Joshua 6 — Coptic (Sahidic)

1 ⲁⲩⲱ ϩⲓⲉⲣⲓⲭⲱ ⲛⲉⲥϣⲟⲧⲙ ⲁⲩⲱ ⲉⲥⲟⲣϫ ⲁⲩⲱ ⲛⲉⲙⲛⲗⲁⲁⲩ ⲛⲏⲟⲩ ⲉⲃⲟⲗ ⲛϩⲏⲧⲥ ⲟⲩⲇⲉ ⲛⲉⲙⲛⲗⲁⲁⲩ ⲃⲱⲕ ⲉϩⲟⲩⲛ ⲉⲣⲟⲥ

2 ⲡϫⲟⲉⲓⲥ ⲇⲉ ⲡⲉϫⲁϥ ⲛⲓⲏⲥⲟⲩⲥ ϫⲉⲉⲓⲥϩⲏⲏⲧⲉ ϯⲛⲁϯ ⲉϩⲣⲁⲓ ⲉⲧⲟⲟⲧⲕ ⲛϩⲓⲉⲣⲓⲭⲱ ⲙⲛⲡⲉⲥⲕⲉⲣⲣⲟ ⲉⲧⲛϩⲏⲧⲥ ⲉⲩⲇⲩⲛⲁⲧⲟⲥ ⲡⲉ ϩⲛⲧⲉϥϭⲟⲙ

3 ⲛⲧⲟⲕ ⲇⲉ ⲕⲱ ϩⲓⲣⲱⲥ ⲛⲛⲣⲉϥⲙⲓϣⲉ ⲧⲏⲣⲟⲩ ⲉⲡⲉⲥⲕⲱⲧⲉ

4 ⲁⲩⲱ ⲉⲧⲉⲧⲛϣⲁⲛⲥⲁⲗⲡⲓⲍⲉ ϩⲛⲧⲥⲁⲗⲡⲓⲅⲝ ⲙⲁⲣⲉⲡⲗⲁⲟⲥ ⲧⲏⲣϥ ⲱϣ ⲉⲃⲟⲗ ϩⲓⲟⲩⲥⲟⲡ

5 ⲁⲩⲱ ⲉⲩⲱϣ ⲉⲃⲟⲗ ⲛⲥⲟⲃⲧ ⲛϩⲓⲉⲣⲓⲭⲱ ⲥⲉⲛⲁϩⲉ ⲉϩⲣⲁⲓ ⲙⲁⲩⲁⲁⲩ ⲁⲩⲱ ⲡⲗⲁⲟⲥ ⲧⲏⲣϥ ⲉⲩⲉϯⲡⲉⲩⲟⲩⲟⲓ ⲛⲥⲉⲙⲟⲟϣⲉ ⲡⲟⲩⲁ ⲡⲟⲩⲁ ⲉϩⲟⲩⲛ ⲉⲧⲡⲟⲗⲓⲥ

6 ⲁⲩⲱ ⲓⲏⲥⲟⲩⲥ ⲡϣⲏⲣⲉ ⲛⲛⲁⲩ ⲁϥⲃⲱⲕ ⲉϩⲟⲩⲛ ⲉⲛⲟⲩⲏⲏⲃ

7 ⲁϥϣⲁϫⲉ ⲛⲙⲙⲁⲩ ⲉϥϫⲱ ⲙⲙⲟⲥ ϫⲉϩⲱⲛ ⲉⲧⲟⲟⲧϥ ⲙⲡⲗⲁⲟⲥ ⲉⲧⲣⲉⲩⲃⲱⲕ ⲉϩⲟⲩⲛ ⲛⲥⲉⲕⲱⲧⲉ ⲉⲧⲡⲟⲗⲓⲥ ⲁⲩⲱ ⲛⲣⲉϥⲙⲓϣⲉ ⲙⲁⲣⲟⲩⲙⲟⲟϣⲉ ⲉⲩϩⲏⲕ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

