Read Judith 3 side by side with translations · The Final Bible
1 ܘܫܕܪܘ ܠܘܬܗ̣ ܐܝܙܓܕ̈ܐ ܒܡ̈ܠܐ ܕܫܠܡܐ ܘܐܡ̣ܪܘ
2 ܐܡ̇ܪܝܢ ܚܢܢ ܥܒ̈ܕܐ ܚܢ̣ܢ ܕܢܒܘܟܕܢܨܪ ܡ̇ܠܟܐ ܪܒܐ ܗܐ ܩ̇ܝܡܝܢ ܚܢܢ ܩܕܡܝܟ ܥܒ̣ܕ ܠܢ ܐܝܟ ܕܫܦܝܪ ܒܥܝ̈ܢܝܟ
3 ܗܐ̣ ܟܠܗ̇ ܐܪܥܐ ܕܒܝܬ ܡܥܡܪܢ ܘܟܘܠ ܚܩ̈ܠܬܢ ܘܦܩܥ̈ܬܐ ܕܥܒܘܪܢ ܘܥܢܢ̇ ܘܬܘܪ̈ܝܢ ܘܟܠ ܒܝܬ ܡܥܡܪܐ ܕܒܥ̇ܝܪܢ ܩܕܡܝܟ ܥ̣ܒܕ ܠ̣ܢ ܐܝܟ ܕܫ̇ܦܝܪ ܠܟ
4 ܘܗܐ ܡܕܝܢܬܢ ܘܥܡܘܪ̈ܝܗܝܢ ܥܒ̣̈ܕܝܟ ܐܢܘܢ ܬܐ ܘܦܓ̣ܥ ܒ̣ܢ ܐܝܟ ܕܛܒ ܒܥ̈ܝܢܝܟ
5 ܘܐܬܘ̇ ܐܝܙ̈ܓܕܐ̣ ܘܐܡܪܘ ܠܐܠܦܪܢܐ ܐܝܟ ܦܬܓ̈ܡܐ ܗܠܝܢ
6 ܘܢܚ̣ܬ ܠܘܬ ܡܕܝ̈ܢܬܐ ܕܥܠ ܓܢܒ ܝܡܐ ܗ̣ܘ̣ ܘܚܝܠܗ ܘܐܩܝܡ ܡܛܪ̈ܬܐ ܒܡܕܝܢ̈ܬܐ ܥܫ̈ܝܢܬܐ ܘܕܒܪ ܡܢܗ̇ܝܢ ܥܕܪ̈ܐ ܓܒܪ̈ܐ ܓܒ̈ܝܐ
7 ܘܩܒܠܝܗܝ ܡܕܝܢ̈ܬܐ ܘܩܘܪ̈ܝܐ ܒܟܠܝܠܐ ܘܒ̈ܦܠܓܐ̣ ܘܒܪ̈ܒܝܥܐ
8 ܘܥܩܪ ܟܘܠ ܗܝ̈ܟܠܝܗܘܢ ܘܟܠܗܝܢ ܕܚ̈ܠܬܗܘܢ ܦܣ̇ܩܘ ܡܛܠ ܕܝܗ̣ܒ ܗܘܐ ܒܐܪܙ ܠܡܘܒܕܘ ܠܟܠܗܘܢ ܐ̈ܠܗܐ ܕܐܪܥܐ ܐܝܟ ܕܠܗ ܠܢܒܘܟܕܢܨܪ ܢܦܠܚܘܢ ܘܢܣܓܕܘܢ ܟܠܗܘܢ ܥܡ̈ܡܐ ܘܠܫ̈ܢܐ ܘܢܩܪܘܢܗ ܐܠܗ
9 ܘܐܬ̣ܐ ܠܐܝܙܪܥܝܠ ܕܥܠ ܓܢܒ ܕܬܢ̇ ܠܘܩܒܠ ܡܣܪܐ ܪܒܐ ܕܝܗܘܕ
10 ܘܫ̣ܪܐ ܒܝܬ ܓܒܥ ܠܒܝܫܢ ܘܥܒܕ ܬܡܢ ܝܪܚ̣ ܝܘܡ̈ܝܢ ܠܡܬܩܢܘ ܟܠܗܝܢ ܥܒܝ̈ܕܬܐ ܕܚܝܠܗ
Judith 2 · Judith 4 · Greek (Septuagint / SBLGNT) · Latin (Vulgate)