Joshua 1 — Coptic (Sahidic)

1 ⲁⲥϣⲱⲡⲉ ⲇⲉ ⲙⲛⲛⲥⲁⲧⲣⲉϥⲙⲟⲩ ⲛϭⲓⲙⲱⲩⲥⲏⲥ ⲡϩⲙϩⲁⲗ ⲙⲡϫⲟⲉⲓⲥ ⲡⲉϫⲉⲡϫⲟⲉⲓⲥ ⲛⲓⲏⲥⲟⲩⲥ ⲡϣⲏⲣⲉ ⲛⲛⲁⲩⲏ ⲡϣⲙϣⲓⲧ ⲙⲙⲱⲩⲥⲏⲥ ⲉϥϫⲱ ⲙⲙⲟⲥ ⲛⲁϥ

2 ϫⲉⲙⲱⲩⲥⲏⲥ ⲡⲁϩⲙϩⲁⲗ ⲁϥⲙⲟⲩ ⲧⲉⲛⲟⲩ ϭⲉ ⲧⲱⲟⲩⲛ ⲛⲅϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲛⲧⲟⲕ ⲙⲛⲡⲉⲓⲗⲁⲟⲥ ⲧⲏⲣϥ ⲉϩⲟⲩⲛ ⲉⲡⲕⲁϩ ⲡⲁⲓ ⲁⲛⲟⲕ ⲉϯⲛⲁⲧⲁⲁϥ ⲛⲁⲩ

3 ⲙⲁ ⲛⲓⲙ ⲛⲧⲉⲣⲉⲛⲧⲁϭⲥⲉ ⲛⲛⲉⲧⲛⲟⲩⲉⲣⲏⲧⲉ ⲛⲁϣⲱⲡⲉ ϩⲓϫⲱϥ ϯⲛⲁⲧⲁⲁϥ ⲛⲏⲧⲛ ⲕⲁⲧⲁⲧϩⲉ ⲉⲛⲧⲁⲓϫⲟⲟⲥ ⲙⲙⲱⲩⲥⲏⲥ

4 ⲧⲉⲣⲏⲙⲟⲥ ⲁⲩⲱ ⲡⲁⲛⲧⲓⲗⲓⲃⲁⲛⲟⲥ ϣⲁϩⲣⲁⲓ ⲉⲡⲛⲟϭ ⲛⲓⲉⲣⲟ ⲡⲉⲩⲫⲣⲁⲧⲏⲥ ⲁⲩⲱ ϣⲁϩⲣⲁⲓ ⲉⲧⲉⲑⲁⲗⲁⲥⲥⲁ ⲛϩⲁⲏ ϫⲓⲛⲡⲙⲁ ⲛϩⲱⲧⲡ ⲙⲡⲣⲏ ⲉⲣⲉⲛⲉⲧⲛⲧⲟϣ ⲛⲁϣⲱⲡⲉ ⲛⲏⲧⲛ

5 ⲛⲛⲉⲗⲁⲁⲩ ⲛⲣⲱⲙⲉ ⲁϩⲉⲣⲁⲧϥ ⲉϯ ⲟⲩⲃⲉⲧⲏⲩⲧⲛ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉⲕⲱⲛϩ ⲁⲩⲱ ⲛⲧϩⲉ ⲉⲛⲧⲁⲓϣⲱⲡⲉ ⲙⲛⲙⲱⲩⲥⲏⲥ ⲧⲁⲓ ⲧⲉ ⲧϩⲉ ⲉϯⲛⲁϣⲱⲡⲉ ⲛⲙⲙⲁⲕ ϩⲱⲱⲕ ⲁⲩⲱ ⲛϯⲛⲁⲕⲁⲁⲕ ⲛⲥⲱⲓ ⲁⲛ ⲟⲩⲇⲉ ⲛϯⲛⲁⲱⲃϣ ⲁⲛ ⲉⲣⲟⲕ