8 ⲁⲩⲱ ⲥⲁϣϥ ⲛⲟⲩⲏⲏⲃ ⲉⲣⲉⲥⲁϣϥⲉ ⲛⲥⲁⲗⲡⲓⲅⲓⲝ ⲉⲩⲟⲩⲁⲁⲃ ⲛⲧⲟⲟⲧⲟⲩ ⲙⲁⲣⲟⲩⲙⲟⲟϣⲉ ϩⲱⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲙⲁⲣⲟⲩϯϩⲣⲟⲟⲩ ⲉⲃⲟⲗ ⲙⲙⲁⲧⲉ ⲁⲩⲱ ⲧϭⲓⲃⲱⲧⲟⲥ ⲛⲇⲓⲁⲑⲏⲕⲏ ⲙⲡϫⲟⲉⲓⲥ ⲙⲁⲣⲉⲥⲟⲩⲁϩⲥ ⲛⲥⲱⲟⲩ

9 ⲛⲣⲉϥⲙⲓϣⲉ ⲇⲉ ⲙⲁⲣⲟⲩⲣϣⲟⲣⲡ ⲛⲥⲉⲙⲟⲟϣⲉ ϩⲓⲧϩⲏ ⲁⲩⲱ ⲛⲟⲩⲏⲏⲃ ⲛⲉⲧⲙⲟⲟϣⲉ ϩⲓⲡⲁϩⲟⲩ ⲛⲧϭⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲉⲩⲉⲥⲁⲗⲡⲓⲍⲉ ϩⲱⲱⲟⲩ

10 ⲓⲏⲥⲟⲩⲥ ⲇⲉ ⲁϥϩⲱⲛ ⲉⲧⲟⲟⲧϥ ⲙⲡⲗⲁⲟⲥ ⲉϥϫⲱ ⲙⲙⲟⲥ ⲛⲁⲩ ϫⲉⲙⲡⲣⲱϣ ⲉⲃⲟⲗ ⲟⲩⲧⲉ ⲙⲡⲣⲧⲣⲉⲗⲁⲁⲩ ⲥⲱⲧⲙ ⲉϩⲣⲟⲟⲩ ⲛⲧⲉⲧⲏⲩⲧⲛ ϣⲁⲛⲧϥⲧⲁⲙⲱⲧⲛ ⲛⲧⲟϥ ⲉⲡⲉϩⲟⲟⲩ ⲉⲧⲣⲉⲧⲛⲱϣ ⲉⲃⲟⲗ ⲁⲩⲱ ⲧⲟⲧⲉ ⲧⲉⲧⲛⲛⲁⲱϣ ⲉⲃⲟⲗ

11 ⲁⲩⲱ ⲧϭⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡⲛⲟⲩⲧⲉ ⲛⲧⲉⲣⲉⲥⲕⲱⲧⲉ ⲉⲧⲡⲟⲗⲓⲥ ⲛⲧⲉⲩⲛⲟⲩ ⲁⲥⲕⲧⲟⲥ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ ⲁⲥⲛⲕⲟⲧⲕ ⲙⲙⲁⲩ

12 ⲁⲩⲱ ⲙⲡⲉϥⲣⲁⲥⲧⲉ ⲙⲡⲙⲉϩϩⲟⲟⲩ ⲥⲛⲁⲩ ⲓⲏⲥⲟⲩⲥ ⲛⲧⲉⲣⲉϥⲧⲱⲟⲩⲛ ⲛϩⲧⲟⲟⲩⲉ ⲁⲩⲱ ⲛⲟⲩⲏⲏⲃ ⲁⲩⲧⲱⲟⲩⲛ ϩⲁⲧϭⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ

