ܙܝܢ ܕܩܢܝ̈ܗܘܢ ܘܓܪ̈ܝܥܝܢ ܘܓܠ̣ܝܢ ܪ̈ܝܫܝܗܘܢ
31 ܢܗ̇ܡܝܢ ܒܩܥܬܐ ܩܕܡ ܐ̈ܠܗܝܗܘܢ̣ ܐܝܟ ܕܐܢܫ̈ܝܢ ܥܠ ܫܪܘܬ ܡ̈ܝܬܐ
32 ܘܡܢ ܠܒ̈ܘܫܝܗܘܢ ܢܣܒܝܢ ܟܘܡܪ̈ܐ̣ ܘܡ̈ܠܒܫܝܢ ܢܫ̈ܝܗܘܢ̣ ܘܒ̈ܢܝܗܘܢ
33 ܐܦܠܐ ܐܢ ܐܢܫ ܢܥܒܕ ܠܗܘܢ ܒܝܫ̣ܬܐ ܐܘ ܛܒܬܐ ܡܫܟܚܝܢ ܕܢܦܪܥܘܢܝܗܝ ܐܦ ܠܐ ܡ̇ܠܟܐ ܡܫܟܚܝܢ ܕܢܩ̣ܝܡܘܢ ܐܘ ܕܢܥܒܪܘܢ
34 ܗܟܢܐ ܐܦ ܠܐ ܥܘܬܪܐ̣ ܐܦ ܠܐ ܟܣܦܐ ܡܫܟܚܝܢ ܠܡܬܠ ܠܐܢܫ ܘܐܢ ܐܢܫ ܢܕ̇ܪ ܠܗܘܢ ܢܕܪܐ ܘܠܐ ܢܦ̣ܪܥܝܘܗܝ̣ ܠܐ ܢܬܒܥܘܢܗ
35 ܠܒܪ ܐܢܫ ܡܢ ܡܘܬܐ̣ ܠܐ ܢܦܪܩܘܢ ܘܠܐ ܠܒܨܝܪܐ ܡܢ ܥܫܝܢܐ ܢܦܨܘܢ
36 ܘܠܓܒܪܐ ܣܡܝܐ̣ ܠܐ ܡܫܟܚܝܢ ܠܡܬܠ ܠܗ ܚܙܬܐ ܘܠܒܝ̇ܫܐ ܡܢ ܐܢܢܩܐ̣ ܠܐ ܢܦܨܘܢ
37 ܘܥܠ ܐܪܡܠܬܐ̣ ܠܐ ܡܪܚܡܝܢ ܘܠܐ ܠܝܬ̈ܡܐ ܡܛܐ̈ܒܝܢ ܘܠܐ ܠܡ̈ܣܟܢܐ ܡܦܪܢܣܝܢ
38 ܠܟܐ̈ܦܐ ܕܫܕܝܢ ܒܛܘܪ̈ܐ ܕܡ̈ܝܢ ܐ̈ܠܗܐ̇ ܕܩܝܣܐ ܘܕܣܐܡܐ ܘܕܕܗܒܐ ܡܫܡܫ̈ܢܝܗܘܢ ܕܝ̣ܢ ܢܒܗܬܘܢ ܕܝܕܥܝܢ ܕܚܫܚܘ̣ ܠܝܬ ܒܗܘܢ ܘܡܛܥܝܢ ܒܗܘܢ ܠܒܢ̈ܝ ܐܢܫܐ
39 ܐ̇ܝܟܢܐ ܢܬܝܕܥܘܢ ܕܐ̈ܠܗܐ ܐܢܘܢ̇
40 ܕܗܐ ܐܦ ܟ̈ܠܕܝܐ ܫܝܛܝܢ ܠܗܘܢ ܕܡܐ ܕܚܙܘ ܦܐܩܐ ܕܠܐ ܡܫܟܚ ܠܡܡܠܠܘ̣ ܡܩ̇ܪܒܝܢ ܠܗ ܠܘܬ ܐ̈ܦܝ ܬܪܥܐ ܘܒ̇ܥܐ ܕܢܡܠܠ̣ ܘܢܩ̣ܪܐ ܐܝܟ ܕܡܫܟܚ ܠܡܕܥ