6 ⲧⲱⲕ ⲁⲩⲱ ⲛⲅⲧⲁϫⲣⲟ ⲛⲧⲟⲕ ⲅⲁⲣ ⲡⲉⲧⲛⲁⲡⲱϣ ⲉϫⲙⲡⲉⲓⲗⲁⲟⲥ ⲙⲡⲕⲁϩ ⲡⲁⲓ ⲛⲧⲁⲓⲱⲣⲕ ⲙⲙⲟϥ ⲛⲛⲉⲧⲛⲉⲓⲟⲧⲉ ⲉⲧⲣⲁⲧⲁⲁϥ ⲛⲁⲩ

7 ⲧⲱⲕ ϭⲉ ⲁⲩⲱ ⲛⲅϭⲙϭⲟⲙ ⲉⲧⲣⲉⲕϩⲁⲣⲉϩ ⲁⲩⲱ ⲛⲅⲉⲓⲣⲉ ⲕⲁⲧⲁⲧϩⲉ ⲉⲛⲧⲁϥϩⲱⲛ ⲉⲧⲟⲟⲧⲕ ⲛϭⲓⲙⲱⲩⲥⲏⲥ ⲡⲁϩⲙϩⲁⲗ ⲁⲩⲱ ⲛⲛⲉⲕⲣⲁⲕⲧⲕ ⲉⲃⲟⲗ ⲙⲙⲟⲟⲩ ⲉⲟⲩⲛⲁⲙ ⲏ ⲉϩⲃⲟⲩⲣ ϫⲉⲕⲁⲥ ⲉⲕⲉⲉⲓⲙⲉ ⲉϩⲱⲃ ⲛⲓⲙ ⲉⲧⲕⲛⲁⲁⲁⲩ

8 ⲁⲩⲱ ⲛⲛⲉⲡϫⲱⲱⲙⲉ ⲙⲡⲉⲓⲛⲟⲙⲟⲥ ⲥⲁϩⲱϥ ⲉⲃⲟⲗ ⲛⲧⲉⲕⲧⲁⲡⲣⲟ ⲁⲩⲱ ⲉⲕⲉⲙⲉⲗⲉⲧⲁ ⲛϩⲏⲧϥ ⲙⲡⲉϩⲟⲟⲩ ⲙⲛⲧⲉⲩϣⲏ ϫⲉⲕⲁⲥ ⲉⲕⲉⲉⲓⲙⲉ ⲉⲉⲓⲣⲉ ⲛϩⲱⲃ ⲛⲓⲙ ⲉⲧⲥⲏϩ ⲛϩⲏⲧϥ ⲁⲩⲱ ⲧⲉⲕϩⲓⲏ ⲛⲁⲥⲟⲟⲩⲧⲛ ⲛⲧⲉⲡϫⲟⲉⲓⲥ ⲥⲟⲟⲩⲧⲛⲛⲉⲕϩⲓⲟⲟⲩⲉ ⲧⲏⲣⲟⲩ ⲁⲩⲱ ⲧⲟⲧⲉ ⲕⲛⲁⲛⲟⲉⲓ

9 ⲉⲓⲥ ϩⲏⲏⲧⲉ ϯϩⲱⲛ ⲉⲧⲟⲟⲧⲕ ⲧⲁϫⲣⲟ ⲁⲩⲱ ⲛⲅϭⲙϭⲟⲙ ⲙⲡⲣϣⲗⲁϩ ⲁⲩⲱ ⲙⲡⲣⲣϩⲟⲧⲉ ⲉⲃⲟⲗ ϫⲉϥⲛⲙⲙⲁⲕ ⲛϭⲓⲡϫⲟⲉⲓⲥ ⲡⲉⲕⲛⲟⲩⲧⲉ ϩⲛⲙⲁ ⲛⲓⲙ ⲉⲧⲕⲛⲁⲃⲱⲕ ⲉⲣⲟⲟⲩ