13 ⲁⲩⲱ ⲡⲥⲁϣϥ ⲛⲟⲩⲏⲏⲃ ⲉⲧⲉⲣⲉⲧⲥⲁϣϥⲉ ⲛⲥⲁⲗⲡⲓⲅⲝ ⲛⲧⲟⲟⲧⲟⲩ ⲁⲩⲙⲟⲟϣⲉ ⲛϣⲟⲣⲡ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲙⲛⲛⲥⲱⲟⲩ ⲁⲩⲙⲟⲟϣⲉ ⲛϭⲓⲛⲣⲉϥⲙⲓϣⲉ ⲡⲕⲉϣⲱϫⲡ ⲇⲉ ⲧⲏⲣϥ ⲙⲡⲙⲏⲏϣⲉ ⲁⲩⲟⲩⲁϩⲟⲩ ⲛⲥⲁⲧϭⲓⲃⲱⲧⲟⲥ ⲛⲧⲇⲓⲁⲑⲏⲕⲏ ⲙⲡϫⲟⲉⲓⲥ ⲛⲟⲩⲏⲏⲃ ⲇⲉ ⲁⲩⲥⲁⲗⲡⲓⲍⲉ ⲛⲛⲥⲁⲗⲡⲓⲅⲝ ⲁⲩⲱ ⲡⲙⲏⲏϣⲉ ⲧⲏⲣϥ ϩⲓⲟⲩⲥⲟⲡ ⲁⲩⲕⲱⲧⲉ ⲉⲧⲡⲟⲗⲓⲥ ⲛⲥⲁⲡⲓⲥⲁ ⲁⲩⲱ ⲛⲥⲁⲡⲁⲓ

14 ⲁⲩⲕⲧⲟⲟⲩ ⲟⲛ ⲉϩⲣⲁⲓ ⲉⲧⲡⲁⲣⲁⲉⲙⲃⲟⲗⲏ ⲧⲁⲓ ⲧⲉ ⲧϩⲉ ⲉⲛⲉⲩⲉⲓⲣⲉ ⲙⲙⲟⲥ ⲛⲥⲟⲟⲩ ⲛϩⲟⲟⲩ

15 ⲁⲩⲱ ϩⲙⲡⲙⲉϩⲥⲁϣϥ ⲛϩⲟⲟⲩ ⲁⲩⲧⲱⲟⲩⲛ ⲛϣⲟⲣⲡ ⲁⲩⲕⲱⲧⲉ ⲉⲧⲡⲟⲗⲓⲥ ⲛⲥⲟⲟⲩ ⲛⲥⲟⲡ

16 ϩⲙⲡⲙⲉϩⲥⲁϣϥ ⲇⲉ ⲛⲕⲟⲧ ⲛⲟⲩⲏⲏⲃ ⲁⲩⲥⲁⲗⲡⲓⲍⲉ ⲁⲩⲱ ⲡⲉϫⲉⲓⲏⲥⲟⲩⲥ ⲛⲛϣⲏⲣⲉ ⲙⲡⲓⲥⲣⲁⲏⲗ ϫⲉⲱϣ ⲉⲃⲟⲗ ⲉⲙⲁⲧⲉ ⲁⲡϫⲟⲉⲓⲥ ⲅⲁⲣ ϯ ⲛⲧⲡⲟⲗⲓⲥ ⲉϩⲣⲁⲓ ⲉⲧⲟⲟⲧⲛ

17 ⲁⲩⲱ ⲧⲡⲟⲗⲓⲥ ⲉⲥⲉϣⲱⲡⲉ ⲛⲁⲛⲁⲑⲉⲙⲁ ⲙⲡϫⲟⲉⲓⲥ ⲛⲧⲟⲥ ⲁⲩⲱ ⲛⲕⲁ ⲛⲓⲙ ⲉⲧϣⲟⲟⲡ ⲛϩⲏⲧⲥ ⲉⲧⲣⲉⲩⲱⲡ ⲉⲡϫⲟⲉⲓⲥ ⲛⲛϭⲟⲙ ⲥⲁⲃⲁⲱⲑ ⲡⲗⲏⲛ ϩⲣⲁⲁⲃ ⲧⲡⲟⲣⲛⲏ ⲛⲁϩⲙⲉⲥ ⲛⲧⲟⲥ ⲙⲛⲛⲉⲧϩⲙ ⲡⲉⲥⲏⲓ ⲧⲏⲣⲟⲩ ⲉⲃⲟⲗ ϫⲉⲁⲥϩⲱⲡ ⲛⲛϥⲁⲓϣⲓⲛⲉ ⲛⲁⲓ ⲉⲛⲧⲁⲛϫⲟⲟⲩⲥⲉ

