Read Joshua 16 side by side with translations · The Final Bible
1 ⲛⲧⲟϣ ⲇⲉ ⲛⲛϣⲏⲣⲉ ⲛⲓⲱⲥⲏϥ ⲁⲩϣⲱⲡⲉ ϫⲓⲛⲡⲓⲟⲣⲇⲁⲛⲏⲥ ⲡⲉⲧⲙⲡⲉⲙⲧⲟ ⲉⲃⲟⲗ ⲛϩⲓⲉⲣⲓⲭⲱ ϫⲓⲛⲙⲙⲁ ⲛϣⲁ ⲁⲩⲱ ⲥⲉⲛⲁⲉⲓ ⲉϩⲣⲁⲓ ϫⲓⲛϩⲓⲉⲣⲓⲭⲱ ⲉⲧⲟⲣⲓⲛⲏ ⲉⲧⲉⲣⲏⲙⲟⲥ ⲡⲕⲁϩ ⲉⲧϫⲟⲥⲉ ⲉϩⲣⲁⲓ ⲉⲃⲁⲓⲑⲓⲏⲗ ⲗⲟⲩⲍⲁ
2 ⲁⲩⲱ ⲥⲉⲛⲁⲉⲓ ⲉⲃⲟⲗ ⲉⲃⲁⲓⲑⲏⲗ ⲁⲩⲱ ⲥⲉⲛⲁⲛⲟⲩϫⲉ ⲉϫⲛⲛⲧⲟϣ ⲛⲁⲕⲕⲁⲣⲱⲛ
3 ⲁⲩⲱ ⲥⲉⲛⲁϫⲱⲧⲉ ⲉϫⲛⲧϩⲁⲗⲁⲥⲥⲁ ⲉϫⲛⲛⲛⲧⲟϣ ⲙⲡⲧⲁⲗⲁⲓⲙ ϣⲁϩⲣⲁⲓ ⲉⲛⲧⲟϣ ⲛⲃⲁⲓⲑⲟⲣⲱⲛ ⲧⲉⲧⲛϩⲙ ⲡϩⲃⲃⲉ ⲁⲩⲱ ⲡⲉⲩⲉⲓ ⲉⲃⲟⲗ ⲉϥⲛⲏⲩ ⲉϫⲛⲧϩⲁⲗⲁⲥⲥⲁ
4 ⲁⲩⲱ ⲁⲩⲕⲗⲏⲣⲟⲛⲟⲙⲉⲓ ⲛϭⲓⲛϣⲏⲣⲉ ⲛⲓⲱⲥⲏⲫ ⲛⲉⲫⲣⲁⲓⲙ ⲙⲛⲙⲁⲛⲁⲥⲥⲏ ⲕⲁⲧⲁⲛⲉⲩⲇⲏⲙⲟⲥ
5 ⲁⲩϣⲱⲡⲉ ⲛϭⲓⲛⲧⲟϣ ⲛⲧⲉⲩⲕⲗⲏⲣⲟⲛⲟⲙⲓⲁ ⲕⲁⲧⲁⲙⲁⲛϣⲁ ⲁⲧⲇⲁⲣⲱⲑ ⲙⲛⲟⲣⲟⲭ ϣⲁϩⲣⲁⲓ ⲉⲃⲉⲑⲟⲣⲱⲛ ⲧⲉⲧϩⲓ ⲧⲡⲉ ⲁⲩⲱ ⲅⲁⲍⲁⲣⲁ
6 ⲁⲩⲱ ⲥⲉⲛⲁϫⲱⲧⲉ ⲛϭⲓⲛⲧⲟϣ ⲉϫⲛⲧϩⲁⲗⲁⲥⲥⲁ ⲉϩⲣⲁⲓ ⲉⲓⲕⲁⲑⲙⲱⲛ ϫⲓⲛⲙⲡⲉⲙϩⲓⲧ ⲛⲑⲉⲣⲅⲁⲙ ⲥⲉⲛⲁⲟⲩⲱⲧⲃ ⲉⲙⲙⲁ ⲛϣⲁ ⲉϩⲣⲁⲓ ⲉⲑⲏⲛⲁⲥⲁ ⲙⲛⲥⲉⲗⲗⲏⲥⲁ ⲁⲩⲱ ⲥⲉⲛⲁϫⲱⲧⲉ ϫⲓⲛⲙⲙⲁ ⲛϣⲁ ⲉϩⲣⲁⲓ ⲉⲛⲁⲛⲱⲑⲁ