10 ⲁⲩⲱ ⲓⲏⲥⲟⲩⲥ ⲁϥϩⲱⲛ ⲉⲧⲟⲟⲧⲟⲩ ⲉⲛⲉⲅⲣⲁⲙⲙⲁⲧⲉⲩⲥ ⲙⲡⲗⲁⲟⲥ ⲉϥϫⲱ ⲙⲙⲟⲥ ⲛⲁⲩ

11 ϫⲉⲃⲱⲕ ⲉϩⲟⲩⲛ ⲉⲧⲙⲏⲧⲉ ⲛⲧⲡⲁⲣⲉⲙⲃⲟⲗⲏ ⲙⲡⲗⲁⲟⲥ ⲁⲩⲱ ⲛⲧⲉⲧⲛϩⲱⲛ ⲉⲧⲟⲟⲧϥ ⲙⲡⲗⲁⲟⲥ ⲉⲧⲉⲧⲛϫⲱ ⲙⲙⲟⲥ ⲛⲁⲩ ϫⲉⲥⲟⲃⲧⲉ ⲛⲏⲧⲛ ⲙⲡⲉⲧⲉⲧⲛⲛⲁⲟⲩⲟⲙⲟⲩ ϫⲉⲉⲧⲓ ⲕⲉϣⲟⲙⲧ ⲛϩⲟⲟⲩ ⲛⲧⲱⲧⲛ ⲧⲉⲧⲛⲁϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲛⲧⲉⲧⲛⲃⲱⲕ ⲉϩⲟⲩⲛ ⲉⲕⲗⲏⲣⲟⲛⲟⲙⲉⲓ ⲙⲡⲕⲁϩ ⲡⲁⲓ ⲉⲧⲉⲣⲉⲡϫⲟⲉⲓⲥ ⲡⲉⲧⲛⲛⲟⲩⲧⲉ ⲛⲁⲧⲁⲁϥ ⲛⲏⲧⲛ

12 ⲁⲩⲱ ⲡⲉϫⲉⲓⲏⲥⲟⲩⲥ ⲛⲧⲉⲡϩⲩⲗⲏ ⲛϩⲣⲟⲩⲃⲏⲛ ⲙⲛⲧⲉⲫⲩⲗⲏ ⲛⲅⲁⲇ ⲙⲛⲧⲡⲁϣⲉ ⲛⲧⲫⲩⲗⲏ ⲙⲙⲁⲛⲁⲥⲥⲏ ⲉϥϫⲱ ⲙⲙⲟⲥ ⲛⲁⲩ ϫⲉ

13 ⲁⲣⲓⲡⲙⲉⲉⲩⲉ ⲙⲡϣⲁϫⲉ ⲙⲡϫⲟⲉⲓⲥ ⲡⲁⲓ ⲉⲛⲧⲁⲙⲱⲩⲥⲏⲥ ⲡϩⲙϩⲁⲗ ⲙⲡϫⲟⲉⲓⲥ ϩⲱⲛ ⲙⲙⲟϥ ⲉⲧⲉⲧⲏⲩⲧⲛ ⲉϥϫⲱ ⲙⲙⲟⲥ ϫⲉⲡϫⲟⲉⲓⲥ ⲡⲉⲧⲛⲛⲟⲩⲧⲉ ⲁϥⲙⲉⲧⲉⲧⲏⲩⲧⲛ ⲁⲩⲱ ⲁϥϯ ⲛⲏⲧⲛ ⲙⲡⲉⲓⲕⲁϩ

14 ⲛⲉⲧⲛϩⲓⲟⲙⲉ ⲙⲛⲛⲉⲧⲛϣⲏⲣⲉ ⲙⲛⲛⲉⲧⲛⲧⲃⲛⲟⲟⲩⲉ ⲙⲁⲣⲟⲩⲟⲩⲱϩ ϩⲙⲡⲕⲁϩ ⲡⲁⲓ ⲉⲛⲧⲁⲓⲧⲁⲁϥ ⲛⲏⲧⲛ ⲛⲧⲱⲧⲛ ⲇⲉ ϩⲉⲕⲧⲏⲩⲧⲛ ⲛⲧⲉⲧⲛϫⲓⲟⲟⲣ ϩⲓⲧϩⲏ ⲛⲛⲉⲧⲛⲥⲛⲏⲩ ⲟⲩⲟⲛ ⲛⲓⲙ ⲉⲧϭⲛⲧϭⲟⲙ ⲛⲧⲉⲧⲛϩⲉⲕⲧⲏⲩⲧⲛ ⲛⲧⲉⲧⲛϯⲧⲟⲟⲧⲧⲏⲩⲧⲛ ⲛⲙⲙⲁⲩ ⲉⲙⲓϣⲉ ⲉϩⲣⲁⲓ ⲉϫⲱⲟⲩ

