Jeremiah 29 — Coptic (Sahidic)

1 ⲡϣⲁϫⲉ ⲉϫⲛⲛⲁⲗⲗⲟⲫⲩⲗⲟⲥ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ

2 ϫⲉⲉⲓⲥϩⲛⲙⲟⲟⲩ ⲥⲉⲛⲏⲩ ⲉⲃⲟⲗ ϩⲙⲡⲙϩⲓⲧ ⲛⲥⲉϣⲱⲡⲉ ⲉϩⲛⲙⲟⲩ ⲛⲥⲱⲣⲙ ⲉⲛⲁϣⲱⲟⲩ ⲛⲥⲉϩⲱⲃⲥ ⲙⲡⲕⲁϩ ⲙⲛⲡⲉϥϫⲱⲕ ⲉⲃⲟⲗ ⲟⲩⲡⲟⲗⲓⲥ ⲙⲛⲛⲉⲧϣⲟⲟⲡ ⲛϩⲏⲧⲥ ⲛⲥⲉⲱϣ ⲉⲃⲟⲗ ⲛϭⲓⲛⲣⲱⲙⲉ ⲛⲥⲉⲁϣϣⲕⲁⲕ ⲧⲏⲣⲟⲩ ⲛϭⲓⲛⲉⲧⲟⲩⲏϩ ϩⲓϫⲙⲡⲕⲁϩ

3 ⲉⲃⲟⲗ ⲙⲡⲉϩⲣⲟⲟⲩ ⲛⲧⲉϥϩⲟⲣⲙⲏ ⲉⲃⲟⲗ ⲙⲡⲉϩⲣⲟⲟⲩ ⲛⲛⲉⲓⲉⲓⲃ ⲛⲛⲉϥⲟⲩⲉⲣⲏⲧⲉ ⲁⲩⲱ ⲉⲃⲟⲗ ϩⲙⲡⲛⲟⲉⲓⲛ ⲛⲛⲉϥϩⲁⲣⲙⲁ ⲡⲉϩⲣⲟⲟⲩ ⲛⲛⲉϥⲧⲣⲟⲭⲟⲥ ⲙⲡⲟⲩⲕⲟⲧⲟⲩ ⲛϭⲓⲛⲉⲓⲟⲧⲉ ⲉⲛⲉⲩϣⲏⲣⲉ ⲉⲃⲟⲗ ϩⲙⲡⲃⲱⲗ ⲉⲃⲟⲗ ⲛⲛⲉⲩϭⲓϫ

4 ϩⲙⲡⲉϩⲟⲟⲩ ⲉⲧⲛⲏⲩ ⲉⲧⲁⲕⲟ ⲛⲛⲁⲗⲗⲟⲫⲩⲗⲟⲥ ⲧⲏⲣⲟⲩ ⲁⲩⲱ ϯⲛⲁⲧⲁⲕⲉⲧⲩⲣⲟⲥ ⲙⲛⲥⲓⲇⲱⲛ ⲙⲛⲡϣⲱϫⲡ ⲧⲏⲣϥ ⲛⲧⲉⲩⲃⲟⲏⲑⲓⲁ ϫⲉⲡϫⲟⲉⲓⲥ ⲛⲁϥⲱⲧⲉ ⲉⲃⲟⲗ ⲙⲡϣⲱϫⲡ ⲛⲛⲛⲏⲥⲟⲥ

5 ϫⲉⲟⲩⲙⲛⲧⲟⲩⲥ ⲁⲥⲉⲓ ⲉϫⲛⲅⲁⲍⲁ ⲁⲩⲛⲉϫⲁⲥⲕⲁⲗⲱⲛ ⲉⲃⲟⲗ ⲙⲡϣⲱϫⲡ ⲉⲧⲟⲩⲏϩ ϩⲛⲛⲁⲕⲓⲙ

6 ϣⲁⲧⲛⲁⲩ ⲧⲉϩⲱⲧⲃ ⲧⲥⲏϥⲉ ⲙⲡϫⲟⲉⲓⲥ ϣⲁⲧⲛⲁⲩ ⲛⲧⲉⲛⲁϩⲣⲟⲕ ⲁⲛ ⲕⲟⲧⲉ ⲉⲡⲟⲩⲕⲟⲉⲓϩ ⲛⲧⲉⲙⲧⲟⲛ ⲙⲙⲟⲛⲧⲉϣⲟⲩϣⲟⲩ ⲙⲙⲟ

7 ⲛⲁϣ ⲛϩⲉ ⲉⲥⲛⲁϭⲱ ⲡϫⲟⲉⲓⲥ ⲡⲉⲛⲧⲁϥϩⲱⲛ ⲉⲧⲟⲟⲧⲥ ⲉⲧⲣⲉⲥⲧⲱⲟⲩⲛ ⲉϫⲛⲁⲥⲕⲁⲗⲱⲛ ⲁⲩⲱ ⲉϫⲛⲙⲙⲁ ⲉⲧϩⲓϫⲛⲛⲉⲑⲁⲗⲁⲥⲥⲁ ⲙⲛⲛⲕⲉⲥⲉⲉⲡⲉ ⲛⲙⲡⲟⲗⲓⲥ