41 ܘܠܐ ܡܫܟܚܝܢ ܗ̣ܢܘܢ ܕܢܕܥܘܢ ܠܡܫܒ̣ܩ ܐܢܘܢ ܣܘܟܠܐ̣ ܓܝܪ ܠܝܬ ܒܗܘܢ
42 ܢܫ̈ܐ ܕܝܢ ܡܨ̈ܒܬܢ ܒܚ̈ܒܠܐ̣ ܘܝܬ̈ܒܢ ܒܐܘܪ̈ܚܬܐ ܘܣ̈ܝܡܢ ܒܣ̈ܡܐ ܦܐ̈ܝܐ
43 ܡܐ ܕܝܢ ܕܐܬܢܓܕܬ ܚܕܐ ܡܢܗܝܢ ܡܢ ܐܢܫ ܡܢ ܥܒܘܪ̈ܐ̇ ܘܬܫ̣ܟܒ ܥܡܗ̣ ܡܚܣܕܐ ܠܚܒܪܬܗ̣̇ ܘܐܡܪܐ ܕܠܐ ܐܫܘܝܬܟܝ ܐܟܘܬܝ ܐܦܠܐ ܚܒܠܗ̣̇ ܠܐ ܐܬܦ̣ܣܩ
44 ܟܠ ܡܕܡ ܕܝܢ ܕܡܬܥ̣ܒܕ ܠܗܘܢ̣ ܣܪܝܩ ܗܘ ܐ̇ܝܟܢܐ ܗܟܝܠ ܢܣܗܕܘܢ ܥܠܝܗܘܢ ܕܐ̈ܠܗܐ ܐܢܘܢ ܐܘ ܐ̇ܝܟܢܐ ܢܬܩ̣ܪܘܢ ܐ̈ܠܗܐ
45 ܕܒܐ̈ܝܕܝ ܢܓܪܐ ܘܩܝܢܝܐ ܐܬܥܒ̣ܕܘ ܘܠܐ ܡܕܡ ܐܢܘܢ ܘܠܐ ܗܘܐ ܐܝܟ ܕܨ̇ܒܝܢ ܐܬܥܒܕܘ ܐܠܐ̣ ܐܝܟ ܕܨ̇ܒܝܢ ܐܘܡܢܝ̈ܗܘܢ ܥܒ̇ܕܝܢ ܠܗܘܢ
46 ܐܢ ܗܢ̣ܘܢ ܕܝܢ ܐܘܡ̈ܢܝܗܘܢ ܠܐ ܡܟܬܪ̈ܝܢ ܙܒܢܐ ܣܓܝܐܐ̣
47 ܐ̇ܝܟܢܐ ܗܟܝܠ ܡܫܟܚܐ ܕܗ̇ܢܘܢ ܕܥܒ̣ܕܘ ܕܢܗܘܘܢ ܐ̈ܠܗܐ ܫܒܩܘ ܓܝܪ ܕܓܠܘܬܐ̣ ܘܚܣܕܐ ܠ̣ܐܝܠܝܢ ܕܡܬܝܠܕܝܢ
48 ܡܐ ܓܝܪ ܕܢܐܬܐ ܥܠܝܗܘܢ ܩܪܒܐ ܘܒܝܫ̣ܬܐ̣ ܡܬܪܥܝܢ ܟܘܡܪ̈ܝܗܘܢ ܒܝ̈ܢܝܗܘܢ ܠܢܦܫܗܘܢ̣ ܕܐܝܟܐ ܢܛܫ̣ܘܢ ܐܢܘܢ ܥܡܗܘܢ