18 ⲁⲗⲗⲁ ⲛⲧⲱⲧⲛ ϩⲁⲣⲉϩ ⲉⲣⲱⲧⲛ ⲉⲙⲁⲧⲉ ⲉⲃⲟⲗ ϩⲙⲡⲁⲛⲁⲑⲉⲙⲁ ⲙⲏ ⲡⲟⲧⲉ ⲛⲧⲉⲡⲉⲧⲛϩⲏⲧ ⲣⲓⲕⲉ ⲛⲥⲱⲟⲩ ⲏ ⲛⲧⲉⲧⲛϫⲓ ⲉⲃⲟⲗ ϩⲙⲡⲁⲛⲁⲑⲉⲙⲁ ⲛⲧⲉⲧⲛⲉⲓⲣⲉ ⲛⲧⲥⲩⲛⲁⲅⲱⲅⲏ ⲧⲏⲣⲥ ⲛⲛϣⲏⲣⲉ ⲙⲡⲓⲥⲣⲁⲏⲗ ⲛⲃⲟⲧⲉ ⲛⲧⲉⲧⲛⲑⲙⲕⲟ ⲙⲙⲟⲛ

19 ⲁⲩⲱ ϩⲁⲧ ⲛⲓⲙ ϩⲓⲛⲟⲩⲃ ⲛⲓⲙ ϩⲓϩⲟⲙⲛⲧ ⲛⲓⲙ ϩⲓⲡⲉⲛⲓⲡⲉ ⲛⲓⲙ ⲉⲩⲉϣⲱⲡⲉ ⲉⲩⲧⲃⲃⲏⲩ ⲙⲡϫⲟⲉⲓⲥ ⲛⲥⲉϫⲓⲧⲟⲩ ⲉϩⲟⲩⲛ ⲉⲡⲁϩⲟ ⲙⲡϫⲟⲉⲓⲥ

20 ⲁⲩⲱ ⲁⲛⲟⲩⲏⲏⲃ ⲥⲁⲗⲡⲓⲍⲉ ϩⲛⲛⲉⲩⲥⲁⲗⲡⲓⲅⲝ ⲛⲧⲉⲣⲉⲡⲗⲁⲟⲥ ⲇⲉ ⲥⲱⲧⲙ ⲉⲡϩⲣⲟⲟⲩ ⲛⲛⲉⲧⲥⲁⲗⲡⲓⲍⲉ ⲡⲗⲁⲟⲥ ⲇⲉ ⲧⲏⲣϥ ϩⲓⲟⲩⲥⲟⲡ ⲁϥⲛⲉϫⲗⲟⲩⲗⲁⲓ ⲉⲃⲟⲗ ϩⲛⲟⲩⲛⲟϭ ⲛⲗⲟⲩⲗⲁⲓ ⲉϥⲛⲁϣⲧ ⲁⲩⲱ ⲡⲥⲟⲃⲧ ⲧⲏⲣϥ ⲛⲧⲡⲟⲗⲓⲥ ⲧⲏⲣⲥ ⲁϥϩⲉ ⲉϩⲣⲁⲓ ⲉⲡⲕⲱⲧⲉ ⲁⲩⲱ ⲡⲗⲁⲟⲥ ⲧⲏⲣϥ ⲁϥϯ ⲙⲡⲉⲩⲟⲩⲟⲓ ⲡⲟⲩⲁ ⲡⲟⲩⲁ ⲙⲡⲉϥⲙⲧⲟ ⲉⲃⲟⲗ ϩⲛⲟⲩⲥⲟⲟⲩⲧⲛ ⲉϩⲟⲩⲛ ⲉⲧⲡⲟⲗⲓⲥ ⲁⲩⲱ ⲁⲩⲣϫⲟⲉⲓⲥ ⲉⲧⲡⲟⲗⲓⲥ

