Read Job 13 side by side with translations · The Final Bible
1 ⲉⲓⲥ ϩⲏⲏⲧⲉ ⲁⲡⲁⲃⲁⲗ ⲛⲁⲩ ⲉⲛⲁⲓ ⲁⲩⲱ ⲁⲡⲁⲙⲁⲁϫⲉ ⲥⲟⲧⲙⲟⲩ
2 ⲁⲩⲱ ϯⲥⲟⲟⲩⲛ ⲛⲛⲉⲧⲉⲧⲛⲥⲟⲟⲩⲛ ⲙⲙⲟⲟⲩ ⲁⲩⲱ ⲁⲛⲅ ⲟⲩⲁⲧϩⲏⲧ ⲁⲛ ⲛϩⲟⲩⲟ ⲉⲣⲱⲧⲛ
3 ⲙⲙⲟⲛ ⲇⲉ ⲁⲗⲗⲁ ϯⲛⲁϣⲁϫⲉ ⲙⲛⲡϫⲟⲉⲓⲥ ϯⲛⲁϫⲡⲓⲟ ⲇⲉ ⲙⲡⲉϥⲙⲧⲟ ⲉⲃⲟⲗ ⲉϣⲱⲡⲉ ⲉϩⲛⲁϥ
4 ⲛⲧⲱⲧⲛ ⲇⲉ ⲛⲧⲉⲧⲛϩⲉⲛⲥⲁⲉⲓⲛ ⲛⲣⲉϥϫⲓⲛϭⲟⲛⲥ ⲁⲩⲱ ⲛⲣⲉϥⲧⲁⲗϭⲟ ⲛⲛⲉⲧϩⲟⲟⲩ ⲧⲏⲣⲟⲩ
5 ⲉⲥⲉϣⲱⲡⲉ ⲇⲉ ⲛⲧⲉⲧⲛⲕⲁⲣⲟⲩⲧⲛ ⲛⲥⲱⲡ ⲉⲣⲱⲧⲛ ⲉⲩⲥⲟⲫⲓⲁ
6 ⲥⲱⲧⲙ ⲉⲡⲉϫⲡⲓⲟ ⲛⲣⲱⲓ ϯϩⲧⲏⲧⲛ ⲇⲉ ⲉⲡϩⲁⲡ ⲛⲛⲁⲥⲡⲟⲧⲟⲩ
7 ⲙⲏ ⲉⲧⲉⲧⲛϣⲁϫⲉ ⲁⲛ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲁⲩⲱ ⲉⲧⲉⲧⲛϫⲱ ⲛⲟⲩϣⲁϫⲉ ⲙⲡⲉϥⲙⲧⲟ ⲉⲃⲟⲗ
8 ⲏ ⲙⲙⲟⲛ ⲧⲉⲧⲛⲛⲁϣϩⲱⲡ ⲛⲧⲱⲧⲛ ⲇⲉ ϯϩⲁⲡ
9 ⲛⲁⲛⲟⲩⲥ ⲅⲁⲣ ⲉϥϣⲁⲛⲙⲉϣⲧ ⲧⲏⲩⲧⲛ ϫⲉⲧⲉⲧⲛⲉⲓⲣⲉ ⲅⲁⲣ ⲛⲛⲁⲓ ⲧⲏⲣⲟⲩ ⲧⲉⲧⲛⲧⲱϭⲉ ⲙⲙⲱⲧⲛ ⲉⲣⲟϥ
10 ⲉⲓⲏ ⲛϥⲛⲁϫⲡⲓⲉ ⲧⲉⲩⲧⲛ ⲁⲛ ⲉϣϫⲉ ⲧⲉⲧⲛϫⲓϩⲟ ⲇⲉ ϩⲙⲡϩⲱⲡ
11 ⲙⲏ ⲛⲉⲧⲛⲁϣⲧ ⲛⲧⲟⲟⲧϥ ⲛⲁϣⲧⲣⲧⲣ ⲧⲏⲩⲧⲛ ⲁⲛ ⲧϩⲟⲧⲉ ⲇⲉ ⲛⲁϩⲉ ⲉϫⲱⲧⲛ ⲉⲃⲟⲗϩⲓⲧⲟⲟⲧϥ
12 ⲡⲉⲧⲛϣⲟⲩϣⲟⲩ ⲇⲉ ⲛⲁⲣ ⲧϩⲉ ⲛⲏⲧⲛ ⲛⲟⲩⲕⲉⲣⲙⲉⲥ ⲁⲩⲱ ⲡⲉⲧⲛⲥⲱⲙⲁ ⲛⲕⲁϩ
13 ⲕⲁⲣⲱⲧⲛ ⲧⲁϣⲁϫⲉ ⲧⲁⲟⲩⲉϩ ⲛⲁⲓ ⲙⲡⲁϭⲱⲛⲧ
14 ⲧⲁⲙⲉϩⲣⲱⲓ ⲛⲛⲁⲥⲁⲣⲝ ⲧⲁⲕⲁⲧⲁⲯⲩⲭⲏ ϩⲛⲛⲁϭⲓϫ
