Lamentations 2 — Coptic (Sahidic)

1 ⲛⲁϣ ⲛϩⲉ ⲁⲡϫⲟⲉⲓⲥ ⲟⲩⲱϣϥ ⲛⲧϣⲉⲉⲣⲉ ⲛⲥⲓⲱⲛ ϩⲛⲧⲉϥⲟⲣⲅⲏ ⲁϥⲛⲟⲩϫⲉ ⲉⲃⲟⲗ ϩⲛⲧⲡⲉ ⲉϩⲣⲁⲓ ⲉϫⲙⲡⲕⲁϩ ⲙⲡⲉⲟⲟⲩ ⲙⲡⲓⲥⲣⲁⲏⲗ ⲁⲩⲱ ⲙⲡϥⲣⲡⲙⲉⲉⲩⲉ ⲙⲫⲩⲡⲟⲡⲟⲇⲓⲟⲛ ⲛⲛⲉϥⲟⲩⲉⲣⲏⲧⲉ ϩⲙⲡⲉϩⲟⲟⲩ ⲛⲧⲉϥⲟⲣⲅⲏ

2 ⲁϥⲱⲙⲥ ⲛϭⲓⲡϫⲟⲉⲓⲥ ⲛⲧϣⲉⲉⲣⲉ ⲛⲥⲓⲱⲛ ⲉⲙⲡϥϯⲥⲟ ⲛⲉⲧⲛⲉⲥⲱⲟⲩ ⲧⲏⲣⲟⲩ ⲛⲓⲁⲕⲱⲃ ⲁϥϣⲣϣⲱⲣⲟⲩ ϩⲙⲡⲉϥϭⲱⲛⲧ ⲛⲉⲧϫⲟⲥⲉ ⲛⲧⲉⲧϣⲉⲉⲣⲉ ⲛⲓⲟⲩⲇⲁ ⲁϥϣⲁϣⲟⲩ ⲙⲛⲡⲕⲁϩ ⲁϥⲃⲱⲧⲉ ⲙⲡⲉⲥⲣⲣⲟ ⲙⲛⲛⲉⲥⲁⲣⲭⲱⲛ

3 ⲁϥϩⲱⲣⲃ ⲛⲛⲧⲁⲡ ⲧⲏⲣⲟⲩ ⲙⲡⲓⲥⲣⲁⲏⲗ ϩⲛⲧⲟⲣⲅⲏ ⲙⲡⲉϥϭⲱⲛⲧ ⲁϥⲕⲧⲟ ⲛⲧⲉϥⲟⲩⲛⲁⲙ ⲉⲡⲁϩⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲁϫⲉ ⲁⲩⲱ ⲁϥⲧⲣⲉⲟⲩϣⲁϩ ⲙⲟⲩϩ ⲛⲧϩⲉ ⲛⲟⲩⲥⲁⲧⲉ ϩⲛⲓⲁⲕⲱⲃ ⲁϥⲟⲩⲱⲙ ⲛⲛⲉⲧⲕⲱⲧⲉ ⲉⲣⲟϥ ⲧⲏⲣⲟⲩ

4 ⲁϥϫⲟⲗⲕ ⲛⲧⲉϥⲡⲓⲧⲉ ⲛⲧϩⲉ ⲛⲟⲩϫⲁϫⲉ ⲁϥⲧⲁϫⲣⲟ ⲛⲧⲉϥⲟⲩⲛⲁⲙ ⲛⲧϩⲉ ⲙⲡⲉⲧϯⲟⲩⲃⲏⲛ ⲁⲩⲱ ⲁϥⲙⲟⲩⲟⲩⲧ ⲛⲛⲁⲙⲉⲣⲁⲧⲉ ⲧⲏⲣⲟⲩ ⲁϥⲡⲱϩⲧ ⲛⲧⲉϥⲟⲣⲅⲏ ⲛⲧϩⲉ ⲛⲟⲩⲕⲱϩⲧ ϩⲛⲧⲉⲥⲕⲏⲛⲏ ⲛⲧϣⲉⲉⲣⲉ ⲛⲥⲓⲱⲛ

5 ⲁⲡϫⲟⲉⲓⲥ ϣⲱⲡⲉ ⲛⲧϩⲉ ⲛⲟⲩϫⲁϫⲉ ⲁϥⲱⲙⲥ ⲙⲡⲓⲥⲣⲁⲏⲗ ⲁϥⲱⲙⲥ ⲛⲛⲉϥⲙⲏⲏϣⲉ ⲁϥⲧⲁⲕⲟ ⲛⲛⲉϥⲙⲁ ⲉⲧⲟⲣϫ ⲁⲩⲱ ⲁϥⲧⲁϣⲟ ⲛⲧϣⲉⲉⲣⲉ ⲛⲓⲟⲩⲇⲁ ⲧⲉⲧⲑⲃⲃⲓⲏⲩ ⲁⲩⲱ ⲧⲉⲛⲧⲁⲩⲑⲃⲃⲓⲟⲥ