49 ܐ̇ܝܟܢܐ ܗܟܝܠ ܠܐ ܘ̇ܠܐ ܠܡܕܥ ܕܠܐ ܗܘ̣ܘ ܐ̈ܠܗܐ ܐܠܐ̣ ܥܒܕ ܐ̈ܝܕܝܐ ܕܐܢܫܐ ܘܠܐ ܡܫܘܙܒܝܢ ܢܦܫܗܘܢ ܡܢ ܩܪܒܐ̣ ܐܦ ܠܐ ܡܢ ܒܝܫ̣ܬܐ
50 ܥܒܝ̈ܕܐ ܓܝܪ ܕܩܝܣܐ ܘܕܟܣܦܐ ܘܕܕܗܒܐ̣ ܢܬܝܕܥܘܢ ܠܐܚܪܝܬܐ ܠܟܠܗܘܢ ܥܡ̈ܡܐ̣ ܕܕܓܠܘܬܐ ܐܢܘܢ ܠܡ̇ܠܟܐ ܕܝ̣ܢ ܓܠܝܐܝܬ ܢܬܚܙܐ ܕܠܐ ܗܘ̣ܘ ܐ̈ܠܗܐ ܐܠܐ̣ ܥܒ̇ܕ ܐ̈ܝܕܝܐ ܕ̇ܒܢ̈ܝ ܐܢܫܐ ܘܡܕܡ ܡܢ ܥ̇ܒ̈ܕܐ ܕܐܠܗܐ̣ ܠܝܬ ܒܗܘܢ
51 ܗܐ ܠܟܠ ܐܢܫ ܝܕܝܥܐ ܗܝ ܗܕܐ̣ ܕܠܐ ܗܘ̣ܘ ܐ̈ܠܗܐ
52 ܡܛܠ ܕܡ̇ܠܟܐ̣ ܥܠ ܐܪܥܐ̣ ܠܐ ܢܩܝܡܘܢ ܘܠܐ ܢܒ̇ܐܫܘܢ ܘܢܦܪܩܘܢ ܡܫܟܚܝܢ ܘܡܛܪܐ ܠܒܢ̈ܝ ܐܢܫܐ̣ ܠܐ ܢܬܠܘܢ
53 ܕܝ̣ܢܐ ܕܝܢ ܠܐ ܢܕܘܢܘܢ ܐܦ ܠܐ ܠܢܦܫܗܘܢ ܐܦ ܠܐ ܠܛܠܝܡܐ ܢܫܟܚܘܢ ܠܡܦܨܝܘ ܡܢ ܡ̇ܢ ܕܥܫܝܢ ܡܢܗ ܡܛܠ ܕܠܐ ܡܫܟܚܝܢ
54 ܘܠܐ ܐܝܟ ܢܥ̈ܒܐ ܒܝܬ ܫܡܝܐ ܠܐܪܥܐ ܦܪ̈ܚܝܢ ܒܐܐܪ ܗܐ ܓܝܪ ܡܐ ܕܢܦܠ̣ܬ ܢܘܪܐ ܒ̈ܒܬܐ ܕܐ̈ܠܗܐ̣ ܟܘܡܪ̈ܝܗܘܢ ܥܪ̈ܩܝܢ ܢܦܩ̇ܝܢ ܠܒܪ̣ ܘܡܫܘܙܒܝܢ ܢܦܫܗܘܢ ܗ̣ܢܘܢ ܕܝܢ ܐܝܟ ܩܪ̈ܝܬܐ̣ ܒܡܨܥܬܐ ܝܩܕܝܢ
55 ܠܘܩܒܠ ܡ̇ܠܟܐ ܕܝܢ ܐܘ ܩܕܡ ܩܪܒܬܢܐ̣ ܠܐ ܢܩܘܡܘܢ
56 ܐ̇ܝܟܢܐ ܗܟܝܠ ܢܬܝܕܥܘܢ ܐܘ ܢܬܗܝܡܢܘܢ ܕܐ̈ܠܗܐ ܐܢܘܢ̇ ܕܗܐ ܐܦ ܠܐ ܡܢ ܓܢܒ̈ܐ ܐܦ ܠܐ ܡܢ ܠܣ̈ܛܝܐ ܡܨܝܢ ܕܢܫܘܙܒܘܢ ܢܦܫܗܘܢ ܐ̈ܠܗܐ ܕܩܝܣܐ ܘܕܟܣܦܐ ܘܕܕܗܒܐ