15 ⲉⲣϣⲁⲛⲡϫⲱⲱⲣⲉ ⲇⲉ ⲧⲁⲕⲟⲓ ⲉⲃⲟⲗ ϫⲉⲁϥⲁⲣⲭⲉⲓ ⲏ ⲙⲙⲟⲛ ϯⲛⲁϣⲁϫⲉ ⲧⲁϫⲡⲓⲟ ⲙⲡⲉϥⲙⲧⲟ ⲉⲃⲟⲗ
16 ⲁⲩⲱ ⲡⲁⲓ ⲛⲁϣⲱⲡⲉ ⲛⲁⲓ ⲛⲟⲩϫⲁⲓ ⲙⲛⲕⲣⲟϥ ⲅⲁⲣ ⲛⲁⲃⲱⲕ ⲉϩⲟⲩⲛ ⲙⲡⲉϥⲙⲧⲟ ⲉⲃⲟⲗ
17 ⲥⲱⲧⲙ ⲥⲱⲧⲙ ⲉⲛⲁϣⲁϫⲉ ϯⲛⲁϣⲁϫⲉ ⲅⲁⲣ ⲉⲧⲉⲧⲛⲥⲱⲧⲙ
18 ⲉⲓⲥ ϩⲏⲏⲧⲉ ϯϩⲏⲛ ⲉϩⲟⲩⲛ ⲉⲡϩⲁⲡ ϯⲥⲟⲟⲩⲛ ⲇⲉ ϫⲉϯⲛⲁⲟⲩⲱⲛϩ ⲉⲃⲟⲗ ⲛⲇⲓⲕⲁⲓⲟⲥ
19 ⲛⲓⲙ ⲅⲁⲣ ⲡⲉⲧⲛⲁϫⲓϩⲁⲡ ⲛⲙⲙⲁⲓ
20 ϥⲛⲁⲉⲓⲣⲉ ⲇⲉ ⲛⲁⲓ ⲛⲥⲛⲁⲩ
21 ⲥⲁϩⲉⲧⲉⲕϭⲓϫ ⲉⲃⲟⲗ ⲙⲙⲟⲓ ⲁⲩⲱ ⲙⲡⲣⲧⲣⲉⲧⲉⲕϩⲟⲧⲉ ϣⲧⲣⲧⲱⲣⲧ
22 ⲁⲩⲱ ⲕⲛⲁⲙⲟⲩⲧⲉ ⲡⲉⲧⲛⲁⲥⲱⲧⲙ ⲉⲣⲟⲕ ⲏ ⲉⲕⲛⲁϣⲁϫⲉ ⲁⲛⲟⲕ ⲇⲉ ϯⲛⲁⲟⲩⲱϣⲃⲉⲕ
23 ⲟⲩⲏⲣ ⲛⲉ ⲛⲁⲛⲟⲃⲉ ⲙⲛⲛⲁⲁⲛⲟⲙⲓⲁ ⲙⲁⲧⲥⲁⲃⲟⲓ ϫⲉⲟⲩ ⲛⲉ
24 ⲉⲧⲃⲉⲟⲩ ⲕϩⲱⲡ ⲉⲣⲟⲓ ⲁⲕⲕⲁⲁⲧ ⲇⲉ ⲟⲩⲃⲏⲕ
25 ⲙⲏ ⲉⲕⲛⲁⲣϩⲟⲧⲉ ⲛⲧϩⲉ ⲉϣⲁⲣⲉⲟⲩϭⲱⲃⲉ ⲕⲓⲙ ϩⲓⲧⲛⲟⲩⲧⲏⲩ ⲏ ⲉⲕⲛⲁϯ ⲟⲩⲃⲏⲓ ⲛⲧϩⲉ ⲛⲟⲩⲭⲟⲣⲧⲟⲥ ⲉⲣⲉⲟⲩⲧⲏⲩ ϥⲓ ⲙⲙⲟϥ
26 ϫⲉⲁⲕⲥϩⲁⲓ ⲛϩⲉⲛⲡⲉⲧϩⲟⲟⲩ ⲉⲣⲟⲓ ⲁⲕⲕⲱ ⲇⲉ ⲉϫⲱⲓ ⲛⲛⲛⲟⲃⲉ ⲛⲧⲁⲙⲛⲧⲕⲟⲩⲓ
27 ⲁⲕⲕⲁ ⲧⲁⲟⲩⲏⲣⲉ ⲇⲉ ϩⲓⲟⲩϫⲣⲟⲡ ⲁⲕϩⲁⲣⲉϩ ⲇⲉ ⲉⲛⲁϩⲃⲏⲩⲉ ⲧⲏⲣⲟⲩ ⲁⲕⲡⲱϩ ⲇⲉ ⲉⲁⲣⲏϫⲛⲟⲩ ⲛⲛⲁⲟⲩⲏⲣⲏⲧⲉ
28 ⲛⲁⲓ ⲉϣⲁⲩϩⲓⲧⲉ ⲛⲧϩⲉ ⲛⲛⲉⲓⲁⲥⲕⲱⲥ ⲏ ⲛⲧϩⲉ ⲛⲟⲩϩⲟⲓⲧⲉ ⲉⲁϥⲣϩⲟⲟⲗⲉ
Job 12 · Job 14 · Hebrew (Masoretic) · Greek (Septuagint / SBLGNT) · Aramaic (Peshitta) · Latin (Vulgate)