6 ⲁϥⲡⲱⲣϣ ⲉⲃⲟⲗ ⲙⲡⲉϥⲙⲁ ⲛϣⲱⲡⲉ ⲛⲧϩⲉ ⲛⲟⲩⲃⲱ ⲛⲉⲗⲟⲟⲗⲉ ⲁϥⲧⲁⲕⲟ ⲙⲡⲉϥϣⲁ ⲁⲡϫⲟⲉⲓⲥ ⲧⲣⲉⲥⲓⲱⲛ ⲣⲡⲱⲃϣ ⲙⲡϣⲁ ⲙⲛⲡⲥⲁⲃⲃⲁⲧⲟⲛ ⲁϥϯ ⲛⲟⲩϭⲥ ϩⲙⲡϭⲱⲛⲧ ⲛⲧⲉϥⲟⲣⲅⲏ ⲛⲟⲩⲣⲣⲟ ⲙⲛⲟⲩⲟⲩⲏⲏⲃ ⲙⲛⲟⲩⲁⲣⲭⲱⲛ

7 ⲁⲡϫⲟⲉⲓⲥ ⲕⲱ ⲛⲥⲱϥ ⲙⲡⲉϥⲑⲩⲥⲓⲁⲥⲧⲏⲣⲓⲟⲛ ⲁϥⲛⲟⲩϫⲉ ⲉⲃⲟⲗ ⲙⲡⲉϥⲡⲉⲧⲟⲩⲁⲁⲃ ⲁϥⲟⲩⲱϭⲡ ϩⲛⲧϭⲓϫ ⲙⲡϫⲁϫⲉ ⲙⲡⲥⲟⲃⲧⲉ ⲛⲛⲉⲥⲙⲏⲏϣⲉ ⲁⲩϯ ⲙⲡⲉⲩϩⲣⲟⲟⲩ ϩⲙⲡⲏⲓ ⲙⲡϫⲟⲉⲓⲥ ⲛⲧϩⲉ ϩⲛⲟⲩϩⲟⲟⲩ ⲛϣⲁ

8 ⲁⲡϫⲟⲉⲓⲥ ⲙⲟⲕⲙⲉⲕ ⲁⲩⲱ ⲁϥⲕⲧⲟϥ ⲉⲧⲁⲕⲉ ⲡⲥⲟⲃⲧ ⲛⲧϣⲉⲉⲣⲉ ⲛⲥⲓⲱⲛ ⲁϥⲡⲱⲣϣ ⲉⲃⲟⲗ ⲛⲟⲩϣⲓ ⲉϩⲣⲁⲓ ⲉϫⲱⲥ ⲙⲡⲉϥⲕⲧⲟ ⲛⲧⲉϥϭⲓϫ ⲉⲃⲟⲗ ⲙⲡⲉⲥϩⲱⲙ ⲁⲥⲣϩⲏⲃⲉ ⲛϭⲓⲧϫⲟ ⲉⲧⲙⲡⲃⲟⲗ ⲙⲡⲥⲟⲃⲧ ⲁⲩⲱ ⲁⲡⲥⲟⲃⲧ ϭⲃⲃⲉ ⲛⲙⲙⲁⲥ

9 ⲁⲛⲉⲥⲡⲩⲗⲏ ϣⲱϣ ⲙⲛⲡⲕⲁϩ ⲁⲩⲧⲁⲕⲟ ⲛⲛⲉⲥⲙⲟⲭⲗⲟⲥ ⲁⲩⲱ ⲁϥⲟⲩⲱϣϥ ⲙⲡⲉⲥⲣⲣⲟ ⲙⲛⲛⲉⲥⲁⲣⲭⲱⲛ ϩⲛⲛϩⲉⲑⲛⲟⲥ ⲉⲙⲛⲛⲟⲙⲟⲥ ϣⲟⲟⲡ ⲛⲁⲥ ⲁⲩⲱ ⲛⲉⲥⲕⲉⲡⲣⲟⲫⲏⲧⲏⲥ ⲙⲡⲟⲩⲛⲁⲩ ⲉϩⲟⲣⲁⲥⲓⲥ ϩⲓⲧⲙⲡϫⲟⲉⲓⲥ

