Jeremiah 21 — Aramaic (Peshitta)

1 ܦܬܓܡܐ ܕܗܘܐ ܥܠ ܐܪܡܝܐ ܡܢ ܩܕܡ ܡܪܝܐ ܟܕ ܫܕܪ ܠܘܬܗ ܨܕܩܝܐ ܡܠܟܐ ܠܦܫܚܘܪ ܒܪ ܡܠܟܝܐ ܘܠܨܦܢܝܐ ܒܪ ܡܥܣܝܐ ܟܗ̈ܢܐ ܠܡܐܡܪ

2 ܒܥܝ ܥܠܝܢ ܡܢ ܡܪܝܐ ܡܛܠ ܕܢܒܘܟܕܢܨܪ ܡܠܟܐ ܕܒܒܠ ܡܬܟܬܫ ܥܡܢ ܛܟ ܢܥܒܕ ܥܡܢ ܡܪܝܐ ܐܝܟ ܟܠܗܝܢ ܬܕܡܪ̈ܬܗ ܘܢܦܪܩܝܘܗܝ ܡܢܢ

3 ܘܐܡܪ ܠܗܘܢ ܐܪܡܝܐ ܗܟܢܐ ܬܐܡܪܘܢ ܠܨܕܩܝܐ ܡܠܟܐ

4 ܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ ܗܐ ܡܗܦܟ ܐܢܐ ܡܐ̈ܢܝ ܩܪܒܐ ܕܒܐ̈ܝܕܝܟܘܢ ܕܡܬܟܬܫܝܢ ܐܢܬܘܢ ܒܗܘܢ ܥܡ ܡܠܟܐ ܕܒܒܠ ܘܥܡ ܟ̈ܠܕܝܐ ܕܟܪ̈ܝܟܝܢ ܠܟܘܢ ܠܒܪ ܡܢ ܩܪܝܬܐ ܘܐܟܢܫ ܐܢܘܢ ܠܓܘ ܩܪܝܬܐ ܗܕܐ

5 ܘܐܬܟܬܫ ܐܢܐ ܥܡܟܘܢ ܒܐܝܕܐ ܬܩܝܦܬܐ ܘܒܕܪܥܐ ܪܡܐ ܒܪܘܓܙܐ ܘܒܚܡܬܐ ܘܒܪܘܓܙܐ ܪܒܐ

6 ܐܡܚܐ ܠܝܬ̈ܒܝ ܩܪܝܬܐ ܗܕܐ ܒܢ̈ܝ ܐܢܫܐ ܘܒܥܝܪܐ ܒܡܘܬܐ ܪܒܐ ܢܡܘܬܘܢ

7 ܘܒܬܪܟܢ ܐܡܪ ܡܪܝܐ ܐܫܠܡܝܘܗܝ ܠܨܕܩܝܐ ܡܠܟܐ ܕܝܗܘܕܐ ܘܠܥܒ̈ܕܘܗܝ ܘܠܥܡܐ ܕܐܫܬܚܪܘ ܒܩܪܝܬܐ ܗܕܐ ܡܢ ܚܪܒܐ ܘܡܢ ܟܦܢܐ ܘܡܢ ܡܘܬܢܐ ܐܫܠܡ ܒܐܝܕܐ ܕܢܒܘܟܕܢܨܪ ܡܠܟܐ ܕܒܒܠ ܘܒܐܝܕܐ ܕܒ̈ܥܠܕܒܒܝܗܘܢ ܘܒܐܝܕܐ ܕܐܝܠܝܢ ܕܒܥܝܢ ܢܦܫܗܘܢ ܘܢܡܚܐ ܐܢܘܢ ܒܦܘܡܐ ܕܚܪܒܐ ܘܠܐ ܢܚܘܣ ܥܠܝܗܘܢ ܘܠܐ ܢܪܚܦ ܘܠܐ ܢܪܚܡ ܥܠܝܗܘܢ

8 ܘܠܥܡܐ ܗܢܐ ܐܡܪ ܗܟܢܐ ܐܡܪ ܡܪܝܐ ܗܐ ܝܗܒ ܐܢܐ ܩܕܡܝܟܘܢ ܐܘܪܚܐ ܕܚ̈ܝܐ ܘܐܘܪܚܐ ܕܡܘܬܐ

9 ܡ̇ܢ ܕܝܬܒ ܒܩܪܝܬܐ ܗܕܐ ܢܡܘܬ ܒܚܪܒܐ ܘܒܟܦܢܐ ܘܒܡܘܬܢܐ ܘܡܢ ܕܢܦܩ ܠܘܬ ܟ̈ܠܕܝܐ ܕܟܪ̈ܝܟܝܢ ܠܟܘܢ ܚܝܐ ܘܡܫܘܙܒ ܢܦܫܗ

10 ܡܛܠ ܕܣܡܬ ܐ̈ܦܝ ܒܩܪܝܬܐ ܗܕܐ ܠܒܝܫܬܐ ܘܠܐ ܠܛܒܬܐ ܐܡܪ ܡܪܝܐ ܘܒܐܝܕܗ ܕܡܠܟܐ ܕܒܒܠ ܬܫܬܠܡ ܘܢܘܩܕܝܗ ܒܢܘܪܐ

11 ܘܠܒܝܬ ܡܠܟܐ ܕܝܗܘܕܐ ܫܡܥܘ ܦܬܓܡܗ ܕܡܪܝܐ

12 ܕܒܝܬ ܕܘܝܕ ܗܟܢܐ ܐܡܪ ܡܪܝܐ ܕܘܢܘ ܒܨܦܪܐ ܕܝܢܐ ܘܦܨܘ ܠܛܠܝܡܐ ܡܢ ܡ̇ܢ ܕܛܠܡ ܠܗ ܕܠܡܐ ܬܦܘܩ ܐܝܟ ܢܘܪܐ ܚܡܬܝ ܘܬܘܩܕ ܘܠܝܬ ܕܡܕܥܟ ܡܛܠ ܒܝܫܘܬܐ ܕܥܒ̈ܕܝܟܘܢ

13 ܗܐ ܐܢܐ ܥܠܝܟܝ ܝܬܒܬ ܒܥܘܡܩܐ ܥܡܝܩܬ ܦܩܥܬܐ ܐܡܪ ܡܪܝܐ ܕܐܡܪܝܢ ܡ̇ܢ ܢܐܬܐ ܥܠܝܢ ܘܡܢܘ ܢܥܘܠ ܠܡܥܡܪܢ

14 ܐܦܩܘܕ ܥܠܝܟܘܢ ܐܝܟ ܦܐܪ̈ܝ ܥܒ̈ܕܝܟܘܢ ܐܡܪ ܡܪܝܐ ܘܐܫܒܘܩ ܢܘܪܐ ܒܩܘܪ̈ܝܗ ܘܬܐܟܘܠ ܟܠܗܘܢ ܚܕܪ̈ܝܗ