21 ⲁⲩⲁⲁⲥ ⲛⲁⲛⲁⲑⲉⲙⲁ ⲁⲩⲱ ⲛⲕⲁ ⲛⲓⲙ ⲉⲧϣⲟⲟⲡ ϩⲛⲧⲡⲟⲗⲓⲥ ϫⲓⲛⲣⲱⲙⲉ ϣⲁϩⲣⲁⲓ ⲉⲥϩⲓⲙⲉ ϫⲓⲛⲟⲩⲕⲟⲩⲓ ϣⲁⲟⲩϩⲗⲗⲟ ⲁⲩⲱ ϣⲁϩⲣⲁⲓ ⲉⲩⲙⲁⲥⲉ ⲙⲛⲟⲩⲉⲥⲟⲟⲩ ⲙⲛⲟⲩϥⲁⲓⲛⲁϩⲃ ⲛⲁⲓ ⲧⲏⲣⲟⲩ ⲁⲩⲙⲟⲟⲩⲧⲟⲩ ϩⲛⲟⲩⲧⲁⲡⲣⲟ ⲛⲥⲏϥⲉ

22 ⲁⲩⲱ ⲡϩⲣϣⲓⲣⲉ ⲥⲛⲁⲩ ⲉⲛⲧⲁⲩⲙⲉϣⲧⲡⲕⲁϩ ⲡⲉϫⲉⲓⲏⲥⲟⲩⲥ ⲛⲁⲩ ϫⲉⲃⲱⲕ ⲉϩⲟⲩⲛ ⲉⲡⲏⲓ ⲛⲧⲉⲥϩⲓⲙⲉ ⲛⲧⲉⲧⲛⲛⲧⲥ ⲉⲃⲟⲗ ⲙⲡⲙⲁ ⲉⲧⲙⲙⲁⲩ ⲙⲛⲛⲉⲧϣⲟⲟⲡ ⲛⲁⲥ

23 ⲁⲩⲱ ⲡϩⲣϣⲏⲣⲉ ⲥⲛⲁⲩ ⲉⲛⲧⲁⲩⲙⲉϣⲧⲧⲡⲟⲗⲓⲥ ⲁⲩⲃⲱⲕ ⲉϩⲟⲩⲛ ⲉⲡⲏⲓ ⲛⲧⲉⲥϩⲓⲙⲉ ⲁⲩⲉⲓⲛⲉ ⲉⲃⲟⲗ ⲛϩⲣⲁⲁⲃ ⲧⲡⲟⲣⲛⲏ ⲁⲩⲱ ⲡⲉⲥⲓⲉⲱⲧ ⲙⲛⲧⲉⲥⲙⲁⲁⲩ ⲙⲛⲛⲉⲥⲥⲛⲏⲩ ⲙⲛⲧⲉⲥⲣⲁⲓⲧⲉ ⲧⲏⲣⲥ ⲙⲛⲛⲕⲁ ⲛⲓⲙ ⲉⲧϣⲟⲟⲡ ⲛⲁⲥ ⲁⲩⲧⲁϩⲟⲥ ⲉⲣⲁⲧⲥ ⲙⲡⲉⲙⲧⲟ ⲉⲃⲟⲗ ⲛⲧⲡⲁⲣⲉⲙⲃⲟⲗⲏ ⲙⲡⲓⲥⲣⲁⲏⲗ