57 ܕܗܐ ܐܝܠܝܢ ܕܥܫܝ̈ܢܝܢ ܘܚܝܠܬܢܝ̣ܢ ܫ̇ܩܠܝܢ ܕܗܒܐ ܘܠܒܘܫܐ ܕܥܠܝܗܘܢ ܘܐܙܠܝܢ ܘܐܢܫ ܡܢܗܘܢ̣ ܠܐ ܡܫ̇ܟܚ ܡܥܕܪ ܢܦܫܗ
58 ܡܝܬܪ ܗܘ ܕܝܢ ܡܢܗܘܢ ܡ̇ܠܟܐ ܐܝܢܐ ܕܡ̇ܚܘܐ ܓܢܒ̇ܪܘܬܐ̇ ܘܡܐܢܐ ܕܚܘܫܚܐ ܕܐܝܬ ܒܒܝܬܐ ܕܡܬܚܫܚ ܒܗ ܡܪܗ̇ ܝܬܝܪ ܡܢ ܐ̈ܠܗܐ ܕܕܓܠܘܬܐ ܘܡܝܬܪ ܗܘ ܬܪܥܐ ܕܢ̇ܛܪ ܠܡܪܗ̇ ܝܬܝܪ ܡܢ ܐ̈ܠܗܐ ܕܕܓܠܘܬܐ
59 ܫܡܫܐ ܕܝܢ ܘܣܗܪܐ ܘܟ̈ܘܟܒܐ̣ ܐܝܬܝܗܘܢ̣ ܡܢܗܪ̈ܢܐ ܒܫܡܝܐ ܥܠ ܐܪܥܐ ܘܡܫܬܕܪ̈ܝܢ ܠܨܒ̈ܘܬܗܘܢ̣ ܘܡܫ̇ܬܡܥܝܢ
60 ܐܦ ܒܪܩܐ ܡܐ ܕܐܒܪܩ̇ ܗܕܝܪ ܗܘ̣ ܛܒ ܗܟܢܐ̣ ܐܦ̇ ܪܘܚܐ ܕܢܫܒܐ ܒܟܠܗ ܟܘܪܐ̣
61 ܘܥܢ̈ܢܐ ܡܐ ܕܐܬܦ̣ܩܕ ܡܢ ܐܠܗܐ ܕܢܐ̈ܙܠܢ ܘܢܝܬܝܢ ܡܛܪܐ ܥܠ ܟܠܗ̇ ܬ̇ܒܝܠ̣ ܐ̈ܙܠܢ̣ ܘܡܫ̈ܠܡܢ ܡܕܡ ܕܡܬܦܩ̈ܕܢ
62 ܐܦ ܢܘܪܐ ܕܡܫܬܕܪܐ ܡܢ ܠܥܠ ܕܬܘܩܕ ܛܘܪ̈ܐ ܘܪ̈ܡܬܐ ܘܥܒ̈ܐ̣ ܥܒ̇ܕܐ ܡܕܡ ܕܐܬ̣ܦܩܕ ܠܗ̇ ܗܠܝܢ ܕܝܢ̣ ܐܦܠܐ ܒܕܡܘܬܐ̣ ܐܦܠܐ ܒܚܝܠܐ ܘܠܐ ܒܥ̇ܒܕܐ ܕܡ̇ܝܢ ܠܚܕ ܡܢ ܗܠܝܢ ܥ̇ܒ̈ܕܐ
63 ܡܛܠ ܗܢܐ̣ ܐܝܟܢܐ ܢܬܩܪܘܢ ܐܘ ܢܣܒܪܘܢ ܥܠܝܗܘܢ ܕܐ̈ܠܗܐ ܐܢܘܢ̇ ܕܗܐ ܠܐ ܡܫܟܚܝܢ ܐܦ ܠܐ ܕܝܢ̣ܐ ܕܢܕܘܢܘܢ ܘܠܐ ܕܢܛܐ̣ܒܘܢ ܘܠܐ ܕܢܒܐܫܘܢ ܠܒܢܝ̈ܢܫܐ