10 ⲁⲩϩⲙⲟⲟⲥ ⲉⲡⲕⲁϩ ⲁⲩⲕⲁ ⲣⲣⲱⲟⲩ ⲛϭⲓⲛⲉⲡⲣⲉⲥⲃⲩⲧⲉⲣⲟⲥ ⲛⲧϣⲉⲉⲣⲉ ⲛⲥⲓⲱⲛ ⲁⲩϣⲉϣⲉⲓⲧⲛ ⲉϫⲛⲧⲉⲩⲁⲡⲉ ⲁⲩⲙⲟⲟⲣⲟⲩ ⲛϩⲉⲛϭⲟⲟⲩⲛⲉ ⲁⲩⲣⲱϩⲧ ⲉⲡⲉⲥⲏⲧ ⲉⲡⲕⲁϩ ⲛⲥⲱⲧⲡ ⲙⲡⲁⲣⲑⲉⲛⲟⲥ ⲛⲧϩⲓⲏⲙ

11 ⲁⲛⲁⲃⲁⲗ ⲱϫⲛ ϩⲛϩⲉⲛⲣⲙⲉⲓⲟⲟⲩⲉ ⲁⲡⲁϩⲏⲧ ϣⲧⲟⲣⲧⲣ ⲁⲡⲁⲉⲟⲟⲩ ϫⲱⲱⲣⲉ ⲉⲃⲟⲗ ϩⲓϫⲙⲡⲕⲁϩ ⲉϫⲙⲡⲟⲩⲱⲱϣϥ ⲛⲧϣⲉⲉⲣⲉ ⲙⲡⲁⲗⲁⲟⲥ ϩⲙⲡⲧⲣⲉⲩⲱϫⲛ ⲛϭⲓⲙϣⲏⲣⲉ ⲕⲟⲩⲓ ⲙⲛⲛⲉⲧϫⲓⲕⲓⲃⲉ ϩⲛⲛⲉⲡⲗⲁϯⲁ ⲛⲧⲡⲟⲗⲓⲥ

12 ⲁⲩϫⲟⲟⲥ ⲛⲛⲉⲩⲙⲁⲁⲩ ϫⲉⲉϥⲧⲱⲛ ⲥⲟⲩⲟ ϩⲓⲏⲣⲡ ϩⲙⲡⲧⲣⲉⲩϣⲱⲥⲙ ⲛϩⲏⲧ ⲛⲧϩⲉ ⲛⲛⲉⲧϣⲟⲟϭⲉ ϩⲛⲛⲉⲡⲗⲁϯⲁ ⲛⲧⲡⲟⲗⲓⲥ ϩⲙⲡⲧⲣⲉⲩϫⲧⲉ ϫⲱⲟⲩ ⲉⲕⲟⲩⲟⲩⲛⲟⲩ ⲛⲛⲉⲩⲙⲁⲁⲩ

13 ⲟⲩ ⲡⲉⲧⲓⲛⲁⲣⲙⲛⲧⲣⲉ ⲙⲙⲟϥ ⲏ ⲉⲉⲓⲛⲁⲧⲛⲧⲱⲛⲉ ⲉⲛⲓⲙ ⲧϣⲉⲉⲣⲉ ⲛⲧϩⲓⲏⲙ ⲛⲓⲙ ⲡⲉⲧⲛⲁⲛⲁϩⲙⲉ ⲏ ⲛⲓⲙ ⲡⲉⲧⲛⲁⲥⲉⲡⲥⲱⲡⲉ ⲧⲡⲁⲣⲑⲉⲛⲟⲥ ⲧϣⲉⲉⲣⲉ ⲛⲥⲓⲱⲛ ϫⲉⲁϥⲁϣⲁⲓ ⲛϭⲓⲡⲁⲡⲟⲧ ⲙⲡⲟⲩⲱϣϥ ⲛⲓⲙ ⲡⲉⲧⲛⲁⲧⲁⲗϭⲟ

14 ⲛⲟⲩⲡⲣⲟⲫⲏⲧⲏⲥ ⲁⲩⲛⲁⲩ ⲉϩⲉⲛⲡⲉⲧϣⲟⲩⲉⲓⲧ ⲙⲛⲟⲩⲙⲛⲧⲁⲧϩⲏⲧ ⲁⲩⲱ ⲁⲩϩⲱⲃⲥ ⲉϫⲙⲡⲟⲩϫⲓⲛϭⲟⲛⲥ ⲉⲧⲣⲉⲩⲕⲧⲟ ⲛⲧⲟⲩⲁⲓⲭⲙⲁⲗⲱⲥⲓⲁ ⲁⲩⲛⲁⲩ ⲁⲩⲱ ⲁⲩϯⲛⲉ ⲛϩⲉⲛⲗⲏⲙⲙⲁ ⲉⲩϣⲟⲩⲉⲓⲧ ⲁⲩⲱ ⲉⲩⲧⲥⲧⲏⲩ ⲉⲃⲟⲗ