15 ϣⲁⲛⲧⲉⲡϫⲟⲉⲓⲥ ⲡⲉⲧⲛⲛⲟⲩⲧⲉ ⲙⲉⲧⲛⲛⲉⲧⲛⲥⲛⲏⲩ ⲛⲧⲉⲧⲛϩⲉ ϩⲱⲧⲧⲏⲩⲧⲛ ⲁⲩⲱ ⲛⲧⲉⲛⲁⲓ ϩⲱⲟⲩ ⲕⲗⲏⲣⲟⲛⲟⲙⲉⲓ ⲙⲡⲕⲁϩ ⲡⲁⲓ ⲉⲧⲉⲡⲉⲛϫⲟⲉⲓⲥ ⲡⲉⲛⲛⲟⲩⲧⲉ ⲛⲁⲧⲁⲁϥ ⲛⲁⲩ ⲁⲩⲱ ⲛⲧⲉⲧⲛⲃⲱⲕ ⲡⲟⲩⲁ ⲡⲟⲩⲁ ⲙⲙⲱⲧⲛ ⲉϩⲣⲁⲓ ⲉⲧⲉϥⲕⲗⲏⲣⲟⲛⲟⲙⲓⲁ ⲧⲁⲓ ⲉⲛⲧⲁⲙⲱⲩⲥⲏⲥ ⲧⲁⲁⲥ ⲛⲏⲧⲛ ϩⲙⲡⲉⲕⲣⲟ ⲙⲡⲓⲟⲣⲇⲁⲛⲏⲥ ϫⲓⲛⲙⲙⲁ ⲛϣⲁ ⲙⲡⲣⲏ

16 ⲁⲩⲱ ⲁⲩⲟⲩⲱϣⲃ ⲛⲓⲏⲥⲟⲩⲥ ⲉⲩϫⲱ ⲙⲙⲟⲥ ⲛⲁϥ ϫⲉϩⲱⲃ ⲛⲓⲙ ⲉⲧⲕⲛⲁϩⲟⲛⲟⲩ ⲉⲧⲟⲟⲧⲛ ⲧⲛⲛⲁⲁⲁⲩ ⲁⲩⲱ ⲙⲁ ⲛⲓⲙ ⲉⲧⲕⲛⲁϫⲟⲟⲩⲛ ⲉⲣⲟⲟⲩ ⲧⲛⲛⲁⲃⲱⲕ ⲉϩⲟⲩⲛ ⲉⲣⲟⲟⲩ

17 ⲕⲁⲧⲁϩⲱⲃ ⲛⲓⲙ ⲉⲛⲧⲁⲛⲥⲱⲧⲙ ⲛⲥⲁⲙⲱⲩⲥⲏⲥ ⲛϩⲏⲧⲟⲩ ⲛⲧⲉⲓϩⲉ ⲧⲉⲛⲛⲁⲥⲱⲧⲙ ⲛⲥⲱⲕ ϩⲱⲱⲕ ⲡⲗⲏⲛ ⲙⲁⲣⲉⲡϫⲟⲉⲓⲥ ⲡⲉⲛⲛⲟⲩⲧⲉ ϣⲱⲡⲉ ⲛⲙⲙⲁⲕ ⲕⲁⲧⲁⲧϩⲉ ⲉⲛⲧⲁϥϣⲱⲡⲉ ⲙⲛⲙⲱⲩⲥⲏⲥ

18 ⲡⲣⲱⲙⲉ ⲇⲉ ⲉⲧⲉⲛϥⲛⲁϩⲉ ⲁⲛ ⲉⲣⲟⲕ ⲁⲩⲱ ⲡⲉⲧⲉⲛϥⲛⲁⲥⲱⲧⲙ ⲁⲛ ⲛⲥⲁⲛⲉⲕϣⲁϫⲉ ⲕⲁⲧⲁⲧϩⲉ ⲉⲧⲕⲛⲁϩⲱⲛ ⲉⲧⲟⲟⲧϥ ⲙⲁⲣⲉϥⲙⲟⲩ ⲁⲗⲗⲁ ⲧⲱⲕ ⲁⲩⲱ ⲛⲅϭⲙϭⲟⲙ