7 ⲁⲩⲱ ⲉϩⲣⲁⲓ ⲉⲙⲁⲣⲁⲭⲱ ⲁⲩⲱ ⲉⲧⲁⲣⲱⲑ ⲙⲛⲛⲉⲩⲕⲉⲧⲙⲉ ⲁⲩⲱ ⲥⲉⲛⲁⲉⲓ ⲉⲃⲟⲗ ϫⲓⲛϩⲓⲉⲣⲓⲭⲱ ⲁⲩⲱ ⲥⲉⲛⲁⲛⲟⲩϫⲉ ⲉⲃⲟⲗ ϫⲓⲛⲡⲓⲟⲣⲇⲁⲛⲏⲥ
8 ⲁⲩⲱ ϫⲓⲛⲧⲁⲫⲟⲩ ⲥⲉⲛⲁⲱⲥⲕ ⲛϭⲓⲛⲧⲟϣ ⲉϫⲛⲧϩⲁⲗⲁⲥⲥⲁ ⲁⲩⲱ ⲉϫⲛⲭⲉⲗⲕⲁⲛⲁ ⲁⲩⲱ ⲡⲉⲩⲉⲓ ⲉⲃⲟⲗ ⲉϫⲛⲧϩⲁⲗⲁⲥⲥⲁ ⲧⲁⲓ ⲧⲉ ⲧⲉⲕⲗⲏⲣⲟⲛⲟⲙⲓⲁ ⲛⲧⲉⲡϩⲩⲗⲏ ⲛⲉⲫⲣⲁⲓⲙ ⲕⲁⲧⲁⲛⲉⲩⲇⲏⲙⲟⲥ
9 ⲁⲩⲱ ⲙⲡⲟⲗⲓⲥ ⲉⲛⲧⲁⲩⲡⲟⲣϫⲟⲩ ⲉⲃⲟⲗ ⲛⲛϣⲏⲣⲉ ⲛⲉⲫⲣⲁⲓⲙ ϩⲛⲧⲙⲏⲧⲉ ⲛⲧⲉⲕⲗⲏⲣⲟⲛⲟⲙⲓⲁ ⲛⲛϣⲏⲣⲉ ⲙⲙⲁⲛⲁⲥⲥⲏ ⲙⲡⲟⲗⲓⲥ ⲧⲏⲣⲟⲩ ⲙⲛⲛⲉⲩⲕⲉⲧⲙⲉ
10 ⲁⲩⲱ ⲙⲡⲉⲉⲫⲣⲁⲓⲙ ⲧⲁⲕⲟ ⲙⲡⲉⲭⲁⲛⲁⲛⲁⲓⲟⲥ ⲡⲉⲧⲟⲩⲏϩ ϩⲛⲅⲁⲍⲉⲣ ⲁϥⲟⲩⲟϩ ⲙⲛⲉⲫⲣⲁⲓⲙ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ϣⲁⲛⲧϥⲉⲓ ⲉϩⲣⲁⲓ ⲛϭⲓⲫⲁⲣⲁⲱ ⲡⲣⲣⲟ ⲛⲕⲏⲙⲉ ⲛϥϫⲓⲧⲥ ⲛϥⲣⲟⲕϩⲥ ϩⲛⲟⲩⲥⲁⲧⲉ ⲁⲩⲱ ⲛⲉⲭⲁⲛⲁⲛⲁⲓⲟⲥ ⲙⲛⲛⲉⲫⲉⲣⲉⲍⲁⲓⲟⲥ ⲛⲉⲧⲟⲩⲏϩ ϩⲛⲅⲁⲍⲉⲣ ⲁϥⲧⲁⲕⲟⲟⲩ ⲁⲩⲱ ⲁϥⲧⲁⲁⲥ ⲛϭⲓⲫⲁⲣⲁⲱ ⲛϭⲣⲏϭⲉ ⲛⲧⲉϥϣⲉⲉⲣⲉ
Joshua 15 · Joshua 17 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)