15 ⲁⲩϣϭⲁϭⲓϫ ⲉϩⲣⲁⲓ ⲉϫⲱ ⲛϭⲓⲟⲩⲟⲛ ⲛⲓⲙ ⲉⲧⲙⲟⲟϣⲉ ϩⲓⲧⲉϩⲓⲏ ⲁⲩϥⲓ ϣⲙϣⲏϭⲉ ⲁⲩⲱ ⲁⲩⲕⲓⲙ ⲛⲧⲉⲩⲁⲡⲉ ⲉϫⲛⲧϣⲉⲉⲣⲉ ⲛⲧϩⲓⲏⲙ ⲉⲩϫⲱ ⲙⲙⲟⲥ ϫⲉⲧⲁⲓ ⲧⲉ ⲧⲡⲟⲗⲓⲥ ⲛⲧⲟⲥ ⲡⲉ ⲡⲉⲕⲗⲟⲙ ⲙⲡⲉⲟⲟⲩ ⲙⲡⲟⲩⲛⲟϥ ⲙⲡⲕⲁϩ ⲧⲏⲣϥ

16 ⲁⲩⲟⲩⲱⲛ ⲛⲣⲱⲟⲩ ⲉϩⲣⲁⲓ ⲉϫⲱ ⲛϭⲓⲛⲟⲩϫⲁϫⲉ ⲧⲏⲣⲟⲩ ⲁⲩϥⲓ ϣⲙϣⲏϭⲉ ⲁⲩⲱ ⲁⲩϩⲣⲟϫⲣⲉϫ ⲛⲛⲉⲩⲟⲃϩⲉ ⲁⲩϫⲟⲟⲥ ϫⲉⲁⲛⲟⲙⲕⲥ ⲡⲗⲏⲛ ⲡⲁⲓ ⲡⲉ ⲡⲉϩⲟⲟⲩ ⲉⲧⲛϭⲱϣⲧ ⲉⲃⲟⲗ ϩⲏⲧϥ ⲁⲛϩⲉ ⲉⲣⲟⲥ ⲁⲩⲱ ⲁⲛⲙⲉϩ ⲉⲓⲁⲧⲛ ⲙⲙⲟⲥ

17 ⲁⲡϫⲟⲉⲓⲥ ⲉⲓⲣⲉ ⲛⲛⲉⲛⲧⲁϥⲙⲉⲉⲩⲉ ⲉⲣⲟⲟⲩ ⲁϥϫⲱⲕ ⲉⲃⲟⲗ ⲛⲛⲉϥϣⲁϫⲉ ⲉⲛⲧⲁϥϩⲱⲛ ⲙⲙⲟⲟⲩ ϫⲓⲛⲛⲉϥϩⲟⲟⲩ ⲛϣⲟⲣⲡ ⲁϥϣⲟⲣϣⲣ ⲁⲩⲱ ⲙⲡϥϯⲥⲟ ⲁϥⲧⲣⲉⲡⲟⲩϫⲁϫⲉ ⲉⲩⲫⲣⲁⲛⲉ ⲉϩⲣⲁⲓ ⲉϫⲱ ⲁⲩⲱ ⲁϥϫⲓⲥⲉ ⲙⲡⲧⲁⲡ ⲙⲡⲉⲧⲑⲗⲓⲃⲉ ⲙⲙⲟ

18 ⲁⲡⲉⲩϩⲏⲧ ⲱϣ ⲉϩⲣⲁⲓ ⲉⲡϫⲟⲉⲓⲥ ⲛⲥⲟⲃⲧ ⲛⲥⲓⲱⲛ ϣⲟⲩⲟ ⲉⲡⲉⲥⲏⲧ ⲛϩⲉⲛⲣⲙⲉⲓⲏ ⲛⲧϩⲉ ⲛⲟⲩⲙⲟⲩ ⲛⲥⲱⲣⲙ ⲙⲡⲉϩⲟⲟⲩ ⲙⲛⲧⲉⲩϣⲏ ⲙⲡⲣϯ ⲱⲃϣ ⲛⲉ ⲧϣⲉⲉⲣⲉ ⲙⲡⲣⲧⲣⲉⲡⲟⲩⲃⲁⲗ ⲥϭⲣⲁϩⲧ