24 ⲁⲩⲱ ⲧⲡⲟⲗⲓⲥ ⲁⲩϣⲱϥⲉ ϩⲛⲟⲩⲕⲣⲱⲙ ⲙⲛⲛⲉⲧⲛϩⲏⲧⲥ ⲧⲏⲣⲟⲩ ϣⲁⲧⲛ ⲡϩⲁⲧ ⲙⲛⲡⲛⲟⲩⲃ ⲁⲩⲱ ϩⲟⲙⲛⲧ ⲛⲓⲙ ϩⲓⲃⲉⲛⲓⲡⲉ ⲛⲓⲙ ⲁⲩⲧⲁⲁⲩ ⲉⲧⲣⲉⲩⲉⲛⲧⲟⲩ ⲉϩⲟⲩⲛ ⲉⲡⲁϩⲟ ⲙⲡϫⲟⲉⲓⲥ

25 ⲁⲩⲱ ϩⲣⲁⲁⲃ ⲧⲡⲟⲣⲛⲏ ⲙⲛⲡⲉⲥⲏⲓ ⲧⲏⲣϥ ⲙⲛⲡⲉⲥⲉⲓⲱⲧ ⲁⲓⲏⲥⲟⲩⲥ ⲧⲁⲛϩⲟⲟⲩ ⲁⲩⲱ ⲁϥⲧⲣⲉⲩⲟⲩⲟϩ ϩⲙⲡⲓⲥⲣⲁⲏⲗ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲁⲩⲱ ⲉⲃⲟⲗ ϫⲉϩⲣⲁⲁⲃ ⲁⲥϩⲱⲡ ⲛⲉⲛⲧⲁⲩⲙⲉϣⲧ ϩⲓⲉⲣⲓⲭⲱ

26 ⲁⲩⲱ ⲓⲏⲥⲟⲩⲥ ⲁϥⲣⲁⲛⲛⲁϣ ⲙⲡⲉϩⲟⲟⲩ ⲉⲧⲙⲙⲁⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉϥⲥϩⲟⲩⲟⲣⲧ ⲛϭⲓⲡⲣⲱⲙⲉ ⲡⲁⲓ ⲉⲧⲛⲁⲕⲱⲧ ⲛⲧⲡⲟⲗⲓⲥ ⲉⲧⲙⲙⲁⲩ ⲏ ⲛϥⲥⲙⲛⲥⲛⲧⲉ ⲙⲙⲟⲥ ϩⲙⲡⲉϥϣⲣⲡⲙⲙⲓⲥⲉ ⲁⲩⲱ ϩⲙⲡⲉϥⲕⲟⲩⲓ ⲛϣⲏⲣⲉ ⲛϥⲧⲁϩⲟ ⲉⲣⲁⲧⲟⲩ ⲛⲛⲉⲥⲡⲩⲗⲏ ⲁⲩⲱ ⲧⲁⲓ ⲧⲉ ⲧϩⲉ ⲉⲛⲧⲁϥⲁⲁϥ ⲛϭⲓⲱⲍⲁ ⲡⲉⲃⲟⲗ ϩⲛⲃⲁⲓⲑⲏⲗ ϩⲛⲁⲃⲓⲣⲱⲛ ⲡⲉϥϣⲣⲡⲙⲙⲓⲥⲉ ⲁϥⲥⲙⲛⲥⲛⲧⲉ ⲙⲙⲟⲥ ⲁⲩⲱ ϩⲙⲡⲕⲟⲩⲓ ⲉⲛⲧⲁϥⲟⲩϫⲁⲓ ⲁϥⲧⲁϩⲟ ⲉⲣⲁⲧⲟⲩ ⲛⲛⲉⲥⲡⲩⲗⲏ

27 ⲁⲩⲱ ⲡϫⲟⲉⲓⲥ ⲛⲛⲉϥϣⲟⲟⲡ ⲙⲛⲓⲏⲥⲟⲩⲥ ⲁⲩⲱ ⲡⲉϥⲣⲁⲛ ⲛⲉϥⲟ ⲛⲥⲟⲉⲓⲧ ϩⲙⲡⲕⲁϩ ⲧⲏⲣϥ