64 ܕܥܘ ܗܟܝܠ̣ ܕܠܐ ܗܘ̣ܘ ܐ̈ܠܗܐ ܘܠܐ ܬܕܚ̣ܠܘܢ ܠܗܘܢ
65 ܠܐ ܓܝܪ ܕܢܒ̇ܪܟܘܢ ܠܡܠܟܐ ܡܫܟܚܝ̣ܢ ܘܠܐ ܕܢܠܘܛܘܢ
66 ܘܐܬܘ̈ܬܐ ܠܥܡ̈ܡܐ ܒܫܡܝܐ̣ ܠܐ ܢܚܘܘܢ̇ ܘܐܦ ܠܐ ܐܝܟ ܫܡܫܐ ܢܕܢܚ̇ܘܢ ܢܘܗܪܗܘܢ ܘܠܐ ܡܢܗܪܝܢ ܐܝܟ ܣܗܪܐ
67 ܚ̈ܝܘܬܐ ܕܒܪܐ̣ ܡܝܬܪ̈ܢ ܐܢܝ̈ܢ ܡܢܗܘܢ ܕܗܠܝܢ ܡܫ̈ܟܚܢ ܕܢܥܪ̈ܩܢ ܘܢܫܘ̈ܙܒܢ ܢܦܫܗܝܢ
68 ܒܡܕܡ ܕܝ̣ܢ ܠܐ ܡܬܚܙܐ ܠܢ ܕܐ̈ܠܗܐ ܐܢܘܢ ܡܛܠ ܗܢܐ̣ ܠܐ ܬܕܚܠܘܢ ܡܢܗܘܢ
69 ܐܝܟ ܥܪܙܠܐ ܓܝܪ ܕܡܩܛܝܐ ܕܡܕܡ ܠܐ ܢ̇ܛܪ̣ ܗܟܢܐ ܐܢܘܢ ܐܦ ܐ̈ܠܗܝܗܘܢ ܕܩܝܣܐ ܘܕܟܣܦܐ ܘܕܕܗܒܐ ܠܝܬ ܒܗܘܢ ܝܘܬܪܢ
70 ܘܐܝܟ ܗܛܛܐ ܕܒܓܢܬܐ ܕܟܠ ܦܪܚܬܐ ܥܠܘܗܝ ܫ̇ܟܢܐ̣ ܗܟܢܐ ܐܢܘܢ ܘܠܡܝ̣ܬܐ ܕܫ̣ܕܐ ܒܚܫܘ̇ܟܐ̣ ܗܟܢܐ ܕܡ̇ܝܢ ܐܠܗܝܗܘܢ̇ ܕܩܝܣܐ ܘܕܟܣܦܐ ܘܕܕܗܒܐ
71 ܡܢ ܐܪܓܘܢܐ ܓܝܪ ܘܡܢ ܫ̇ܪܝܐ ܕܥܠܝܗܘܢ ܕܡܬ̇ܚܒܠ̣ ܬܕܥܘܢ̣ ܕܠܐ ܗܘ̣ܘ ܐ̈ܠܗܐ ܐܦ ܗ̣ܢܘܢ ܕܝܢ ܠܚܪܬܐ̣ ܠܥܠܡ ܢܬܚ̇ܒܠܘܢ ܘܢܗܘܘܢ̣ ܠܚܣܕܐ ܒܐܪܥܐ
72 ܛܒ ܕܝܢ ܠܓܒܪܐ ܙܕܝܩܐ ܕܠܝܬ ܠܗ ܦܬܟܪܐ̇ ܕܪܚܝܩ ܡܢ ܚܣܕܐ ܘܡܣ̇ܟܐ ܠܡܪܝܐ ܐܠܗܐ