19 ⲧⲱⲟⲩⲛⲉ ⲛⲧⲉⲧⲉⲗⲏⲗ ϩⲛⲧⲉⲟⲩϣⲏ ⲉⲛⲁⲣⲭⲏ ⲛⲧⲟⲩⲟⲩⲣϣⲉ ⲡⲱϩⲧ ⲉⲃⲟⲗ ⲙⲡⲟⲩϩⲏⲧ ⲛⲧϩⲉ ⲛⲟⲩⲙⲟⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ϥⲓ ⲉϩⲣⲁⲓ ⲉⲣⲟϥ ⲛⲛⲟⲩϭⲓϫ ⲉⲧⲃⲉⲧⲉⲯⲩⲭⲏ ⲛⲛⲟⲩϣⲏⲣⲉ ⲕⲟⲩⲓ ⲛⲁⲓ ⲉⲛⲧⲁⲩϣⲱⲥⲙ ϩⲛⲟⲩϩⲕⲟ ϩⲓϫⲛⲧⲁⲣⲭⲏ ⲛⲛⲉϩⲓⲟⲟⲩⲉ ⲧⲏⲣⲟⲩ ⲙⲙⲟⲟϣⲉ

20 ϭⲱϣⲧ ⲡϫⲟⲉⲓⲥ ⲁⲩⲱ ⲛⲅϯ ϩⲧⲏⲕ ϫⲉⲛⲓⲙ ⲡⲉⲛⲧⲁϥⲑⲙⲕⲟϥ ⲉⲛⲉ ⲧⲁⲓ ⲧⲉ ⲧϩⲉ ⲉⲧⲉⲣⲉⲛⲉϩⲓⲟⲙⲉ ⲛⲁⲟⲩⲱⲙ ⲙⲡⲕⲁⲣⲡⲟⲥ ⲛϩⲏⲧⲟⲩ ⲡⲙⲁⲅⲉⲓⲣⲟⲥ ⲁϥⲉⲓⲣⲉ ⲛⲟⲩⲑⲙⲕⲟ ⲉⲛⲉⲉⲩⲛⲁϩⲱⲧⲃ ⲛϩⲉⲛϣⲏⲣⲉ ⲕⲟⲩⲓ ⲉⲩϫⲓ ⲉⲕⲓⲃⲉ ⲏ ⲉⲕⲛⲁⲙⲟⲩⲟⲩⲧ ⲛⲟⲩⲏⲏⲃ ⲙⲛⲟⲩⲡⲣⲟⲫⲏⲧⲏⲥ ϩⲙⲡⲉⲧⲟⲩⲁⲁⲃ ⲙⲡϫⲟⲉⲓⲥ

21 ⲁⲩⲛⲕⲟⲧⲕ ϩⲓⲧⲉϩⲓⲏ ⲙⲙⲟⲟϣⲉ ⲛϭⲓⲛⲟⲩϣⲏⲣⲉ ⲕⲟⲩⲓ ⲙⲛⲛϩⲗⲗⲟ ⲛⲁⲡⲁⲣⲑⲉⲛⲟⲥ ⲙⲛⲛⲁϩⲣϣⲓⲣⲉ ⲁⲩⲃⲱⲕ ϩⲛⲟⲩⲁⲓⲭⲙⲁⲗⲱⲥⲓⲁ ⲁⲕϩⲟⲧⲃⲟⲩ ϩⲛⲟⲩⲥⲏϥⲉ ϩⲙⲡⲉϩⲟⲟⲩ ⲙⲡⲉⲕϭⲱⲛⲧ ⲁⲕϭⲉϫϭⲱϫⲟⲩ ⲙⲡⲕϯⲥⲟ

22 ⲁⲕⲙⲟⲩⲧⲉ ⲉⲩϩⲟⲟⲩ ⲛϣⲁ ⲙⲡⲕⲱⲧⲉ ⲙⲡⲁⲙⲁ ⲛϭⲟⲉⲓⲗⲉ ⲁⲩⲱ ⲙⲡⲉⲗⲁⲁⲩ ⲟⲩϫⲁⲓ ⲉⲁϥϣⲱϫⲡ ϩⲙⲡⲉϩⲟⲟⲩ ⲙⲡϭⲱⲛⲧ ⲙⲡϫⲟⲉⲓⲥ ⲛⲧϩⲉ ⲉⲛⲧⲁⲕⲁⲙⲁϩⲧⲉ ⲁⲩⲱ ⲁⲕⲧⲁϣⲟ ⲛⲛⲁϫⲁϫⲉ ⲧⲏⲣⲟⲩ